សភាបារាំងបានធ្វើយុទ្ធនាការបោះឆ្នោតមួយ ដើម្បីអនុម័តការកាត់បន្ថយប្រាក់បៀវត្សន៍ របស់ប្រធានាធិបតីបារាំង គឺលោក ហ្វ្រង់ ស័រហូឡង់ និង លោកនាយករដ្ឋមន្រ្តី ហ្សង់ម៉ាក អាយរ៉ូល ចំនួន៣០ភាគរយ។ ការបោះឆ្នោតអនុម័តនេះ គឺជាវិធានការដំបូង របស់ប្រទេសបារាំង ក្នុងការទប់ស្កាត់ ការចំណាយរបស់រដ្ឋច្រើន មកលើប្រធានាធិបតី និង នាយករដ្ឋមន្រ្តីផងដែរ ហើយការបោះឆ្នោតអនុម័ត ការកាត់បន្ថយប្រាក់ខែ របស់លោក ហ្វ្រង់ស័រហូឡង់ និង លោកហ្សង់ម៉ាក អាយរ៉ូល នេះគឺជាការអនុម័ត របស់រដា្ឋភិបាលបារាំង តាមរយៈសំណើរ របស់លោកប្រធានាធិបតីផ្ទាល់តែម្តង។
ការកាត់បន្ថយប្រាក់បៀវត្សរ៍នេះ មានន័យថា ប្រាក់ខែរបស់លោកប្រធានាធិបតីបារាំង នឹងធា្លក់ពី២១៣០០អ៊ឺរ៉ូ ស្មើនឹង២៦១០០ដុល្លារ មកនៅត្រឹម១៤៩១០អ៊ឺរ៉ូ។ ចំនែកប្រាក់ខែរបស់លោកនាយករដ្ឋមន្រ្តី ក៍ត្រូវធ្លាក់មកនៅត្រឹម៩៩៤០អ៊ឺរ៉ូដែរ។ នេះគឺជាការបោះឆ្នោត អនុម័តលើកដំបូងមួយ ក្នុងយុទ្ធនាការកាត់បន្ថយប្រាក់ចំណាយរដ្ឋ របស់លោកប្រធានាធិបតីថ្មី របស់បារាំងដែលទើបឡើងមក កាន់អំណាចកាលពីខែឧសភា កន្លងទៅថ្មីៗនេះ៕
