នយោបាយ

កូរ៉េខាងជើង​​បដិសេធ​​សំណើ​រ​ពិភាក្សា​រ​បញ្ហា​ជួប​ជុំ​គ្រួសារ​​ជា​ទៀងទាត់​​របស់​កូរ៉េខាងត្បូង​

ត្រឹម​តែ​រយៈពេល​មួយ​ថ្ងៃ​ប៉ុណ្ណោះ បន្ទាប់​ពី​កូរ៉េខាងត្បូង​បាន​ដាក់​សំណើ​ទៅ​កូរ៉េខាងជើង​ក្នុង​គោលបំណង​សុំ​ជួប​ពិភាក្សា​ពី​បញ្ហា ការបង្កើត​ឱ្យ​មាន​ការ​ជួបជុំ​គ្រួសារ​ដែល​បាន​បែកបាក់​គ្នា​ជា​ទៀត​ទាត់​មួយ កូរ៉េខាងជើង​ក៏​បាន​ប្រកាស​បដិសេធ​ចំពោះ​សំណើ​នេះ​។

ការបដិសេធ ត្រូវបាន​កូរ៉េខាងជើង​លើកឡើងថា​ជា​រឿង​ដែល​មិន​គប្បី ធ្វើឡើង​តាមរយៈ​កាកបាទ​ក្រហម​របស់​កូរ៉េខាងជើង​ឡើយ គួរតែ​មាន​ការពិភាក្សា​គ្នា​រវាង​មន្ដ្រីជាន់ខ្ពស់​របស់​ប្រទេស​ទាំង​ពីរ​។

ម្យ៉ាងវិញទៀត​ការពិភាក្សា​នេះ​អាច​ធ្វើទៅបាន លុះត្រាតែ​ភាគី​ទាំងពីរ​មិន​មាន​ការប្រឈមមុខ​ដាក់គ្នា ក៏​ដូច​ជា​ការចោទប្រកាន់​គ្នា​ទៅវិញទៅមក បើ​មិន​ដូច្នេះ​ទេ ការពិភាក្សា​មិនអាច​ប្រព្រឹត្ដទៅបាន​ឡើយ​។​

​ជា​ការឆ្លើយតប​ក្រសួង​បង្រួបបង្រួម​កូរ៉េខាងត្បូង បាន​សម្ដែង​នូវ​ការសោកស្ដាយ​យ៉ាងខ្លាំង​ទៅលើ​ការបដិសេធ​របស់​កូរ៉េខាងជើង​។ កូរ៉េ​ខាង​ត្បូង​​​បាន​​បន្ថែម​ទៀត​ថា បញ្ហា​ទាក់ទង​នឹង​គ្រួសារ​ដែល​បាន​បែកបាក់​គ្នា​ក្រោយ​ពេល​សង្គ្រាម​បែងចែក​ទឹកដី​កាលពី​ឆ្នាំ​១៩៥០​ដល់​១៩៥៣ គួរ​តែ​​ដោះ​ស្រាយ​​មុន​​បញ្ហា​​ដទៃ​ទៀត មិន​ត្រូវ​ភ្ជាប់​ជាមួយ​រឿង​ផ្សេង​ឡើយ​។

​សូម​បញ្ជាក់​ឡើងវិញ​ថា ការជួប​គ្នា​ជា​ទៀត​ទាត់​ដែល​កូរ៉េខាងត្បូង​ចង់បាន​នោះ គឺ​មិនមែន​សំដៅលើ​តែ​ព្រឹត្ដិការណ៍​ជួប​គ្នា​ផ្ទាល់​នោះទេ កូរ៉េ​ខាង​ត្បូង​​ចង់ឱ្យ​មាន​ការជូន​ដំណឹង​ឱ្យ​គ្នា​ទៅវិញទៅមក​ពី​ស្ថានភាព​រស់នៅ​ការស្លាប់​បាត់បង់​ជីវិត​ការផ្ញើ​សំបុត្រ​សួរសុខទុក្ខ និង​ការផ្ញើ​ជា​ខ្សែអាត់​វីដេអូ​​ជា​ដើម​។​

​គួររម្លឹកថា ចាប់តាំងពី​បញ្ចប់​សង្គ្រាម​​បែក​ចែង​​ទឹកដី​​កូរ៉េ​ទាំង​ពី​ឆ្នាំ​១៩៥០​ ​ដល់​១៩៥៣ ​រួចមក​មាន​ប្រជាជន​កូរ៉េ​ប្រមាណ​ជាង​២​ម៉ឺន​នាក់​ ហើយ បាន​​ជួប​ជាមួយ​សាច់ញាតិ​របស់​ខ្លួន​ពី​ឆ្នាំ​១៩៨៥​ដល់​ឆ្នាំ​២០១៤​។ ​ដោយឡែក​ក៏មាន​ប្រជាជន​ប្រមាណ​ជាង​៧​ម៉ឺន​នាក់​ផ្សេង​ទៀត​ដែរ ដែល​កំពុង​តែ​រងចាំ​ការ​ចុះបញ្ជី​ដើម្បី​អនុញ្ញាត​ឱ្យទៅ​ជួបជុំ​គ្រួសារ​របស់​ពួកគេ​បន្ដ​ទៀត​៕​(ដោយ៖ពេញ ផេង)​

​ប្រធានាធិបតី​វេនេ​ស៊ូ​អ៊ីឡា​​មិន​ឲ្យ​​អង្គការ​​អាមេរិ​ក​លូក​ដៃ​​ចូល​ការងារ​​ផ្ទៃក្នុង​​វេនេ​ស៊ូ​អ៊ី​ឡា​

​ពិតជា​ចំឡែក​ដែរឬទេ ចំពោះ​ប្រទេស​វេនេ​​ ស៊ូ​អ៊ី​ឡា ដោយ​ស្រប​ពេល​ដែល​ខ្លួន​កំពុង​ជួប​វិបត្តិ​នយោបាយ​មិនទាន់​មាន​ច្រក​ចេញ​នៅឡើយ​បែរ​ជា​សម្រេចចិត្ត​ផ្តាច់ទំនាក់ទំនង​នយោបាយ​និង​ការទូត ជាមួយ​ប្រទេស​ប៉ា​ណា​ម៉ាក​។

ការសម្រេចចិត្ត​បែប​នេះ​ទាំង​លោក​ម៉ា​ដូ​រ៉ូ​ខ្លួនឯង​ក៏​ដឹង​ដែរថា ធ្វើឲ្យប៉ះពាល់​ដល់​ទំនាក់ទំនង​ផ្នែក​សេដ្ឋកិច្ច និង​ពាណិជ្ជកម្ម​របស់​វេនេ​ស៊ូ​អ៊ី​ឡា​។​លោក​ម៉ា​ដូ​រ៉ូ​បានប្រកាស​បែបនេះ​នៅ​ចំពោះមុខ​ប្រធានាធិបតី​នៃ​ប្រទេស​មួយចំនួន​ដូចជា​គុយបា អ៊ុយ​រូ​ហ្គាយ បូ​លី​វី​និង​មាន​មេដឹកនាំ​ផ្សេង​ទៀត ។

​ទាក់ទង​និង​ការសម្រេចចិត្ត​របស់​លោក​ម៉ា​ដូ​រ៉ូ ធ្វើ​ឲ្យ​ប្រធានាធិបតី​ប៉ា​ណា​ម៉ាក​លោក ម៉ា​ទីនេ​លី​( Martinelli) មាន​ការភ្ញាក់ផ្អើល​ជា​ខ្លាំង​ដោយ​មិនដឹងថា មាន​បញ្ហា​អ្វី​នៅ​ពីក្រោយ​រឿងនេះ​។

ប៉ុន្តែ​ទោះជា​យ៉ាងណា​ក៏​ដោយ​លោក ម៉ា​ទីនេ​លី​(martinelli) មិន​បាន​ផ្តោត​ទៅលើ​បញ្ហា​ដែល​លោក​ម៉ា​ដូ​រ៉ូ​បាន​លើកឡើង​នោះ​ទេ ផ្ទុយ​ទៅ​វិញ​លោក​បែរជា​ផ្តល់​កំម្លាំងចិត្ត​ដល់​លោក​ម៉ា​ដូ​រ៉ូ​ធ្វើយ៉ាងណា ដោះស្រាយ​បញ្ហា​នយោបាយ​ឲ្យបាន​ឆាប់រហ័ស ធ្វើឲ្យ​ប្រជាជន​វេនេ​ស៊ូ​អ៊ីឡា​មាន​សន្ត​ភាព​ឡើងវិញ​។​

​ដោយឡែក​ងាក​មក​អគ្គលេខាធិការ​អង្គការ​អាមេរិក​វិញ លោក Jose Miguel Insulza បាន​និយាយ​ឲ្យដឹងថា ប្រសិនជា​លោក​ម៉ា​ដូ​រ៉ូ​យល់ព្រម​ចូលរួម​កិច្ចប្រជុំ​ពិភាក្សា រក​ដំណោះស្រាយ​បញ្ហានយោបាយ​ជាមួយ​អង្គការ​ប្រជាជន​អាមេរិក នោះ​កិច្ចប្រជុំ​នេះ​នឹង​ប្រារព្ធ​ធ្វើឡើង​បាន​យ៉ាង​ឆាប់​បំផុត​។

ជា​ការឆ្លើយតប​ភ្លាមៗ លោក​ម៉ា​ដូ​រ៉ូ​បាន​ថ្លែង​ឲ្យដឹង​ដែរថា លោក​មិន​អនុញ្ញាតឲ្យ​លោក​អ៊ី​ន​ ស៊ុល​ហ្សា​(Insulza)​​លូកដៃ​ចូល​ការងារ​ផ្ទៃក្នុង​របស់​វេនេ​ស៊ូ​អ៊ីឡា​នោះទេ​។ មិន​ឲ្យ​លូកដៃ​ចូល ដោយសារតែ​លោក​យល់ឃើញថា លោក អ៊ី​ន​ស៊ុល​ហ្សា​(Insulza)​ក៏​ជា​អ្នក​នៅ​ពីក្រោយ​ចលនា​បាតុ​កម្ម​ក​ន្លង​មក​ដែរ​៕(ដោយ៖អ៊ុន សុខ​ឡា)​

ការ​ជួប​គ្នា​​រវាង​​លោកស្រី​​យី​ង​ឡាក់​​និង​​លោក​​ប្រា​យុទ្ធ​​ហាក់​​មាន​​អាថ៌កំបាំង​​

ក្រោយ​ពី​​បាន​​រង​​ការ​ចោទប្រកាន់​​ពាក់ព័ន្ធ​​នឹង​​ការ​រៀបចំ​​ចលនា​​បះបោរ​ និង​​ការ​រៀបចំ​​ផែនការ​​បែងចែក​​ប្រទេស​​រួចមក​ លោក​ស្រី​​យី​ង​ឡាក់​​ស៊ី​ណាវ៉ាត្រា​ ដែល​ជា​​នាយករដ្ឋមន្ដ្រី​​ចាំ​ផ្ទះ​​ថៃ​​គាំទ្រ​​ដោយ​​ក្រុម​​អាវ​​ក្រហម បាន​​បដិសេធ​​ទាំងស្រុង​​ចំពោះ​​ការ​ចោទ​ប្រកាន់​​ថា​​ក្រុម​អាវ​​ក្រហម​​មាន​​បំណង​​បែងចែក​​ប្រទេស​។​

ដើម្បី​​ជា​ការ​បក​ស្រាយ​ក៏ដូចជា​​បញ្ចប់​​នូវ​បញ្ហា​​ដែល​​បាន​​កើត​ឡើង​ លោកស្រី​​យី​ង​ឡា​ក់​បាន​​ផ្អាក​​ការធ្វើ​ដំណើរ​​ទៅ​​ភាគ​​ឦសាន​​របស់​​លោក​ស្រី​ ដើម្បី​​ចូល​​ជួប​​លោក​​ប្រា​យុទ្ធ​​ចាន់​អ៊ូ​ចា​​ពិភាក្សា​​ពី​​បញ្ហា​​នេះ​​។ កាល​ពី​ព្រឹក​​ថ្ងៃទី​​០៥​​ខែ​មីនា​លោកស្រី​​ក៏​បាន​​ធ្វើ​ដំណើរ​​ទៅ​​ទីស្នាក់​ការ​​កងទ័ព​​ជើង​​អាកាស​ដើម្បី​​ជួប​​ជាមួយ​​លោក​​ប្រា​យុទ្ធ​ និង​​មេបញ្ជាការ​​កងទ័ព​​កំពូលៗ​​ជាច្រើន​​នាក់​​ផ្សេង​ទៀត​​។​​

