សេដ្ឋកិច្ច​

​រុស្ស៊ី​បាន​​ដំឡើងថ្លៃ​​ឧស្ម័ន​​ពី​អ៊ុយ​ក្រែន​​ខណៈ​ដែលសេដ្ឋកិច្ច​​​​អ៊ុ​យក្រែន​​​កំពុង​ធ្លាក់​​

បន្ទាប់​ពី​ប្រទេស​អ៊ុ​យក្រែន​បាន​ចោទប្រកាន់​ថា ​រុស្ស៊ី​បាន​បាញ់សម្លាប់​ក្រុម​បាតុករ​នៅ​ទីក្រុង​គៀវ​កាល​ពី​បី​ខែ​មុន​នោះ នៅពេលនេះ​ប្រធានា​ធិបតី​​​រុស្ស៊ី​​បាន​ប្រកាស​​តំឡើងថ្លៃ​ឧស្ម័ន​ពី​អ៊ុ​យក្រែន​។

ជាមួយគ្នានេះ​ប្រធានា​ប​តី​រុស្ស៊ី​បានបញ្ជាក់​ថា អតិថិជន​អ៊ុ​យក្រែន​​ទិញ​ឧស្ម័ន​ពី​រុស្ស៊ី អាជ្ញា​ធរ​​រុស្ស៊ី​ត្រូវអនុវត្ត​រាល់​សិទ្ធិ​ពន្ធគយ​ធម្មតា​ដោយ​គ្មាន​បញ្ចុះតម្លៃ​ដូច​មុន​ទៀត​ទេ​។ ដូច្នេះ​ចាប់ពី​ខែ​មេសា​នេះ​អ៊ុយ​ក្រែន​​ត្រូវ​បង់ថ្លៃ​ឧស្ម័ន​ខ្ពស់​បំផុត​ដូច​តម្លៃ​ប្រទេស​អ៊ឺរ៉ុប​ទិញឧ​ស័​ន្ម​ពី​ប្រទេស​រុស្ស៊ី​ដែរ​។​

​ទាក់ទង​នឹង​បញ្ហា​នេះ​ការតំលើងថ្លៃឧ​ស័​ន្ម​រុស្ស៊ី​បាន​ធ្វើឱ្យ​ប្រទេស​អ៊ុ​យក្រែ​ន​មាន​ការព្រួយបារម្ភ​យ៉ាងខ្លាំង​ពីព្រោះ​ បច្ចុប្បន្ន​ប្រទេស​អ៊ុ​យក្រែន កំពុង​តែ​​ធ្លាក់​សេដ្ឋកិច្ច​កាន់តែ​ដុនដាប​។ ហេតុ​ដូច្នេះ​​ហើយ​​ប្រទេស​​អ៊ុយ​ក្រែន​​ពិបាក​​ទប់​ទល់​​ការ​ប​ង់​ថ្លៃ​​ឧស្ម័ន​​រុស្ស៊ី​។​

​សូមបញ្ជាក់​ថា កាលពី​ឆ្នាំ​២០១០​អ៊ុ​យក្រែន បាន​ទិញ​ឧស្ម័ន ពី​រុស្ស៊ី​មាន​តំលៃ​ទាប​បំផុត គឺ​ដោយសារតែ​អ៊ុយ​ក្រែន​បានចុះ​កិច្ចព្រមព្រៀង​ជាមួយ​រុស្ស៊ី​ដោយ​អ៊ុយ​ក្រែន​យល់ព្រម​ពន្យារ​ពេល​ជួល​កំពង់ផែ​នៅគ្រីមៀ​។​ គួរ​រំ​ម្លឹក​ថា រុស្ស៊ី​ធ្លាប់តែ​លក់ឧ​ស័ន្មទៅ​អ៊ុយ​ក្រែន​ក្នុងតម្លៃ​១០០​ដុល្លារ ក្នុង​មួយ​​គូប ប៉ុន្តែ​បច្ចុប្បន្ន​រុស្ស៊ី​លក់​ទៅឱ្យ​អ៊ុ​យក្រែន​​៤៨៥​ដុល្លារ​ក្នុង​មួយ​គូប​៕(ដោយ​៖លាង​ ធីតា)​

ភាគហ៊ុនអាកាសចរណ៍​​ម៉ាឡេស៊ី​ធ្លាក់ចុះ ​​បន្ទាប់​ពី​ការ​​បាត់​ខ្លួន​​របស់​​MH370​

ភាគហ៊ុន​​​របស់​​ក្រុមហ៊ុន​​​អាកាសចរណ៍​​ប្រទេស​ម៉ាឡេស៊ី​ បាន​ធ្លាក់​ចុះ​យ៉ាងខ្លាំង​​ប្រមាណ​២០% ​កាល​ពី​ថ្ងៃ​ច័ន្ទ​ បន្ទាប់​​ពី​យន្តហោះ​​ដឹក​អ្នក​ដំណើរ​​របស់​​អាកាស​ចរណ៍​ម៉ាឡេស៊ី​​ជើងហោះហើរ 370 ​បាន​បាត់​ខ្លួន​ មួយ​ម៉ោង​​បន្ទាប់​ពី​ហោះ​ចេញពី​​ទី​ក្រុងកូឡា​ឡាំ​ពួរ ​ទៅ​កាន់​ទីក្រុង​​Beijing​​ប្រទេស​ចិន​កាល​ពី​ព្រឹក​ថ្ងៃ​សៅរ៍​។ ​ទន្ទឹមនឹងនេះ​ ទីផ្សារ​ភាគហ៊ុន​នៅ​ទីក្រុង​កូឡា​ឡាំ​ពួរ​​បាន​ធ្លាក់ចុះ​០.៦% , ​ប្រតិបត្តិ​ករ​អាកាស​ចរណ៍​​ម៉ាឡេស៊ី​​ក៏បាន​ធ្លាក់ចុះ​ប្រមាណ​5%​ ផងដែរ ​ដែល​ទាញ​​ឲ្យ​ស​ន្ទ​ស្សន៍​​ទីផ្សារ​ក្រុម​ហ៊ុន​អាកាសចរណ៍ ​មាន​ការធ្លាក់ចុះសន្ធឹក​។​ នេះ​បើ​តាម​ការចុះ​ផ្សាយ​នៅ​លើ​ទំព័រ​សារព័ត៌មាន​អន្តរជាតិ​CNN ​កាលពី​ថ្ងៃ​ច័ន្ទ​៕​(ដោយៈសៅ វិសាល)

អ៊ុយ​ក្រែន​​កំពុង​​ជួប​វិបត្ដិ​​សេដ្ឋកិច្ច​​ធ្ងន់ធ្ងរ​

​លោក​បា​រ៉ាក់ អូ​បា​ម៉ា​​បាន​ព្រមាន​ថា វិបត្តិ​អ៊ុយ​ក្រែន​មិន​ត្រឹមតែ​មាន​ផលប៉ះពាល់​ដល់​នយាបាយ និង​សង្គម​ប៉ុណ្ណោះ​ទេ វិបត្តិ​នេះ​ក៏​អាច​បង្ក​ឱ្យ​ផលប៉ះពាល់​ដល់​សេដ្ឋកិច្ច​ប្រទេស​អ៊ុយ​ក្រែន​ផងដែរ។

លោក​អូ​បា​ម៉ា​ បាន​បនែ្ថមទៀតថា តំលៃ​ប្រេងសាំង​និង​តំលៃ​មាស​កើនឡើង​ជា​អតិ​ប​មារ​ដែល​ធ្វើឱ្យ​មាន​អ្នក​បោះបង់ចោល​នូវ​ទុន​ទី​ផ្សារ​ភាគ​ហ៊ុន​នៅ​អ៊ុ​យក្រែន​ក៏ដូចជា​ទីក្រុង​មូ​ស្គូ​នោះ បែរ​ជា​ទៅ​រក​ទីផ្សារ​មាស​ទៅវិញ​។

​ខណៈពេលដែល​លោក​អូ​បា​ម៉ា​លើកឡើង​បែបនេះ នាយករដ្ឋមន្ត្រី​អង់គ្លេស ប្រធានាធិបតី​អាល្លឺម៉ង់ និង​ប្រធានាធិបតី​បារាំង​វិញ បាន​ព្រមាន​ទៅ​ប្រទេស​រុស្ស៊ី​ថា ប្រទេស​នេះ​ជា​អ្នកបង្ក​ភាពចលាចល​ក្នុង​ប្រទេស​អ៊ុ​យក្រែន ហើយ​បញ្ហា​នៅ​អ៊ុយ​ក្រែ​ននឹង​បណ្តាលឱ្យ​ប្រទេស​នៅ​តំបន់​អា​ស៊ី​​ជួ​ប​​វិបត្តិ​សេដ្ឋកិច្ច​ទៀតផង​។​

