ខណៈពេលដែលរដ្ឋមន្ត្រីការបរទេសចិនលោកយ៉ាង ជាឆឺ Yang Jiechi មកចូលរួមកិច្ចប្រជុំរដ្ឋមន្ត្រីការបរទេសអាស៊ានបូកបី និង វេទិកាតំបន់អាស៊ាន ចាប់ពីថ្ងៃទី១០ ដល់ ថ្ងៃទី១២ ខែកក្កដា ។ លោក យ៉ាង ជាឆឺ រដ្ឋមន្ត្រីការបរទេស ចិន ក៏នឹងជួបប្រជុំជាមួយ សម្ដេចហ៊ុន សែន នាយករដ្ឋមន្ត្រីកម្ពុជា ជាលក្ខណៈទ្វេភាគីផងដែរ។បញ្ហាទំនាក់ទំនង រវាងប្រទេសទាំងពីរ កិច្ចសហប្រតិបត្តិការ លើវិស័យនានា ត្រូវបានគេរំពឹងថានឹងក្លាយ ជារបៀបវារៈនៃកិច្ចប្រជុំនេះ។
គួរបញ្ជាក់ថា ប្រទេសចិននឹងក្លាយជាតួអង្គសំខាន់ នៅក្នុងកិច្ចប្រជុំទាក់ទងទៅនឹង អាស៊ាន - ចិន ដោយកិច្ចប្រជុំនឹងមាននិយាយ ពីការតាក់តែងក្រមប្រតិបត្តិសមុទ្រចិនខាងត្បូង COC ដើម្បីឈានទៅដោះស្រាយជម្លោះ ដោយសន្តិវិធីលើជម្លោះសមុទ្រចិនខាងត្បូង ។ បញ្ហាសមុទ្រចិនខាងត្បូង ដែលកំពុងមានជម្លោះរវាងប្រទេសចិន និង ប្រទេសសមាជិកអាស៊ានផ្សេងទៀត ដូចជា ហ្វីលីពីន ម៉ាឡេស៊ី វៀតណាម និង ប្រ៊ុយណេ។
ក្រៅពីបញ្ហាសមុទ្រចិនខាងត្បូង អនុស្សារណៈ នៃការយោគយល់គ្នា រវាងអាស៊ាន និង ចិន លើសន្ធិសញ្ញា ស្តីពី តំបន់អាស៊ីអាគ្នេយ៍ គ្មានអាវុធនុយក្លេអ៊ែរ ក៏នឹងត្រូវរដ្ឋមន្ត្រីការបរទេសអាស៊ាន និង ចិន ចុះហត្ថលេខាជាមួយគ្នាផងដែរ ។