​បើតាម​​ប្រភព​​ព័ត៌មាន​​បាន​​ឱ្យដឹង​ថា​ ការជួប​​ពិភាក្សា​​គ្នា​​បាន​​ធ្វើឡើង​​ប្រមាណ​​ជា​១​ម៉ោង​ និង​​បាន​​បិទ​​បញ្ចប់​ទៅ​វិញ​​នៅ​ម៉ោង​​១១​​ព្រឹក​​ថ្ងៃ​​ទី​​០៥​​ខែ​មីនា​។ ​ប៉ុន្ដែ​​ការជួប​គ្នា​​ប្រមាណ​​ជា​​១​​ម៉ោង​របស់​​ថ្នាក់​ដឹកនាំ​​ទាំងអស់​​មិន​មាន​​ការផ្ដល់​​ព័ត៌មាន​​ឱ្យបាន​​ច្បាស់​លាស់​​នោះ​ទេ​ ហើយ​​​ក៏​​មិន​​បាន​​ផ្ដល់​​បទ​សម្ភាសន៍​​ដល់​​អ្នក​​សារព័ត៌មាន​​ដែរ​។​

ដូច្នេះ​គេ​​នៅ​​មិនទាន់​​ដឹង​​ថា​ ការជួប​​គ្នា​​របស់​​ថ្នាក់​ដឹកនាំ​​កំពូលៗ​​នេះ​ សម្រេច​បាន​​លទ្ធផល​​យ៉ាង​​ណា​​ឱ្យ​ពិត​ប្រាកដ​​នោះទេ​ គ្រាន់​តែ​​គេ​​ដឹង​ថា​​លោកស្រី​​យី​ង​ឡាក់​​ស៊ីណាវ៉ាត្រា​ និង​​ក្រុម​មន្ដ្រី​​ដែល​​គេ​មិន​​បាន​​ស្គាល់​​មួយ​ចំនួន​ បាន​​បញ្ជាក់​បន្ថែម​​ថា​ពួកគេ​​មិន​បាន​​គាំទ្រ​​​ចំពោះ​​ទស្សនៈ​​ដែល​​ថា​​ក្រុម​​អាវ​ក្រហម​​ចង់​​បែងចែក​​ប្រទេស​​នោះ​​ទេ​។​

ចំណែក​ឯ​ការ​ប្រមូល​ផ្ដុំ​​គ្នា​​របស់​​ក្រុម​​អាវ​ក្រហម​ គឺ​គ្រាន់​តែ​​ជា​ការ​ប្រមូល​ផ្ដុំ​​ដើម្បី​​បញ្ជាក់​​ពី​​លទ្ធិ​ប្រជាធិបតេយ្យ​ និង​​ស្វែង​រក​​ដំណោះ​​ស្រាយ​​​ចំពោះ​​ភាព​មិន​ប្រក្រតី​​មួយ​ចំនួន​​ដែល​​បាន​​កើត​ឡើង​​តែប៉ុណ្ណោះ​​។​ ក្រោយ​​ពី​​ការ​​បញ្ជាក់​បន្ថែម​​ដូច្នេះ​ហើយ​ លោក​​ប្រា​យុទ្ធ​ចាន់​​អ៊ូ​ចា​​ក៏​បាន​​យល់​​ពី​បញ្ហា​​ដែល​បាន​​កើត​ឡើង​​។ ការ​ជួប​​គ្នា​​នេះ​ ​ហាក់​ដូច​ជា​​​មាន​​អាថ៌កំបាំង​ខុស​ប្លែ​ក​​ពី​ការ​ជួប​គ្នា​​លើក​​មុន​​។​

​គួររម្លឹកថា​កាល​ពី​​ថ្ងៃ​ទី​​០៣​​ខែ​មីនា​ លោក​​ប្រា​យុទ្ធ​​ចាន់​អ៊ូ​ចា​​បាន​​លើក​ឡើង​​ថា​ ​ការ​ប្រមូលផ្ដុំ​​គ្នា​​របស់​​ក្រុម​​អាវ​ក្រហម​នៅ​​ភាគ​​ខាង​ជើង​​ប្រទេស​​ថៃ​ អាច​​ប្រឈម​​​​ទៅ​នឹង​​ការ​ចោទ​ប្រកាន់​ ពី​បទ​​បង្ក​​ចលនា​​បះបោរ​​និង​​ការ​បែង​ចែក​​ប្រទេស​​។ ​លោក​​ប្រា​យុទ្ធ​​ក៏​បាន​​បញ្ជាក់​ដែរ​​ថា​ អ្នក​​ដែល​​ដឹក​នាំ​​នូវ​​សកម្មភាព​​នេះ​ អាច​​មាន​ទោស​​ជាប់​ពន្ធនាគារ​​មួយជីវិត​ និង​​ឈាន​​ដល់​​ការ​ប្រហារ​ជីវិត​​ថែម​ទៀត​​ផង​​។ ​ប៉ុន្ដែ​ជា​​ការ​ឆ្លើយ​តប​ លោកស្រី​​យី​ង​ឡាក់​​ក៏​​បាន​​ប្រកាស​​បដិសេធ​ភា្ល​មៗ​​ដែរ​ ទៅ​​លើ​ការ​ចោទ​ប្រកាន់​​នេះ​​៕​​(ដោយ៖ពេញ​ ផេង)​

អាមេរិក ថា ឳ​ពុក​មា​របស់លោក គីម ជុង​អ៊ុន បាត់បង់​ឥទ្ធិពល មុន​ត្រូវ​គេ​ប្រហារជីវិត​

ប្រមាណ​ជា​ជាង​០៣​ខែ​ទៅ​ហើយ ដែល​លោក ចាង សងថេក ឳ​ពុក​មា​របស់លោក គីម ជុង​អ៊ុន មេដឹកនាំ​ផ្ដាច់ការ​កូរ៉េ​ខាង​ជើង ត្រូវបាន​គេ​កាត់ទោស​ប្រហារជីវិត យ៉ាង​ព្រៃផ្សៃ​។

០៣​ខែ​ក្រោយ​មក​នេះ មន្ទីរ​បញ្ច​កោណ​របស់​អាមេរិក បាន​ចេញ​របាយការណ៍​មួយ ដោយ​បាន​បង្ហាញ ថា មុន​ត្រូវ​គេ​ប្រហារជីវិត​លោក ចាង បាន​បាត់បង់​ឥទ្ធិពល ក្នុង​ជួរ​កងទ័ព របស់​ទីក្រុង​ព្យុ​យ៉ាង​។

​របាយការណ៍​របស់​អា​មេរិក ចេញផ្សាយ​កាលពី​ថ្ងៃ​ពុធ បានឲ្យដឹង ថា លោក ចាង សង​ថេក ត្រូវបាន​គេ​ដឹ​ថា ជា​ទីប្រឹក្សា​មុតមាំ និង​សកម្ម​ម្នាក់ ដែល​ស្និត​ជាមួយ​លោក គីម ជុង​អ៊ុន​នោះ ឥទ្ធិពល របស់លោក កាលពី​ឆ្នាំ​២០១៣ បាន​ធ្លាក់ចុះ ហើយ​ការ​បង្ហាញខ្លួ ន​ជា​សាធារណៈ របស់​លោក​ជា​មួយ​មេដឹកនាំ​កូរ៉េខាងជើង បាន​ធ្លាក់ចុះ​យ៉ាងខ្លាំង បើ​ប្រៀបធៀប​ទៅនឹង​ឆ្នាំ​មុនៗ​។

​សូមជម្រាបថា លោក ចាង សុង​ថេ​ក ត្រូវបាន​ដក​តំណែង​ជា អនុប្រធាន​គណៈកម្មកា​រ​ការពារជាតិ ដែល​ជា​ស្ថាប័ន​មាន​អំណាច​កំពូល​ខាង​កងទ័ព នៅ​កូរ៉េ​ខាងជើង ហើយ​កាលពី​ថ្ងៃ​ទី​១២ ខែ​ធ្នូ ឆ្នាំ​២០១៣ លោក​ត្រូវបាន រដ្ឋាភិបាល​ក្រុង​ព្យុង​យ៉ាង កាត់ទោស​ប្រហារ​យ៉ាង​ព្រៃផ្សៃ​។​

​លោក ចាង ត្រូវបាន​ចោទប្រកាន់ ថា ក្បត់ជាតិ ដោយ​បាន​រៀបចំ នូវ​ចេតនា​អាក្រក់ ចង់​ឆក់យក​ឱកាស ធ្វើ​ការប្រកួត ប្រជែង និង​ដណ្តើម​យក​អំណាច​ពី​លោក គីម ជុង​អ៊ុន ដែលជា​អ្នក​ស្នង​តំណែង​ត្រូវបាន​ជ្រើសតាំង តាំងពី​មុន​លោក គីម ជុងអ៊ីល ទទួលមរណៈភាព​កាលពី​ខែ​ធ្នូ ឆ្នាំ​២០១១ មកម្ល៉េះ​។​

​សូម​ជម្រាប​បន្ថែម ថា លោកស្រី គីម គី​យ៉ុង​ហ្វឺ ភរិយា​លោក ចាង សុង​ថេ​ក រួម​ទាំង​សាច់ញាត្ដិ​ទាំងអស់​របស់​លោក ក៏​ត្រូវបាន​គេ​ប្រហារជីវិត​ដែរ ដែល​នេះ ត្រូវបាន​មេដឹកនាំ​កូរ៉េខាងជើង អះអាង ថា គឺ​ក្នុង​គោលបំណង ចង់​ជីក​ស្មៅ ជីក​ទាំង​ឬ​ស ចំពោះ​ក្រុម​ដែល​ត្រូវបាន​គេ​ចោទ ប្រកាន់​ថា​ក្បត់ជាតិ និង មាន​គោល បំណង​ចង់​ដណ្តើម​អំណាច​ពី​មេដឹកនាំ​កំពូល​នោះ​៕(ដោយៈឃួន សុភ័ក្រ)

ផ្ទុះ​អំពើហិង្សា​នៅ​ឥណ្ឌា ក្រោយ​ប្រទេស​នេះ​ប្រកាស​រៀបចំ​ការបោះឆ្នោត

ភ្លាមៗ​ក្រោយ​ពី​រដ្ឋាភិបាល​ក្រុង​ញ៉ូ​ដេលី ប្រទេស​ឥណ្ឌា ប្រកាស​រៀបចំ​ការបោះឆ្នោត ដែល​នឹង​ចាប់ផ្ដើម​ពី​ថ្ងៃ​ទី​០៧ ខែ​មេសា​នោះ ការប៉ះទង្គិច​គ្នា​តាម​ចិញ្ចើម​ផ្លូវ បាន​ផ្ទុះឡើង នៅ​ថ្ងៃ​ពុធ​នេះ​។

​បើ​តាម​សារព័ត៌មាន Reuters បានឲ្យដឹង ថា អំពើហិង្សា បាន​ផ្ទុះឡើង​បន្ទាប់​ពី​មេដឹកនាំ នៃ​គណបក្ស​ប្រឆាំង​អំពើពុករលួយ គឺ​លោក Narendra Modi ត្រូវបាន​ប៉ូលីស​ឃាត់ ក្នុងអំឡុងពេល​យុទ្ធនាការ​ឃោសនា ក្នុង​ដ្ឋ​Gujarat​។

​ភ្លាមៗ អ្នកគាំទ្រ​លោក Narendra Modi បាន​ប្រមូលផ្តុំ​គ្នា​នៅ ​ខាងក្រៅ​ការិយាល័យ​គណបក្ស​BJP ដើម្បី​តវ៉ា​ប្រឆាំង​ការឃុំ​មេដឹកនាំ​រូប​នោះ​។
​សូម​ជម្រាប ថា រដ្ឋាភិបាល​ឥណ្ឌា នឹងរ​បៀ​ចំ​ការបោះឆ្នោត​រយៈពេល​៥​សប្តាហ៍​ចាប់ពី​ថ្ងៃ​៧ ខែ​មេសា តទៅ ហើយ​ការ​រាប់​សន្លឹកឆ្នោត នឹង​ចាប់ផ្តើម​រយៈពេល​០៤​ថ្ងៃ បន្ទាប់ពី​នោះ​គឺ​នៅ​ថ្ងៃ​ទី​១៦ ខែ​ឧសភា​។​

​គ្រោង​នៃ​ការរៀបចំ​ការបោះឆ្នោត​នេះ ត្រូវបាន​គេ​មើលឃើញ ថា នឹង​នាំយក​អ្នក​ជាតិនិយម គឺ​លោក Narendra Modi ឡើង​កាន់​អំណាច​លើ​គូប្រជែង ដែល​ជា​មេដឹកនាំ​បច្ចុប្បន្ន​។