​សូមបញ្ជាក់​ថា ស្របពេល​ដែល​ប្រទេស​អ៊ុយ​ក្រែន​ជួប​បញ្ហា តម្លៃ​ប្រេង​សម្រាប់​ផ្គត់ផ្គង់​ក្នុង​​ ខែ​មេសា​​បាន​ឡើង​ដល់​​១០៤​ដុល្លារ​​ ៦១​សេន​ក្នុង​មួយ​បារ៉ែល ហើយ​ប្រេង​នៅ​សមុទ្រ​ខ្មៅ​អ៊ុយ​ក្រែន​វិញ ​មាន​តម្លៃ​ជិត​​១១២​ដុល្លារ​ក្នុង​មួយ​បារ៉ែល​។

ចំណែកឯ​មាស​ប្រមាណ​ជាង​៣០​ក្រាម​មាន​​តម្លៃ​​ឡើង​រហូត​ដល់​ជាង​ ​១៣៥០​ដុល្លារ​​តម្លៃ​នេះ​​គេ​​ចាត់​ទុកថា​​ជា​​តម្លៃ​​កម្រិត​កំពូល​មួយ​ជាហេតុ​ធ្វើឱ្យ​​អ្នក​​បោះទុន​​ទី​ផ្សារភាគ​ហ៊ុន​បែរ​ទៅ​​ចាប់​បោះទុន​ខាង​ទីផ្សារ​មាស​វិញ​៕​​(ដោយ៖លាង ធីតា​)

​រដ្ឋាភិបាល​ថៃ​​ពង្រាយ​​កម្លាំង​រាប់​ពាន់​នាក់​​បំណង​​ទារ​យក​​អាគារ​​រដ្ឋ​មកវិញ​

​នៅ​ថ្ងែ​ទី​១៤​​កុម្ភៈ​នេះ រដ្ឋាភិបាល​ថៃ​បាន​ដាក់​ពង្រាយ​​កង​កម្លាំង​​រាប់ពាន់​​នាក់​​នៅ​​តាម​តំ​បន់​មួយចំនួន​ដែល​ក្រុមបាតុករ​បាន​កាន់កាប់​។​ ការ​ដាក់​ពង្រាយ​​កម្លាំង​នេះ ធ្វើឡើង​ក្នុង​គោល​បំណង​​ទាម​ទារ​កាន់កាប់​អាគារ​រដ្ឋាភិបាល និង​ក្រសួង​មួយចំនួនទៀត​ដែល​ក្រុមបាតុករ​បាន​កាន់កាប់​កន្លង​មក​ធ្វើជា​កម្មសិទ្ធិ​របស់​រដ្ឋាភិបាល​វិញ​។

​ប្រធាន​ក្រុមប្រឹក្សា​សន្តិសុខ​ជាតិ​ថៃ​បាន​និយាយ​នៅ​ថ្ងៃ​សុក្រ​នេះ​ថា ទោះជា​អាជ្ញាធរ​ថៃ​មាន​ប្រៀប​​លើ​​ក្រុម​​បាតុករ​​យ៉ាងណាក៏ដោយ ប៉ុន្តែ​រដ្ឋាភិ​បាល​​ថៃ​ត្រូវតែ​ចរចារ​ជាមួយ​មេដឹកនាំ​ក្រុមបាតុករ​ថៃ​មុន​ធ្វើ​សកម្មភាព​ដែរ​។​

​យោង​តាម​សម្តី​ប្រធាន​ក្រុមប្រឹក្សា​រូបនេះ​បាន​បញ្ជាក់​ដែរ​ថា ប្រសិនបើ​អាជ្ញាធរ​ថៃ​បាន​​កាន់​កាប់​​អាគារ​​រដ្ឋាភិបាល​​វិញ​​ពេល​ណា​អាជ្ញាធរ​​នឹង​​ស្វែង​រក​​ចាប់ខ្លួន​មេដឹកនាំ​ក្រុមបាតុករ ​ដើម្បី​ឲ្យ​​ការ​អនុវត្តន៍​​ច្បាប់​​ក្នុង​​ប្រទេស​​ថៃ​​មាន​ភាព​យុត្ដិធម៌​ត្រឹមត្រូវ បើទោះជា​ថៃ​កំពុង​ស្ថិត​ក្នុង​គ្រា​មាន​អាសន្ន​ក៏ដោយ​។​

​សូមបញ្ជាក់​ថា កាលពី​ថ្ងៃ​ព្រហស្បតិ៍ មន្ដ្រី​ប៉ូលីស​បាន​ព្រមាន​អ្នក​តវ៉ា​ដោយ​អោយ​ក្រុមបាតុករ​ទាំងអស់​ចាកចេញ​ពី​ទីកន្លែង​ដែល​ពួកគេ​កាន់​កាប់​​ភ្លាមៗ និង​មិនឱ្យ​មាន​ការតវ៉ា​អ្វី​ទាំងអស់​៕(ដោយៈ​អ៊ុន សុខ​ឡា)​

មនុស្ស​៧៧​នាក់ បាន​ស្លាប់​​បាត់បង់​ជីវិតដោយសារការធ្លាក់​យន្តហោះ​​យោធា​​អាល់​ហ្សេ​រី​

មនុស្ស​៧៧​នាក់ ក្នុង​ចំនោម​មនុស្ស ៧៨​នាក់ បាន​ស្លាប់​​បាត់​បង់​​ជីវិត​ដោយ​សារ​ការ​ធ្លាក់​​យន្ត​ហោះ​​យោធា​​អាល់​​ហ្សេ​រី​​មួយ​​គ្រឿង​​នៅ​ភាគ​​ឦ​សាន​​​​កាលពី​ថ្ងៃ​អង្គារ​។​ ការធ្លាក់​យន្តហោះ​នេះ​បាន​សម្លាប់​​​មនុស្ស​​ទាំង​អស់ ប៉ុន្តែ​មាន​តែ​មនុស្ស​ម្នាក់​គត់​ដែល​ស្ថិតក្នុង​ចំណោម​មនុស្ស​​៧៨​នាក់​នៅលើយន្តហោះ​នេះ​បាន​នៅរស់​។ ​យន្តហោះ​យោធា​នោះ​បាន​ធ្លាក់​បុក​ភ្នំ​មួយ​ដោយ​យន្តហោះ​នេះ​ដាច់​ជា​២​ចំណែក។​ គួរបញ្ជាក់​ថា ភាគច្រើន​នៃ​អ្នកជិះ​ក្នុង​យន្តហោះ​នេះ​ជា​ទាហាន​និង​សមាជិក​ក្រុមគ្រួសារ​របស់​ពួកគេ​៕

កូរ៉េខាងត្បូង​និង​អង់គ្លេស ​ពង្រឹង​ទំនាក់​ទំនង​​ពាណិជ្ជកម្ម​​ជាមួយ​គ្នា​

កាលពី​ថ្ងៃ​ពុធ​ម្សិលមិញ លោកស្រី​ប្រធានាធិបតី​កូរ៉េខាងត្បូង ប៉ាក ហ្គុន​ហឺ( Park Geun-Hye)​បាន​និយាយថា ក្នុង​ដំណើរ​ទស្សនកិច្ច​ផ្លូវ​រដ្ឋ​រយៈ​ពេល​ ២​ថ្ងៃ ក្នុង​ទីក្រុង London នោះ​ប្រទេស​អង់គ្លេស និង​កូរ៉េខាងត្បូង​បាន​សន្យាថា នឹង​បន្ត​ចាប់ដៃ​គ្នា​ពង្រឹង និង​ពង្រីក​ទំនាក់ទំនង​ពាណិជ្ជ​កម្ម​​បន្ថែម​ទៀត ស្ទើរ​គ្រប់​វិស័យ​ដូចជា វិស័ស​ថាមពល​នុយក្លែអ៊ែ និង​សេវាកម្ម​ហិរញ្ញវត្ថុជាដើម។

​លោកនាយក​រដ្ឋមន្ត្រី​អង់គ្លេស​ដា​វីដ កា​មា​រ៉ុន (David Cameron​)ក៏​បាន​បញ្ជាក់​ជា​ថ្មី​ថា រដ្ឋាភិបាល​ក្រុង​ឡុង​ដុន គាំទ្រ​ជា​និច្ច​ចំពោះ​កូរ៉េខាងត្បូង ដែល​ជា​មិត្ត​ជិតខាង​ខ្លួន​នា​ភាគ​ខាងជើង​ប្រទេស។

​គួរបញ្ជាក់​ថា ពាណិជ្ជកម្ម​ទ្វេភាគី រវាង​ទីក្រុង​ឡុន​ដុន និង​ទីក្រុង​សេ​អ៊ូ​ល បាន​កើនឡើង​យ៉ាង​ខ្លាំងខ្លា ចាប់តាំងពី​កូរ៉េ​ខាងត្បូង និង​សហភាព​អ៊ឺរ៉ុប​ចុះ​កិច្ចព្រមព្រៀង​ពាណិជ្ជកម្ម​សេរី​ជាមួយគ្នា កាលពី​ឆ្នាំ​​២០១១​មក។

