(អត្ថបទដោយកញ្ញា អេង គឹមហុង)៖ប្រទេសធំៗជាង១០ប្រទេសបានប្រកាសជាបន្តបន្ទាប់ចាប់តាំងពីមានការសំលាប់រង្គាល់នៅប្រទេសស៊ីរីនោះថា ពួកគេបានបណ្តេញក្រុមអ្នកការទូតស៊ីរីចេញពីប្រទេសរបស់ខ្លួនចាប់តាំងពីថ្ងៃអង្គារមកបន្ទាប់ពីមើលឃើញថា រដ្ឋាភិបាលស៊ីរីបានសម្លាប់មនុស្សយ៉ាងរង្គាលកាលពីថ្ងៃសុក្រសបា្ដហ៍មុន។
បណ្ដាលប្រទេសទាំងនោះរួមមានបារាំង សហរដ្ឋអាមេរិក អង់គ្លេស អាល្លឺម៉ង់ អ៊ីតាលី អេស្ប៉ាញ កាដាណា អូស្ត្រាលី ហូឡង់ និងប្រទេសស្វីស។
ការបណ្តេញពួកអ្នកការទូតស៊ីរីទាំងនេះចេញពីប្រទេសរបស់ខ្លួនដោយប្រទេសមហាអំណាចទាំងនោះគឺ ជាចំណាត់ការមួយដ៏ល្អដើម្បីដាក់គំនាបទៅលើប្រធានាធិបតីស៊ីរី លោកបាសា អាល់អាស្សាត បន្ទាប់ពីមនុស្សចំនួន១០៨នាក់បានស្លាប់ និងមនុស្សចំនួន៣០០នាន់បានរងរបួសកាលពីថ្ងៃសុក្រ។ ក្នុងនោះក្មេងចំនួន៣៤នាក់ ត្រូវបានសម្លាប់ផងដែរនៅក្នុងអំពើហិង្សានេះ។
ក្នុងពេលជាមួយគ្នានេះក្រុមប្រឹក្សាអង្គការសហប្រជាជាតិក៏បានចេញសេចកី្តថ្លែងការណ៍ថ្កោលទោសចំពោះអំពើសម្លាប់ដ៏រង្គាលនៅស៊ីរី និងបានស្នើទៅរដ្ឋាភិបាលស៊ីរីអោយដកកងទ័ពចេញពីតំបន់ដែលមានប្រជាជនរស់នៅផងដែរ។
គួររម្លឹកថា លោកកូហ្វី អាណាន់ បេសកជនពិសេសរបស់អង្គការសហប្រជាជាតិកំពុងស្ថិតនៅក្នុងប្រទេស៊ីរី ដើម្បីជជែកគ្នាចុងក្រោយជាមួយមេដឹកនាំស៊ីរីក្នុងគោលដៅព្យាយាមជួយសង្គ្រោះផែនការសន្តិភាពរបស់អង្គការសហប្រជាជាតិ។
ចាប់តាំងពីមានចលនាបះបោរប្រឆាំងរដ្ឋាភិបាលតាំងពីខែមីនាឆ្នាំ២០១១មក មានមនុស្សស្លាប់១៣០០០ហើយនៅក្នុងប្រទេសស៊ីរី។ ទាក់ទងទៅនឹងការសម្លាប់មនុស្សរបស់រដ្ឋាភិបាលស៊ីរីកន្លងមកសហរដ្ឋអាមេរិក និងអ៊ឺរ៉ុប បានព្យាយាមបញ្ចុះបញ្ចូលដល់រដ្ឋាភិបាលចិន និង រុស្សីឲ្យគាំទ្រទៅលើវិធានការដាក់ទណ្ឌកម្មលើស៊ីរី ប៉ុន្តែប្រទេសទាំងពីរបានបដិសេធ៕
