កិច្ចប្រជុំរយៈពេល៣ថ្ងៃនេះរៀបចំឡើងដោយសាលាឧទ្ធរណ៍ ដែលមានការចូលរួមឧបត្ថម្ភពីការិយាល័យឧត្តមស្នងការសិទ្ធិមនុស្សប្រចាំនៅកម្ពុជា និងអង្គការយូនីសេហ្វនៅសណ្ឋាគារសាន់វ៉េក្នុងរាជធានីភ្នំពេញ។
កិច្ចពិភាក្សានេះ គឺជាផ្នែកមួយដើម្បីកែលំអនូវដំណើរការប្រព័ន្ធយុត្តិធម៌ ហើយជាពិសេសគឺកិច្ចសហប្រតិបត្តិការរវាងតុលាការ ព្រះរាជអាជ្ញា និងពន្ធនាគារ។ នោះគឺការរិះរកវិធីដើម្បីបង្កើនការជំនុំជម្រះក្តីដែលកំពុងតែកកស្ទះនៅតុលាការសាលាឧទ្ធរណ៍នាពេលសព្វថ្ងៃ។
បទបង្ហាញរបស់តំណាងការិយាល័យអង្គការសហប្រជាជាតិទទួលបន្ទុកសិទ្ធិមនុស្សប្រចាំកម្ពុជាលើកឡើងថា ការធ្វើជំរឿននៅតុលាការសាលាឧទ្ធរណ៍ គិតត្រឹមចុងឆ្នាំ២០០៩ មានសំណុំរឿងកកស្ទះមានជិតដល់ ៣.៤០០សំណុំរឿង ទាំងរឿងរដ្ឋប្បវេណីនិងទាំងរឿងក្តីព្រហ្មទណ្ឌ។ ក្នុងនោះសវនាការរបស់សាលាឧទ្ធរណ៍ក្នុងល្បឿនដូចសព្វថ្ងៃ គឺការជម្រះសំណុំរឿងកកស្ទះអាចនឹងប្រើពេលរហូតដល់ទៅ៩ឆ្នាំ។
បទបង្ហាញដដែលក៏បានលើកឡើងថា រយៈពេលនៃការកកស្ទះសំណុំរឿងនៅសាលាឧទ្ធរណ៍ ដែលមិនទាន់ទទួលបានការជំនុំជម្រះមានលើសពី៥ឆ្នាំ ទៅ ៧ឆ្នាំ និងមានរឿងខ្លះរហូតដល់១០ឆ្នាំ។
លោក James Heenan តំណាងស្តីទី នៃការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សប្រចាំកម្ពុជា ( OHCHR-Cambodia ) បានលើកឡើងថា ក្រោមច្បាប់សិទ្ធិមនុស្សអន្តរជាតិ ជនជាប់ឃុំទាំងឡាយមានសិទ្ធិទទួលបានការកាត់ក្តីក្នុងរយៈពេលសមស្របដោយតុលាការគ្រប់ជាន់ថ្នាក់។
ពួកគេពុំគួររង់ចាំបណ្តឹងឧទ្ធរណ៍ដោយប្រើរយៈពេលយូរឡើយ។ លោក James បានបន្ថែមថា ចំនួនជនជាប់ឃុំកើនឡើង១៥.០០០នាក់ ទូទាំងប្រទេស។ នេះសឲ្យឃើញថា ប្រទេសកម្ពុជាកំពុងជួបប្រទះវិបត្តិណែនចង្អៀតក្នុងពន្ធនាគារ។
មួយវិញទៀតអស់រយៈពេលច្រើនឆ្នាំមកហើយនៅកម្ពុជាមានកង្វល់អំពីករណីឃុំលើសរយៈពេលកំណត់ដោយច្បាប់ព្រោះថា មានជនជាប់ចោទជាច្រើនទាំងទណ្ឌិត និងពិរុទ្ធជនបាននិងកំពុងរង់ចាំបណ្តឹងឧទ្ធរណ៍ក្នុងរយៈពេលយូរ។
សូមបញ្ជាក់ថា គិតត្រឹមខែមិថុនា ឆ្នាំ២០១២ បើតាមរបាយការណ៍ការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សបានបង្ហាញថា មានអ្នកជាប់ឃុំឃាំងដែលរង់ចាំសវនាការលើបណ្តឹងឧទ្ធរណ៍មានចំនួន១.៤៣៧នាក់។
ដែលក្នុងនោះអ្នកជាប់ឃុំឃាំងដែលមានសំណុំរឿងតែមួយមានចំនួន ១.១៩១នាក់ និងអ្នកជាប់ឃុំឃាំងដែលមានសំណុំរឿងច្រើនមានចំនួន២៤៦នាក់។ ចំណែកចំនួនសរុបនៃសំណុំរឿងដែលពាក់ព័ន្ធមានចំនួន ១.៩១៧៕(អត្ថបទដោយលោក ជា ធីរិទ្ធ)
