គម្រោងការដើរដង្ហែក្បួនឃោសនាបោះឆ្នោតជ្រើសតាំងសមាជិកព្រឹទ្ធសភា របស់គណបក្សសមរង្ស៊ីដែលមានអ្នកចូលរួមប្រមាណជាមួយពាន់នាក់នោះ ត្រូវបានលុបចោលទៅវិញដោយសារតែផ្លួវដែលអនុញ្ញាតឲ្យគណបក្សនេះដង្ហែក្បូននោះសុទ្ធតែជាផ្លូវដែលមិនសូវសំខាន់។
នេះបើតាមការបញ្ជាក់ឲ្យដឹងពីលោក ហូរ វ៉ាន់ អ្នកតំណាងរាស្ត្រមណ្ឌលភ្នំពេញ និងជាប្រធានក្រុមប្រឹក្សារាជធានីភ្នំពេញនៃគណបក្សសម រង្ស៊ី។ លោក ហូរ វ៉ាន់ បានបន្តទៀតថា គណបក្សប្រឆាំងនេះបានសម្រេចចិត្តផ្លាស់ប្តូរកម្មវិធីដោយរៀបចំការជួបជុំគ្នាមួយជាមួយសមាជិកក្រុមប្រឹក្សាសង្កាត់របស់ខ្លួនជំនួសវិញ។ លោកថា ការជូបប្រជុំជាមួយសមាជិកក្រុមប្រឹក្សាសង្កាត់ដោយផ្ទាល់អាចទទួលបានលទ្ធផលប្រសើរជាងពីព្រោះនេះគឺជាការបោះឆ្នោតអសកល។
ការឃោសនាបោះឆ្នោតជ្រើសតាំងសមាជិកព្រឹទ្ធសភានីតីកាលទី៣នឹងត្រូវបញ្ចប់នៅថ្ងៃទី២៧មករាស្អែកនេះ។ ការបោះឆ្នោតនេះនឹងធ្វើឡើងនៅថ្ងៃអាទិត្យ ទី២៩ មករានេះ។ មានតែគណបក្សនយោបាយចំនួនពីរប៉ុណ្ណោះដែលបានចូលរួមក្នុងការប្រកួតប្រជែងនេះ គឺមានគណបក្សប្រឆាំងសម រង្ស៊ី និងគណបក្សប្រជាជនកម្ពុជា។
