គណៈកម្មាធិការសម្របសម្រូលប្រយុទ្ធនឹងមេរោគអេដស៏និងជំងឺអេដស៏ហៅកាត់ថា HACC បានរៀបចំវេទិការពិគ្រោះយោបល់ស្តីពីមេរោគអេដស៏ និងជំងឺអេដស៏នៅរសៀលថ្ងៃទី ២១មិថុនានេះ ក្នុងផ្ទះសំណាក់ម្កុដមាសក្នុងខេត្តបន្ទាយមានជ័យ។
វេទិការនេះមានការចូលរួមពីអភិបាលរងខេត្តបន្ទាយមានជ័យ អ្នកតំណាងមកពីមន្ទីរសុខាភិបាល អ្នកសម្របសម្រូលជាន់ខ្ពស់ដែលតំណាងគណៈកម្មាធិការសម្របសម្រូលប្រយុទ្ធនឹងមេរោគអេដស៏ និងជំងឺអេដស៏ហៅកាត់ថា HACC និងតំណាងអង្គការសង្គមស៊ីវិលថ្នាក់ក្រោមជាតិជាច្រើនទៀតព្រមទាំងមានការចូលរួមផ្ទាល់ពីក្រុមគោលដៅដែលពាក់ព័ទ្ធរួមមានស្ត្រីអ្នកផ្ទុកមេរោគអេដស៏ក្រុមបុរសស្រឡាញ់បុរស និងក្រុមអ្នកប្រើប្រាស់គ្រឿងផងដែរ។
លោកឈឿន ឈុនណា អ្នកសម្របសម្រូលជាន់ខ្ពស់របស់HACCបានឲ្យដឹងក្នុងវេទិការនោះថា គោលបំណងសំខាន់ក្នុងការរៀបចំវេទិការនោះមានបីសំខាន់ៗគឺ ទីមួយដើម្បីពង្រឹងទំនាក់ទំនងរវាងបណ្តាញអង្គការសង្គមស៊ីវិលថ្នាក់ក្រោមជាតិនិង HACC ទី២ដើម្បីប្រមូលព័ត៌មានទាំងឡាយដែលអង្គការសង្គមស៊ីវិលទាំងអស់នោះជួបប្រទះនិងនិងការចាត់វិធានការអទិភាពបញ្ហាដើម្បីធ្វើការតស៊ូមតិ និងចុងក្រោយដើម្បីជំរុញឲ្យអាជ្ញាធរជាតិក៏ដូចជាម្ចាស់ជំនួយបានដឹងពី ផលប៉ះពាល់ដែលអង្គការសង្គមស៊ីវិលបានជួបប្រទះ។
គួរកត់សំគាល់មួយរយៈពេលកន្លងមកនេះ យើងសង្កេតឃើញថាអត្រានៃការឆ្លងមេរោគអេស៏នៅក្នុងប្រទេសកម្ពុជាមានការធ្លាក់ចុះជាលំដាប់ ប៉ុន្តែមិនមានន័យថាជំងឺនេះមិនកើតមាននោះទេ។
យ៉ាងណាក៏ដោយជំងឺនេះនៅតែមានវត្តមានក្នុងប្រទេសកម្ពុជាដដែលហើយប្រសិនបើ យើងសធ្វេសប្រហែលក្នុងការបង្ការនិងការការពារនោះជំងឺនេះអាចនឹងរីករាលដាលក្នុងប្រទេសកម្ពុជាជាថ្មីម្តងទៀតចំពោះប្រជាជនកម្ពុជាជាពិសេសប្រជាពលរដ្ឋនៅតាមជនបទដែលមិនអាចទទួលបានសេវាអប់រំបានគ្រប់គ្រាន់នោះ៕
