សន្តិសុខ
នៅព្រឹកថ្ងៃទី២៣ ខែឧសភា ឆ្នាំ២០១៣នេះ ក្រុមកម្មករប្រមាណជា ៨០០០នាក់ នៅក្នុងរោងចក្រចំនួនពីរនៅកំពង់ឆ្នាំង និងកំពង់ស្ពឺនៅតែបន្តធ្វើកូដកម្មខណៈពុំមានដំណោះស្រាយណាមួយពីភាគីរោងចក្រ។
នេះបើតាមការបញ្ជាក់ពីលោកម៉ាន់ សេងហាក់ មន្ត្រីសហជីពប្រចាំចក្រស្បែកជើងខេនស្ពត័ស៊ូ។
សំលេងៈ
លោកអ្នកនាងទើបតែបានស្ដាប់ការលើកឡើងរបស់លោកម៉ាន់ សេងហាក់ មន្ត្រីសហជីពតាមរយៈការសាកសួរពីអេង គឹមហុង នៅប៉ុន្មាននាទីមុននេះ៕
គ្រោះថ្នាក់ចរាចរណ៏ដែលបានកើតឡើង៧លើក នៅទូទាំងប្រទេសកាលពីថ្ងៃទី២២ ឧសភា ២០១៣ បានបណ្តាលឲ្យមនុស្សម្នាក់ស្លាប់ និង ៧នាក់របួសធ្ងន់ និងស្រាល(៦នាក់របួសធ្ងន់)។ នេះបើយោងគេហទំព័រប៉ូលិសជាតិ។
ប្រភពដដែលបានបង្ហាញក្នុងគ្រោះថ្នាក់ចរាចរណ៏ទាំង៧លើកនោះបានបង្កឲ្យខូចខាតយានយន្តសរុប ១៣គ្រឿង ក្នុងនោះម៉ូតូ៧គ្រឿង រថយន្តធុនតូច៣គ្រឿង រថយន្តធុនធំ២គ្រឿង យានផ្សេងៗ១គ្រឿង និងថ្មើរជើងម្នាក់។
មូលហេតុនៃគ្រោះថ្នាក់ចរាចរណ៍នេះបណ្តាលមកពីល្បឿន ៤លើក ប្រជែងគ្រោះថ្នាក់ ២លើក មិនគោរពសិទ្ឋិ១លើក ក្នុងនោះជិះម៉ូតូមិនពាក់មួកការពារសុវត្ថិភាព ៥នាក់។
បុរសម្នាក់ត្រូវបានរន្ទះបាញ់ធ្លាក់ពីលើទូកស្លាប់ ខណៈកំពុងអង្គុយលើទូកដោះមងយកត្រីពេលមេឃភ្លៀង។
ហេតុការណ៍នេះបានកើតឡើងកាលពីវេលាម៉ោង ៣និង៣០នាទីល្ងាចថ្ងៃទី២២ ខែឧសភា ឆ្នាំ២០១៣ត្រង់ចំណុចប្រឡាយតាអ៊ុំក្នុង ភូមិកំពង់ថ្គោល ឃុំអន្សាចំបក់ ស្រុកក្រគរខេត្តពោធិ៍សាត់។
បុរសរងគ្រោះរូបនោះមានឈ្មោះ ម៉ន មុំ អាយុ ៣១ឆ្នាំ រស់នៅក្នុងភូមិឃុំកើតហេតុខាងលើ។
ស្ត្រីម្នាក់ បានរងរបួសធ្ងន់ បន្ទាប់ពីត្រូវរថយន្តមួយគ្រឿង បើកកៀរ ខណៈជនរងគ្រោះកំពុងជិះម៉ូតូឌុបកង់ពីក្រោយ។
ហេតុការណ៍នេះ បានកើតឡើងកាលពីវេលាម៉ោង ៧និង២០នាទីព្រឹក ថ្ងៃទី២២ ខែឧសភា នៅខាងជើងវត្តព្រែកស្តី ស្ថិតក្នុងភូមិព្រែកស្តី សង្កាត់លលកស ក្រុងខេត្តពោធិសាត់។
