សហរដ្ឋអាមេរិកកំពុងតែផលិតគ្រាប់បែកទម្លាក់ដែលមានទម្ងន់១៣,៦តោនឲ្យកាន់តែមានប្រសិទ្ធភាពខ្ពស់ ដើម្បីវាយប្រហារទីតាំងយោធារបស់កូរ៉េខាងជើងនិងរោងចក្រនុយក្លេអ៊ែរដ៏រឹងមាំរបស់អ៊ីរ៉ង់។ នេះបើតាមការបញ្ជាក់ឲ្យដឹងពីក្រុមមន្ត្រីរបស់អាមេរិក។គ្រាប់បែកដ៏ខ្លាំងក្លានេះ ក្រសួងការពារប្រទេសអាមេរិកបានចំណាយប្រាក់ចំនួន៣៣០លានដុល្លារហើយរហូតមកដល់ពេលនេះ ដើម្បីផលិតគ្រាប់បែកដ៏ខ្លាំងបែបនេះឲ្យបានចំនួន២០គ្រាប់។
ការផលិតគ្រាប់បែកនេះ បានកើតឡើងបន្ទាប់ពីក្រុមអ្នកឯកទេសខាងសង្គ្រាមរបស់មន្ទីរបញ្ចកោណបានវាយតំលៃថាគ្រាប់បែកដ៏ធំមុនៗរបស់ពួកគេមិនទាន់មានសមត្ថភាពនៅឡើយទេក្នុងការកំទេចរោចក្រផលិតអាវុធនុយក្លេអ៊ែររបស់អ៊ីរ៉ង់ដែលស្ថិតនៅក្រោមដីដ៏ជ្រៅនោះទេ។
កាសែតWall Street Journal បានដកស្រង់សម្តីរបស់រដ្ឋមន្ត្រីការពារប្រទេសអាមេរិកថាប្រទេសអាមេរិកបានទទួលស្គាល់ថាគ្រាប់បែកមុនៗគឺមិនមានប្រសិទ្ធភាពខ្លាំងក្នុងការកំទេចលេណដ្ឋានយោធាដែលអ៊ីរ៉ង់បានរៀបចំការពារដ៏រឹងមាំនោះទេហើយលោកបាននិយាយថាកិច្ចការផលិតគ្រាប់បែកដ៏ខ្លាំងជាងមុនទាំងនេះកំពុងដំណើរការទៅហើយសង្ឃឹមថាអ្វីៗគ្រាប់យ៉ាងនឹងសម្រេចបានក្នុងពេលឆាប់ៗនេះ៕
