នៅថ្ងៃពុធនេះអគ្គលេខាធិការនៃសមាគមប្រជាជាតិអាស៊ីអាគ្នេយ៍ ហៅកាត់ថាអាស៊ានបានចេញសេចក្តីថ្លែងការណ៍មួយដោយបានសំដែងការសាទរចំពោះសេចក្តីសម្រេចចិត្តរបស់សហភាពអឺរ៉ុប ដកទណ្ឌកម្មចេញពីប្រទេសភូមារឺម៉ីយ៉ាន់ម៉ា។
«ប្រទេសសមាជិកអាស៊ានទាំងអស់ស្វាគមន៍ការលើកទណ្ឌកម្មពីប្រទេសមីយ៉ាន់ម៉ា។នេះបើតាមការបញ្ជាក់របស់លោកស៊ូរិន ពិតសុវណ្ណ។ លោកបានថ្លែងថា វាគឺជាសកម្មភាពដ៏ត្រឹមត្រូវដែលត្រូវបានធ្វើនៅក្នុងពេលដ៏ត្រឹមត្រូវដែរ។
នៅក្នុងកិច្ចប្រជុំមួយកាលពីថ្ងៃចន្ទរដ្ឋមន្ត្រីការបរទេសទាំង២៧ប្រទេសនៃសហភាពអឺរ៉ុបបានយល់ព្រមដកទណ្ឌកម្មចេញពីប្រទេសមីយ៉ាន់ម៉ានេះ។ ជាទណ្ឌកម្មដែលត្រូវបានដាក់ប្រឆាំងជាលក្ខណៈបុគ្គលចំនួន៥០០នាក់និងប្រឆាំងនិតិបុគ្គលចំនួន៨០០ក្រុមហ៊ុន។
ក្រៅពីសហភាពអ៊ឺរ៉ុបក៍មានផងដែរប្រទេសជប៉ុន អាមេរិក កាណាដាដែលបានសម្រេចចិត្តដកទណ្ឌកម្មជាបន្តបន្ទាប់ចេញពីប្រទេសភូមា។
គួរបញ្ជាក់ផងដែរថា នេះជាគឺជាជោគជ័យជាបន្តបន្ទាប់របស់ប្រទេសភូមាព្រោះមានបណ្តាប្រទេសមហាអំនាចជាច្រើនលើពិភពលោកបានសម្រេចដកទណ្ឌកម្មចេញពីប្រទេសមួយនេះ បន្ទាប់ពីប្រទេសភូមាបានធ្វើកំណែទម្រង់នយោបាយជាច្រើ់នរួចមក។
គេរំពឹងថា នៅថ្ងៃខាងមុខទៀតប្រទេសភូមានឹងទទួលបានការគាំទ្រលើគ្រប់វិស័យពីបណ្តាប្រទេសលោកខាងលិច និងប្រទេសមហាអំណាចជាច្រើននៅលើពិភពលោក៕
