ទឹកដោះម្ដាយ គឺពិតជាមានប្រយោជន៍ច្រើនណាស់ដែលពេលនេះក្រុមអ្នកវិទ្យាសាស្ដ្របានរកឃើញថា ការបំបៅកូនដោយទឹកដោះអាចជួយការពារកុមារពីការវិវឌ្ឍទៅរកជំងឺទឹកនោមផ្អែម និងការធាត់លើសទម្ងន់នៅពេលពួកគេចាស់ទៅ។
ទារកដែលបោះទឺកដោះម្ដាយ គឺមានការរីកលូតលាស់ខុសគ្នា បើប្រៀបធៀបជាមួយកុមារដែលបៅទឹកដោះគោ។ ភាពខុសគ្នា គឺមិនមែនតែចំពោះសុខភាពនាពេលកុមារភាពនោះទេ ប៉ុន្ដែគឺរហូតដល់ពេលពួកគេធំដឹងក្ដីរហូតចាស់ផងដែរ។
ការបំបៅកូនដោយទឹកដោះនឹងជួយកាត់បន្ថយកម្រិតរីកលូតលាស់នៃអ័រម៉ូន និងជាតិអ៊ីនសូលីននៅក្នុងឈាមរបស់កុមារដែលអាចជួយពន្យឺតការឡើងទម្ងន់ជ្រុលបានទៀតផង។ ផ្ទុយមកវិញកុមារដែលបៅទឹកដោះគោ គឺបានបង្កើននូវផលិតកម្មនៃកោសិកាធាត់ ដែលធ្វើឲ្យពួកគេធាត់ជ្រុល។
ការបំបៅកូនដោយទឹកដោះកាន់តែយូរនោះភាគឡើងទម្ងន់របស់កុមារក្នុងរយៈពេល ១៨ខែដំបូងក៏កាន់តែយឺតតាមនោះដែរ។ មិនត្រឹមតែជួយកុមារមិនឲ្យធាត់ជ្រុលនោះទេ ទឹកដោះម្ដាយក៏អាចការពារកុមារពីជំងឺជាច្រើនទៀតផងដែរ ហើយពួកគេនឹងទទួលបានអត្ថប្រយោជន៍សុខភាពជាច្រើននាពេលអនាគត។
រឹតតែពិសេសជាងនេះទៀត ប្រយោជន៍មិនមែនមានសម្រាប់តែទារកប៉ុណ្ណោះទេ ប៉ុន្ដែអ្នកម្ដាយក៏ទទួលប្រយោជន៍ពីការបំបៅដោះកូននោះដែរ។ ការបំបៅទឹកដោះកូននឹងធ្វើឲ្យម្ដាយដុតបំផ្លាញកាឡូរីអស់៥០០កាឡូរីក្នុងមួយថ្ងៃដែលអាចជួយឲ្យម្ដាយមានរាងស្វ៊ែលស្អាត៕