ហើយ​នៅ​ឆ្នាំ​២០១២​ទ​ទូល​បាន​កំណើន​នៃ​ទឹកប្រាក់​ជាង 7.7​ពាន់​លាន​ផោន​។ ក្នុង​ការដោះដូរ​ពាណិជ្ជ​កម្ម មាន​ក្រុមហ៊ុន​កូរ៉េខាងត្បូង​ជាច្រើន ដូចជា ក្រុមហ៊ុន Samsung , LG ​និង Hyundai​ជាដើម សុទ្ធតែ​មាន​ឈ្មោះ​រកស៊ី​នៅ​ប្រទេស​អង់គ្លេស៕(ដោយៈ​ថា ថៃ)​

​សព្វាវុធ​​ចិន​វាយ​លុក​ខ្លាំង​​លើ​ទីផ្សារ​​ពិភព​លោក​

ថ្មីៗ​ នេះ​ប្រទេស​ចិន​បាន​ធ្វើឱ្យ​បណ្ដា​ប្រទេស​នាំចេញ​គ្រឿង​សព្វាវុធ​មួយចំនួន​នៅលើ​ពិភពលោក​ភ្ញាក់ផ្អើល​យ៉ាងខ្លាំ​ង​ជាពិសេស​អាមេរិក រុស្ស៊ី​ អាល្លឺម៉ង់​។

ភ្ញាក់ផ្អើល​ដោយ​សារ​​តែ​អាជីវកម្ម​គ្រឿង​សព្វាវុធ​របស់​ប្រទេស​មួយ​នេះ បាន​រីក​រាលដាល​យ៉ាង​ឆាប់រហ័ស​ទៅ​លើ​ពិភពលោក ជា​ពិសេស​ប្រទេស​កំពុង​អភិវឌ្ឍ​នៅ​អាហ្វ្រិក​និង​អាមេរិក​ឡាទីន​។

អតិថិជន​ធំ​បំផុត​ដែល​ទិញ​គ្រឿង​សព្វាវុធ​ពី​ចិន​គឺ​ប្រទេស​ប៉ា​គី​ស្ថាន​។ ​បើ​យោង​តាម​អ្នកសិក្សា​ខាង​ទីផ្សារ​សព្វាវុធ​យល់ឃើញថា រាល់​គ្រឿង​សព្វាវុធ​ទាំងអស់​របស់​ចិន​មាន​លក្ខណៈ​​​ពិសេស​ពីរ​យ៉ាង​។​

ទី​មួយ​គឺ​ តម្លៃ​លក់​ចេញ​របស់​ចិន​សមល្មម​អាច​ទទួលយកបាន បើ​ប្រៀបធៀប​នឹង​ប្រទេស​ដទៃ​ទៀត រី​ឯ​គុណភាព​វិញ​អាច​ប្រើប្រាស់​បាន​។ លក្ខណៈ​ពិសេស​ទី​ពីរ គឺ​​ចិន​​មិន​ជ្រៀត​​ជ្រែក​​រឿង​ផ្ទៃក្នុង​របស់​ប្រទេស​មួយ​ណា​ឡើយ។​

​ពាក់​ពន្ធ័​នឹង​បញ្ហា​នេះ​ដែរ អាមេរិក​ក៏​ដូចជា​អង្គការ​អូតង់​បាន​សម្តែង​ការព្រួយបារម្ភ​យ៉ាងខ្លាំង​ពី​ការធ្វើ​ចរាចរ​សព្វាវុធ​របស់​ចិន​ជាពិសេស​គឺ​ប្រព័ន្ធ​មី​ស៊ី​ល​។

បច្ចេកវិទ្យា​នៃ​ប្រព័ន្ធ​មី​ស៊ី​ល​​ចិន​មិន​ត្រូវ​គ្នា​​នឹង​បច្ចេកវិទ្យា​ប្រើ​ដោយ​ប្រទេស​ក្នុង​អូតង់ ម្យ៉ាងវិញទៀត​​​ក្រុមហ៊ុន​ចិន​​ដែល​ផលិត​​ប្រព័ន្ធ​មី​ស៊ី​ល​​នេះ ក៏​កំពុង​ស្ថិត​ក្រោម​ទណ្ឌកម្ម​អាមេរិក ដោយ​រង​ការចោទ​ប្រកាន់​​ថា ​បាន​លួច​ផ្ទេរ​បច្ចេកវិទ្យា​ខុសច្បាប់​ទៅឱ្យ​អ៊ីរ៉ង់ ស៊ី​រី និង​កូរ៉េ​ខាងជើង​។​

​ជា​ការកត់សំគាល់ កាលពី​ខែ​កញ្ញា ឆ្នាំ​២០១៣​​កន្លងមក ប្រទេស​តួ​ក​គី ដែល​ជា​បក្ស​សម្ពន្ធ័​អូតង់​បាន​ប្រកាសថា​ ខ្លួន​នឹង​ទិញ​ប្រព័ន្ធ​ការពារ​ដែន​អាកាស​​ក្នុង​តម្លៃ​​​៣៤០០​លាន​ដុល្លារ​​អាមេរិក​។ ​ប៉ុន្តែ​កិច្ចសន្យា​ទិញ​​ប្រព័ន្ធ​ការពារ​ដែនអាកាស​នេះ​​មិនមែន​​ធ្វើ​ឡើង​​ជាមួយ​​ក្រុមហ៊ុន​​អាមេរិក​ទេ គឺជា​មួយ​ចិន​។​

​សូម​រម្លឹកថា ចន្លោះ​ពី​ឆ្នាំ​២០០៨ ​ដល់​​ឆ្នាំ​​២០១២ ចិន​មាន​ការកើនឡើង​ដល់​​ ១៦២%​ទៅលើ​ការនាំចេញ​គ្រឿង​​សព្វាវុធ​បើ​ប្រៀបធៀប​ទៅនឹង​​ ៥​ឆ្នាំមុន ក្នុងនោះ​មានដូចជា​ការនាំ​ចេញ​​យន្ដហោះ មី​ស៊ី​ល​នាវាចម្បាំង និង​កាំភ្លើង​ផ្លោង​។

បច្ចុប្បន្ន​ប្រទេស​មួយ​នេះ ជាប់​ចំណាត់ថ្នាក់​លេខ​៥ ជា​ប្រទេស​ដែល​នាំ​ចេញ​គ្រឿង​សព្វាវុធ បន្ទាប់​ពីអាមេរិក រុស្ស៊ី អាល្លឺ​ម៉ង់ និង​បារាំង​៕​(ដោយៈពេញ ផេង)​

ADB​ជំរុញ​​ឲ្យ​​រដ្ឋាភិបាល​​នៅ​ទ្វីប​​អាស៊ី​​ត្រៀម​យក​​ផលប្រយោជន៍​​ពី​សេដ្ឋកិច្ច​​អាស៊ាន​

នៅ​ថ្ងៃ​ព្រហស្បតិ៍​នេះ​ធនាគារ​អភិវឌ្ឍន៍អាស៊ី​ហៅ​កាត់​ថា ADB បានប្រកាសក្នុងន័យ​ជំរុញឲ្យរដ្ឋាភិបាល​នៅ​ទ្វីបអាស៊ី​ត្រូវតែ​ចាត់វិធានការ​នៅ​​ថ្នាក់​ជាតិ និង​ថ្នាក់​តំបន់ ដើម្បី​ទាញយក​ផលប្រយោជន៍​ពី​សមាហរណកម្ម​សេដ្ឋកិច្ច​អាស៊ាន​។

សហគមន៍​សេដ្ឋកិច្ច​អាស៊ាន គឺធ្វើឡើង ដើម្បី​ត្រៀម​ជំហរ​ឲ្យបាន​រឹងមាំ សម្រាប់​ទប់ទល់​ជាមួយ​បម្រែបម្រួល​សេដ្ឋកិច្ច​ជា​សកល​។ ​នេះ​បើ​តាម​របាយ​ការណ៍​ថ្មី ដែល​ចេញផ្សាយ​ដោយ ADB នៅ​ថ្ងៃ​ទី​២៤ ខែ​តុលា​នេះ​។​

​ធនាគារ​អភិវឌ្ឍន៍អាស៊ី​បាន​បញ្ជាក់​ឲ្យដឹង​នៅ​ក្នុង​របាយការណ៍​របស់​ខ្លួន​បន្តទៀតថា វឌ្ឍនភាព​ក្នុង​ការឈាន​ទៅ​សម្រេច​ការបង្កើត​សហគមន៍ សេដ្ឋកិច្ច​​អាស៊ាន​កំពុងតែ​ដើរ​ទៅ​មុខ​បណ្តើរៗ ហើយ​តំបន់​នេះ​ចាំបាច់​ត្រូវតែ​ខិតខំ​ប្រឹងប្រែង​បន្ថែមទៀត ដើម្បី​ដោះស្រាយ​ឧបសគ្គ​នានា​៕