​ក្រុម​អ្នក​តាម​តាន​ស្ថានការណ៍​នយោបាយ ក្នុង​ប្រទេស​ឥណ្ឌា បាន​មើលឃើញ ថា ការ​បោះឆ្នោត​រៀបចំ​នេះ ធ្វើឡើង ខណៈពេល​កំហឹង​របស់​ប្រជាជន​ឥណ្ឌា រស់នៅ​តាម​ទីក្រុង កំពុងតែ​ពុះកញ្ជ្រោល ដោយសារ​អំពើ​ពុករលួយ​៕(​ដោយៈ​ឃួន សុភ័​ក្រ​)


គណៈកម្មាធិការ​​រៀបចំ​​ការ​បោះឆ្នោត​​ថៃ​សុំ​អន្ដរាគមន៍​​ពី​តុលាការ​​រដ្ឋធម្មនុញ្ញ​​៣​ចំណុច​

ដោយសារ​តែ​ការបោះឆ្នោត​នៅក្នុង​ប្រទេស​ថៃ​កាលពី​ថ្ងៃ​ទី​០២​ ខែ​កុម្ភៈ​​កន្លង​ទៅ​ ​​នៅ​មាន​បញ្ហា​ចំពោះ​មណ្ឌល​បោះឆ្នោត​ចំនួន​២៨ ដែល​គ្មាន​បេក្ខ​​ជន​​​តំណាងរាស្ដ្រ​​ទៅ​ឈរ​ឈ្មោះ​ ហើយ​ក៏​គ្មាន​អ្នក​ទៅ​បោះឆ្នោត​ផង​នោះ គណៈកម្មាធិការ​រៀបចំ​ការបោះឆ្នោត​ថៃ​បាន​ស្នើ​ទៅ​តុលាការ​រដ្ឋ​ធម្មនុញ្ញ​ ដើម្បី​សម្រេច​ទៅលើ​បញ្ហា​ដ៏​ចម្រូងចម្រាស​នេះ​។​ គណៈកម្មាធិការ​រៀបចំ​ការបោះឆ្នោត​បាន​ស្មើ​ចំនួន​៣​ចំណុចឱ្យ​តុលា​រដ្ឋធម្មនុញ្ញ​ជួយ​សម្រេច​។​

​ទី​១​ ​តើ​គណៈកម្មាធិការ​រៀប​ចំ​ការបោះឆ្នោត​គួរតែ​រៀបចំ​មុន​ឬ​យ៉ាងណា​ពាក់ព័ន្ទ​នឹង ​ការប្រកាស​ពី​ការចុះ​ឈ្មោះ​របស់​បេក្ខជន​ហើយ​នឹង​ការរៀប​ចំ​​ការ​បោះឆ្នោត​ជា​ថ្មី​នៅ​តាម​មណ្ឌល​ដែល​ខកខាន​?

​ទី​២ ប្រសិនបើ​គណៈកម្មាធិកា​ន​សិទ្ធិ​ក្នុង​ការរៀបចំ​កិច្ចការ​ខាងលើ​តើ​គួរតែ​ត្រូវការ​ព្រះរាជក្រឹត្យ​អះអាង​ពី​ព្រះមហារ​ក្រ​ត្ស​ក្នុងការ​ធ្វើ​វិសោធន​កម្ម​​លើ​ព្រះរាជក្រឹត្យ​ពី​មុន​ដើម្បី​រំលាយ​នូវ​សមាជិក​សភា​ឬ​យ៉ាងណា​? កិច្ចការ​នេះ នឹង​ត្រូវ​ធ្វើឡើង​ដោយ​នាយក​រដ្ឋមន្ដ្រី​ឬ​យ៉ាងណា​?

​ទី​៣​ក្នុងករណី​ដែល​ព្រះរាជក្រឹត្យ​ថ្មី​ត្រូវបាន​ប្រកាស តើ​ព្រះរាជក្រឹត្យ​នេះ​អាច​អនុញ្ញាត​ឱ្យមាន​ការបោះឆ្នោត​ត្រឹមតែ​ក្នុង​មណ្ឌល​ដែល​ខកខាន​ទាំង​២៨ ឬក៏​អាច​អនុញ្ញាត​ឱ្យមាន​ការបោះឆ្នោត​ជា​សាកល​ដូច​ដែល​រដ្ឋធម្មនុញ្ញ​បានចែង​ថា​ការបោះឆ្នោត​ត្រូវតែ​ធ្វើ​ឡើង​រួម​គ្នា​នឹង​ការបោះ​ឆ្នោត​​ជា​សាកល​?

​ជា​ចុងក្រោយ​គណៈកម្មាធិការ​រៀប​ចំ​ការបោះឆ្នោត​បាន​លើកឡើង​ថា​នឹង​អនុវត្ដ​ន៍​តាម​ការសម្រេច​របស់​តុលាការ​រដ្ឋធម្មនុញ្ញ​ជានិច្ច​សម្រាប់​សំណួរ​​ទាំងបី​ខាងលើ​។

​គួរ​រម្លឹក​ឡើងវិញ​ថា មូលហេតុ​ដែល​បណ្ដាល​ឱ្យ​មាន​ការខកខាន​ចំពោះ​ការបោះឆ្នោត​នៅ​មណ្ឌល​ទាំង​២៨​​ខាងលើ​ក៏​ដូចជា​មិន​មាន​ការចុះ​ឈ្មោះ​​តំណាងរាស្ដ្រ​នោះ​គឺ​ដោយសារតែ​ក្រុមបាតុករ​ប្រឆាំង​រដ្ឋាភិបាល​លោកស្រី​យី​ង​ឡាក់ បាន​ប្រមូលផ្ដុំ​គ្នា​ទៅ​រារាំង​នៅ​តំបន់​នោះ​។

ការរារាំង​នេះ​គឺ​ ដើម្បី​ជា​ការដាក់​សម្ពាធ​មិន​ឱ្យ​លោក​ស្រី​យី​ង​​ឡាក់​ជាប់​ឆ្នោត​និង​មិន​​ឱ្យ​លោក​ស្រី​​បន្ដ​តំណែង​​ជា​នាយករដ្ឋមន្ដ្រី​តទៅ​ទៀត​ព្រោះ​គោលដៅ​របស់​ពួកគេ​គឺ​ចង់​ទម្លាក់​លោកស្រី​ចេញពី​ឆាក​នយោបាយ​ថៃ​៕​(ដោយៈ​ពេញ​ ផេង)​

តុលាការ​វៀតណាម​កាត់​ទោស អតីត​កាសែត និយាយ​រិះគន់​រដ្ឋាភិបាល

​មាន​អាយុ​៥០​ឆ្នាំ លោក Truong Duy Nhat ដែល​លាឈប់​ពី​ការងារ​ជា​អ្នកកាសែត​របស់​លោក​នៅ​ក្នុង​ឆ្នាំ​២០១០​នោះ ត្រូវ បាន​តុលាការ​ប្រទេស​វៀតណាម កាត់ទោស​ឲ្យ​ជាប់​ពន្ធនាគារ​រយៈពី​រ​ឆ្នាំ កាល​ពី​អង្គារ​។

​ការប្រកាស​សាលក្រម របស់​តុលាការ​វៀតណាម​នេះ គឺ​បន្ទាប់ពី​អតីត​អ្នកកាសែត​រូបនេះ បាន​រិះគន់​លើ ដឹកនាំ​កុ​ម្មុយ​និស្ត​របស់​ប្រទេស​នេះ តាម​blog របស់គាត់​។ នេះ​បើ​តាម​ការ រាយការណ៍​របស់​ទីភ្នាក់ងារ​សារព័ត៌មាន​Reuters​។

​ការកាត់ទោស​នេះ ត្រូវបាន​គេ​មើលឃើញ ថា គឺជា​ការ​រឹតត្បិត សេរីភាព​សារព័ត៌មាន​ជាខ្លាំង របស់​រដ្ឋាភិបាល​កុ​ម្មុយ​និស្ត​មួយនេះ ទោះបី​សេរីភាព​សារព័ត៌មាន ត្រូវបាន​ធានា​នៅក្រោម​រដ្ឋធម្មនុញ្ញ ក៏ដោយ ហើយ​ក៏​ធ្វើឲ្យ​ស្មុគស្មាញ​ផងដែរ ជាមួយ​សហរដ្ឋអាមេរិក​។​

​សហរដ្ឋអាមេរិក បាន​នឹង​កំពុង​ខិតខំ​ប្រឹងប្រែង បង្កើន​ទំនាក់ទំនង ផ្នែក​ពាណិជ្ជកម្ម​ជាមួយ​ប្រទេស​វៀតណាម បន្ទាប់​ប្រទេស​ទាំង​ពីរ បានចាប់ផ្ដើម​ចង​សម្ព័ន្ធមិត្ត​ជាមួយគ្នា​ជា​ថ្មី ដែល​កន្លង​សម្ព័ន្ធមិត្ត​នេះ បាន​កាត់ផ្ដាច់​ដោយសារ​សង្គ្រាម ពី​អតីតកាល​។

​ស្ថានទូត​សហរដ្ឋអាមេរិក​ប្រចាំ​ប្រទេស​វៀតណាម បានចេញ​សេចក្តីថ្លែងការណ៍​មួយ ដោយ​សម្ដែង​ការព្រួយបារម្ភ និង​អំពាវនាវ​ឲ្យមាន​ការដោះលែង​លោក​Truong Duy Nhat និង​អ្នកទោសនយោបាយ​ផ្សេងទៀត ហើយ​អំពាវនាវ ឲ្យ​រដ្ឋាភិបា​លបើក​សិទ្ធិ ឲ្យ​ប្រជាជន​វៀតណាម បង្ហាញ​ពី​ឆន្ទះ​នយោបាយ​របស់​ពួកគេ​ដោយ​សន្ដិវិធី​ផងដែរ​។​

​ជា​ញឹកញយ អ្នកកាសែត​ក្នុង​ប្រទេស​វៀតណាម តែងតែ​រង​ការចាប់ខ្លួន និង​កាត់ទោស​ឲ្យ​ជាប់ពន្ធនាគារ ជា​បន្ដបន្ទាប់ ក្រោយពេល​ដែល ពួកគេ​បាន​សរសេរ ឬ​ផ្សាយ​ព័ត៌មាន រិះគន់​រដ្ឋាភិបាល​។

ការ​ធ្វើ​ទុក្ខ​បុក​ន្និ​ញ​អ្នកកាសែត​ក្នុង​ប្រទេស​វៀតណាម​នេះ ក៏​តែងតែ​រិះគន់​យ៉ាង​ចាស់ដៃ​ផងដែរ ពី​ប្រទេស​សេរី ដូចជា ប្រទេស​អាមេរិក​ជាដើម​៕(ដោយៈឃួន សុភ័ក្រ)


កូរ៉េខាងត្បូង​​នឹង​ជួប​ពិភាក្សា​​ជាមួយ​​កូរ៉េ​ខាងជើង​​ពី​ព្រឹត្ដិការណ៍​​ជួបជុំ​គ្រួសារ​​ជា​ទៀតទា​ត់​

​ក្រោយពី​មាន​ព្រឹត្ដិការណ៍​ជួបជុំ​គ្រួសារ​ដែល​បាន​បែកបាក់​គ្នា​ក្រោយ​សង្គ្រាម​​បែងចែក​​ទឹកដី​កូរ៉េ​​ទាំងពីរ​​ដែល​ទើបតែ​បិទ​បញ្ចប់​កាលពី​ថ្ងៃ​ទី​២៥​ ខែ​កុម្ភៈ​​កន្លងទៅ ថ្នាក់ដឹកនាំ​កូរ៉េខាងត្បូង​លោក​ស្រី​ប៉ាក់ គុន​ហឹ Park Geun-hye បាន​ធ្វើ​សេចក្ដីណែនាំ​មួយ​ដល់​មន្ដ្រី​ក្រោម​ឱវាទ​ពាក់ព័ន្ធ​នឹង​ការ​ពិភាក្សា​គ្នា​ជាមួយ​កូរ៉េខាងជើង​ក្នុង​ការ​អនុញ្ញាត​​ឱ្យមាន​ការជួប​គ្នា​ជា​ទៀត​ទាត់​មួយ​។

លោកស្រី​ប្រធានាធិបតី​បាន​មានប្រសាសន៍ថា ក្រសួង​បង្រួបបង្រួម​កូរ៉េ​និង​ស្ថាប័ន​កាក​បាទ​ក្រហម​​កូរ៉េខាងជើង​​គួរតែ​​ប្រឹក្សា​​យោបល់​​គ្នា​ ដើម្បី​​អនុញ្ញាត​ឱ្យ​មាន​ព្រឹត្ដិការណ៍​ជួបជុំ​គ្នា​តាមរយៈ​ការផ្ញើ​សំបុត្រ​ការផ្ញើ​ជា​ខ្សែអាត់​វិដេអូ និង​ការផ្ដល់​ដំណឹង​ពី​ស្ថានភាព​រស់នៅ ឬក៏​ការស្លាប់​បាត់​បង់​​ជីវិត​​ជាដើម​។

