ក្រុមហ៊ុនកាត់ដេរថៃ HITECH បានចុះកិច្ចសន្យាជាមួក្រុមហ៊ុន ឆាយ ឆាយ អ៊ិនវេសមិន កាលពីរសៀល ថ្ងៃទី២៩ ខែកម្ភៈ ឆ្នាំ២០១២ ដើម្បីសាងសង់រោងចក្រកាត់ដេរសម្លៀកបំពាក់ធំមួយក្នុងតំបន់សេដ្ឋកិច្ចពិសេសអូររាងក្រុងប៉ោយប៉ែត។
មន្ដ្រីធុរកិច្ចថៃ៣៨នាក់ ដឹកនាំដោយលោកដូងចៃ ច័ន្ទថនសមាជិកសភាពាណិជ្ជកម្មទទួលបន្ទុកកម្ពុជា និងតំណាងក្រុមហ៊ុនកាត់ដេរថៃ HITECH បានទៅដល់ការិយាល័យ និងទីតាំងនៃតំបន់សេដ្ឋកិច្ចពិសេសប៉ោយប៉ែត អូររាង ស្ថិតនៅភូមិអូររាង សង្កាត់ប៉ោយប៉ែត ក្រុងប៉ោយប៉ែតក្បែរព្រំដែនកម្ពុជា-ថៃ ហើយបានចុះកិច្ចសន្យាជាមួយក្រុមហ៊ុន ឆាយ ឆាយ អ៊ីនវេសម៉ិន។
លោកង៉ោ ម៉េងជ្រួន អភិបាលក្រុងប៉ោយប៉ែតបានឲ្យដឹងថា រោងចក្រដែលនឹងសាងសង់ក្នុងពេលឆាប់ៗនេះត្រូវការកម្មការិនីកាត់ដេរប្រមាណ ៣.០០០នាក់ និងរោងចក្រកាត់ដេរ៤ទៀត កំពុងសាងសង់នៅក្នុងតំបន់សេដ្ឋកិច្ចពិសេសនោះដែរ។ សព្វថ្ងៃមានក្រុមហ៊ុនថៃមួយកំពុងដំណើរការនៅតំបន់សេដ្ឋកិច្ចពិសេសជាប់ព្រំដែនថៃនោះផលិតសំបកវិចខ្ចប់គ្រឿងអលង្ការ៕