មី​យ៉ាន់​ម៉ា​​និង​​ ចិន​បើក​​ប្រតិបត្តិការ​​បំពង់​នាំ​​ប្រេង​​ហើយ

គំរោង​បំពង់​នាំ​ប្រេង​ដែល​លាតសន្ធឹង​ប្រមាណ​ជាង ​២.៥០០​គីឡូម៉េត្រ ពី​ភាគ​ខាងលិច​ប្រទេស​​ភូមា​ទៅកាន់​ភាគ​ខាងត្បូង​ប្រទេស​ចិន​​បាន​​ចាប់​ផ្តើម​​​ដំណើរ​យ៉ាង​ពេញលេញ​ហើយ កាល​ពី​ថ្ងៃអាទិត្យ​ម្សិលមិញ​នេះ។

ដូច្នេះ​បំពង់​នាំ​ប្រេង​នេះ​នឹង​ជួយ​ផ្គត់​ផ្គង​តម្រូវការ​ថាមពល​យ៉ាង​សម្បើម​ដល់​ប្រទេស​មហាអំណាច​សេដ្ឋកិច្ច​លំដាប់​ទី​២​​ លើ​ពិភពលោក​។​

អ្វី​ជា​ការគត់សម្គាល់​សមិទ្ធផល​ថ្មី​នេះ​បាន​កើតឡើង​ខណៈ​ដែល​នយោបាយ​រវាង​ប្រទេស​ទាំង​ពីរ​ហាក់​មិនសូវ​ចុះសម្រុង​គ្នា។

បន្ទាប់​ពី​ប្រទេស​មី​យ៉ាន់​ម៉ា​ផ្លាស់ប្តូរ​របប់​គ្រប់គ្រង​រដ្ឋ​ទៅ​ជា​របប់​ស៊ីវិល កាលពី​ឆ្នាំ​២០១១​មក និង​បាន​ធ្វើ​កំណែទម្រង់​ក្នុង​ប្រទេស​ទាំង​ស្រុង ដើម្បី​​រំដោះ​​ខ្លួន​​ចេញ​ពី​ទណ្ឌកម្ម​របស់​ពួក​បច្ចឹម​ប្រទេស។

​បំពង់​នាំ​ប្រេង​នេះ​ត្រូវ​បាន​ចំណាយពេល​សាងសង់​អស់​រយៈ​កាល​៣ឆ្នាំ។ ប្រេង​ឧស្ម័ន​ធម្មជាតិ នៅក្នុង​ទីក្រុង Kyaukphyu ក្នុង​រដ្ឋ​រាក់​ឃី​ន របស់​មី​យ៉ាន់​ម៉ា នឹង​ហូរ​នាំ​ប្រេង​ឆ្ពោះទៅ​តំបន់ Ruili ព្រំដែន​ប្រទេស​ចិន​​ជា​ទី​ដែល​មាន​ការប៉ះទង្គិច​គ្នា​នា​ដើមឆ្នាំ​នេះ រវាង​កងទ័ព​មី​យ៉ាន់​ម៉ា និង​ពួក​ឧទ្ទាម​ការឈីន។

អ្នក​រិះគន់​ជាច្រើនបាន​លើកឡើង​ថា គម្រោង​នេះ​បាន​រឹបអូស​យក​ដី​ពី​អ្នក​ស្រុក​នៅ​តំបន់​​នោះ​ជា​ច្រើន និង​បាន​ធ្វើអោយ​បរិស្ថាន​មាន​សភាព​គ្រោះ​ថ្នាក់​ទៀតផង​។

​គួរបញ្ជាក់​ថា នា​ពេលកន្លងមក​ប្រទេស​ចិន​ធ្លាប់បាន​ធ្វើ​ការប៉ាន់ប្រមាណ​ថា ចំនួន​ប្រេង​ដែល​ផ្គត់ផ្គង់​ដោយ​ប្រទេស​មី​យ៉ាន់​ម៉ា អាច​មាន​សមត្ថ​ភាព​បានចំនួន ២២​លានតោន ក្នុង​មួយ​ឆ្នាំ។ ហើយ​សម្រាប់ប្រទេស​មី​យ៉ាន់​ម៉ា​វិញ​នឹង​អាច​ទទួលបានចំណូល​ប្រចាំឆ្នាំ​សរុប​រហូត​ដល់​ប្រមាណ​៣៥លាន​ដុល្លារ៕(ដោយៈ​ថា ថៃ)​

​អាមេរិក​ខាត​២៤ពាន់​​លាន ពី​សេដ្ឋកិច្ច​ក្នុង​រង្វង់​​១៦​ថ្ងៃ ​ពេល​បិទ​រដ្ឋាភិបាល​

​ទីភ្នាក់ងារ​វាយតម្លៃ Standard & Poor បានបញ្ជាក់​ថា រដ្ឋាភិបាល របស់លោក អូ​បា​ម៉ា បាន​ខាតបង់ទឹកប្រាក់​ប្រមាណ​ជា ២៤ពាន់​លាន​​ដុល្លារ ពី​សេដ្ឋកិច្ច​របស់​ខ្លួន​នៅ​អំឡុង​ពេល ១៦​ថ្ងៃ ពេល​បិទ​រដ្ឋាភិបាល​របស់​ខ្លួន​។​

​ទីភ្នាក់ងារ​វាយតម្លៃ Standard & Poor ក៏បាន​លើកឡើង​ដែរ​ថា សេដ្ឋកិច្ច​សហរដ្ឋអាមេរិក​នឹង​កើនឡើង ក្នុង​រង្វង់ ២,៤ភាគរយ នៅ​ត្រីមាស​ទី​៤​ខាងមុខនេះ ដែល​ផ្ទុយទៅនឹង​ការព្យាករណ៍​ថា​នឹង​កើនឡើង ៣​ភាគរយ កាលពី​មុន​ពេល​បិទ​រដ្ឋាភិបាល​នោះ​។​

ការនាំ​ចេញ​​អង្ករ​​វៀតណាម​​នឹង​ធ្លាក់ចុះ​​នៅ​ឆ្នាំ​ក្រោយ​

​បើ​យោង​តាម​ការបញ្ជាក់​របស់​លោក Pham Dong Quang ប្រធាន​នាយកដ្ឋាន​ផលិតកម្ម​កសិផល​របស់​វៀតណាម​បានឲ្យដឹងថា ទិន្នផល​ស្រូវ​របស់​ប្រទេស​ខ្លួន​​នឹង​មាន​ការធ្លាក់​ចុះ​ចាប់​ពី​ឆ្នាំក្រោយ​នេះ​។

លោក​បន្តថា ការធ្លាក់ចុះ​នេះ​គឺ​បណ្តាលមកពី​កសិករ​បាន​ផ្លាស់ប្តូរ​ ចំពោះ​ការ​ផ្តោត​សំខាន់​ទៅ​ដំណាំ​ស្រូវ​មក​ដាំ​នូវ​ដំណាំ​ផ្សេងៗ​ទៀត​ដែល​ជា​តម្រូវការ​ចាំបាច់​របស់​ទីផ្សា មានដូចជា ដំណាំ​ពោត​ជាដើម​។

បើ​តាម​ការអះអាង​ពី​មន្ត្រី​វៀតណាម​ដដែល​ការផ្លាស់ប្តូរ​គោលដៅ​ក្នុង​ការដាំដុះ​នេះ នឹង​អាច​នាំឲ្យ​ប្រជាពលរដ្ឋ​មានជីវិ​ភាពប្រសើរជាង​មុន​តាមរយៈ​ការ​ដាំ​ដំ​ណាំ​​ផ្សេងៗ​ ​ទៀត​ដែល​អាច​ផ្តល់​កំរៃ​ខ្ពស់​។ ទាក់ទង​នឹង​បញ្ហា​នេះ​ដែរ ក្រសួង​កសិកម្ម​របស់​វៀតណាម​នឹង​ធ្វើ​ការសិក្សា​ក៏ដូចជា​ដាក់​ចេញ​នូវ​ផែនការ​នៅ​ចុងឆ្នាំ ២០១៣​នេះ​។​

​ក្រុម​អ្នក​សេដ្ឋកិច្ច​មួយចំនួន​បាន​មើលឃើញ​ថា ប្រសិនបើ ផលិតផល​អង្ករ​របស់​វៀតណាម មាន​ការធ្លាក់​ចុះ​មែន​នោះ​វា​នឹង​ផ្តល់​ឪ​កាស​ដល់​ប្រទេស​ជា​គូរ​ប្រជែង​មានដូចជា ប្រទេស​ឥណ្ឌា និង ថៃ​ជាដើម​ក្នុង​ការទទួលបាន​ផលប្រយោជន៏​ចំពោះ​ការនាំ​ចេញ​អង្ករ​ទៅ​លក់​នៅ​បរទេស​។