​ក្រៅពីនេះ​លោកស្រី​ប៉ាក់ គុន​ហឹ Park Geun-hye បាន​បញ្ជាក់បន្ថែម​ថា ពេលវេលា​ចេះ​តែ​រំកិល​ទៅមុខ​ហើយ​ចំពោះ​ជន​ចាស់ជរា​។ ដូច្នេះ​ដោយ​យោងទៅលើ​បញ្ហា​នេះ យ៉ាងហោចណាស់​ក៏​ត្រូវ​អនុញ្ញាត​ឱ្យ​មាន​ជន​ចាស់ជរា​៦​ពាន់​នាក់​ដែរ​ក្នុង​មួយឆ្នាំ ដើម្បី​ឱ្យ​ពួកគេ​ទៅ​ជួបជុំ​សាច់ញាតិ​របស់​​ខ្លួន​មុនពេល​ស្លាប់​ទៅ​វិញ​។

​គួររម្លឹកថា ចាប់តាំងពី​បញ្ចប់​សង្គ្រាម​បែក​​ចែង​​ទឹក​ដី​​កូរ៉េ​ទាំង​ពី​ឆ្នាំ​១៩៥០​ដល់​១៩៥៣​​រួចមក​ មាន​ប្រជាជនកូរ៉េ​ប្រមាណ​ជាង​២​ម៉ឺន​នាក់​ហើយ បាន​​ជួប​​ជាមួយ​សាច់ញាតិ​​របស់​​ខ្លួន​ពី​ឆ្នាំ​១៩៨៥ ​ដល់​​ឆ្នាំ​២០១៤​នេះ​។ ​ដោយឡែក​ក៏មាន​ប្រជាជន​ប្រមាណ​ជាង​៧​ម៉ឺន​នាក់​ផ្សេង​ទៀត​ដែរ ដែល​កំពុង​តែ​រងចាំ​ការចុះបញ្ជី ដើម្បី​អនុញ្ញាត​ឱ្យ​ទៅ​ជួបជុំ​គ្រួសារ​របស់​ពួកគេ​បន្ដទៀត​។

ប៉ុន្ដែ​ទោះជា​យ៉ាងណាក៏ដោយ​គេ​នៅ​មិនទាន់​សន្និដា្ឋនបានថា ការពិភាក្សា​ពី​ការអនុញ្ញាត​ឱ្យ​មាន​ការ​ជួបជុំ​សាច់ញាតិ​ជា​ទៀងទាត់​នេះ​អាច​ប្រព្រឹត្ដ​ទៅបាន​ឬ​យ៉ាណា​នោះទេ ព្រោះ​ក្នុង​ពេល​ថ្មីៗ​នេះ​​កូរ៉េ​ខាងជើង​​កំពុង​តែ​​បញ្ចេញ​​នូវ​​សកម្មភាព​​ហាក់​ដូចជា មាន​ចេតនា​ណាមួយ​ខឹង​ដល់​កូរ៉េ​ខាងត្បូង​តាមរយៈ​ការបាញ់​សាកល្បង​គ្រាប់​មី​ស៊ី​ល​របស់​ខ្លួន​ជា​ច្រើន​គ្រាប់​។ ​ទង្វើ​នេះ​គេ​មិន​ទាន់​ដឹង​ច្បាស់​ថា​ជា​ការសាកល្បង​ធម្មតា ឬ​ជា​ការបង្ហាញ​អានុភាព​ឱ្យ​កូរ៉េខាងត្បូង​បាន​ដឹង​ឬ​យ៉ាងណា​នោះទេ​៕(ដោយ៖ពេញ ផេង)​

អាមេរិក​​ប្រើ​យុទ្ធសាស្ដ្រ​​ថ្មី​លើ​រុស្ស៊ី​​គឺ​ ផ្អាក​​កិច្ច​សហប្រតិបត្ដិការ​​យោធា​

ការគាំទ្រ​ភាគី​​ម្ខាងៗ​​របស់​រុស្ស៊ី ​និង​អាមេរិក​បាន​​ធ្វើឱ្យ​ប្រទេស​ទាំង​ពីរ​មើល​មុខ​គ្នា​មិន​ចំឡើយ​ក្នុង​ពេល​ថ្មីៗ​នេះ​។ បន្ទាប់​ពី​ការទម្លាក់​ប្រធានា​ធិប​តី​​អ៊ុយ​​ក្រែន​លោកវិកទ័រ​យ៉ានូ​កូ​វិច​ចេញពី​តំណែង​រួចមក​រុស្ស៊ី​បាន​ប្រឆាំង​ដាច់ខាត​ចំពោះ​ទង្វើ​នេះ ហើយ​បាន​ចោទប្រកាន់ថា ការ​បោះឆ្នោត​​ទម្លាក់​​​លោក​​យ៉ានូ​​កូវិ​ចចេញ​​ពី​​តំណែង​​គឺ ​ជា​​ការ​បោះឆ្នោត​​ដែល​​មិន​​ស្រប​ច្បាប់​។

ដោយឡែក​អាមេរិក​វិញ​បាន​លើកឡើង​ថា ការទម្លាក់​លោក​យ៉ានូ​កូវិ​ច​គឺជា​រឿង​សមស្រប ព្រោះ​លោក​យ៉ានូ​កូវិ​ចជាប់​ពាក់ព័ន្ធ​ទៅនឹង​ការស្លាប់​របស់​ក្រុម​បាតុករ​ប្រមាណ​ជិ​តមួយ​រយ​នាក់ ក្នុង​អំឡុង​ពេល​ពួកគេ​ធ្វើ​ចលនា​តវ៉ា ហើយ​អាមេរិក​គាំទ្រ​ពេញទំហឹង​ចំពោះ​ការតែងតាំង​ប្រធានា​ធិបតី​​បណ្ដោះអាសន្ន ដែល​ជា​ការទាមទា​ររ​បស់​ក្រុមបាតុករ​ប្រឆាំង​រដ្ឋាភិបាល​លោក​យ៉ានូ​កូ​វិក​។

​ដោយសារ​តែ​ភាព​តានតឹង​រវាង​ប្រទេស​ទាំង​ពីរ​បាន​កើតឡើង​ជា​បន្ដបន្ទាប់ និង​គ្មាន​ភាគី​ណាមួយ​ស្ដាប់​គ្នា​នោះ កាលពី​ថ្ងៃ​ទី​០៣​ខែ​មីនា​អាមេរិក​បាន​ប្រកាស​ផ្អាក​កិច្ចសហប្រតិបត្ដិការ​យោធា​ជាមួយ​រុស្ស៊ី​។ នេះ​បើ​តាម​ការ បញ្ជាក់​ពី អ្នកនាំពាក្យ​អា​មេរិ​ក្នុង​ពេល​ធ្វើ​សេចក្ដីថ្លែងការ​ណ៍​។

ការសម្រេច​ផ្អាក​សម្មភាព​កិច្ចសហប្រតិបត្ដិការ​យោធា​នេះ គឺ ដោយសារ​តែ​ទង្វើ​របស់​រុស្ស៊ី​ហាក់ដូចជា​ផ្គើន​ខ្លាំងពេក ទៅនឹង​ការស្នើសុំ​របស់​អាមេរិក​ឱ្យ​ប្រទេស​មួយ​នេះ ដក​កងទ័ព​ចេញពី​ទីក្រុង គ្រីមៀ​ប្រទេ​សអ៊ុយ​ក្រែន​។ ដូច្នេះ​ការប្រកាស​ផ្អាក​កិច្ចសហប្រតិបត្ដិការ​យោធា​រួម​គ្នា​រវាង​អាមេរិក និង​រុស្ស៊ី​នេះ​អាច​ជា​ការព្រមាន​មួយ​ចំពោះ ប្រទេស​រុស្ស៊ី​។

​គួររម្លឹកថា ភាព​ប្រទាញប្រទុង​គ្នា​វាង​ក្រុមបាតុករ​អ៊ុ​ក្រែន​ប្រឆាំង​នឹង​​រដ្ឋាភិបាល​របស់​លោក​យ៉ានូ​កូវិ​ចបាន​ចាប់ផ្ដើមប្រ​មាណ​ជាង​៣​ខែ​មក​ហើយ​​។ ថ្មីៗ​នេះ​បន្ទាប់ពី​ការបង្ក្រាប​យ៉ាងឃោ​ឃៅ​ទៅលើ​ក្រុមបាតុករ ដែល​បណ្ដាលឱ្យ​មនុស្ស​ជិត​១០០​នាក់​បាន​ស្លាប់ ប្រធានាធិបតី​អ៊ុ​យ​ក្រែន លោក​​យ៉ានូ​កូវិ​ច​ត្រូវបាន​គេ​ទម្លាក់​ចេញពី​តំណែង​។

បន្ទាប់​មក​រុស្ស៊ី​ដែល​ជា​អ្នកគាំទ្រ​លោក​យ៉ានូ​កូ​វិក បាន​ប្រឆាំង​យ៉ាង​ដាច់អហង្កា​ចំពោះ​ទង្វើ​នេះ​។ ចំណែកឯ​អាមេរិក​ដែល​ជា​អ្នកគាំទ្រ​ក្រុម​បាតុករ​​ប្រឆាំង​​នឹង​រដ្ឋាភិបាល​លោក​យ៉ានូ​កូ​វិច បានប្រកាស​ជំហរ​របស់​ខ្លួន​ដែរ​ថា លោក​យ៉ានូ​កូវិ​ច​ត្រូវ​ចុះ​ចេញ​ពី​តំណែង ព្រោះ​លោក​ជាប់​ពាក់ព័ន្ធ​នឹង​ការសម្លាប់​ក្រុមបាតុករ​ជិត​១០០​នាក់​។

ក្រោយមក​ភាគី​ទាំង​ពីរ​គឺ​រុស្ស៊ី​និង​អាមេរិក បាន​ប្រឆាំង​គ្នា​ទៅវិញទៅមក ដើម្បី​បង្ហាញ​ពី​ការគាំទ្រ​ទៅ​ភាគី​របស់​ខ្លួន​។ ស្ថានភាព​កាន់តែ​ធ្ងន់ធ្ងរ​ឡើងៗ រហូត​ដល់​អាមេរិក​ប្រើ​យុទ្ធសាស្ដ្រ​ថ្មី ដើម្បី​ទប់ទល់​ជាមួយ​រុស្ស៊ី គឺ​ការ​ផ្អាក​សកម្មភាព​កិច្ចសហប្រតិបត្ដិការ​យោធា​ជាមួយ​ប្រទេស​មួយ​នេះ​។ ទោះជា​យ៉ាងណា​ក៏ដោយ គេ​នៅ​មិនទាន់​ដឹង​ថា​ការប្រកាស​របស់​អាមេរិក​ដូច្នេះ អាច​ធ្វើឱ្យ​រុស្ស៊ី​បញ្ឈប់​សកម្មភាព​របស់​ខ្លួន​ឬ​យ៉ាងណា​នោះ​ទេ​៕(ដោយៈ​ពេញ ផេង)​

​មេដឹកនាំ​ចលនា​​ប្រឆាំង​​នៅ​វេនេ​ស៊ូ​​អេ​ឡា​​ប្រកាស​​គំរោង​​តវ៉ា​ជាថ្មី​

ការ​អំ​នាវ​តាមរយៈ​ប្រព័ន្ធ​ផ្សព្វផ្សាយ​ទំនើប Twitter របស់​មេដឹកនាំ​ក្រុមបាតុករ​ប្រឆាំង​និង ​ប្រធានាធិបតី​​ប្រទេស​​វេនេ​​ ស៊ូ​អ៊ីឡា​លោក ​Nicolas Maduro ​បាន​ប្រកាស​ជា​សាធារណៈ​​ដល់​អ្នកគាំទ្រ​​គណបក្ស​​ប្រឆាំង​​ដែល​កំពុង​ព្យាយាម​​ប្រឆាំង​ដ៏​ស្វិតស្វាញ​ឲ្យចូល​រួម​ប្រមូលផ្តុំ​គ្នា​ដ៏​ធំ​ជា​ថ្មី​ម្តង​ទៀត​នៅ​ប្រទេស​វេនេ​ស៊ូ​អ៊ី​ឡា​។​

ជាមួយគ្នា​នោះ​លោក Leopoldo Lopez​ ដែល​ជា​សកម្មជន​រប​ស់មេ​គណបក្សប្រឆាំង​ក៏​បាន​ចូលរួម​ក្នុងការ​អំពារ​នាវ​របស់​មេបក្ស​ប្រឆាំង​នេះ​ផង​ដែរ ទោះបីជា​លោ​កំពុង​ជាប់​ឃុំ​ខ្លួន​ក៏ដោយ​។​

