សំលេង
អត្ថបទលោកស្រី អៀង ធីរិទ្ធ ដែលមានបញ្ហាសុខភាពមិនបានចូលរួមសវនាការនៅព្រឹកថ្ងៃព្រហស្បតិ៍នេះទេ ប៉ុន្តែមេធាវីរបស់លោក ស្រី គឺលោក ផាត់ ពៅស៊ាងបានចូលរួមជាតំណាង។ លោក ផាត់ ពៅស៊ាង សហមេធាវី ជាតិការពារលោកស្រី អៀង ធីរិទ្ធ បានទាមទារអោយតុលាការលើកលែងការចោទប្រកាន់ចំពោះកូនក្តីរបស់ខ្លួនដោយសារថា កូនក្តីរបស់ខ្លួនត្រូវបានក្រុមអ្នកជំនាញខាងវិកលវិជ្ជាបង្ហាញថា កូនក្តីរបស់ខ្លួន មានបញ្ហាសម្បទា បញ្ញាស្មារតីពិតប្រាកដ។ លោក នេត្រ ភត្រា អ្នកនាំពាក្យសាលាក្តីខ្មែរក្រហមបានថ្លែងថា សវនាការបានចាប់ផ្តើមឡើង ដោយមានការចោទសួរជាច្រើនជុំវិញបញ្ហាសម្បទាបញ្ញាសា្មរតីរបស់លោកស្រី អៀង ធិរិទ្ធ ដែលបញ្ហានេះនឹងប៉ះពាល់ដល់ការចូលរួមរបស់លោកស្រីអៀង ធិរិទ្ធ នៅក្នុងសវនាការនាពេលខាងមុខនេះ។
កាលពីថ្ងៃទី១៩តុលា ឆ្នាំ២០១១ ក្រុមអ្នកជំនាញផ្នែកវិកលវិជ្ជា ៤ រូប រួមមានវេជ្ជបណ្ឌិតកម្ពុជា២ រូប និងអន្តរជាតិ២ រូប បានវាយតម្លៃជាឯកច្ឆន្ទក្នុងរបាយការណ៍រួមថា លោកស្រី អៀង ធីរិទ្ធ អាយុ ៧៩ ឆ្នាំ អតីតរដ្ឋមន្ត្រីក្រសួងសង្គមកិច្ច សម័យខ្មែរក្រហម មានការចងចាំ និងបញ្ញាស្មារតីធ្លាក់ចុះ។ អាការៈជំងឺរបស់លោកស្រី អៀង ធីរិទ្ធ ក៏អាចប៉ះពាល់ដល់សវនាការកាត់ទោសលើសំណុំរឿង០០២ ដែលមានជនជាប់ចោទចាស់ជរា៤រូប។ ប៉ុន្តែយ៉ាងណាក៍ដោយ បើតាមការបញ្ជាក់របស់លោក នេត្រ ភត្រា អ្នកនាំពាក្យសាលាក្តីខ្មែរក្រហម តុលាការនៅមិនទាន់សំរេចយ៉ាងណានៅឡើយទេ ដោយគេត្រូវរងចាំការ ពិចារណាដ៍ត្រឹមត្រូវមួយ។ យ៉ាងណាក៍ដោយលោកនេត្រភត្រាបានបញ្ជាក់ថា ដំណើរការជាទូទៅនៃអង្គសវនាការរយៈពេល ពីថ្ងៃមកនេះបានប្រព្រឹត្តទៅដោយរលូន ដោយមានការចូលរួមទស្សនាពីប្រជាពលរដ្ឋជាង២ពាន់នាក់។
សូមបញ្ជាក់ថា លោកស្រី អៀង ធីរិទ្ធ ជាអតីត រដ្ឋមន្ត្រីក្រសួងសង្គមកិច្ចដែលមានអាយុ ៧៩ ឆ្នាំ ហើយជាជនជាប់ចោទមួយរូបក្នុងសំណុំរឿង០០២ ត្រូវបានអង្គជំនុំជម្រះ វិសាមញ្ញក្នុងតុលាការកម្ពុជាបើកសវនាការទៅលើកាយសម្បទាដើម្បីរកឲ្យឃើញថា តើលោកស្រីមានបញ្ហាខាងផ្នែកកាយសម្បទារដែលអាចចូលរួមក្នុងសវនាការលើអង្គសេចក្តីដែលគ្រោងនឹងធ្វើឡើងនៅថ្ងៃទី២១ ខែវិច្ឆិកា ឆ្នាំ២០១១ខាងមុខនេះបានដែរឬក៏អត់៕