ចាប់តាំងពី​ឆ្នាំ​២០០១​មក ប្រទេស​វៀតណាម​បាន​បង្កើន​ការនាំចេញ​អង្ករ​របស់​ខ្លួន​ទៅ​កាន់​ពិភពលោកជា ច្រើន តាមរយៈ​ការលើក​ស្ទួយ​វិស័យ​កសិកម្ម និង ការកែរ​ទំរង់​គួរឲ្យ​កត់សម្គាល់​ចំពោះ​បច្ចេកទេស​ក្នុងកា​រ​ដាំដុះ​។

បើ​តាម​មន្ត្រី​ជំនាញ់​របស់​វៀតណា​មឲ្យដឹងថា រដ្ឋាភិបាល​នឹង​មិន​កំណត់​ចំពោះ​បរិមាណ​ដែល​ត្រូវ​ផលិត​ចំពោះមុខ​ដំណាំ​នីមួយ​នោះទេ ដើម្បី​ឲ្យ​កសិករ​​មាន​ជំរើស​​ក្នុងការ​ដាំ​ដំណាំ​ដែល​ស្របទៅនឹង តម្រូវការ​ទីផ្សា​ជាក់ស្តែង​។ ប៉ុន្តែ​រដ្ឋាភិបាល នឹង​បន្ត​ខិតខំ​ក្នុង​ការផ្តល់​នូវ​បច្ចេកទេស​ដាំ​ដុះ​ឲ្យ​កាន់តែ​ប្រសើរ​ថែម​ទៀត​​។​​​(ដោយៈអ៊ុន រស្មី)

សេដ្ឋកិច្ច​​ជប៉ុន​កើន​ឡើង​​ខ្ពស់ ​សម្រាប់​​ត្រីមាស​​ទី​២

​ក្នុង​រយៈពេល​តែ​៣​ខែ​ប៉ុណ្ណោះ​គឺ​ចាប់ពី​ខែ​មេសា រហូតដល់​ខែ​មិថុនា​ឆ្នាំ​២០១៣​នេះ សេដ្ឋកិច្ច​ប្រទេស​ជប៉ុន​បាន​រីកចម្រើន​ឡើង​រហូត​ដល់​ទៅ​០.៩​​ភាគរយ បើ​ប្រៀបធៀប​នឹង​រយៈពេល​៣​ខែ​ផ្សេងៗ​ទៀត​។

កំណើត​សេដ្ឋកិច្ច ដែល​ត្រូវបាន​គេ​បញ្ជូលទៅ​ក្នុង​កំណើន​ប្រចាំ​ឆ្នាំ​នោះ គឺ​៣.៨​ភាគរយ។ តាមពិតទៅ​ការកើនឡើង​នេះ​វា​ហួត​ពីអ្វី​ដែល​គេ​ព្យាករណ៍​​ទុក​​ទៅ​ទៀត ដែលថា​អាច​នឹង​កើនឡើង​ត្រឹមតែ​០.៦​ភាគរយ​ប៉ុណ្ណោះ។

​គួរបញ្ជាក់​ថា ប្រទេស​ជប៉ុន​បានចាប់ផ្តើម​ប្រើប្រាស់​វិធានការ​ដ៏​ខ្លាំងក្លា​បំផុត ​ដើម្បី​ទម្លុះទម្លាយ​រាល់ឧ​បគ្គស​គ្គ​ក្នុង​រយៈពេល​ប៉ុន្មាន​ខែ​ថ្មីៗ​នេះ ដើម្បី​​ស្តា​​កំណើន​សេដ្ឋកិច្ច​របស់​ខ្លួន​ឡើងវិញ ក្នុងនាម​ជា​ប្រទេស​សេដ្ឋកិច្ច​ធំ​បំផុត​លំដាប់​ទី​៣​នៅលើ​ពិភពលោក បន្ទាប់​ពី​សេដ្ឋកិច្ច​របស់​ខ្លួន បាន​​ដាំ​ក្បាល់​ចុះ​អស់​ជាច្រើន​ឆ្នាំ​មក ។

​វិទ្យាស្ថាន​ស្រា​ជ្រាវ Fujitsu បាន​លើកឡើង​ថា អ្នកបង្កើត​គោលនយោបាយ​ជប៉ុន បាន​សម្តែង​នៅ​សុទិដ្ឋិនិយម​យ៉ាងខ្លាំង​នៃ​ដំណើរ​ដ៏​ជឿន​លឿន​​នៃ​​សេដ្ឋកិច្ច​​ដែល​ក្រុមហ៊ុន​ជាច្រើន ចាប់ផ្តើម​បោះ​វិនិយោគ​យ៉ាង​សម្បើម។

យ៉ាងណាក៏ដោយ រដ្ឋាភិបាល​ជប៉ុន​ក៏​កំពុង​តែពិចារណា​ពី​ការដំឡើង​អត្រាពន្ធ​លក់​ដែរ នោះ​គឺ​ពន្ធ​រកស៊ី​នា​ក្នុង​ប្រទេស​ជប៉ុន។ នាពេល​បច្ចុប្បន្ន​​នេះ​អត្រាពន្ធ​មាន​ត្រឹម​៥​ភាគរយ​ប៉ុណ្ណោះ ហើយ​ស្ថិត​នៅក្រោម​ផែនការ​របស់​រដ្ឋាភិបាល​នៅឡើយ​ទេ ប៉ុន្តែ​អាច​នឹង​ឡើង​ខ្ពស់​រហូតដល់​ទៅ​១០ ភាគរ​យ នៅ​ឆ្នាំ​២០១៥​ខាងមុខ។

​អ្នកបង្កើត​គោលនយោបាយ​ជប៉ុន បាន​ជជែក​រក​ហេតុផល​ថា វិធានការណ៍​ទាំងនេះ គឺ​គន្លឹះ​ដ៏​សំខាន់​បំផុត​ដើម្បី​កាត់បន្ថយ​បំណុល​សាធារណៈ​​ខ្ពស់​នៅ​ប្រទេស​ជប៉ុន ដែល​ស្ថិតនៅ​ចន្លោះ​២៣០​ភាគរយ​នៃ​ផលិតផល​ក្នុងស្រុក​សរុប​។

ហើយ​ក្នុង​ពេល​ជាមួយគ្នា​នោះ​រដ្ឋាភិបាល​ហ្ស៊ី​ន​ហ្ស៊ូ​អាបេ ក៏​ត្រូវការ​បង្កើន​ចំណូល​ដែរ ដើម្បី​ចំណាយ​ទៅលើ​សុខមាលភាព​ខណៈ​ប្រជាជន​របស់​ខ្លួន មាន​វ័យ​ចំណាស់​កាន់តែ​ខ្ពស់។ បើ​តាម​ការសន្និដ្ឋាន​ចំនួន​ប្រជាជន​ជប៉ុន​ប្រមាណ​​ជា​៤០% នឹង​ត្រូវ​ចូល​សោធន៍​និវត្តន៍នៅ​ឆ្នាំ​២០៦០។

​ក៏​ប៉ុន្តែ​អ្វី​ដែល​ជា​ក្តី​បារម្ភ​នោះ គឺ​ការដំឡើង​ពន្ធ​ទៅវិញ​ទេ ដែល​អាច​ធ្វើអោយ​ប៉ះពាល់​ដល់​តម្រូវការ​ក្នុងស្រុក​និង​បណ្តាល​ឲ្យ​រាំងស្ទះ​ដល់​ការ​ស្ទុះ​ងើប​ឡើងវិញ​នៃ​សេដ្ឋកិច្ច​ក្នុងប្រទេស៕(ដោយៈថា ថៃ)​

ទីផ្សារ​​អចលន​ទ្រព្យ​របស់​​កូរ៉េ​​ខាងត្បូង​រស់​​ឡើង​​វិញ

​យោងតាម​សេចក្តីប្រកាស​ព័ត៌មាន​ពី​ក្រសួង​ចំនួន​៥​របស់​ប្រទេស​កូរ៉េខាងត្បូង​រួម​មាន​ក្រសួង​ហិរញ្ញវត្ថុ​ផង​នោះ កាល​ពី​​ម្សិល​មិញ​​បាន​​ឲ្យ​​ដឹង​​ថា រដ្ឋាភិបាល​នឹង​កាត់បន្ថយ​ពន្ធ​ទិញ​ផ្ទះ និង​បង្កើន​ការផ្ដល់​ប្រាក់កម្ចី​ទាប​។

បន្ថែម​ពី​នេះ​ទៀត ក្រៅពី​កូរ៉េខាងត្បូង​បាន​ប្រកាស​ពី​វិធានការ​ក្នុង​ការគាំទ្រ​ទីផ្សារ​អចលនទ្រព្យ​នោះ​លោកស្រី​ប្រធានាធិបតី Park Geun Hye  ក៏​​ស្វែង​រក​​ការ​ជំរុញ​កំណើន​សេដ្ឋកិច្ច និង​ជួយ​ដល់​គ្រួសារ​ដែល​មាន​ចំណូល​ទាប ។​

