សហជីពតំណាងកម្មករបានជួបចរចាជាមួយតំណាងក្រុមហ៊ុនរោងចក្រកាត់ដេរសៀនអេស្រ៊ីនៅខេត្តកំពង់ស្ពឺ ដើម្បីដោះស្រាយបញ្ហាកម្មករកូដកម្មកាលពីព្រឹកថ្ងៃទី៣១ ខែមករា ឆ្នាំ២០១២ ។ នេះបើតាមការបញ្ជាក់របស់លោក ថន ថុល មន្ត្រីសហជីពសេរីកម្មករដែលបានដឹកនាំកម្មករចូលចរចាជាមួយថៅកែក្រុមហ៊ុន ។
មន្ត្រីសហជីពសេរីកម្មករនៃព្រះរាជាណាចក្រកម្ពុជាលោកថុន ថុលមានប្រសាសន៍ថា កម្មករជាង៥០០នាក់នៅរោងចក្រសៀនអេស្រ៊ីបានចូលធ្វើការជាធម្មតាវិញហើយ បន្ទាប់ពីមានការចរចាររវាងភាគីរោងចក្រជាមួយក្រុមកម្មកររួចមកនោះ។ សហជីពសេរីកម្មករ បានប្រាប់អោយដឹងថា ការទាមទាររបស់កម្មករកាត់ដេរ សៀន អេស្រ៊ីគឺសុំឲ្យក្រុមហ៊ុនទទួលយកប្រធានផ្នែកដែលក្រុមហ៊ុនបញ្ឈប់ពីការងារបានចូលធ្វើការជាធម្មតាឡើងវិញ ព្រមទាំងសុំឲ្យមានពេទ្យក្នុងរោងចក្រនិងកែលម្អលក្ខខណ្ឌការងារជាច្រើនទៀត។
គួរបញ្ជាក់ថា កម្មករនៅរោងចក្រកាត់ដេរ សៀនអេស្រ៊ី ស្ថិតនៅភូមិត្បាញ ឃុំវល្លិស ស្រុកសំរោងទង ខេត្តកំពង់ស្ពឺដែលមានកម្មករជិត៥០០នាក់ បំរើការបានធ្វើកូដកម្មនៅខាងមុខរោងចក្រដើម្បីទាមទារលក្ខខណ្ឌការងារចំនួន ១៨ចំណុចពីថៅកែរោងចក្រអស់រយៈពេល៣ថ្ងៃ លុះរហូតមកដល់ថ្ងៃរសៀលទី៣១ ខែមករាទើបក្រុមហ៊ុនយល់ព្រមតាមសំណើរបស់ក្រុមកម្មករហើយពួកគេបានចូលធ្វើការជាធម្មតាវិញអស់ហើយ៕
