ប្រមុខរដ្ឋាភិបាលកម្ពុជានៅថ្ងៃទី១៤ឧសភានេះបានអំពាវនាវទៅបណ្ដាអ្នកវិនិយោគិនខ្មែរទាំងឡាយបោះទុនវិនិយោគនៅក្នុងប្រទេសអោយបានច្រើនដើម្បីឈានទៅរកការប្រកួតប្រជែងនៅខាងក្រៅប្រទេស។ ការវិនិយោគនៅក្នុងស្រុក គឺជាការជំរុញកំណើនសេដ្ឋកិច្ចកម្ពុជាមួយកំរិតទៀត។
ថ្លែងនៅក្នុងពិធីបើកសម្ពោធរោងចក្រស្រាបៀរកម្ពុជារបស់ក្រុមហ៊ុនខ្មែរ ប្រ៊ូវើរី ជាផ្លូវការនៅថ្ងៃទី១៤ឧសភានៅខណ្ឌដង្កោនេះ សម្តេចនាយករដ្ឋមន្ត្រីហ៊ុន សែនកម្ពុជាបានជំរុញ និង អំពាវនាវបន្ថែមទៀតទៅដល់បណ្តាអ្នកវិនិយោគិននានាបន្តការបោះទុនវិនិយោគនៅក្នុងស្រុក។
សម្តេចហ៊ុនសែនបានមានប្រសាសន៍បន្តថា កាលពីអតីតកាលប្រជាពលរដ្ឋខ្មែរភាគច្រើនយកលុយទៅវិនិយោគនៅក្រៅប្រទេស ប៉ុន្តែចាប់តាំងពីឆ្នាំ១៩៧៩មក ប្រជាពលរដ្ឋខ្មែរជាច្រើនបានយកលុយមកវិនិយោគនៅក្នុងប្រទេសវិញ។
តែយ៉ាងណាក៍ដោយសម្តេចហ៊ុនសែនបានថ្លែងថា នាពេលបច្ចុប្បន្ននេះអ្នកវិនិយោគិនបរទេសក៍អាចមកដាក់ទុនវិនិយោគជាមួយទឹកប្រាក់របស់ពួកគេ១០០ភាគរយ ដោយមិនចាំបាច់ចាប់ដៃគូវិនិយោគជាមួយក្រុមហ៊ុនវិនិយោគនៅក្នុងស្រុកនោះទេ។
ជាមួយនឹងការលើកឡើងនេះដែរសម្តេចហ៊ុន សែន ក៍បានជំរុញអោយក្រុមហ៊ុនក្នុងស្រុកខិតខំបង្កើនផលិតភាព និង គុណភាពរបស់ខ្លួន ដើម្បីនាំចេញទៅលក់នៅក្រៅប្រទេសផងដែរ៕