​ការធ្វើឲ្យ​ទីផ្សារ​អចលនទ្រព្យ​រស់ឡើង​វិញ គឺជា​គន្លឹះ​ដ៏​សំខាន់​ដល់​កិច្ចខិតខំ​ប្រឹងប្រែង​របស់​រដ្ឋាភិបាល​ក្រុង​សេ​អ៊ូល​ក្នុង​ការជំរុញ​ដល់​សុខុមាល​ភាព​​សង្គម និង​ដឹកនាំ​សេដ្ឋកិច្ច​។

គួរ​បញ្ជាក់​​ថា វិធានការ​នេះ​នឹង​កាត់បន្ថយ​ពន្ធ​ទិញ​ផ្ទះ​ចាប់ពី​១ភាគរយ និង​៣​ភាគរយ ពោល​គឺ​ធ្លាក់ចុះ​ពី២ ភាគរយ​ទៅ ៤ភាគរយ អាស្រ័យ​លើ​តម្លៃ​ផ្ទះ​ដោយ​មិន​គិត​ពី​ចំនួន​ផ្ទះ​ដែល​អ្នកទិញ​បាន​កាន់កាប់​រួចហើយ​នោះទេ៕

វិបត្តិ​​នៅ​​ស៊ី​រី​ញាំ​ង​​ឲ្យ​​តម្លៃ​​ប្រេង​​លើ​ទីផ្សា​​ពិភព​លោក​​ឡើង​ថ្លៃ

តម្លៃ​ប្រេង​ឆៅ​នៅលើ​ទីផ្សារ​ពិភពលោក​បាន​នឹង​កំពុង​ហក់​ឡើង​ខ្ពស់​យ៉ាងខ្លាំង ដោយសារតែ​ប្រទេស​មហាអំណាច​លោកខាងលិច ប្រកាស​ពី​ការដាក់ទណ្ឌកម្ម និង​ត្រៀមលក្ខណៈ​ក្នុង​ការវាយប្រហារ​កម្ទេច​របប​ស៊ី​រី។

វិបត្តិ​ដ៏​​សាំ​ញាំ​ទាំងនេះ​ក៏​កំពុងតែ​ធ្វើឲ្យមាន​ការព្រួយបារម្ភ​កាន់តែ​ខ្លាំង​ដែរ ជុំវិញ​ការផ្គត់ផ្គង់​ប្រេង​ឆៅ​នៅ​មជ្ឈឹម​បូ​ព៌ា​និង​នៅ​តំបន់​អាស៊ី​អាគ្នេហ៍។

​កាលពី​ថ្ងៃ​ពុធ​ម្សិលមិញ​តម្លៃ​ប្រេង​នៅលើ​ពិភពលោក បាន​​ឡើង​ដល់​​ជាង​​២​ដុល្លា ​ដោយ​​ប្រេង​ Brent ​នៅ​ផ្សារ​​ក្រុង​​ឡុង​​ដ៍​បាន​​ឡើង​​លើ​​១១៧​ដុល្លារ​ក្នុង​មួយ បារ៉ែល និង​ប្រេង​នៅ​ផ្សារ​អាមេរិក​ឡើង​ដល់​កំរិត​ខ្ពស់​បំផុត​ក្នុង​រយៈពេល​ជាង​១៨​ខែ​កន្លងមកនេះ។​

​ជាមួយគ្នានេះដែរ ការផលិត​ប្រេង​ឆៅ​នៅ​ប្រទេស​លី​ប៊ី​ប្រហែលជា អាច​ធ្លាក់ចុះ​យ៉ាង​គំហគ រហូតដល់​២០០,០០០​បារ៉ែល​ក្នុង​មួយ​ថ្ងៃ បន្ទាប់​ពី​បិទ​ទ្វា​រោងចក្រ​ផលិត​ប្រេង​Elephant កាលពី​ថ្ងៃ​ច័ន្ទ ដោយសារតែ​មាន​មហា​បាតុកម្ម​។

ក៏​ប៉ុន្តែ​យ៉ាងណា​ក៏ដោយ​អ្នកវិភាគ​មួយ​ចំនួនបា​និយាយថា ការផ្គត់ផ្គង់​ប្រេង​នៅលើ​ទីផ្សា​នៅ​ប្រទេស​អាមេរិក​ខាងជើង និង​ប្រទេស Saudi Arabia នឹង​គ្រប់គ្រាន់​ដោយ​មាន​តម្លៃ​សមរម្យ​ទៀតផង៕(ដោយៈថា ថៃ)

ប្រទេស​ឡាវ​គ្រោង​ទិញ​យន្តហោះ​ចំនួន​៤​​គ្រឿងបន្ថែម​ទៀត

ដើម្បី​ឆ្លើយ​នឹង​តម្រូវការ​ជើងហោះហើរ ចេះតែ​កើនឡើត​ឥត​ឈប់ឈរ​សោះ​នោះ ក្រុមហ៊ុន​អាកាសចរណ៍​ឡាវ គ្រោង​នឹង​ទិញ​យន្តហោះ​ម៉ូ​ដែល​ATR72-600ចំនួន២គ្រឿង​នៅ​ឆ្នាំក្រោយ​នេះ និង​យន្តហោះ​ម៉ូ​ដែលAirbus 320 ចំនួន២គ្រឿងនៅ​ឆ្នាំ២០១៥ខាងមុខ ។

នេះ​បើ​តាម​សារពត៌មានVientiane Times កាល​ពី​ច័ន្ទ​ម្សិលមិញ។ មិនតែប៉ុណ្ណោះ​ឡើយ នៅ​ខែ​តុលា ក្រុមហ៊ុន​អាកាសចរណ៍ Lao Airlines នឹង​បង្កើន​ជើងហោះហើរ​ប្រចាំថ្ងៃ​របស់​ខ្លួន ពី​ទីក្រុង​វៀងចន្ទន៍ និង​ទីក្រុងឧត្តម​សាយ​ក្នុង​ខេត្តបរកែវ និង​ខេត្ត​លួង​នាំ​ថា ពី៣ទៅ៤​ជើង ។

ហើយ​ក្នុង​ខែ​ដដែល​នោះ ក្រុមហ៊ុន​ហោះហើរ​មួយ​នេះ  នឹង​ចាប់ផ្តើម​ផ្តល់​សេវា​ហោះហើរ​ទៀងទាត់ ទៅ​កាន់​ទីក្រុង អ៊ី​ន​ជុន ក្នុង​ប្រទេស​កូរ៉េ​ខាង​ត្បូង​ទៀត​ដែរ  ។

គួរគត់សម្គាល់​ថា សម្រាប់​ខែ​តុលា នៅ​ប្រទេស​ឡាវ គឺជា​រដូវ​កាល​ទេសចរណ៍​ដ៏​មមាញឹក​បំផុត​។ នៅ​ឆ្នាំ២០១២ ប្រទេស​ឡាវ បាន​ទទូល​ភ្ញៀវ​ទេសចរ​បរទេស​បរ​ទេស ចំនួន​ជាង៣,៣ លាន​នាក់ ស្មើ​នឹង​ពាក់កណ្តាល​ប្រជាជន​សរុប​ប្រទេស​នេះ និង​ផ្តល់​ប្រាក់​ចំណូល​ប្រមាណ១៣​លា​ន​​​ដុល្លារ ។​

​គួរបញ្ជាក់​ថា ក្រុមហ៊ុន Lao Airlines ត្រូវបាន​បង្កើតឡើង​នៅ​ឆ្នាំ១៩៧៦ ដែល​បច្ចុប្បន្ន​មាន​យន្តហោះ​ចំនួន ១៤​គ្រឿង ដូចជា​យន្តហោះ​ម៉ូ​ដែល A320 ចំនួន ៤ គ្រឿង យន្តហោះ​ម៉ូ​ដែល ATR72-500 ចំនួន៤គ្រឿងយន្តហោះ​ម៉ូ​ដែលATR72-600 ចំនួន២គ្រឿង និង​យន្តហោះ​ម៉ូ​ដែលMA60 ចំនួន៤គ្រឿង​៕(ដោយៈថា ថៃ)

វៀតណាមនឹង​បង្កើត​​ព្រលាន​យន្តហោះ​ទី​ពីរ​

ក្រសួង​ដឹកជញ្ជូន​វៀតណាម​បានឲ្យដឹងថា ទីក្រុង​ហូ​ជី​មី​ញ ចាំបាច់​ណាស់ ក្នុង​ការសាងសង់​ឲ្យមាន ព្រលាន​យន្តហោះ​ថ្មី​មួយ និង​ជា​ព្រលាន​ទី​ពីរ ដើម្បី​បន្ធូរបន្ថយ​ការកកស្ទះ​ចរាច​រណ៍​នៅ​អាកាសយានដ្ឋាន ដែល​មាន​ស្រាប់​នៅ​ក្នុង​មជ្ឈមណ្ឌល​ពាណិជ្ជកម្ម ​ដែល​ស្ថិត​នៅ​ភាគខាងត្បូង​នៃ​ប្រទេស​វៀតណាម។​

