កម្ពុជាបាននំាចូលទំនិញ ច្រើនជាងនាំចេញ ក្នុងរយៈពេល៥ខែដើមឆ្នាំ២០១២នេះ។ តួលេខរបស់ក្រសួងពាណិជ្ជកម្មបានបង្ហាញថា ការនាំចេញ នាំចូលទំនិញ របស់កម្ពុជា ចាប់តាំងពី ខែមករា ដល់ខែឧសភា ក្នុងឆ្នាំ២០១២ មានការកើនឡើង ១៧ភាគរយ បើប្រៀបធៀបនឹងឆ្នាំទៅ នាំចូលទំនិញ ។
ការនាំចូលបានកើនឡើង ១៨ភាគរយ ដែលមានទំហំទឹកប្រាក់ជាង៣ពាន់លានដុល្លារ ខណៈដែលការនាំចេញកើនឡើង ១៥ភាគរយ ចំនួនជាង ២ពាន់លានដុល្លារ ។ តួលេខនេះបានបង្ហាញថា ការនាំចេញមានឱនភាពចំនួន ១.១ពាន់លានដុល្លារ។
របាយការណ៍ របស់ក្រសួងណិជ្ជកម្ម បានបង្ហាញឲ្យដឹងថា ផលិតផលដែលកម្ពុជានាំចេញរួមមាន សំលៀកបំពាក់ សំភារៈកាត់ដេរ ស្បែកជើង កៅស៊ូ អង្ករនិងគ្រាប់ស្វាយចន្ទី។ ដោយឡែកការនាំចូលវិញរួមមាន គ្រឿងសំណង់ គ្រឿងកាត់ដេរ ប្រេងឥន្ធនៈ គ្រឿងអេឡិចត្រូនិចនិង គ្រឿងឧបភោគបរិភោគជាមុខទៀត ។
គួរបញ្ជាក់ថា សេដ្ឋកិច្ចរបស់ប្រទេសកម្ពុជា បានពឹងផ្អែក ទាំងស្រុង លើវិស័យឧស្សាហកម្មកាត់ដែរ ទេសចរណ៍ កសិកម្ម និងសំណង់។ ជាមួយគ្នានេះដែរកម្ពុជាបានមានទំនាក់ទំនង ពាណិជ្ជកម្ម ជាមួយបណ្តាប្រទេសមួយចំនួនដូចជា ថៃ វៀតណាម ម៉ាឡេស៊ី សហរដ្ឋអាមេរិក អឺរ៉ុប ចិន កូរ៉េ និងកាណាដា៕
