លោកថាក់ស៊ីន ស៊ីណាវ៉ាត្រាអតីតនាយករដ្ឋមន្ត្រីថៃបានធ្វើដំណើរទៅកូរ៉េខាងត្បូងបន្ទាប់ពីប្រឈមជាមួយពួកអាវលឿងនិងសំណួរអំពីទិដ្ឋាការចូលអាមេរិករបស់លោក។ ការអនុញ្ញាតរបស់អាមេរិកអោយថាក់ស៊ីនចូលប្រទេសរបស់ខ្លួនបានបណ្តាលអោយកិច្ចការទូតរបស់មហាអំណាចពភពលោកស្ថិតក្រោមការតាមដានត្រួតពិនិត្យ។
ពួកអ្នករិះគន់បានចង្អុលទៅកាន់ឯកសារដែលបញ្ចេញដោយវេបសាយ WikiLeaks ដែលបានបង្ហាញថាស្ថានទូតអាមេរិកប្រចាំថៃធ្លាប់ពិចារណាថាថាក់ស៊ីនជាមនុស្សមិនសមសំរាប់ទិដ្ឋាការអាមេរិក។
ពួកប្រឆាំងថាក់ស៊ីនបានធ្វើការប្រឆាំងតវ៉ាទាំងនៅក្នុងប្រទេសថៃនិងអាមេរិក។ លិខិតតវ៉ាត្រូវបានសរសេរផ្ញើទៅអាជ្ញាធរអាមេរិករួមទាំងរដ្ឋមន្ត្រីការបរទេសហ៊ីលឡារី គ្លីនតុនផងដែរ។
ការរិះគន់ចំពោះការផ្តល់ទិដ្ឋាការដល់ថាក់ស៊ីននេះក៏មានធ្វើតាមប្រព័ន្ធអ៊ីនធើណេត ជាហេតុនាំអោយអាមេរិកចាត់វិធានការចេញសេចក្តីថ្លែងការណ៍សាធារណៈមួយអំពីការសំរេចចិត្តរបស់ខ្លួន៕