​ក្រសួង​ដឹកជញ្ជូន​វៀតណាម បាន​ផ្ញើ​លិខិត្ត​ស្នើ​សុំ​ទៅ​កាន់​រដ្ឋាភិបាល​រួចហើយ ដែលមាន​ខ្លឹមសារ ចង់ឲ្យ​បង្កើត​ព្រលាន​យន្តហោះ​ថ្មី​មួយ ដែល​មានឈ្មោះ​ថា Long Thanh  ជំនួស​ឲ្យ​ការពង្រីក​ព្រលានយន្តហោះTan Son Nhat។​

តាម​គម្រោង បានបង្ហាញ​ថា ការសាងសង់​ព្រលានយន្តហោះ​ថ្មី​នេះ នឹង​មាន​ចម្ងាយ​ប្រហែល៤០គីឡូម៉ែត្រ​នៅ​ភាគ​ឦសាន​ទីក្រុង​ហូជីមិញ ត្រូវបាន​ប៉ាន់ស្មាន​ថា នឹង​ចំណាយ​ទឹកប្រាក់​ចំនួន៨ពាន់​លាន​ដុល្លារ។ ព្រលាន​ថ្មី​នេះនឹង​សាងសង់​លើ​ផ្ទៃដីទំហំ៥ ,០០០ហិកតា ដែល​អាច​ទទួល​អ្នក​ធ្វើ​ដំណើរ​ចំនួន​រហូត​ដល់១០០លាន​នាក់​ក្នុង​មួយ​ឆ្នាំ ។​

​គួរបញ្ជាក់​ថា ព្រលានយន្តហោះTan Son Nhat ដែល​មាន​រយៈ​ចម្ងាយ​ប្រហែល៦គីឡូម៉ែត្រ​នៅ​ភាគ​ខាងជើង​នៃ​ទីក្រុង​ហូជីមិញ នឹង​មិន​អាច​មាន​សមត្ថភាព​ទទួលភ្ញៀវ​បាន​តទៅទៀត​ទេ​នៅ​ក្រោយ​ឆ្នាំ២០២០ ខណៈ​ដែល​គេ​ព្យាក​រថា នឹងមាន​អ្នកធ្វើ​ដំណើរ​លើស​ពី​សមត្ថភាព​របស់​ព្រលាន​នេះ ដែល​ផ្ទុក​បាន​អតិបរមា​ចំនួន២៥លាន​នាក់​នោះ ។

គម្រោង​ថ្មី​នេះ​ត្រូវបាន​អនុវត្ត​ដោយ​នាយករដ្ឋមន្ត្រី​វៀតណាម ហើយ​ដំណាក់កាល​សាងសង់​ដំបូង​អាច​ចាប់ផ្តើម​នៅ​ឆ្នាំក្រោយ និង​បញ្ចប់​នៅ​ឆ្នាំ​២០២០​ខាងមុខ៕ (ដោយៈថា ថៃ)

នៅ​ខែ​កក្កដា​ឱនភាព​ពាណិជ្ជកម្ម​រ​បស់​ជប៉ុនកើនឡើង​​ជិត​ទ្វេដង

​យោង​តាម​ទិន្នន័យ​ផ្លូវការ​​ដែល​បាន​ចេញផ្សាយ​​កាលពី​ថ្ងៃ​ចន្ទ​ម្សិលមិញ​បានអោយដឹងថា កាលពី​ខែកក្កដា​កន្លងទៅ ឱនភាព​ពាណិជ្ជកម្ម​រ​បស់​ប្រទេស​ជប៉ុន​បាន​​កើនឡើង​ជិត​ពីរ​ដង ដោយ​សារ​តែ​ការធ្លាក់​ថ្លៃ​ប្រាក់​យ៉េន បាន​ធ្វើ​ឲ្យ​ការចំណាយ​លើ​​ការ​នាំចូល​ថាមពល​របស់​​ប្រទេស​មួយ​នេះ​ហក់​ឡើង​ខ្ពស់បើទោះជា​ការនាំ​ចេញ​បាន​កើន​ឡើង​ក៏​ដោយ ។​
​ក្រសួង​ហិរញ្ញវត្ថុ​ជប៉ុន​បាន​រាយការណ៍​ថា ឱនភាព​មាន​កម្រិត​ខ្ពស់​ជាង​ការរំពឹងទុក​នេះ គឺ​មាន​រហូត​ដល់ជាង​១០,៥ពាន់​លាន​ដុល្លារក្នុង​ខែកក្កដា ធៀប​នឹង​រយៈពេល​ដូច​គ្នា​កាល​ពី​ឆ្នាំ២០១២ ដែល​ឱនភាព​មាន​កម្រិត​ត្រឹមតែ៥២៨,៥៥ពាន់​លាន​យ៉េន​ប៉ុណ្ណោះ​។

យ៉ាងណាក្តីលោក Hideki Matsumura អ្នកវិភាគ​ប្រចាំ​វិទ្យាស្ថាន​ស្រាវជ្រាវ​ជប៉ុន ឱនភាព​នេះ​អាច​នឹង​ថយចុះ​វិញ​ជា​បណ្តើរៗ ខណៈ​ដែល​ការនាំចេញ​អាច​នឹង​មាន​កម្រិត​ខ្ពស់​ជាង​ការ​នាំចូល ដោយសារ​ឥទ្ធិពល​ប្រាក់​យ៉េន​។​

​​ឱនភាព​ពាណិជ្ជកម្ម​នេះ​​បាន​កើតមានឡើង​នៅពេល​ដែល​ទំហំ​នាំចេញ​បាន​ហក់ឡើង ១២.២ ភាគរយ​នៅ​ខែ កក្កដា ធៀប​នឹង​រយៈពេល​ដូច​គ្នា​កាលពី​ឆ្នាំមុន ដោយសារ​កំណើន​​តម្រូវការ​ខ្ពស់​នៅ​អាមេរិក និង​ប្រទេស​ចិន​ក៏​ដូចជា​នៅ​តំបន់​អឺរ៉ុប​ផង​ដែរ​៕(ដោយៈថា ថៃ)

កំណើន​​សេដ្ឋកិច្ច​​ក្នុង​​ប្រទេស​​ថៃ ​កើន​​ឡើង​​​យឺត​នៅ​ត្រីមាស​​ទី​២​ឆ្នាំ​នេះ​

យោង​តាម​ការផ្សាយ​របស់ Bloomberg សេដ្ឋកិច្ច​របស់​ប្រទេស​ថៃ​មាន​កំណើន​ត្រឹមតែ​​២.៨ភាគ ក្នុង​រយៈពេល​បី​ខែ​​ ចាប់ពី​​ខែ​​មេសា ដល់​​ខែ​​​មិថុនា​​​នេះ។

ខណៈ​កាលពី​ត្រីមាស​មុន សេដ្ឋកិច្ច​​ប្រទេស​​ថៃ​មាន​កំណើន​រហូត​ដល់​៥.៤​ភាគរយ ជាមួយនឹង​ការ ធា្ល​ក់​ចុះ​នៃ​លុយ​បាត​ជិត​៥​ភាគរយ បើ​ធៀប​នឹង​លុយ​ដុល្លា​អាមេរិក​នោះ​ហើយ​ការនាំ​ចេញ​មាន​កំណើន​​តែ​​០.៩៥ភាគរយ​តែ​ប៉ុណ្ណោះ។

ក្រុមប្រឹក្សា​អភិវឌ្ឍន៍​សង្គម និង​សេដ្ឋកិច្ច​ជាតិ​បានឲ្យ​ដឹង​នៅ​ថ្ងៃច័​ន្ទ​នេះ​ថា កំណើន​សេដ្ឋកិច្ច​របស់​ប្រទេស​ថៃ សម្រាប់​ត្រីមាស​ទី​២ ធៀប​​នឹង​​ត្រី​មាស​ទី​​១​ឆ្នាំ​នេះ គឺ​បាន​កើនឡើង​យឺត​ជាង​ឆ្នាំ​មុន។

ការធ្លាក់ចុះ​នៃ​សេដ្ឋកិច្ច​របស់​ប្រទេស​នៅក្នុង​តំបន់​អាស៊ីអាគ្នេយ៍​មួយ​នេះ គឺ​ដោយសារតែ​មាន​ការរាំងស្ទះ​ក្នុង​ការនាំចេញ និង​ការធ្លាក់ចុះ​ការវិនិយោគទុន​នៅក្នុង​ប្រទេស​រួម​ទាំង​តម្រូវការ​ក្នុងស្រុក​ក៏​បាន​ថមថយ​ចុះ​ដែរ​។​

