រដ្ឋមន្ត្រីក្រសួងកសិកម្មលោកចាន់ សារុន បានជំរុញដល់ប្រជាកសិករទូទាំងប្រទេសអោយបង្កើនការដាំបន្លែប្រកបដោយគុណភាព និងសុវត្ថិភាពឱ្យបានកាន់តែច្រើន ដើម្បីកាត់បន្ថយភាពក្រីក្រនិងការនាំចូលបន្លែពីបរទេសថែមទៀត។
ថ្លែងនៅក្នុងពិធីបើកវេទិកាស្តីពីដំណាំបន្លែនៅកម្ពុជានៅឯសណ្ឋាគារកាំបូឌីយ៉ាណា នាព្រឹកថ្ងៃអង្គារទី២៨ខែកុម្ភៈនេះលោកចាន់ សារុនបានមានប្រសាស៍ថា ដើម្បីបំពេញតម្រូវការបន្លែកម្ពុជាបាននាំចូលបន្លែពីប្រទេសវៀតណាម និងប្រទេសថៃប្រមាណជា២០០ទៅ៣០០តោនក្នុងមួយថ្ងៃពិសេសនាំចូលមកពីប្រទេសវៀតណាម។
លោកបន្តថា គ្រាន់តែនៅក្នុងរាជធានី ភ្នំពេញមួយ ត្រូវការបន្លែប្រមាណជា១ពាន់តោនក្នុងមួយថ្ងៃ។ ដូច្នេះកម្ពុជាបាននាំចូលបន្លែជា ច្រើនមកពីក្រៅប្រទេស ហើយកសិករខ្មែរគួរតែគិតគូរពីបញ្ហានេះ។
ជាមួយគ្នានេះដែរឯកអគ្គរដ្ឋទូតអូស្ត្រាលីប្រចាំនៅកម្ពុជាលោកស្រី ផែននី រីឆាដ៏ បានមានប្រសាសន៍នៅក្នុងឱកាសនោះផងដែរថា ផលិតកម្មបន្លែដើរតួយ៉ាងសំខាន់ដោយមិនត្រឹមតែធ្វើឱ្យប្រសើរឡើងនូវជីវភាពនៃកសិករតូចតាចប៉ុណ្ណោះទេ ក៏ប៉ុន្តែក៏បានផ្តល់ផងដែរនូវប្រភពអាហារូបត្ថម្ភគ្រប់គ្រាន់ហើយរដ្ឋាភិបាលអូស្ត្រាលីមានមោទនភាពដោយបានគាំទ្ររដ្ឋាភិបាលកម្ពុជាអង្គការមិនមែនរដ្ឋាភិបាល និងវិស័យឯកជន ដើម្បីពង្រឹងឧស្សាហកម្មបន្លែនៅកម្ពុជានេះ។