ស្ត្រីរងគ្រោះរូបនោះមានឈ្មោះ ស្តុក អាយុ ៣៧ឆ្នាំ មានទីលំនៅភូមិកោះ សង្កាត់លលកស ក្រុងខេត្តពោធិសាត់។
អគ្គិភ័យដ៏សន្ធោសន្ធៅបានឆាបឆេះអគារមួយក្រុមហ៊ុនដឹកអ្នកដំណើរ ម៉ីហុង ដែលស្តិតនៅចំណុចមុខសាសាបឋមសិក្សាទួលគោក ក្នុងសង្កាត់បឹងកក់ទី១ ខណ្ឌទួលគោក កាលពីម៉ោង ម៉ោង៧ និង២០នាទីព្រឹក ថ្ងៃ២៣ ខែឧសភា ឆ្នាំ២០១៣នេះ បណ្តាលប្រជាពលរដ្ឋមានផ្ទះនៅជាប់កន្លែងកើតហេតុស្លន់ស្លោទាំងព្រឹក។
យ៉ាងណាក៏ដោយអគ្គីភ័យនេះ បានរលត់ទាំងស្រុងនៅម៉ោង ៧និង ៥០នាទីព្រឹកថ្ងៃដដែលដោយប្រើទឹកអស់ប្រមាណជា១០រថយន្ត។ គេនៅមិនទាន់ដឹងពីមូលហេតុនៃអគ្គីភ័យនេះនៅឡើយទេ។ ហើយទំហំនៃការខូចខាតក៏នៅមិនទាន់ដឹងនៅឡើយដែរ។
បុរសជាកម្មករទូកនេសាទម្នាក់ បានរងរបួសបែកក្បាលសន្លប់នៅនឹងកន្លែងដោយសារតែត្រូវបុរសម្នាក់ ទៀតជាកម្មករទូកដូចគ្នា វាយនិងឈើជ្រុងចំក្បាលនិងឆ្អឹងជំនឺដោយសារតែជនរងគ្រោះ ស្រវឹងស្រា ហើយនិយាយឌឺដងដាក់គេ។
ហេតុការណ៍នេះបានកើតឡើងកាលពីវេលាម៉ោង៣ និង៣០នាទី រសៀល ថ្ងៃទី២២ ខែឧសភា ឆ្នាំ២០១៣ នៅចំណុចតំបន់ទំនប់រលកផែ១៨ (ផែតាហួត) ក្រុម២២ ស្ថិតក្នុងភូមិ៣ សង្កាត់លេខ១ ក្រុងព្រះសីហនុ។
បុរសរងគ្រោះឈ្មោះ ស៊ូ សុខ អាយុ ៣៧ឆ្នាំ មានស្រុកកំណើត ភូមិទួលស្នែង ឃុំក្រាំងលឿង ស្រុកបាទី ខេត្តតាកែវ។
បុរស២នាក់បានរងរបួសធ្ងន់ និងម្នាក់ទៀតរបួសស្រាល បន្ទាប់ពីផឹកស្រាស្រវឹង ហើយបើករថយន្តទៅបុកបង្គោលភ្លើង។
ហេតុការណ៍នេះបានកើតឡើងកាលពីវេលាម៉ោង០០និង៣០នាទីយប់ឈានចូលថ្ងៃទី២២ ខែឧសភា ឆ្នាំ ២០១៣ នៅចំណុចភូមិដើមអម្ពិល សង្កាត់ច្បារអំពៅទី១ ខណ្ឌមានជ័យ។
សមត្ថកិច្ចមូលដ្ឋានបានឲ្យដឹងថា ជនរងគ្រោះដែលរបួសធ្ងន់មានឈ្មោះ ម៉ូ នីកា អាយុ ៣៥ឆ្នាំ និង ឈ្មោះសុខ លាភ អាយុ ៣០ឆ្នាំ។
