សាលារាជធានីភ្នំពេញបានចេញសេចក្ដីណែនាំស្ដីពីការរៀបចំពិធីបុណ្យមាឃបូជា ដោយយោងតាមផែនការណែនាំលេខ០០១ របស់គណៈកម្មាធិការជាតិរៀបចំបុណ្យជាតិ-អន្តរជាតិចុះថ្ងៃទី១៦ ខែមករា។ សាលារាជធានីបានណែនាំថាដើម្បីចូលរួមរៀបចំពិធីបុណ្យមាឃបូជា នៅថ្ងៃអង្គារ ទី៧ កុម្ភៈ និងថ្ងៃពុធទី៨ ខែកុម្ភៈនេះ គ្រប់សាលាខណ្ឌមន្ទីរធម្មការនិងសាសនារាជធានីភ្នំពេញត្រូវរៀបចំឲ្យមានពិធីបុណ្យមាឃបូជាជាផ្លូវការនៅទីវត្តអារាមណាមួយក្នុងមូលដ្ឋានដែលនឹងអាចដំណើរការបាន។
ទី២ គ្រប់សាលាខណ្ឌត្រូវបំផុសឲ្យតុបតែងលម្អចងបដាពាក្យស្លោក ទង់ជាតិទង់សាសនានៅតាមអគារសាធារណៈ រោងចក្រ សហគ្រាស គ្រប់គេហដ្ឋាន វត្តអារាមដើម្បីអបអរសាទរ ពិធីបុណ្យប្រពៃណីសាសនានេះ។ ទី៣ មន្ទីរព័ត៌មានរាជធានីភ្នំពេញ ត្រូវចាត់ឲ្យមានការផ្សព្វផ្សាយធម្មទេសនាអំពីប្រវត្តិនៃពិធីបុណ្យមាឃបូជានេះឲ្យបានទូលំទូលា។ សេចក្តីប្រកាសចុងក្រោយគឹ គ្រប់អាជ្ញាធររាជធានីភ្នំពេញត្រូវសហការគ្នាដើម្បី ការពាររក្សាសន្តិសុខរបៀបរៀបរយសណ្ដាប់ធ្នាប់សង្គម និងធានាសុវត្ថិភាពក្នុងពិធីបុណ្យនេះផងដែរ។
សាលារាជធានីភ្នំពេញអះអាងថា ខ្លួនសង្ឃឹមយ៉ាងមោះមុតថា រាល់អង្គភាពដែលពាក់ព័ទ្ធទាំងអស់មានដូចជាស្នងការដ្ឋាននគរបាលរាជធានីភ្នំពេញបញ្ជាការដ្ឋានកងរាជអាវុធហត្ថរាជធានីភ្នំពេញមន្ទីរធម្មការនិងសាសនារាជធានីភ្នំពេញ មន្ទីរព័ត៌មានរាជធានីភ្នំពេញនិងសាលាខណ្ឌទាំង៩នឹងចាត់តាំងអនុវត្តនេះឲ្យទទួលបានលទ្ធផលល្អប្រសើរទៅតាមសេចក្តីណែនាំនេះឲ្យបានគ្រប់ៗគ្នា។
គួរកត់សម្គាល់ថា សេចក្តីណែនាំនេះបានធ្វើឡើងស្របពេលដែលវប្បធម៌បរទេសកំពុងតែវាយប្រហារមកលើប្រទេសកម្ពុជាយ៉ាងសម្បើម ដូចជាពិធីបុណ្យណូអែលដែលជាបុណ្យសាសនាគ្រឹះត្រូវបានគេនាំគ្នាប្រារព្ធធ្វើនៅទូទាំងប្រទេស ចំណែកឯពិធីបុណ្យព្រះពុទ្ធសាសនាដែលជាសាសនារបស់រដ្ឋវិញមិនសូវមានការចាប់អារម្មណ៍ឡើយ៕