​​សូមបញ្ជាក់​ថា លោក Lopez ត្រូវបាន​សមត្ថកិច្ច​ចាប់​ឃាត់​ខ្លួន​អស់​រយៈពេល​ជិត​ពីរ​សប្តាហ៍​មក​ហើយ ឃាត់ខ្លួន​ពី​បទ​ប្រើ​អំពើហិង្សា​បណ្តាល​​ឲ្យ​មាន​មនុស្ស​ស្លាប់​។​ ទន្ទឹម​​និង​​ការ​អំពាវ​នាវ​​របស់​​មេ​បក្ស​ប្រឆាំង​​ឲ្យ​មាន​​កា​ប្រមូល​ផ្តុំ​​ជា​ថ្មី​​នេះ​​ប្រធានាធិបតី ​Maduro​​ក៏​មិន​នៅ​ស្ងៀម​ដែរ កាលពី​ថ្ងៃ​ទី​០៣​ខែ​មីនា​។

​មិន​នៅ​ស្ងៀមដោយសារតែ​ប្រមុខ​រដ្ឋាភិបាល​រូបនេះ​បាន​ដឹកនាំ​ដង្ហែ​ក្បូន​ដែល​មាន​មនុស្ស​ប្រមាណ​ជា​ពីរ​ពាន់​នាក់​ឆ្ពោះ​ទៅ​អង្គការ​អាមេរិក​ប្រចាំ​នៅ​ប្រទេស​វេនេ​ ស៊ូ​អ៊ី​ឡា ឲ្យមាន​ការអន្តរាគម​ន៍​មួយ​ចំពោះ​ការ​ធ្វើ​ចលនា ប្រឆាំង​តវ៉ា​ជា​ថ្មី​របស់​ក្រុម​បាតុករ​ឲ្យ​ពួក​គេ​បញ្ឈប់​សកម្មភាព​នោះ​ជា​បន្ទាន់​ដោយសារ​សកម្មភាព​នេះ​និង​ធ្វើឲ្យ​ប្រទេ​សកាន់តែ​មាន​ស្ថានភាព​ដុនដាប​ទៅៗ​។​

​គួរ​ម្លឹក​ផងដែរ​ថា ចាប់តាំងពី​មាន​ការប្រឆាំង​តវ៉ា​របស់​ក្រុម​បាតុករ និង​មាន​ការ​បង្ត្រាប​ពី​រដ្ឋាភិបាលកន្លងម​ក គឺ​បាន​បន្សល់ទុក​នៅ​អ្នក​ស្លាប់​ប្រមាណ​​១៨​នាក់ រង​របួស​​ជិត​​៣០០​នាក់ ​​និង​​មាន​ការចាប់ខ្លួន​មនុស្ស មួយ​ពាន់​នាក់ និង​បាន​ធ្វើឲ្យ​ប្រទេស​មួយនេះ អសន្តិសុខ សេដ្ឋកិច្ច​មាន​ការ​ធ្លាក់ចុះ និង​អំពើ​ឧក្រិដ្ឋកម្ម​ផ្សេងៗ​​តែងតែ​កើតឡើង​ឥត​ឈប់ឈរ​ជា​ដើម​៕(ដោយ៖​អ៊ុន សុខ​ឡា)​

លោក​ស្រី​​យី​ង​ឡាក់​​បដិសេធ​​ការ​លើក​ឡើង​​ថា​​ក្រុម​​អាវ​​ក្រហម​​ចង់​​បែង​ចែក​​​ប្រទេស​​

ជា​ការ​ឆ្លើយ​តប​​ភ្លាមៗ​បន្ទាប់​ពី​​លោក​​ប្រា​យុទ្ធ​ចាន់​អ៊ូ​ចា​ មេបញ្ជាការ​​កងទ័ព​ជាន់​ខ្ពស់​​ថៃ​បាន​​និយាយ​​ពី​ការ​​ប្រមូល​ផ្ដុំ​​របស់​​ក្រុម​​អាវ​​ក្រហម​​​ថា​ អាច​​ប្រឈម​​មុខ​​ទៅ​​នឹង​​ការចោទ​ប្រកាន់​​ពី​​បទ​​បង្ក​​ចលនា​​បះបោរ​ និង​​មាន​​ចេតនា​​ចង់​​បែង​ចែក​​ប្រទេស​ លោក​ស្រី​យី​ង​ឡាក់​​ក៏ដូច​ជា​​គណបក្ស​​ភឿ​ថៃ​​បាន​​ប្រកាស​​បដិសេធ​​ទាំង​ស្រុង​​ចំពោះ​​ពាក្យ​សម្ដី​​នេះ​​។​​ លោក​ស្រី​​បាន​​បញ្ជាក់​បន្ថែម​​ថា​ គណបក្ស​​​ភឿ​ថៃ​​មិន​​មាន​​បំណង​​បែង​ចែក​​ប្រទេស​​នោះ​ទេ​ ហើយ​​​រាជ​​រដ្ឋាភិបាល​​នៅតែ​​មាន​​ជំហរ​​រួបរួមនិង​​ឯកភាព​​ជាតិ​​​ជានិច្ច​​។ ដូច្នេះ​​ចំពោះ​​មតិ​​ដែល​​ថា​ ក្រុម​​អាវ​​ក្រហម​​ចង់​​ធ្វើ​ការ​​ផ្ដាច់ខ្លួន​​ដើម្បី​​បំបែក​​រដ្ឋ ត្រូវតែ​​មាន​​ការ​ស៊ើប​អង្កេត​ឱ្យបាន​​ច្បាស់​លាស់​​។​

​ដោយឡែក​​ទី​ប្រឹក្សា​​ជាន់​ខ្ពស់​​មជ្ឈមណ្ឌល​​រក្សា​​សន្ដិភាព​​និង​​សណ្ដាប់​ធ្នាប់​លោក​ ស៊ូ​រ៉ា​ពុង​ តូ​វិចាក់​​ឆៃ​គុល​ ក៏​បាន​​ប្រកាស​​ឱ្យ​​លោក ​ប្រា​​យុទ្ធ​ចាន់​អ៊ូ​ចា​ ត្រូវ​មាន​​អព្យាក្រឹត​​ផ្នែក​​នយោបាយ​​ផង​​ដែរ​​។​ លោក​​ស៊ូ​រ៉ា​ពុង​ បាន​​បន្ថែម​ថា​ប្រជាជន​​មិន​មាន​​ការ​គាំទ្រ​​ខ្លាំង​ក្លា​​ទៅលើ​​ភាព​​យុត្ដិធម៌​ និង​​ប្រព័ន្ធ​​នយោបាយ​​នៅ​ក្នុង​​ប្រទេស​​នា​ពេល​បច្ចុប្បន្ន​​នេះ​ទេ​ ដូច្នេះ​​ទើប​​ពួក​គេមាន​​ការ​ប្រមូល​ផ្ដុំ​គ្នា​​។ ​ការ​ជួប​ជុំ​គ្នា​​នេះ​​ដែរ​ គឺ​គ្រាន់​តែ​​ចង់​​បង្ហាញ​ពី​​ការ​មិន​ពេញ​ចិត្ដ​​របស់​​ពួកគេ​លើ​​ប្រព័ន្ធ​​យុត្ដិធម៌​​តែ​ប៉ុណ្ណោះ​​។​

សូម​បញ្ជាក់​​ថា​ កាល​ពី​​ថ្ងៃ​ទី​​០៣​​ខែ​មីនា​​នេះ​ លោក​​​​ប្រា​យុទ្ធ​​​​ចាន់​​អ៊ូ​ចា​​​បាន​​​លើក​​ឡើង​​​ថា​​ ការ​​ប្រមូល​ផ្ដុំ​​​គ្នា​​របស់​​ក្រុម​​អាវ​​ក្រហម​​នៅ​​ភាគ​​ខាង​ជើង​​ប្រទេស​​ថៃ​ អាច​​ប្រឈម​​មុខ​ ទៅ​​នឹង​​ការ​​ចោទ​ប្រកាន់​ពី​​បទ​​បង្ក​​ចលនា​​បះបោរ​និង​​ការ​បែង​ចែក​ប្រទេស​​។ លោក​​ប្រា​យុទ្ធ​​ក៏​​បាន​​បញ្ជាក់​​ដែរ​​ថា​ អ្នក​​ដែល​​ដឹក​នាំ​​នូវ​​សកម្មភាព​​នេះ​ អាច​​មាន​​ទោស​​ជាប់​​ពន្​នាគារ​​មួយ​ជីវិត​ និង​​ឈាន​​ដល់​​ការ​ប្រហារ​ជីវិត​​ថែម​ទៀត​​ផង​​។​​ ប៉ុន្ដែ​​បញ្ហា​​នេះ​ នៅ​​មិន​ទាន់​មាន​​ភស្ដុតាង​​ជាក់​លាក់​​សម្រាប់​​ចោទ​ប្រកាន់​នៅ​ឡើយ​​ទេ​ ហើយ​​គេ​​ក៏​​ពុំ​​ទាន់​​ដឹង​ថា​ ក្រុម​​អាវ​​ក្រហម​​អាច​​ប្រឈមមុខ​​នឹង​​ស្ថានភាព​​បែប​ណា​​នោះ​​ដែរ​​៕​​(ដោយ៖ពេញ ផេង)​​

អ៊ុយ​ក្រែន​​ត្រៀមទ័ព​​ធ្វើសង្គ្រាម​​បន្ទា​ប់​ពី​​រុស្ស៊ី​គម្រាម​

​បន្ទាប់​ពី​រដ្ឋាភិបាល​រុស្ស៊ី​បាន​បញ្ជូន​កងទ័ព​រាប់​រយ​​នាក់ ចូល​ទៅ​ទីក្រុង ​Crimea ក្នុង​គោលបំណង​ចូល​ទៅ​លុកលុយ និង​ចង់​ដណ្ដើម​ទីក្រុង​Crimea​ ដែលជា​អតីត​ទីក្រុង​របស់​ខ្លួន​មក​វិញ​នោះ​ប្រទេស​អ៊ុយ​ក្រែន​បានប្រកាសថា ខ្លួន​នឹង​ធ្វើ​សង្គ្រាម​ជាមួយ​ប្រទេស​រុស្ស៊ី ប្រសិនបើ​កងទ័ព​រុស្ស៊ី​នៅតែ​រឹងទទឹង​មិន​ព្រម​ឈប់​។

​រដ្ឋមន្ដ្រី​របស់​អ៊ុយ​ក្រែន​ម្នាក់​បាន​បញ្ជាក់​តាម​ទូរទស្សន៍​ថា អ៊ុយ​ក្រែន​រៀបចំ​ធ្វើសង្គ្រាម​រួចហើយ ប្រសិនបើ​កងទ័ព​រុស្ស៊ី​នៅតែ​ចូលលុកលុយ បង្ក​ភាពចលាចល​តទៅទៀត អ្វី​ជា​វិធានការ​អ៊ុយ​ក្រែ​ននឹង​ផ្ដាច់​រាល់​ទំនាក់ទំនង​ទាំង​អស់​ជាមួយ​រុស្ស៊ី​។

ដោយ​ឡែក​​ប្រធានាធិបតី​​អាមេរិក​​លោក​បា​រ៉ាក់ អូ​ប៉ា​ម៉ា​វិញ​​បាន​គំរាម​ទៅ​ប្រទេស​រុស្ស៊ី​ថា ការឈ្លានពាន​របស់​រុស្ស៊ី​ទៅលើ​ទីក្រុង​Crimea គឺ​ជា​ទង្វើ​​មួយ​ដែល​មិន​ត្រឹមត្រូវ​ឡើយ​។ ក្រៅពីនេះ​លោក​អូ​ប៉ា​ម៉ា បានបញ្ជាក់​ថា ការឈ្លានពាន​របស់​រុស្ស៊ី​ចូល​ទឹកដី​អ៊ុ​យក្រែន មិន​បាន​សុំ​អនុ​ញ្ញាត​​ពី​អង្គការសហប្រជាជាតិ​នោះទេ​។​

​សូមបញ្ជាក់​ថា នៅពេល​នយោបាយ​កំពុងតែ​មាន​ភាព​តានតឹង​នោះ​រវាង​ប្រទេស​រុស្ស៊ី និង​អ៊ុ​យក្រែន​​សភា​ប្រទេស​រុស្ស៊ី​បាន​អនុម័ត​ឲ្យ​រដ្ឋាភិ​បាល​​​ក្រុង​​មូ​ស្កូ​ពង្រាយ​ទ័ព​នៅ​តំបន់ Crimea ដើម្បី​ពង្រឹង​សន្តិសុខ ហើយ​ការពារ​ផលប្រយោជន៍​ពាណិជ្ជកម្ម​របស់​រុស្ស៊ី ខណៈ​ដែល​ប្រទេស​​អ៊ុយ​​ក្រែន​ក៏​ត្រៀម​បញ្ជូនកង​ទព័ទៅ​តំបន់​នោះ​ដែរ។

