តាមរយៈកិច្ចពិភាក្សាការងារ រវាងប្រមុខរដ្ឋាភិបាលកម្ពុជា និង ប្រមុខការទូត កូរ៉េខាងជើង កាលពីថ្ងៃទី១៤ខែកក្កដា កន្លងទៅនេះ កូរ៉េខាងជើង មានបំណងចងរឹត ចំណងទំនាក់ទំនងមិត្តភាព ជាមួយកម្ពុជា ឲ្យបានកាន់តែរឹងមាំឡើង មិនត្រឹមតែលើវិស័យនយោបាយទេ ប៉ុន្តែរួមទាំងវិស័យសេដ្ឋកិច្ចផងដែរ។ នេះបើតាមការបញ្ជាក់ឲ្យដឹងពីលោកអ៊ាង សុផល្លែត ជំនួយការផ្ទាល់សម្តេចនាយករដ្ឋមន្ត្រី ហ៊ុនសែន បានប្រាប់អ្នកកាសែតក្រោយជំនួបនោះ។
លោកអៀង សុផល្លែត បានបន្ថែមថា រដ្ឋមន្រ្តីការបរទេស កូរ៉េខាងជើង បានជម្រាបជូនសម្តេចនាយករដ្ឋមន្ត្រីថា លោកបានជួបជាមួយលោកឧបនាយករដ្ឋមន្ត្រីហោ ណាំហុង និង បានពិភាក្សាគ្នាលើបញ្ហាពាណិជ្ជកម្ម សេដ្ឋកិច្ច ដោយ សាធារណរដ្ឋប្រជាមានិតប្រជាធិបតេយ្យកូរ៉េមានបំណង ចង់សហការជាមួយកម្ពុជា ក្នុងការសាងសង់រោងចក្រម៉ាស៊ីនកិនស្រូវ និង ជួលដីដើម្បីដាំកៅស៊ូហើយក្នុងករណីដែលភាគីកម្ពុជាយល់ព្រម សាធារណរដ្ឋប្រជាមានិតប្រជាធិបតេយ្យកូរ៉េ សូមជូនអ្នកឯកទេសលើវិស័យនេះមកធ្វើការសិក្សា។
ជាក់ស្តែងដូចជាការចង់បង្កើតរោងចក្រម៉ាស៊ីនកិនស្រូវវិញ លោកអៀងសុផល្លែត បានបន្ថែមថា សម្តេចនាយករដ្ឋមន្ត្រីមានប្រសាសន៍ថា វាជាបំណងល្អហើយត្រឹមត្រូវសមស្របទៅតាមគោលនយោបាយរបស់រាជរដ្ឋាភិបាលកម្ពុជាក្នុងទិសដៅនាំអង្ករចេញនោះ។
សូមរម្លឹកថា ក្នុងកិច្ចប្រជុំជាមួយ លោកឧបនាយករដ្ឋមន្ត្រី ហោ ណាំហុង រដ្ឋមន្ត្រីការបរទេសកម្ពុជា កាលពីព្រឹកថ្ងៃសៅរ៍ លោកប្រមុខការទូតកូរ៉េខាងជើង បានបញ្ជាក់ច្បាស់ថា កូរ៉េខាងជើង បានត្រៀមរួចជាស្រេច ដើម្បីចូលរួមតុចរចា ៦ ភាគី ឡើងវិញស្តីពី បញ្ហាជម្លោះឧបទ្វីបកូរ៉េ និង វិបត្តិនុយក្លេអ៊ែរ៕