​ជាមួយគ្នានេះដែរ ក្រុមប្រឹក្សា​អភិវឌ្ឍន៍​សង្គម និង​សេដ្ឋកិច្ច​ជាតិ​ក៏​បាន​ទម្លាក់​ការព្យាករណ​កំណើ​ន​DGP​ពី​មុន​ដែរ ដែល​ចាប់ពី​៤.២​ភាគរយ ដល់​៥.២​ភាគរយ​នោះ មក​នៅត្រឹម​៣.៨​ភាគរយ ដល់​៤.៣​ភាគរយ​វិញ ។

យ៉ាងណាក្តី​រដ្ឋាភិបាល​ប្រទេស​ថៃ​រំពឹងថា កំណើន​សេដ្ឋកិច្ច​សកល​នឹង​ងើប​ឡើងវិញ​យ៉ាង​ឆាប់រហ័ស។ ដោយ​ឡែក​​សម្រាប់​​ផែន​ការ​​វិនិយោគ​​នានា ត្រូវ​បាន​រដ្ឋាភិបាល​ផ្អាក់​ទុក​មួយ​ឡែក ព្រោះ​រងចាំ​ដោះស្រាយ​ជម្លោះ​ផ្នែក​នយោបាយ​ឲ្យមាន​ស្ថិរភាព​ជាមុនសិន៕

​នៅ​ត្រី​​មាន​​ទី​ពីរ​ឆ្នាំនេះ ​ឥណ្ឌា​នាំចូល​​មាស​​កើន​ឡើង​​ទ្វេដង​

​ប្រទេស​ឥណ្ឌា​ដែល​ល្បីល្បាញ​ថា ប្រើប្រាស់​មាស​ច្រើនជាងគេ​បំផុត​នៅលើ​ពិភពលោក​នោះ​សម្រាប់​ត្រីមាស​ទី​ពីរ ឆ្នាំ​២០១៣​នេះ ប្រទេស​មួយ​នេះ​បាន​នាំ​ចូល​មាស​កើន​ឡើង​​ជាង​​ពីរ​ដង បន្ទាប់​ពី​តម្លៃ​មាស​​បាន​ធ្លាក់ចុះ​កាលពី​​ខែ​មេសា​​កន្លងមក​។ នេះ​បើ​យោង​តាម​ក្រុមប្រឹក្សា​មាស​ពិភពលោក។

ប្រភព​ដដែល​បង្ហាញថា ការនាំ​ចូល​មាស​នៅ​ប្រទេស​ឥណ្ឌា បាន​កើនឡើង​រហូត​ដល់ ៣៣៨តោន នៅ​ត្រីមាស​ទី​ពីរ ធៀប​ទៅ​នឹង​រយៈពេល​ដូចគ្នា កាលពី​ឆ្នាំមុន​ដែល​បាន​នាំ​ចូល​​ចំនួន​១៥៣តោន​ប៉ុណ្ណោះ។​

​ក្រុមប្រឹក្សា​មាស​ពិភពលោក​បាន​ឲ្យដឹង​បន្ត​ថា តម្រូវការ​មាស​សរុប​បាន​កើនឡើង​៧១​ភាគរយ ដល់​៣១០​តោន ពោល​គឺ​តម្រូវកា​រមាស​ដុំ និង​កា​សមាស​បាន​កើនឡើង​រហូត​ដល់ ១២២​តោន ហើយ​ចំណែក ការលក់​គ្រឿងអលង្ការ​បាន​កើនឡើង ៥១ភាគរយ ដល់​១៨៨តោន ។

​គួរបញ្ជាក់​ថា ដោយសារ​តែ​កំណើន​នៃ​ការ​នាំចូល​មាស​ដ៏​ខ្ពស់​នេះ​បាន​ជំរុញ​ឲ្យ​រដ្ឋាភិបាល​ប្រទេស​​ឥណ្ឌា​ដំឡើង​ពន្ធ​លើ​ការ​នាំចូល​មាស​ជា​លើក​ទី​បីនា​ក្នុង​ឆ្នាំនេះ ដើម្បី​គ្រប់គ្រង​​ឱន​ភាព​​ថវិកា ដែល​មាន​កម្រិត​ខ្ពស់​បំផុត និង​បាន​ធ្វើឲ្យ​ប្រាក់​រូពី ធ្លាក់​ថ្លៃ​ដល់​តម្លៃ​ទាប​បំផុត។

យ៉ាងណាក្តី​សហព័ន្ធ​ពាណិជ្ជកម្ម​ត្បូង​មាន​តម្លៃ និង​គ្រឿងអលង្ការ​របស់​ឥណ្ឌា បានឲ្យដឹងថា ការដំឡើង​អត្រាពន្ធ​ខ្ពស់ និង​បទ​ប្បញ្ញត្តិ​របស់​ធនាគា​រ​កណ្តាល​ឥណ្ឌា​ទាក់ទង​នឹង​ការ​ទិញ​មាស​ពី​បរទេស​នេះ បាន​កាត់បន្ថយ​ការនាំ​ចូល​មាស​នៅ​ឆមាស​ទី​ពីរ​ក្នុង​ឆ្នាំ​២០១២ ពី​ចំនួន ៤៧៨​តោន មក​នៅត្រឹម​ចំនួន​ប្រហែល​ពី​១៥០តោន និង​បាន​ជំរុញ​ឲ្យមាន​ការ​រត់​ពន្ធ​មាស​​ទៀត​ផង៕(ដោយៈថា ថៃ)​

​នៅ​​ប្រទេស​​ចិន​ការប្រើប្រាស់​​ថាមពល​ក្នុង​​វិស័យ​​ឧស្សាហកម្ម​​កើនឡើង

គិត​ត្រឹម​ខែកក្កដា ឆ្នាំនេះ​នៅ​ប្រទេស​ចិន​បាន​ប្រើប្រាស់​ថាមពល​ក្នុង​ឧស្សាហកម្ម បាន​កើនឡើង​រហូត​ដល់​កម្រិត​ខ្ពស់បំផុត​ដែល​នេះ​ជា​សញ្ញា​បង្ហាញ​ថា ប្រទេស​មាន​សេដ្ឋកិច្ច​ធំ​លំដាប់​ទី​២​នៅលើ​ពិភពលោក​មួយ​នេះ កំពុងតែ​ធ្វើឲ្យ​មាន​ស្ថិរភាព​សេដ្ឋកិច្ច។​

​យោង​ទិន្នន័យ​របស់​អាជ្ញាធរ​ថា​ម​ពល​ជាតិ​បានបង្ហាញ​កាលពី​ម្សិលមិញ​ថា ការប្រើប្រាស់​ថាម​​ពល​សរុប​នៅ​ខែ​កក្កដា បាន​កើនឡើង​៨.៨​ភាគរយ​ដល់​៤៩៥ពាន់​លាន​គីឡូវ៉ាត់​ម៉ោង។

ជា​មួយ​គ្នា​នេះសម្រាប់​អ្នក​ប្រើប្រាស់​តាម​ផ្ទះ​បាន​ប្រើ​អស់ ៥៨,៥​ពាន់​លាន​គីឡូវ៉ាត់ម៉ោង​កើនឡើង ១២​ភាគរយ​ធៀប​នឹង​ឆ្នាំ​មុន ខណៈ​ការប្រើប្រាស់​ក្នុង​ឧស្សាហកម្ម​សេវាកម្ម​កើនឡើង​ពី​១៣​ភាគរយ ដល់ ៥៨,៦ពាន់​លាន​គីឡូវ៉ាត់ម៉ោង ។​

​ក្នុង​ទិន្នន័យ​ផ្លូវការ​ដដែល​បាន​បង្ហាញ​ទៀត​ថា ការប្រើប្រាស់​ថាមពល​នៅតាម​បណ្ដា​ក្រុមហ៊ុន​នានា​នៅក្នុង​វិស័យ​រុករក​រ៉ែ វិស័យ​រោងចក្រ និង​វិស័យ​សំណង់​បាន​កើនឡើង ៨,១​ភាគ​ដល់ ៣៦៦,៦​ពាន់​លាន​គីឡូវ៉ាត់ម៉ោង ធៀប​នឹង​ឆ្នាំមុន។

ហើយ​តម្រូវការ​ថាមពល​បាន​កើនឡើង​យ៉ាង​ខ្ពស់ត្រដែត​នេះ ខណៈ​រដ្ឋាភិបាល​បាន​ជំរុញ​ក្នុង​ការវិនិយោគឲ្យ​បានកា​ន់តែ​ច្រើនឡើង​នៅ​ក្នុង​ហេដ្ឋារចនាសម្ព័ន្ធ និង​នគរូប​នី​យ​កម្ម​​ទិន្នផល​ឧស្សាហកម្ម​៕(ដោយៈថា ថៃ)​

Vayo FM Song Request