គួររម្លឹកថា ស្ថានភាព​ប្រទេស​អ៊ុយ​ក្រែ​នបច្ចុប្បន្ន​កំពុងតែ​ឡើង​កម្តៅ​ខ្លាំង​ស្ថានភាព​នេះ​ត្រូវបាន​គេ​មើលឃើញ​ថា មាន​ភាពផុយស្រួយ​ដែល​ងាយ​នឹង​​ធ្វើឲ្យ​សង្គ្រាម​កើតឡើង៕(ដោយ៖លាង ធីតា​)

សាធារណៈជន​​គាំ​ទ្រ​​ជំនួប​​រវាង​​លោក​​ស៊ូ​ថេប​​និង​​លោក​ស្រី​​យី​ង​ឡាក់​​

ក្រោយ​ពី​លោក​​ស៊ូ​ថេប​​បាន​ប្រកាស​ថា​ លោក​​នឹង​​ជួប​​ជាមួយ​​លោក​ស្រី​​យី​ង​ឡាក់​ ដើម្បី​​បញ្ចប់​​បញ្ហា​​នយោបាយ​​ដ៏​រាំ​រ៉ៃ​​ក្នុង​ប្រទេស​​ថៃ​​រួច​មក​​ សាធារណៈជន​​បាន​​បង្ហាញ​​ការ​គាំទ្រ​​យ៉ាង​ខ្លាំង​​ចំពោះ​​កិច្ច​​ពិភាក្សា​​នេះ​​។​ គាំទ្រ​​ដោយសារ​​តែ​​ពួក​គេ​​គិត​​ថា​ ការជួប​​គ្នា​​មួយ​ទល់​​នឹង​​មួយ​​តាម​​ប៉ុស្ដិ៍​​ទូរទស្សន៍​​នេះ​ អាច​​ជា​គន្លឹះ​​ថ្មី​​មួយ​​សម្រាប់​​ភាគី​​ទាំងពីរ​ ដែល​អាច​​គេច​​ចេញ​ពី​ការ​​មើល​មុខ​​គ្នា​​មិន​ចំ​ ក៏ដូច​ជា​​ការ​បញ្ចប់​​បញ្ហា​​វិបត្ដិ​​នយោបាយ​ដ៏​រាំរ៉ៃ​​ក្នុង​​ប្រទេស​​ថៃ​​ផងដែរ​​។ សូម​​បញ្ជាក់​ដែរ​​ថា​ ជម្លោះ​នយោបាយ​​ក្នុង​​ប្រទេស​​ថៃ​​បាន​​កើត​ឡើង​​ប្រមាណ​​៤​ខែ​​មក​​ហើយ​​។ រាល់​ដ​ង​​ទៅ​​ពេល​​មាន​​ការ​​ណាត់​ជួប​​ម្ដងៗ​ ​ភាគី​​ទាំង​ពីរ​​មិន​​​​អាច​​​ណោះ​​​ស្រាយ​​បញ្ហា​​បាន​​​​ទេ​​។​ នេះ​​គឺជា​លើក​ទី​មួយ​​ហើយ​​ដែល​​លោក​​ស៊ូ​ថេប​ ប្រកាស​​ចង់​​ជួប​​ជា​មួយ​​លោក​ស្រី​​យី​ង​ឡាក់​​មួយ​​ទល់​នឹង​​មួយ​​តាម​​ប៉ុស្ដិ៍​​ទូរទស្សន៍​​៕​(ដោយ៖ពេញ ផេង)​

កូរ៉េ​ខាង​ជើង​​សាក​ល្បង​​មី​ស៊ី​ល​ពីរ​គ្រាប់​​បន្ថែម​ទៀត​​

ក្រោយ​ពី​បាន​​បាញ់​​សាក​ល្បង​​គ្រាប់​​មី​ស៊ី​ល​រយៈ​​ចម្ងាយ​​ខ្លី​របស់​​ខ្លួន​​ចំនួន​​៤​ដើម​កាល​ពី​​ថ្ងៃ​ទី​​២៧​ខែ​កុម្ភៈ​​កន្លង​ទៅ ​កូរ៉េ​ខាង​ជើង​​បាន​​បាញ់​​សាក​ល្បង​​គ្រាប់​​មី​ស៊ី​ល​ពីរ​គ្រាប់​​បន្ថែម​ទៀត​​ហើយ​​នៅ​ថ្ងៃទី​​០៣​​ខែ​​មីនា​​។​ នេះ​​បើ​តាម​​ការបញ្ជាក់​របស់​​ទីភ្នាក់ងារ​​​សារព័ត៌​មាន​​Yonhap​ របស់​​កូរ៉េ​ខាងត្បូង​​។​ ​ការបាញ់​​គ្រាប់​​មី​ស៊ី​ល​ពីរ​​គ្រាប់​​បន្ថែម​នេះ​​ធ្វើឡើង​​នៅ​​ឆ្នេរ​សមុទ្រ​​ភាគ​​ខាង​កើត​​ចូល​ទៅ​ក្នុង​​សមុទ្រ​​របស់​​ជប៉ុន​​។​​

បើ​យោង​​​​តាម​ក្រសួង​​ការពារ​ជាតិ​របស់​​កូរ៉េ​​ខាង​ត្បូង​បាន​ឱ្យ​ដឹង​​ទៀត​​ថា​ ការ​សាក​ល្បង​​មី​​ស៊ី​ល​​រយៈ​​ចម្ងាយ​​ខ្លី​​ចំនូ​ន​​៤​ដើម​​កាល​ពី​ថ្ងៃ​​ទី​​២៧​​ខែ​​កុម្ភៈ​​កន្លង​ទៅ​នេះ​ បើ​តាម​​ការ​ប៉ា​ន់​ស្មាន​​គឺ​មាន​​ចម្ងាយ​​ពី​​៣០០​​ទៅ​​៨០០​​គីឡូ​ម៉ែត្រ​។ ទង្វើ​​នេះ​​ហាក់​​បង្ហាញ​ឱ្យ​ឃើញ​ថា​កូរ៉េខាង​ជើង​​ចង់​បង្ហាញ​​ពី​ចេតនា​​ណាមួយ​​ដល់​​កូរ៉េ​ខាង​ត្បូង​​។ ​កូរ៉េ​ខាង​ត្បូងបាន​​បញ្ជាក់​ទៀត​ថា​ វា​​មិន​មែន​​ជា​​រឿង​​ធម្មតា​​ទេសម្រាប់​​កូរ៉េ​​ខាង​ជើងក្នុង​ការ​​ធ្វើ​​តេស្ដ​​មី​ស៊ី​ល​​នេះ​ ជា​ពិសេស​​គឺ​ការ​បង្ហាញ​​ពី​​ការ​មិន​ពេញ​ចិត្ដ​​ចំពោះ​​ការធ្វើ​​សមយុទ្ធ​​របស់​​កូរ៉េខាង​ត្បូង​​ជា​មួយ​​អាមេរិក​។​

​ដោយ​ឡែក​​ទីក្រុង​​Washington​​វិញ ​ក៏បាន​​បង្ហា​ញ​​ពីការ​មិន​ពេញ​ចិត្ដ​​ច​ពោះ​​ទង្វើ​​របស់​​កូរ៉េខាង​ជើង​​ដែរ​​។ មិន​ពេញ​ចិត្ដ​​ត្រូវ​បាន​​អាមេរិក​​បញ្ជាក់​​ឱ្យដឹង​ថា​​កូរ៉េ​ខាង​​ជើង​​បាន​​រំលោភ​​ទៅ​លើ​​ការ​ហាមឃាត់​​របស់​អង្គការ​សហប្រជាជាតិ​ ដែល​​បាន​ហាម​ចំពោះ​​កម្មវិធី​​មី​ស៊ី​ល​​គ្រប់​​ប្រភេទ​​របស់​​កូរ៉េ​ខាង​ជើង​​។​

​សូម​​បញ្ជាក់​​ផង​ដែរ​​ថា​ ​ការ​សាក​ល្បង​​មី​ស៊ី​ល​​ចំនូ​ន​​ពីរ​​គ្រាប់​​បន្ថែម​​នេះ​ ធ្វើ​​ឡើង​​តែ​​៤​​ថ្​ងៃ​ប៉ុណ្ណោះ​​បន្ទាប់​​ពី​ការ​បាញ់​​សាក​ល្បង​​មី​ស៊ី​ល​​ចំនួន​​៤​​​គ្រាប់​​កាល​ពី​​ថ្ងៃ​ទី​​២៧​​ខែ​កុម្ភៈ​​។​ ​ទង្វើ​​នេះ​​មិន​បាន​​បង្ហាញ​​ពី​គោល​បំណង​អ្វី​​ឱ្យ​​ពិត​ប្រាកដ​​នោះ​ទេ​ ក្រៅ​ពី​​ការ​បាញ់​​សាក​ល្បង​ សព្វា​វុធ​​របស់​​កូរ៉េ​​ខាងជើង​​ ហើយ​​ទង្វើ​​នេះ​​ទៀត​សោត​​ហាក់​​ផ្គើន​យ៉ា​ង​ខ្លាំង​​ដល់​​កូរ៉េ​ខាងត្បូង​​។​ ដូច្នេះ​​តើ​​នេះ​​គឺ​ជា​​ការ​ឆ្លើយ​តប​​ទៅ​នឹង​​ការ​ធ្វើ​​សមយុទ្ធ​​រួម​​គ្នា​​រ​វាង​​កូរ៉េ​ខាងត្បូង​​ជាមួយ​​អាមេរិក​​ឬ​​យ៉ាង​ណា​​?​​​(ដោយ៖ពេញ ផេង)​​


ពួក​អាវ​ក្រហម​ប្រមាណ​ជា​ជាង​២​ម៉ឺន​នាក់​ជួបជុំគ្នា​នៅ​ទីក្រុង​បាងកក​

​មហា​ដំណើរ​របស់ពួកអាវ​ក្រហម​ប្រមាណ​២០.០០០​នាក់បាន​ចាប់ផ្តើម​នៅថ្ងៃទី​០២​មីនា​នេះ ។ ​មហា​ដំណើរ​នេះ ធ្វើឡើង ដើម្បី​បង្ហាញ​ការគាំទ្រ​របស់​គេ​ចំពោះ​រដ្ឋាភិបាល ដោយ​ថា​ពួកគេ​ត្រៀម​ ធ្វើដំណើរ​ចូល​ក្រុង​បាងកក​បើ​ចាំបាច់។សមាជិក​នៃ​ក្រុម​រណសិរ្ស​រួបរួម​សំរាប់​   លទ្ធិប្រ ជា ធិបតេយ្យ​ប្រឆាំង​ភាព ផ្តាច់ការ រឺ​ក្រុម​អាវ​ក្រហម នៅ​៨​ខេត្ត​ភាគ​ឦសាន​បាន​ជួបជុំ​គ្នា​កាលពី​ថ្ងៃ​០១​មីនា​នៅ​ខេត្ត​អ៊ូ​ដន ថា​នី ដែល​ជា​ចំណុច​ចាប់ផ្តើម​។ ប្រធាន​ក្រុម​នេះ លោក ស្រី​ ធីតា ថា​វ៉ន​សេត បាន​និយាយថា ពួក អាវ​ក្រហម​បាន​ជួបជុំគ្នា​នៅ​ថ្ងៃ​ដដែល នេះ​ដើម្បី​ចាប់ផ្តើម​ដំណើរ​របស់​គេ ទៅ​ជួប​ប្រជាជន​ដែល​មិន​ស្រឡាញ់​លទ្ធិប្រជាធិបតេយ្យ​"​នៅ​បាងកក​។​មនុស្ស​យ៉ាង​តិច​ជាង​២​ម៉ឺន​នាក់ បាន ចាប់ ផ្តើម ដំណើរ នេះ​នៅ​ថ្ងៃ​០២​មីនា ហើយ​នៅ​តាម​ផ្លូវ នឹង​ចូលរួម​ជាមួយ​ម​នុស្ស​ដទៃ​ទៀត​ដែល​មាន​មនោគមវិជ្ជា ដូចគ្នា​។​នៅ​សប្តាហ៍​ក្រោយ ក្រុម​ អាវ​ក្រហម​នឹង​ទៅ​ខេត្ត​ឈៀង​ម៉ៃ ហើយ​នឹង ស្នាក់​នៅ​ទីនោះ​២​យប់​៕

លោក​បាន គី​មូន​ស្នើ​ឲ្យ​រុស្សី​​ដក​កងទ័ព​​ចេញពី​អ៊ុ​យក្រែន​និង​ត្រូវ​​ចូល​តុ​ចរចា​ជាបន្ទាន់​

