ក្រុមប្រឹក្សារដ្ឋធម្មនុញ្ញប្រទេសបារាំង កាលពីថ្ងៃព្រហស្បតិ៍ ទី២៦ ខែមេសាម្សិលមិញនេះ បានចេញផ្សាយនូវរបាយការណ៍ជាផ្លូវការនៃការបោះឆ្នោតជ្រើសរើសប្រធានាធិបតីជំហានទីមួយដែលបានប្រព្រឹត្តទៅកាលថ្ងៃអាទិត្យទី២២ខែមេសាកន្លងទៅនេះ។
តាមរយៈរបាយការណ៍បានបង្ហាញថា លោក Hollandeបានទទួលសំឡេងគាំទ្រ២៧,៦ភាគរយ ខណៈដែលលោក Sakozyទទួលបានសំឡែងគាំទ្រ ២៦,៦ភាគរយ។
ដោយឡែកបេក្ខជនមកពីគណបក្ស National Front ស្ថិតក្នុងលំដាប់ថ្នាក់ទីបីដោយទទួលបានសំឡេងគាំទ្រចំនួន១៩,៧ភាគរយ។ តាមរយៈលទ្ធផលនេះ មានបេក្ខជនពីររូបដែលត្រូវបានសម្រេចក្នុងការប្រកួតប្រជែងគ្នាក្នុងការបោះឆ្នោតជំហានទីពីរ ដែលនឹងត្រូវប្រព្រឹត្តទៅនៅថ្ងៃទី៦ ខែឧសភា ឆ្នាំ២០១២ខាងមុខ៕
