អាជ្ញាធររាជធានីភ្នំពេញនៅតែមិនទាន់មានវិធានការយ៉ាងតឹងរឹងដដែលជាមួយម្ចាស់អាជីវកម្មដែលបានដាក់តាំងបង្ហាញ រូបភាពគោដុតទាំងមូលៗ នៅតាមភោជនីយដ្ឋាន និងតាមដងផ្លួវសាធារណៈ។ អាជីវករនិងម្ចាស់ហាងភោជនីយដ្ឋាននៅតែបន្តដាក់តាំងបង្ហាញ រូបភាពគោដុតទាំងមូលពាសវាសពាសកាលដដែលដោយគ្មានការបិទបាំងដូចសេចក្តីណែនាំរបស់អាជ្ញាធរនោះឡើយ។
សេចក្តីប្រកាសរបស់ទីស្តីការគណៈរដ្ឋមន្ត្រីចុះថ្ងៃទី១០មករាឆ្នាំ២០១២ បានសម្រេចហាមឃាត់មិនឲ្យធ្វើអាជីវកម្មគោដុតដោយបង្ហាញនៅតាមទីសាធារណៈនោះឡើយ។ ការដាក់តាំងគោដុតទាំងមូលៗដែលឆ្លុះបញ្ចាំងពីរូបភាពដ៏ឃោរឃៅប្រាសចាកពីគោលការណ៏របស់ព្រះពុទ្ធសាសនា។ សេចក្តីសម្រេចនេះ បានធ្វើឡើងបន្ទាប់ពីមានការស្នើរសុំពីមន្ត្រីសង្ឃនៅក្នុងមហាសន្និបាតមន្ត្រីសង្ឃទូទាំងប្រទេសលើកទី២០ដែលធ្វើឡើងកាលពីថ្ងៃទី២១ធ្នូ២០១១ ហើយការស្នើរសុំនេះក៏ទទួលបានការយល់ព្រមពីប្រមុខរដ្ឋាភិបាលកម្ពុជាសម្តេចនាយករដ្ឋមន្ត្រីហ៊ុន សែនផងដែរ។
យ៉ា់ងណាក៏ដោយ មានម្ចាស់អាជីវកម្មលក់គោដុតជាច្រើននាក់នៅក្នុងរាជធានីភ្នំពេញបានបង្ហើបឲ្យដឹងថា មានអតីថិជនជាច្រើនមិនចូលហាងរបស់ពួកគាត់នៅពេលដែលមិនឃើញមានការដាក់តាំងបង្ហាញ រូបភាពគោដុតទាំងមូលនៅពីមុខភោជនីយដ្ឋាន។ ម្ចាស់ហាងទាំងនោះបានបន្តទៀតថា អាជីវកម្មរបស់ពូកគេអាចនឹងបិទប្រសិនជាគ្មានភ្ញៀវចូលទេនោះ។
គួរកត់សំគាល់ថា ក្នុងរយៈពេលចុងក្រោយមកនេះអាជីវកម្មលក់គោដុតទាំងមូលបានកំពុងរីកដុះដាលនិងពេញនិយមជាខ្លាំងនៅតាមភោជនីយដ្ឋានជាច្រើនក្នុងរាជធានីភ្នំពេញ និងនៅតាមបណ្តាខេត្តជាច្រើនទៀត៕