យុវជនម្នាក់ ត្រូវបានក្រុមចោរ២នាក់ បានបើកម៉ូតូកៀរផ្តួលម៉ូតូជនរងគ្រោះ ភ្ជង់ប្លន់យកម៉ូតូ។
ហេតុការណ៍នេះ បានកើតឡើងកាលពីវេលាម៉ោង៧ និង២០នាទីយប់ ថ្ងៃទី២១ ខែឧសភា ឆ្នាំ២០១៣ នៅចំណុចចុង ឆ្នេរ អូរឈើទាល ស្ថិតក្នុងភូមិ៥ សង្កាត់លេខ៤ ក្រុងព្រះសីហនុ។ ជនរងគ្រោះរូបនោះមាន ឈ្មោះ វ៉ា មេត្តារុង រ៉ាត់ អាយុ ២០ឆ្នាំ។
យុវជន២នាក់បានស្លាប់នៅនឹងកន្លែងកើតហេតុ និងម្នាក់ទៀតរងរបួសធ្ងន់ បន្ទាប់ពីជនរងគ្រោះទាំង៣នាក់ បានជិះម៉ូតូទាំងស្រវឹងជ្រុលចង្កូតទៅបុករឺម៉កពីក្រោយយ៉ាងពេញទំហឹង។
ហេតុការណ៍នេះបានកើតឡើង កាលពីវេលាម៉ោង ១១និង១៥នាទីយប់២០ ខែឧសភា ឆ្នាំ២០១៣ ស្ថិតនៅចំណុចភូមិព្រែកខ្សេវ ឃុំរកាសខ្ពស់ ស្រុកស្អាង ខេត្តកណ្តាល។
សមត្ថកិច្ចមូលដ្ឋានបានឲ្យដឹងថា ជនរងគ្រោះដែលស្លាប់ទាំង២នាក់ នោះមានឈ្មោះ ឡុង វាសនា អាយុ ១៨ឆ្នាំ និង ឈ្មោះម៉ុន ម៉េង អាយុ ២០ឆ្នាំ និងម្នាក់ទៀតដែលរបួសធ្ងន់ឈ្មោះ សយ ប៊ុនលី អាយុ១៩ឆ្នាំ។ អ្នកទាំង៣រស់នៅ ក្នុងភូមិព្រែកស្នង ឃុំព្រែកគយ ស្រុកស្អាង ខេត្តកណ្តាល។
យ៉ាងហោចណាស់មនុស្សចំនួន១០នាក់(ស្រី២នាក់)បានស្លាប់ និង២១នាក់ផ្សេងទៀត(ស្រី៦នាក់)បានរងរបួសធ្ងន់ និងស្រាលដោយសារគ្រោះថ្នាក់ចរាចរណ៍ ដែលបានកើតឡើងចំនួន១៦លើក នៅទូទាំងប្រទេស កាលពីថ្ងៃទី២០ ខែឧសភា ឆ្នាំ២០១៣។
នេះបើយោងតាមប្រភពព៌ត័មាន ពីនាយកដ្ឋានសណ្តាប់ធ្នាប់ នៃអគ្គ ស្នងការនគរបាលជាតិ។ ប្រភពព៌ត័មានដដែល បានបង្ហាញថា ក្នុងគ្រោះថ្នាក់ចរាចរណ៍ ទាំង១៦លើកនោះ បានបង្កឲ្យខូចខាតយានយន្តសរុប ២៤គ្រឿង ក្នុងនោះម៉ូតូ១១គ្រឿង រថយន្តធុនតូច៧គ្រឿង រថយន្តធុនធំ ២គ្រឿង និងយានផ្សេង៤គ្រឿង។
មូលហេតុដែលបណ្តាលឲ្យមានគ្រោះថ្នាក់ចរាចរណ៍ទាំងនោះ គឺបណ្តាលមកពីល្បឿន ៦លើក មិនគោរពសិទ្ធិ២លើក ប្រជែងគ្រោះថ្នាក់២លើក បត់គ្រោះថ្នាក់២លើក ស្រវឹង២លើក និងកត្តាយានយន្ត២លើក ក្នុងនោះជិះម៉ូតូមិនពាក់មួក១០នាក់(យប់៦នាក់)។
