សំលេងៈ
អត្ថបទៈសេចក្តីព្រាងច្បាប់ស្តីពីសមាគម និងអង្គការក្រៅរដ្ឋាភិបាលដ៏ចម្រូងចម្រាស់រវាងមន្ត្រីរដ្ឋាភិបាល និងអង្គការសង្គមសីវិលនោះត្រូវបានរដ្ឋាភិបាល លើកយកមកកែសម្រួលនិងពិភាក្សាជាលើកទី២ កាលពីព្រឹកថ្ងៃព្រហស្បតិ៍ ទី២៧ ខែតុលា ឆ្នាំ២០១១នេះ។ នេះបើតាមការឲ្យដឹងរបស់មន្ត្រីជាន់ខ្ពស់ក្រសួងមហាផ្ទៃ។ លោក ម៉ី ណារ៉ាត់អនុប្រធាននាយកដ្ឋានកិច្ចការនយោបាយ និងអង្គការសង្គមស៊ីវិល នៃក្រសួងមហាផ្ទៃ បានថ្លែងឲ្យដឹងនៅព្រឹកថ្ងៃព្រហស្បតិ៍នេះថា ការកែសម្រួលលើមាត្រាខ្លះនៃសេចក្តីព្រាងច្បាប់នេះ គឺដើម្បីឆ្លើយតបទៅនឹងការព្រួយបារម្ភ និងការចង់បានរបស់អង្គការមិនមែនរដ្ឋាភិបាល។ លោក ម៉ី ណារ៉ាត់ បានពន្យល់ពីចំនុចមួយចំនួនដែលបានកំពុងកែសម្រួល។
ការថ្លែងបែបនេះបានធ្វើឡើងក្នុងពិធីបិទសិក្ខាសាលាពិគ្រោះយោបល់ជាមួយអ្នកពាក់ព័ន្ធពហុភាគីស្តីពីការត្រៀមលក្ខណៈសម្រាប់វេទិកាជាន់ខ្ពស់លើកទី៤ នៅប្រទេសកូរ៉េខាងត្បូងកាលពីព្រឹកថ្ងៃព្រហស្បតិ៍នេះនៅសណ្ឋាគារសាន់វ៉េ។ លោក ម៉ី ណារ៉ាត់ បានបញ្ជាក់ឲ្យដឹងបន្ថែមថា នៅពេលសេចក្តីព្រាងច្បាប់នេះត្រូវបានកែសម្រួលរួចរាជរដ្ឋាភិបាលនឹងអញ្ជីញអង្គការសង្គមស៊ីវិលមកពិភាក្សាម្តងទៀត ដើម្បីរកចំនុចចន្លោះប្រហោងផ្សេងទៀតដែលនៅសេសសល់។
សូមបញ្ជាក់ថា សេចក្តីព្រាងច្បាប់ស្តីពីអង្គការនិងសមាគមក្រៅរដ្ឋាភិបាលបានធ្វើឲ្យសង្គមស៊ីវិល និងអង្គការអន្តរជាតិជាច្រើនបញ្ចេញប្រតិកម្មដោយចាត់ទុកថា ជាសេចក្តីព្រាងច្បាប់ដែលមានចេតនាកម្រិតសេរីភាពរបស់អង្គការសង្គមស៊ីវិលកម្ពុជា។ ប្រឈមនឹងការប្រឆាំងតវ៉ានេះក្រសួងមហាផ្ទៃដែលជាអ្នកតាក់តែងសេចក្តីព្រាងច្បាប់នេះបានពិនិត្យ និងកែសម្រួលជាបន្តបន្ទាប់៕
