កម្មករក្រុមហ៊ុនហុងដាដែលមានទីតាំងស្ថិតក្នុងសង្កាត់ចោមចៅ ខណ្ឌពោធិ៍សែនជ័យបានធ្វើការតវ៉ាអស់រយៈពេលជិត១សបា្ដហ៍ទៅហើយ ដើម្បីទាមទារអោយថៅកែរក្រុមហ៊ុនដោះស្រាយលក្ខណ្ឌការងារមួយចំនួនសំរាប់។ ប៉ុន្តែយ៉ាងណាក៍ដោយរហូតមកដល់ថ្ងៃទី២៥ឧសភានេះពួកគេមិនទាន់មានដំណោះស្រាយណាមួយនៅឡើយទេ។
ជាមួយគ្នានេះក្រុមកម្មករដែលមានគ្នាជាង៥០០នាក់ក៍បានគំរាមបិទទ្វារក្រុមហ៊ុននៅថ្ងៃនេះផងដែរ ប្រសិនបើមិនមានដំណោះស្រាយណាមួយពីក្រុមហ៊ុន។ ការតវ៉ារបស់កម្មករបានធ្វើឡើងបន្ទាប់ពីកម្មករមួយចំនួនត្រូវបានបណ្ដេញចេញពីការងារនៅពេលពួកគេព្យាយាមបង្កើតសហជីព និងទាមទារឲ្យមានលក្ខខណ្ឌការងារនិងអត្ថប្រយោជន៍ផ្សេងៗសំរាប់កម្មករ។
ជាមួយគ្នានេះ ក្រុមកម្មករក៍បានទាមទារអោយក្រុមហ៊ុនបញ្ឈប់ប្រធានរដ្ឋបាលក្រុមហ៊ុនលោកអៀត សេងនីផងដែរ។ យ៉ាងណាក៏ដោយទាក់ទងនឹងបញ្ហានេះលោក អៀត សេងនី ប្រធានរដ្ឋបាលក្រុមហ៊ុនហ៊ុនដាបានមានប្រសាសន៍ថា ក្រុមហ៊ុននឹងមិនអាចធ្វើតាមការស្នើរសុំរបស់ក្រុមកម្មករបានទេ ហើយថាលោកមិនបានដឹងពីគំរោងបិទទ្វាររោងចក្ររបស់ក្រុមកម្មករនេះនៅឡើយទេ។
ប៉ុន្តែលោកបានអះអាងថា ក្រុមហ៊ុនកំពុងស្វែងរកដំណោះស្រាយតាមផ្លូវច្បាប់។ សូមបញ្ជាក់ថា មួយរយៈពេលចុងនេះសកម្មភាពនៃការតវ៉ារបស់ក្រុមកម្មករ-កម្មការិនីបានកើតឡើងជាបន្តបន្ទាប់គួរឲ្យគត់សម្គាល់៕