ស្ត្រីម្នាក់ជាម្តាយបានរងរបួសធ្ងន់ និងកូនតូច២នាក់រងរបួសស្រាល បន្ទាប់ពីគោយន្តច្នៃមួយគ្រឿង បានរេចង្កូតជ្រុលទៅបុកម៉ូតូផ្ទប់បង្កាន់ដៃស្ពាន បណ្តាលឱ្យជនរងគ្រោះធ្លាក់ចូលទឺកអូរ។
ហេតុការណ៍នេះបានកើតឡើងកាលពីវេលាម៉ោង ១០និង៣០នាទីព្រឹកថ្ងៃទី២០ឧសភា នៅចំណុចស្ពានអូរជីក ក្នុងភូមិអូរចិញ្ចៀន ឃុំអន្លង់វែង ស្រុកអន្លង់វែង ខេត្តឧត្តរមានជ័យ។ ស្ត្រីរងគ្រោះឈ្មោះ ប៊ិន ស្រីម៉ៅ អាយុ២៦ឆ្នាំ។
យុវជន ២នាក់ បានរងរបួសធ្ងន់ ក្រោយពេលដែលពួកគេបានជិះម៉ូតូលឿនជ្រុលទៅបុកខឿនផ្លូវដួល ដោយសារតែជិះម៉ូតូគេចពីក្រុមក្មេងស្ទាវមួយក្រុមដែលជិះម៉ូតូ៣គ្រឿង ដេញវាយពួកគេ។
ហេតុការណ៍នេះបានកើតឡើង កាលពីវេលាម៉ោង ១២ និង ៣០នាទីយប់រំលងអាធ្រាត្រ ឈានចូលថ្ងៃទី២១ ឧសភា ២០១៣ នៅតាមបណ្តោយផ្លូវសហព័ន្ធរុស្ស៊ី ខណ្ឌសែនសុខ។
បុរសម្នាក់ស្លាប់ភ្លាមៗនៅកន្លែងកើតហេតុក្រោយពីត្រូវរថយន្តតាកូម៉ាបើកមួយគ្រឿង បើកបុកម៉ូតូរបស់ជនរងគ្រោះ កាលពីវេលាម៉ោង១០ និង២០នាទីយប់ ថ្ងៃទី១៩ខែឧសភាឆ្នាំ២០១៣ នៅចំណុច ក្បែរផ្សារដីហុយ ក្នុងភូមិរោងចក្រ សង្កាត់ភ្នំពេញថ្មី ខណ្ឌសែនសុខ។
ជនរងគ្រោះដែលស្លាប់មានឈ្មោះអ៊ាន រ៉ាត់ អាយុ ២៣ឆ្នាំ ជានិស្សិតឆ្នាំទី៣ នៅសាកលវិទ្យាល័យភូមិន្ទភ្នំពេញ ស្នាក់នៅម្តុំទួលគោក និងមានស្រុក កំណើតនៅឃុំជីផុច ស្រុកមេសាង ខេត្តព្រៃវែង។
ស្ត្រីម្នាក់ត្រូវបានប្តីចាក់សាំងដុតទាំងរស់រលាកខ្លួនធ្ងន់ធ្ងរពេលមានទំនាស់ពាក្យសម្តីនឹងគ្នា។
ហេតុការណ៍នេះបានកើតឡើងកាលពីវេលាម៉ោងជាង ៥ល្ងាច ថ្ងៃទី១៩ ខែឧសភា ឆ្នាំ២០១៣ នៅចំណុចភូមិសំបូរ ឃុំសំបូរ ស្រុកបាធាយ ខេត្តកំពង់ចាម។
ស្ត្រីរងគ្រោះខាងលើមានឈ្មោះ ឡៃ រឿន អាយុ ៣០ឆ្នាំ។ រីឯប្តីដែលជាជនសង្ស័យមានឈ្មោះ យ័ន ស្នា អាយុ៣២ឆ្នាំ។
