ដំណើរទស្សនកិច្ចរបស់រដ្ឋមន្រី្តការបរទេសសហរដ្ឋអាមេរិកទៅកាន់ប្រទេសទីម័រខាងកើតនេះបានធ្វើឡើង បន្ទាប់ពីមានការបោះឆ្នោតនៅក្នុងប្រទេសនេះរួចមក។
លោកស្រីក្លីនតុន ត្រូវបានគេចាត់ទុកថា គឺជាប្រមុខការទួតសហរដ្ឋអាមេរិកដំបូងគេមួយរូបដែលបានធ្វើទស្សនកិច្ចនៅក្នុងប្រទេសទីម័រខាងកើតចាប់តាំងពីប្រទេសនេះបានទទូលឯករាជ្យពីប្រទេសឥណ្ឌូនេស៊ីក្នុងឆ្នាំ២០០២កន្លងមក។
លោកស្រីរដ្ឋមន្ត្រីការបរទេសបានទៅដល់រដ្ឋធានី Di0li នៃប្រទេសទីម័រហើយនៅថ្ងៃព្រហស្បតិ៍ទី៦ ខែកញ្ញាបន្ទាប់ពីលោកស្រីបានបញ្ចប់ដំណើរទស្សនកិច្ចនៅរដ្ឋធានីប៉ែកាំងនៃប្រទេសចិន កាលពីថ្ងៃពុធ ទី៥ ខែកញ្ញាម្សិលមិញនេះដោយបានជួបប្រជុំជាមួយលោកហ៊ូ ជិនតាវ ប្រធានាធិបតីចិនជិតផុតអាណត្តិផងដែរ។ នៅក្នុងជំនួបនោះត្រូវបានគេសន្និដ្ឋានថា បានផ្តោតជាសំខាន់ទៅលើបញ្ហាជម្លោះនៅសមុទ្រចិនខាងត្បូង។
គួរបញ្ជាក់ថា ដំណើរទស្សនកិច្ចរបស់ស្រីគ្លីនតុន នឹងត្រូវចំណាយពេល១១ថ្ងៃ ដើម្បីធ្វើដំណើរទស្សនកិច្ចទៅកាន់ប្រទេសចំនួន៦នៅក្នុងអាស៊ី ដើម្បីសំរបសំរួលពីបញ្ហាជំលោះនៅក្នុងតំបន់ពោលគឺ នៅមុនពេលប្រធានាធិបតីអាមេរិកលោកបារ៉ាក់ អូបាម៉ា អញ្ជើញមកបំពេញទស្សនកិច្ចនៅកម្ពុជាដើម្បីចូលរួមកិច្ចប្រជុំកំពូលអាស៊ាន-អាស៊ីបូព៌ានៅក្នុងខែ វិច្ឆិការខាងមុខនេះ។
ក្នុងដំណើទស្សនកិច្ចនៅទីម័រនោះលោកស្រីក៍មានជំនួបជាមួយប្រធានាធិបតីលោកTaur Matan Ruak និងលោកនាយករដ្ឋមន្ត្រី Xanana Gusmao នៃប្រទេសទីម័រផងដែរ។
មន្ត្រីជាន់ខ្ពស់សហរដ្ឋអាមេរិកម្នាក់បាននិយាយថា ដំណើរទស្សនកិច្ចរបស់លោកស្រីរដ្ឋមន្ត្រីការបរទេសរូបនេះ គឺជាការខិតខំប្រឹងប្រែងមួយដើម្បីជួយជ្រោមជ្រែងអោយមានស្ថេរភាព និងមានការអភិវឌ្ឃជឿនលឿននៅក្នុងប្រទេសទីម័រខាងកើតដែលជាប្រទេសមួយដែលក្របំផុតក្នុងអាស៊ី។
លោកស្រីក្លីនតុនត្រូវបានគេរំពឹង ផងដែរថានឹងប្រកាសអំពីមូលនិធិចំនួន៦.៥លានដុល្លា សហរដ្ឋអាមេរិកសម្រាប់អាហាររូបករណ៍ដែលអាចអោយសិស្សក្នុងប្រទេសទីម័រទៅសិក្សានៅសហរដ្ឋអាមេរិក៕
