បញ្ហានយោបាយដ៏ចម្រូងចម្រាសរបស់ថៃនៅតែបន្តកើតឡើង ហើយបញ្ហាកើតឡើងនេះក៏មិនមែនជារឿងថ្មីដែរសម្រាប់រដ្ឋាភិបាលលោកស្រី យីកឡាក់ ស៊ីណាវ៉ាត្រា។ កាលពីថ្ងៃសៅរ៏ ទី២៨មករា គណបក្សប្រជាធិបតេយ្យដែលជាបក្សប្រឆាំងថៃនោះបានចេញមុខមកអំពាវនាវភ្លាមៗ ដើម្បីឲ្យលោកស្រី យីកឡាក់បញ្ជាក់អះអាងពីតួនាទីរបស់លោកថាក់ស៊ីនឲ្យបានច្បាស់លាស់។
សមាជិកសភាគណបក្សប្រជាធិបតេយ្យម្នាក់បានឲ្យដឹងថា នាយករដ្ឋមន្ត្រីយីកឡាក់មិនចាំស្ទះស្ទើរនោះទេក្នុងការតែងតាំងលោកថាក់ស៊ីន ជាឯកអគ្គរដ្ឋទូតពិសេសឬតំណាងពាណិជ្ជកម្មនោះ។ ចំណាត់ការរបស់បក្សប្រឆាំងនាពេលនេះធ្វើឡើងបន្ទាប់ពីលោកថាក់ស៊ីន បាននិយាយក្នុងកិច្ចសម្ភាសន៍មួយនៅក្នុងប្រទេសលីបង់ ដើម្បីបើកផ្លូវអោយក្រុមហ៊ុន PTT Exploration and Production Plc អាចដាក់ពាក្យសុំសម្បទានធ្វើអាជីវកម្មប្រេងនៅក្នុងប្រទេសនៅមជ្ឈិមបូព៌ាមួយនេះ។
តាមរយៈកាសែត Bangkok Post កាលពីថ្ងៃសុក្របានឡើងលើកដែរថា លោកថាក់ស៊ីន បានស្ថិតនៅប្រទេសលីបង់ ហើយលោកក៏រំពឹងថា បានជួបនាយករដ្ឋមន្ត្រីលីបង់ផងដែរ ដើម្បីពិភាក្សាអំពីអាជីវកម្មប្រេងហើយថៃក៏នឹងអាចទទួលផលពីការចូលធ្វើអាជីវកម្មនេះដែរ។ យ៉ាងណាក៏ដោយលោកថេបថៃសមាជិកសភាគណបក្សប្រជាធិបតេយ្យនៅតែអះអាងថា លោកថាក់ស៊ីនបានលូកដៃចូលក្នុងការងាររបស់ប្រទេសថៃជាច្រើនក្នុងនោះមានទាំងការពិភាក្សាជាមួយមេដឹកនាំភូមា អំពីកិច្ចព្រមព្រៀងថាមពល មុនដំណើរទស្សនកិច្ចរបស់លោកស្រីយីងឡាក់នៅភូមាកាលពីខែតុលា។ បន្ថែមពីនោះលោកថាក់ស៊ីនក៏ពាក់ព័ន្ធបញ្ហានានាជុំវិញដែនសមុទ្រត្រួតស៊ីគ្នារវាងថៃនិងកម្ពុជាផងដែរ៕
