អង្គការសហប្រជាជាតិបានឲ្យដឹងថា ប្រទេសកូរ៉េខាងជើងកំពុងតែអំពាវនាវរកជំនួយស្បៀងអាហារ ដើម្បីផ្គត់ផ្គង់ប្រជាជនដែលទទួលរងគ្រោះដោយសារគ្រោះទឹកជំនន់។
ស្ថានភាពក្នុងប្រទេសកូរ៉េខាងជើងនាពេលនេះកំពុងស្ថិតក្នុងស្ថានភាពដ៏លំបាកលំបិន ព្រោះទឹកជំនន់មានបានបណ្តាលឲ្យមនុស្សចំនួន ១១៩នាក់បានស្លាប់ និង មនុស្សជាច្រើនម៉ឺននាក់កំពុងបាត់បង់ជំរក។
បន្ទាប់ពីរទទួលរងគ្រោះដោយសារតែគ្រោះទឹកជំនន់កាលពីពេលថ្មីៗនេះ រួចមកប្រទេស កូរ៉េខាងជើងកំពុងតែអំពាវនាវដល់អង្គការសហប្រជាជាតិដើម្បីជួយផ្តល់ជំនួយជាស្បៀងអាហារសម្រាប់ប្រជាជនដែលរងគ្រោះដោយសារគ្រោះធម្មជាតិនេះព្រោះជនរងគ្រោះមានចំនួនច្រើន។
មន្ត្រីរបស់អង្គការសហប្រជាជាតិប្រចាំនៅទៅក្រុងព្យុងយ៉ាងបានឲ្យដឹងថា ប្រជាជនដែលរងគ្រោះដោយសារតែទឹកជំនន់នោះកំពុងតែរងចាំជំនួយជាបន្ទាន់ ព្រោះទឹកជំនន់បានបំផ្លាញ់អ្វីៗស្ទើរតែទាំងស្រុងជាពិសេសហេដ្ឋារចនាសម្ព័ននិង ផ្ទៃដីដាំដុះនៅតាមបណ្តាខេត្តសំខាន់មួយចំនួន។ នាពេលនេះប្រជាជនទាំងនោះកំពុងតែប្រឈមមុខនិងកង្វះនូវស្បៀងអាហារ និង ទឹកស្អាតសម្រាប់ប្រើប្រាស់។
បញ្ហានេះបានធ្វើឲ្យប្រទេសកូរ៉េខាងជើងកំពុងមានការព្រួយបារម្មណ៏យ៉ាងខ្លាំងចំពោះការផ្គត់ផ្គង់ស្បៀងអាហារដល់ប្រជាជនរបស់ខ្លួន។ តាមរបាយការរបស់អង្គការសហប្រជាជាតិ បានឲ្យដឹងថាចំនួន២ភាគ៣ នៃប្រជាជនសរុបរបស់កូរ៉េខាងជើងកំពុងតែជួបនឹងបញ្ហាកង្វះស្បៀងអាហារ។
ទាក់ទងនឹងបញ្ហានេះដែរ ក្រុមអង្គការផ្តល់ជំនួយអន្តរជាតិមួយចំនួនកំពុងតែចាប់ផ្តើមដំណើរការរៃអង្គាសថវិការ ដើម្បីជួយដល់ប្រជាជនកូរ៉េខាងជើងទាំងនោះ។ ក្នុងនោះក្រុមកាកបាទក្រហមក៏បានឲ្យដឹងកាលពីថ្ងៃព្រហស្បត៏កន្លងទៅនេះថា ពួកគេនឹងផ្តល់ថវិការជាង ៣០ម៉ឺនដុល្លាអាមេរិកសម្រាប់ជួយដល់ជនរងគ្រោះទាំងនោះ។
គួរបញ្ជាក់ថា ប្រទេសកូរ៉េខាងជើងគឺជាប្រទេសដ៏ក្រីក្រមួយក្នុងពិភពលោក បើទោះបីជារដ្ឋាភិបាលនៃប្រទេសនេះមានគ្រឿងសព្វាវុធទំនើបៗ ដើម្បីប្រកួតប្រជែងជាមួយប្រទេសមហាអំណាចលើពិភពលោកក៏ដោយព្រោះប្រទេសនេះ គឺជាប្រទេសឯកោមួយក្នុងពិភពលោក។ កាលពីអំឡុងទសវត្សឆ្នាំ១៩៩០ ប្រទេសកូរ៉េខាងជើងបានរងគ្រោះ ដោយសារគ្រោះទុរភិក្សយ៉ាងធ្ងន់ធ្ងរដោយពេលនោះបានបណ្តាល់ឲ្យប្រជាជនរាប់រយពាន់នាក់បានស្លាប់៕(ដោយ លោក អ៊ុន រស្មី)