ស្ត្រីម្នាក់ បានស្លាប់ពេលបញ្ជូនមកដល់មន្ទីរពេទ្យ បន្ទាប់ពីបុរសជាប្តីបានបើករថយន្តក្រឡាប់ធ្លាក់ចូលក្នុងទឹកស្រែ។
ហេតុការណ៍នេះបានកើតឡើងកាលពីវេលាម៉ោង ៣និង ៣០នាទី ថ្ងៃទី១៩ ខែឧសភា ឆ្នាំ២០១៣ នៅចំណុចផ្លូវលំក្រាលគ្រួសក្រហម ស្ថិតនៅក្នុងភូមិដើមជ្រែ ឃុំខុនរ៉ង់ ស្រុកបរិបូណ៌ ខេត្តកំពង់ឆ្នាំង។
ស្ត្រីរងគ្រោះដែលស្លាប់នោះមានឈ្មោះ អឿង រិន អាយុ៥២ឆ្នាំ។ រីឯបុរសជាប្តីដែលបើករថយន្តឈ្មោះ ផូ សាម អាយុ៥៣ឆ្នាំ រស់នៅខេត្តប៉ៃលិន។
ហេតុការណ៍មួយទៀត ដែលបានកើតឡើងក្នុងខេត្តកំពង់ឆ្នាំង ដែរនោះគឺ ក្មេងស្រីម្នាក់បានរងរបួសធ្ងន់ បន្ទាប់ពីត្រូវគោយន្តកន្ត្រៃបើកបុក ខណៈក្មេងស្រីរងគ្រោះរត់ឆ្លងផ្លូវទៅទិញនំ កាលពីវេលាម៉ោង ៧និង ២០នាទីព្រឹក ថ្ងៃទី១៩ ខែឧសភា ឆ្នាំ២០១៣ ក្នុងភូមិក្រាំងកកោះ ឃុំពេជ្រចង្វា ស្រុកបរិបូណ៌ ខេត្តកំពង់ឆ្នាំង។ ក្មេងស្រីរងគ្រោះមានឈ្មោះ យ៉ន មេសា អាយុ៣ឆ្នាំ។
ជាងជួសជុលម៉ាស៊ីនត្រជាក់៥នាក់ បានរងរបួសធ្ងន់ បន្ទាប់ពីបាក់រន្ទៀរធ្លាក់មកដី ខណៈកំពុងតែជួលជុលម៉ាស៊ីនត្រជាក់។
ហេតុការណ៍នេះបានកើតឡើងកាលពីវេលាម៉ោង ៣និង២០នាទីថ្ងៃទី១៩ ខែឧសភា ឆ្នាំ២០១៣ ស្ថិតនៅចំណុចក្រុមហ៊ុនលក់រថយន្តលូទូស្ស ក្នុងភូមិប៉ប្រកខាងជើង សង្កាត់កាកាប ខណ្ឌពោធិ៍សែនជ័យ រាជធានីភ្នំពេញ។
ជនរងគ្រោះទាំង៥នាក់នោះមានឈ្មោះ គឹម គឿន អាយុ៣២ឆ្នាំ ឈ្មោះ រុណ ពិសិទ្ធិ អាយុ ២៤ឆ្នាំ ឈ្មោះ គឹម គេន អាយុ ៣២ឆ្នាំ ឈ្មោះប៊ុន ថោន អាយុ២៦ឆ្នាំ និងឈ្មោះ ផល្លី ២៦ឆ្នាំ។
មនុស្សម្នាក់បានស្លាប់បាត់បង់ជីវិត និង៣នាក់ទៀតបានរងរបួសធ្ងន់ និងស្រាល បន្ទាប់ពីរថយន្តឡង់គ្រីស័របុកជាមួយនឹងរថយន្តកូរ៉េដឹកទឹកកកដែលចតស្ងៀម។
ហេតុការណ៍នេះ បានកើតឡើងកាលពីវេលាម៉ោង ២រសៀល ថ្ងៃទី១៩ ខែឧសភា ឆ្នាំ២០១៣ នៅចំណុចមុខស្នាក់ ការសង្កាត់រដ្ឋបាលព្រៃឈើដុងក្រឡក្នុង សង្កាត់សាមគ្គី ក្រុងស្ទឹងត្រែង។
