សំលេងៈ
អត្ថបទៈជាថ្មីម្តងទៀត សម្តេចនាយករដ្ឋមន្ត្រីបានត្រឡប់មកប្រតិកម្មចំពោះក្រុមអ្នកមាននិន្នាការប្រឆាំងរដ្ឋាភិបាល ហើយដែលបានអត្ថាធិប្បាយប្រៀបធៀបសម្តេច ទៅនឹងលោកមូអាម៉ាកាដាហ្វ៊ី។ ខុសពីលើកមុន លើកមុនដែលសម្តេចហ៊ុន សែនថ្លែងថា នឹងមិនខ្លាចការប្រើអំពើហឹង្សាផ្តួលរដ្ឋាភិបាលរបស់សម្តេចនោះ ម្តងនេះសម្តេចនាយករដ្ឋមន្ត្រីបានព្រមានប្រើប្រាស់យន្តកាច្បាប់ប្រឆាំងអ្នកណាដែលនិយាយប្រៀបធៀបសម្តេចទៅនឹងអតីតមេដឹកនាំប្រទេសលីប៊ី ដែលពិភពលោកបានចាត់ទុកថា ជាមេដឹកនាំផ្តាច់ការម្នាក់នោះ។ លោកមូអាម៉ាកាដាហ្វ៊ីត្រូវបានក្រុមបះបោរ ដោយមានការជួយជ្រោមពីកំលាំងយោធាណាតូ សម្លាប់យ៉ាងវេទនាកាលពីថ្ងៃទី២០តុលាកន្លងទៅ។
ក្រោយការសម្លាប់លោកម៉ូអាមា កាដាហ្វ៊ីភ្លាម មានការអត្ថាធិប្បាយមួយចំនួនបាននិយាយប្រៀបធៀបសម្តេចហ៊ុន សែនទៅនឹងវាសនារបស់លោកកាដាហ្វ៊ីរួចទៅហើយ។ នៅពេលនោះសម្តេចហ៊ុនសែនបានបកស្រាយថា បរាជ័យរបស់លោកកាដាហ្វ៊ីកើតឡើងដោយសារការធ្វើសង្គ្រាម។ ប្រសិនបើជាការធ្វើសង្គ្រាម សម្តេចថ្លែងថា សម្តេចនឹងផ្តល់អាវុធអោយអ្នកប្រឆាំងមួយឃ្លាំងថែមទៀតដើម្បីប្រឆាំងសម្តេច។ ប៉ុន្តែសម្រាប់សម្តេចការថ្លែងយ៉ាងដូច្នេះ គឺបានន័យថាក្រុមអ្នកប្រឆាំងនោះមិនចេះប្រើប្រាស់កំភ្លើងនៅឡើយទេ ហើយថាសម្តេចក៏មិនចង់អោយមានការផ្ទុះសង្គ្រាមផ្ទៃក្នុងទៀតដែរ។