​អគ្គលេខា​អង្គការ​សហ​ប្រជា​ជា​តិ​​លោកបាន គីមូន​បាន​ជួបពិភាក្សា​​តាម​ទូរស័ព្ទ​ជាមួយនឹង​ប្រធានាធិបតី​របស់​​រុស្សីលោកប្លា​ឌី​មៀ​ពូ​ទីន​ដោយ​ស្នើ​ឲ្យ​លោក​ពូ​​ទីន​ដក​កងទ័ព​របស់​ខ្លួន​ចេញពី​ប្រទេស​​អ៊ុយ​ក្រែន​​ជាបន្ទាន់។

​ការស្នើសុំ​​របស់​លោក​បាន​​គីមូន​បែនប​នេះ​​គឺ​ក្នុង​គោលបំណង​​ឲ្យ​ភាគី​ដែល​ពាក់​ព័ន្ឋ​​នៅក្នុង​ប្រទេស​អ៊ុ​យក្រែន​​ចូលរួម​ក្នុង​តុច​រចា​ដើម្បី​បញ្ចប់​វិបត្តិ​នយោបាយ​​ដ៏​ធ្ងន់ធ្ងរ​មួយ​នេះ​។​

នេះ​បើ​យោង​តាម​សារព័ត៌មាន​ចិន​ស៊ិន​ហួរ​​បាន​ចុះផ្សាយ​ឲ្យដឹង​។​សារព័ត៌មាន​ដដែល​​បាន​បន្ត​ឲ្យដឹងថាលោកបាន គីមូន បានលើកឡើង​​នៅក្នុងរ​បាយ​ការណ៏​ថា ការសម្រេច​ដោយ​ភាគី​ណាមួយ​​របស់​អ៊ុយ​ក្រែន​​មុន​ចូល​រួម​តុ​ចរចា​​គឺ​ដើម្បី​បញ្ចប់​វិបត្តិ​ផ្សេងៗ​​ត្រូវ​បាន​ហាម​ជាដាច់ខាត​។​មិនតែប៉ុណ្ណោះ​លោក​បាន គីមូនក៏​បាន​ស្នើសុំ​ឲ្យ​ប្រធានាធិបតី​របស់​រុស្សីលោកប្លា​ឌី​មៀ ពូ​ទីនជួបចរចា​ដោយ​ផ្ទាល់​ជាមួយ​អាជ្ញាធរ​​នៅក្នុង​ទីក្រុង​គៀវ​ប្រទេស​អ៊ុយ​ក្រែន​​ផងដែរ​។

​ស្របពេល​ជាមួយ​គ្នា​នោះដែរ ប្រធានាធិបតី​របស់​សហរដ្ឋ​អា​មេ​រិកលោកបា​រ៉ាក់​​អូបា​ម៉ាក៏​បាន​សំដែង​នូវ​ការ​​ព្រួយបារម្ភ ចំពោះ​អ៊ុ​យក្រែន​ដែល​កំពុង​ត្រូវបាន​​រុស្ស៊ី​ត្រៀម​ឈ្លានពាន​ទឹកដីនិង​អធិបតេយ្យ ភាព​ដែរ​។​
​សូម​បញ្ជ​ក់ថា កាលពី​ថ្ងៃ​ទី​២៨​ ខែ​កុម្ភៈ​កន្លងទៅ​រុស្ស៊ី​បាន​បញ្ជូន​កងទ័ព​របស់​ខ្លួន​រាប់រយ​នាក់​ទៅក្នុង​ប្រទេស​អ៊ុ​យក្រែន បន្ទាប់​​ពី​ប្រទេស​មួយ​នេះ​បាន​ទម្លាក់​​លោក​យ៉ានូ​​កូវិ​ចចេញ​ពី​តំណែង​។

ការបញ្ជូន​កងទ័ព​ជាច្រើន​នាក់​នេះ​ធ្វើឱ្យ​រដ្ឋាភិបាល​ទី​ក្រុងកៀវ​មានប្រតិកម្ម​យ៉ាងខ្លាំង​ហើយក៏​បាន​ប្រកាស​ឱ្យ​​រុស្ស៊ី​ដក​កងទ័ព​របស់​ខ្លួន​​ចេញ​ជា​បន្ទាន់​ផង​ដែរ​។​ពាក់​ពន្ធ័​នឹង​បញ្ហា​នេះ​ប្រធានាធិបតី​អាមេរិក​លោកប៉ា​រាក់ អូ​ប៉ា​បានបញ្ជាក់​ថា ការបញ្ជូន​កងទ័ព​រុស្ស៊ី​មិន​បាន​សុំ​អនុញ្ញាត​ពី​អង្គការ​សហប្រជាជាតិ​ទេ​ហើយក៏​មិន​បាន​បង្ហាញ​​ពី​គោលបំណង​របស់​ខ្លួន​ដែរ​។ សហរដ្ឋអាមេរិក​ក៏​បាន​សម្តែង​ការព្រួយបារម្ភ​យ៉ាង​ខ្លាំង​ដែរ ចំពោះ​បញ្ហា​នយោបាយ និង​សេដ្ឋកិច្ច នៅ​អ៊ុ​យក្រែន ជា​ពិសេស​បញ្ហា​យោធា ដែល​ធ្វើឡើង​ដោយ​សហព័ន្ធរុស្ស៊ី និង អ្នក គាំទ្រ អតីត​ប្រធានាធិបតី អ៊ុយ​ក្រែន​លោកវិចទ័រ យ៉ានូ​កូ​វិច​៕(ដោយ៖ ហេង សំណាង)

​កូរ៉េ​ខាង​ជើង​បាន​​បាញ់​មី​ស៊ី​ល​-​​អាមេរិក​ថា​​រំលោភ​ច្បាប់​​អង្គការ​សហប្រជាជាតិ​

ប្រទេស​កូរ៉េ​ខាងជើង​កាលពី​ថ្ងៃ​ទី​២៧​ ខែ​កុម្ភៈ បាន​បាញ់​ផ្លោង​គ្រាប់​មី​ស៊ី​ល​ធន​ខ្លី​​របស់​ខ្លួន​ចំនួន​បួន​​ដើម ដោយ​បាញ់​ទៅ​ក្នុង​សមុទ្រ​ភាគ​ខាង​កើត​​ប្រទេស​។ ទាក់ទង​និង​សកម្មភាព​បាញ់​បង្ហោះ​មី​ស៊ី​ល​នេះ បានធ្វើ​ស្របពេល​ដែល​សហរដ្ឋអាមេរិក​កំពុង​ធ្វើ​សមយុទ្ធ​យោធារ​នៅ​ប្រទេស កូរ៉េខាងត្បូង​ផងដែរ​។​ ​ការបាញ់​បង្ហោះ​មី​ស៊ី​ល​ធន​ខ្លី​នេះ ពីដំបូង​រដ្ឋមន្ត្រីក្រសួង​ការពារ​ជាតិ​យល់ថា​អាច​បាញ់​បាន​។

ប៉ុន្ដែ​ក្រោយពី​ក្រុម​ព្រឹក្សា​សន្តិសុខ​អង្គការ​សហ​ប្រជាជាតិ ត្រួតពិនិត្យ​ឡើងវិញ​ទាក់ទង​និង​ច្បាប់​ស្តីពី​ការ​បង្ហោះ​មី​ស៊ី​ល​របស់​ប្រទេស​កូរ៉េ​ខាង​ជើង​​រួចមក​បានបង្ហាញ​ថា​មី​ស៊ី​ល​គ្រប់​ប្រភេទ​របស់​ប្រទេស​កូរ៉េខាងជើង​គឺ​មិន​ត្រូវបាន​អនុញ្ញាត​ឲ្យ​បាញ់​បង្ហោះ​នោះទេ រួម​ទាំង​មី​ស៊ី​ល​ធន​ខ្លី​នេះ​ផងដែរ​។​

​សូម​បញ្ជាក់​ដែរ​ថា បន្ទាប់​ពី​កូរ៉េ​ខាងជើង​បាន​បាញ់​បង្ហោះ​មី​ស៊ី​ល​កាលពី​ថ្ងៃ​ទី​២៧​ ខែ​កុម្ភៈ សហរដ្ឋអាមេរិក​បាន​អំពាវនាវ​ដល់​ប្រទេស​កូរ៉េ​ខាង​ជើង​​បញ្ឈប់​​សកម្មភាព​​ដែល​ខ្លួន​កំពុង​ធ្វើ​ជា​បន្ទាន់ ពីព្រោះ​វា​អាច​បង្ក​ភាព​តានតឹង​កាន់តែ​ធ្ងន់ធ្ងរ​។

ប៉ុន្ដែ​ជា​ការឆ្លើយតប​កូរ៉េខាងជើង​មិន​បាន​ធ្វើតាម​ការស្នើសុំរ​បស់​អាមេរិក​ឡើយ ហើយ​កាលពី​ថ្ងៃ​ទី​២៧​ខែ​កុម្ភៈ​កន្លងទៅ កូរ៉េ​ខាងជើង​បាន​បាញ់​គ្រាប់​មី​ស៊ី​ល​ចំនួន​៤​ដើម​ថែមទៀត​ផង ដែល​សកម្មភាព​នេះ ហាក់ដូចជា​ផ្គើន​យ៉ាងខ្លាំង​ដល់​អាមេរិក និង​កូរ៉េខាងត្បូង​៕(ដោយៈ​ពេញ ផេង)​

ប្រទេស​រុស្ស៊ី​​បញ្ជូន​​កងទ័ព​​រាប់រយ​​នាក់​ទៅ​​ប្រទេស​​អ៊ុ​យក្រែន​

កាលពី​ថ្ងៃ​ទី​២៨​ ខែ​កុម្ភៈ​​កន្លងទៅ រុស្ស៊ី​​បាន​បញ្ជូន​កង​ទ័ព​​របស់​ខ្លួន​រាប់រយ​នាក់​ ទៅក្នុង​ប្រទេស​អ៊ុ​យក្រែន បន្ទាប់​ពី​ប្រទេស​មួយ​នេះ​បាន​ទម្លាក់​លោក​​យ៉ានូ​កូវិ​ច​ចេញ​ពី​តំណែង​។ ការបញ្ជូន​កងទ័ព​ជាច្រើន​នាក់​នេះ ធ្វើឱ្យ​រដ្ឋាភិបាល​ទី​ក្រុងកៀវ មានប្រតិកម្ម​យ៉ាងខ្លាំង ហើយក៏​បាន​ប្រកាស​ឱ្យ​រុស្ស៊ី ដក​កងទ័ព​របស់​ខ្លួន​ចេញ​ជា​បន្ទាន់​ផង​ដែរ​។

ពាក់​ពន្ធ័​នឹង​បញ្ហា​នេះ ប្រធានាធិបតី​អាមេរិក​លោក​ប៉ា​រាក់ អូ​ប៉ា​ បានបញ្ជាក់​ថា ការបញ្ជូន​កងទ័ព​រុស្ស៊ី​មិន​បាន​សុំ​អនុញ្ញាត​ពី​អង្គការ​សហ​ប្រជា​ជាតិ​​ទេ ហើយក៏​មិន​បាន​បង្ហាញ​ពី​គោលបំណង​របស់​ខ្លួន​ដែរ​។ សហរដ្ឋអាមេរិក​ក៏​បាន​សម្តែង​ការព្រួយបារម្ភ​យ៉ាង​ខ្លាំង​ដែរ ចំពោះ​បញ្ហា​នយោ​បាយ ​និង​សេដ្ឋកិច្ច​នៅ​អ៊ុ​យក្រែន ជា​ពិសេស​បញ្ហា​យោធា​ដែល​ធ្វើឡើង​ដោយ​សហព័ន្ធរុស្ស៊ី និង​ជា​អ្នកគាំ​ទ្រ​អតីត​ប្រធានាធិបតី​អ៊ុយ​ក្រែន​លោក​វិចទ័រ​​យ៉ានូ​កូ​វិច​។​

​ជាមួយគ្នានេះ ប្រធានាធិបតី​បណ្តោះអាសន្ន​អ៊ុ​យក្រែន Oleksandr បាន​ចោទប្រកាន់​ទាហាន​រុស្ស៊ី​ថា ទង្វើ​នេះ​គឺជា​ការ​វាយឆ្មក់​និង​បង្ក​ភាព​ចលាចល​នៅ​ព្រលានយន្តហោះ​នៃ​ទីក្រុង Crimea និង​ទិស​និរតី​នៃ​ប្រទេស​អ៊ុ​យក្រែន។