មានឈ្មោះអូន ទូច អាយុ២១ឆ្នាំ ឈ្មោះ យ៉ាង មុំាង អាយុ៤៩ឆ្នាំ ឈ្មោះ យ៉ាង ប៉ុង អាយុ ៣៣ឆ្នាំ និងឈ្មោះស៊ើយ អេង អាយុ ៤១ឆ្នាំ។ ជនរងគ្រោះទាំង៤នាក់ រស់នៅក្រុងបានលុង ខេត្តរតនគិរី។
មនុស្ស៥នាក់បានស្លាប់ និង១៨នាក់ រងរបួសធ្ងន់និងស្រាលដោយសារគ្រោះថ្នាក់ចរាចរណ៍ដែលបានកើតឡើងចំនួន១២លើក នៅទូទាំងប្រទេស កាលពីថ្ងៃទី១៧ ខែឧសភា ឆ្នាំ២០១៣។ នេះបើតាមការឲ្យដឹងពីនាយកដ្ឋានសណ្តាប់ធ្នាប់នៃអគ្គស្នងការនគរបាលជាតិ។
ប្រភពព៌ត័មានដដែលបានបង្ហាញទៀតថា នៅក្នុងគ្រោះថ្នាក់ទាំង១២លើកនោះ បានបង្កឲ្យខូចខាតយានយន្តសរុប ១៨គ្រឿង ក្នុងនោះម៉ូតូ ១២គ្រឿង រថយន្តធុនតូច ៥គ្រឿង និងរថយន្តធុនធំ ១គ្រឿង។
មូលហេតុដែលបណ្តាលឲ្យមានគ្រោះថ្នាក់ គឺបណ្តាលមកពីបើកបរហួសល្បឿន ៣លើក មិនគោរពសិទ្ធិ៣លើក បត់គ្រោះថ្នាក់ ២លើក មិនប្រកាន់ស្តាំ២លើកកត្តាផ្សេងៗ ២លើក ក្នុងនោះជិះម៉ូតូគ្រោះថ្នាក់មិនពាក់មួក៩នាក់(យប់)។
បុរសម្នាក់បានស្លាប់ និងម្នាក់ទៀតរងរបួសធ្ងន់ បន្ទាប់ពីរថយន្ដដឹកដីមួយគ្រឿង បើកចុះពីលើភ្នំរេចង្កូតធ្លាក់ផ្លូវក្រឡាប់។
ហេតុការណ៍នេះបានកើតឡើងកាលពីវេលាម៉ោង៨ព្រឹកថ្ងៃ ទី១៧ ខែឧសភា ឆ្នាំ២០១៣នៅត្រង់ចំណុចភូមិជើងភ្នំ ឃុំត្រញំងប្រិយ៍ ស្រុកអន្លង់វែង ខេត្ដឧត្ដរមានជ័យ។
ជនរងគ្រោះដែលស្លាប់មានឈ្មោះសួរ សាដា អាយុ២០ឆ្នាំ និងម្នាក់ទៀតរងរបួសធ្ងន់មានឈ្មោះហ៊ន់ សីហា អាយុ៣១ឆ្នាំ។
បុរសជាកម្មករសំណង់ម្នាក់ស្លាប់ពេលបញ្ជូនទៅមណ្ឌលសុខភាព បន្ទាប់ពីកម្មកររូបនេះឡើងរន្ទា ដើម្បីចាក់បេតុងស៊ីម៉ងត៍ហើយក៏បាក់ធ្លាក់។
ហេតុការណ៍នេះបានកើតឡើងកាលពីវេលាម៉ោង៧ និង២៥នាទីព្រឹក ថ្ងៃទី១៨ ឧសភា ២០១៣ នៅចំណុចផ្ទះលេខ២ ផ្លូវ៣១៧ សង្កាត់បឹងកក់១ ខណ្ឌទួលគោក។
បុរសរូបនោះមានឈ្មោះ សុង ទីថា អាយុ៣៣ឆ្នាំ រស់នៅភូមិពារាំង ឃុំកោះចេក ស្រុកពាមជរ ខេត្តព្រៃវែង។
