លោក Riyad Hijab អតីតនាយករដ្ឋមន្ត្រីស៊ីរីដែលបានលាលែងពីតំណែងបាននិយាយថា របបនយោបាយស៊ីរីដែលដឹកនាំដោយលោកបាស្សា អាល់អាស្សាដកំពុងឈានទៅរកការដូលរលំទាំងផ្នែកមនោគម និងផ្នែកសេដ្ឋកិច្ច ហើយអតីតនាយករដ្ឋមន្ត្រីរួបនេះបានជំរុញឲ្យបណ្តាមន្ត្រីនានាលាលែងពីតំណែង ហើយចុះចូលជាមួយក្រុមប្រឆាំងរដ្ឋាភិបាល។
យោងតាមទីភ្នាក់ងារ ព័ត៌មានមួយ ចុះថ្ងៃទី១៥ ខែសីហានេះបានឲ្យដឹងថា ក្នុងពេលបង្ហាញវត្ថមាននៅចំពោះមុខមហាជននៅរដ្ឋធានីមួយនៃប្រទេស ហ្ស៊កដានី កាលពីថ្ងៃអង្គារ ទី១៤ ខែសីហាម្សិលមិញ។
អតីតនាយករដ្ឋមន្ត្រីស៊ីរីរួបនេះបានថ្លែងក្នុងសន្និសីទសារព័ត៌មានថា កងកម្លាំងយោធារបស់រដ្ឋាភិបាលស៊ីរី បានកាន់កាប់ដែនដីនៃប្រទេសស៊ីរី មិនដល់៣០ភាគរយឡើយ។
គួរបញ្ជាក់ថា លោក Riyad Hijab បានលាលែងពីតំណែងដោយធ្វើដំណើរទៅកាន់ប្រទេសហ្ស៊កដានី កាលពីថ្ងៃទី៨ ខែសីហា កន្លងទៅនេះជាមួយសមាជិកគ្រួសាររបស់ខ្លួនមួយចំនូន៕