​សូមបញ្ជាក់​ថា ក​នែ្ល​ង​ដែល​កងទ័ព​រុស្ស៊ី​បាន​ចូលលុកលុយ​នោះ មាន​ទីក្រុង​Crimea ដែល​ជា​អតីត​ទឹកដី​របស់​ខ្លួន ដែល​ត្រូវ​បាន​សហភាព​សូ​វៀត​​​ប្រគល់​​ឱ្យ​ប្រទេស​​អ៊ុយ​​ក្រែន​​តាំងពី​ឆ្នាំ១៩៥៤​មកម្ល៉េះ​។ គួររម្លឹកថា ស្ថានភាព​ប្រទេស​អ៊ុយ​ក្រែ​នបច្ចុប្បន្ន គឺ​មាន​ទាំង​វិបត្តិ​នយោបាយ និង​សេដ្ឋកិច្ច​ហាក់ដូចជា​កើន​សន្ទុះ​ម្ដងទៀត​ហើយ បន្ទាប់​ពី​វិបត្តិ​នេះ​ធ្លាប់​ស្ងប់​ស្ងាត់​ម្ដង​រួចមកហើយ​នោះ​៕(ដោយ​៖លាង​ ធីតា​)

លោក​យ៉ានូ​កូវិ​ច​​ត្រូវ​ប្រកាស​​បណ្ដេញ​​ចេញ​ពី​​តំណែង​​ជា​ថ្មី​

​ក្រោយពី​ត្រូវ​បាន​ប្រជាពលរដ្ឋ​បោះឆ្នោត​ទម្លាក់​ចេញពី​តំណែង និង​បាន​ប្រកាស​ចេញ​ដី​ការ​ចាប់​ខ្លួន​​កាលពី​ថ្ងៃ​ទី​២៤​​​កុម្ភះ ពាក់​ពន្ធ័​​នឹង​​​ការ​​ស្លាប់​របស់​​ក្រុមបាតុ​ករ ប្រមាណ​ជិត​១០០​នាក់​​ នៅក្នុង​ទីក្រុង Kiev កាលពី​សប្ដាហ៍​​មុន​អតីត​ប្រធានាធិបតី​លោក​យ៉ានូ​កូ​វិច​បាន​ភៀស​ខ្លួន​​ទៅ​​ប្រទេស​​​រុស្ស៊ី ​ដើម្បី​​​លាក់ខ្លួន ​និង​សុំ​​សិទ្ធិ​​ជ្រក​កោណ​​ក្នុង​​ប្រទេស​​មួយ​​នេះ​។

​លោក​យ៉ានូ​កូ​វិច ដែល​គាំទ្រ​ដោយ​ប្រទេស​​រុស្ស៊ី​​នោះ​នឹង​រៀប​ចំ​​ធ្វើ​​សន្និសីទ​កាសែត​​មួយ​ទាក់ទង​ទៅនឹង​ការបោះឆ្នោត​ទម្លាក់​រូបលោក​ដោយ​លោក​​បាន​​អះអាង​​ថា​​ ការបោះឆ្នោត​លើក​នេះ​មិន​សមស្រប​ទៅតាម​ច្បាប់​ទេ​។

យ៉ាងណាក៏ដោយ​ការ​គ្រោង​ធ្វើ​សន្និសីទកាសែត​របស់​លោក​យ៉ា​នូ​កូ​វិច ត្រូវបាន​រដ្ឋាភិបាល​អ៊ុយ​ក្រែន​ឆ្លើយតបថា លោក​យ៉ានូ​កូ​វិច មិនមែន​ជា​ប្រធានាធិបតី​អ៊ុយ​ក្រែន​ទៀត​ទេ​។ ដោយ​ឡែក​​អនុ​​ប្រធានាធិបតី​​អាមេរិក​​លោក​​Joe Biden​​ វិញ បាន​បង្ហាញ​ការគាំទ្រ​ជាថ្មី​ម្តងទៀត​ទៅលើ​ប្រធា​នា​ធិបតី​​បណ្ដោះអាសន្ន​លោក​អ៊ូ​ឡី​កសិន ទួ​ជី​ណូ​(Oleksandr Turchynov)​ឲ្យនៅ​កាន់​តំណែងដ​ដែល​។​

​​គួរ​បញ្ជាក់​ផង​ដែរ​ថា បន្ទាប់ពី​មាន​ការប៉ះទង្គិច​គ្នា​ដែល​បាន​បណ្ដាលឱ្យ​មាន​អ្នក​ស្លាប់​ប្រមាណ​ជិត​មួយ​រយ​នាក់​រួច​មក លោក​យ៉ានូ​កូ​វិច ត្រូវ​បាន​​បោះ​ឆ្នោត​​ទម្លាក់​ពី​តំណែង កាលពី​ថ្ងៃ​ទី​២៣​ខែ​កុម្ភះ​។ ដោយឡែក​នេះ​ជា​ការប្រកាស​ទម្លាក់​រូបលោក​ជា​លើក​ទី​ពីរ បន្ទាប់ពី​លោក​យ៉ានូ​កូ​​វិច​​​ដែលមាន​ប្រទេស​រុស្ស៊ី​នៅ​ពីក្រោយ​មិន​បាន​យល់ស្រប​ចំពោះ​ការទម្លាក់​ចេញពី​តំណែង​៕​(ដោយៈ​លាង​ ធីតា)​

លោក​​ស៊ូ​ថេប​​ប្រកាស​​ចង់​​ប្រឈម​មុខ​​មួយ​​ទល់​​នឹង​​មួយ​​ជាមួយ​​លោក​ស្រី​​យី​ង​​ឡាក់​​

ក្រោយ​​ពី​​ការ​បរាជ័យ​​ក្នុង​​ការ​ពិភាក្សា​​ដើម្បី​​បញ្ចប់​​វិបត្ដិ​​នយោបាយ​​​ដ៏​រាំ​​រ៉ៃនៅ​ក្នុង​​ប្រទេស​​ថៃ​​រួចមក​ ជា​ថ្មី​​ម្ដងទៀត​​លោក​​ស៊ូ​​ថេប​ ថង​​ស៊ូ​​បាន​​ មេ​ដឹក​នាំ​​ក្រុម​បាតុករ​​ប្រឆាំង​​រដ្ឋាភិបាល​​​​នឹង​​កោះ​​អញ្ចើញ​​លោក​​ស្រី​​យីង​ឡា​ក់​​ស៊ីណាវ៉ាត្រា​ ឱ្យ​​ចូល​ជួប​​ពិភាក្សា​​ដោះ​ស្រាយ​​វិបត្ដិ​​នយោបាយ​​ឱ្យបាន​​ឆាប់​រហ័ស​​។​ លោក​​ស៊ូថេប​​និយាយ​ទៀតថា​ ប្រសិន​​បើ​​លោក​​ស្រី​​យី​ង​ឡាក់​​ពិត​​ជា​​ចង់​​បញ្ចប់​​វិបត្ដិ​​នយោបាយ​​ក្រឡាប់​​ចាក់​​នេះ​​មែន ​​លោក​​នឹង​ណាត់​​ជួប​​ជា​មួយ​​លោក​​ស្រី​​មួយ​​ទល់​​នឹង​​មួយ ដោយ​​ការ​ជួប​គ្នា​នេះ​​នឹង​​ធ្វើ​​ដោយ​​បើក​ទូលាយ​ គឺ​​ត្រូវ​​ផ្សាយ​​​ផ្ទាល់​​តាម​​​ប៉ុស្ដិ៍​​ទូរទស្សន៍​ ដើម្បី​​ឱ្យ​​ប្រជាជន​​នៅ​ទូទាំង​​ប្រទេស​ថៃ​​បាន​ដឹង​​ពី​​ដំណើរការ​​នៃ​​កិច្ច​​ពិភាក្សា​​។​

​បន្ថែម​​លើ​នេះ​ មេ​ដឹកនាំ​​ក្រុម​ប្រឆាំង​​រូបនេះ​​បាន​​បញ្ជាក់​​បន្ថែម​​ទៀត​​ថា​​ការជួប​​ពិភាក្សា​​នេះ ត្រូវតែ​​មាន​​ប្រយោជន៍​​ជា​​រួម​​​សម្រាប់​​​ប្រទេស​​​ជាតិ​​​ទាំងមូល​​មិនមែន​​សំដៅ​លើ​​ផល​​ប្រយោជន៍​​បុគ្គល​​ឡើយ​​។​ ដូច្នេះ​​​ប្រសិនបើ​​ការ​ជួបគ្នា​ ធ្វើឡើង​​ដើម្បី​​តែ​​ផល​ប្រយោជន៍​​របស់​​លោ​ក​​ស្រី​​យី​ង​ឡាក់​​នោះ​ លោក​​នឹង​​មិន​​ចូល​រួម​ក្នុង​​ការ​ពិភាក្សា​​ជា​ដាច់ខាត​​​។​​

ជា​​ការ​ឆ្លើយ​តប​ចំពោះ​ការ​ប្រកាស​​សុំ​ជួប​​ចរចារ​​ជា​​សាធារណៈ​​នេះ​ លោក​ស្រី​​យី​ង​ឡាក់​​បាន​ឱ្យ​ដឹង​​ដែរ​​ថា​ លោក​​ស្រី​​នឹង​ជួប​​ជាមួយ​​លោក​​​ស៊ូ​​ថេប​ ប្រសិន​​បើ​​មេដឹក​នាំ​​ក្រុម​ប្រឆាំង​​រូបនេះ​​បញ្ឈប់​​ការ​ដឹកនាំ​​ចលនា​​តវ៉ា​​ប្រឆាំង​​នឹង​​រដ្ឋាភិបាល ហើយ​​អនុញ្ញាត​​ឱ្យ​ការ​បោះ​​ឆ្នោត​​​ដែល​​មិនទាន់​​បាន​​បញ្ចប់​​ទាំង​ស្រុង​នោះ​ឲ្យ​បញ្ចប់​​ទៅ​​ដោយ​ជោគ​ជ័យ​។ ​

លោកស្រី​​បញ្ជាក់​​បន្ថែម​ថា​ បើ​​ការ​ជួប​គ្នា​ធ្វើ​ឡើង​​ស្រប​​ទៅ​តាម​​ច្បាប់​​រដ្ឋ​ធម្មនុញ្ញ​​លោក​ស្រី​​រីករាយ​​នឹង​​សហការ​​ជានិច្ច​ ប៉ុន្ដែ​​បញ្ហា​​នោះ​​គឺថា​​​តើ​​លោក​​ស៊ូ​ថេប​​អាច​​បញ្ចប់​​ការតវ៉ា​ និង​​យល់​ព្រម​​ការ​ឈាន​ទៅរក​​ការ​បោះឆ្នោត​​ជា​ការ​​នាំមុខ​​ដែរ​​ឬ​​យ៉ាង​ណា​​?​ ផ្ទុយ​ទៅ​វិញ​​ប្រសិន​​បើ​​មិន​​អាច​​បញ្ឈប់​ការ​តវ៉ា​​និង​​បើក​ឱកាស​​ឱ្យ​មាន​​ការ​បោះ​ឆ្នោត​​ទេ​​នោះ​ តើ​យើង​​អាច​​ប្រាប់​​សហគមន៍​​បរទេស​​ពី​​ការ​អនុវត្ដ​​តាម​​លទ្ធិ​​ប្រជាធិបតេយ្យ​​​បាន​​ដោយ​​របៀប​​ណា​​?​

​សូប​​បញ្ជាក់​ថា​ ពាក់​​ពន្ធ័​​នឹង​​បញ្ហា​​នយោបាយ​ដ៏​​រាំ​រ៉ៃ​​នេះ​ មិន​​ត្រឹម​តែ​​មាន​​ការ​ដោះស្រាយ​​ក្នុង​​ប្រទេស​​ថៃ​​ប៉ុណ្ណោះ​​ទេ​រដ្ឋមន្ដ្រី​ការបរទេស​​​ថៃ​​លោ​ក​ Surapong​ Tovichakchaikul​ ក៏​បាន​​ស្វែង​រក​​ជំនួយ​​ពី​​អង្គការ​សហប្រជាជាតិ​​ផងដែរ​​។​ លោក​​Surapong ​បាន​​ពិភាក្សា​ជាមួយ​​លោក​​BanKimoon​​រួច​មក​ហើយ​ ហើយ​​លោក ​BanKimoon​​ក៏​​បាន​​ព្រមាន​​ឱ្យ​​ភាគី​​ទាំង​ពី​រ​ត្រូវតែ​​ពិភាក្សា​​គ្នា​​ឱ្យ​បាន​​ឆាប់​រហ័ស​​ក្នុង​ន័យ​​ធ្វើ​​យ៉ាង​ណា​​ឱ្យ​មាន​​​កំណែ​ទម្រង់​​ជាតិ​​​ពិត​ប្រាកដ​​៕​​​(ដោយ៖ពេញ ផេង)​​ ​

​​

Vayo FM Song Request