នយោបាយ

​ឯកសារ​​ព័ត៌មាន​​សកម្មភា​ព​លោក​គីម​ ជុង​អ៊ុន​​ត្រូវ​បង្ហោះ​តាម​​ប៉េងប៉ោង​​ចូល​ទៅ​កូរ៉េ​ខាងជើង​

ក្រោយពី​ការប្រកាស​របស់​ទីក្រុង​ព្យុងយ៉ាង​ថា​មិន​អនុញ្ញាត​ឱ្យ​មាន​ការជួប​ជុំ​គ្នា​ឡើង​វិញ រវាង​ប្រជាពលរដ្ឋ​កូរ៉េ​ទាំង​ពីរ ដែល​បែកបាក់​គ្នា​ក្រោយ​សង្គ្រាម​បែក​ចែក​ទឹកដី​ប្រទេស​កូរ៉េខាងត្បូង​ហាក់​បញ្ចេញ​នូវ​សកម្មភាព​មួយ ផ្គើន​ដល់​កូរ​រ៉េ​ខាងជើង​យ៉ាងខ្លាំង​។

សកម្មភាព​ដែល​ផ្គើន​ដល់​កូរ៉េខាងជើង​នេះ​គឺថា កាលពី​ថ្ងៃ​ទី​១៥​កន្លងទៅ​កូរ៉េខាងត្បូង​បាន​បង្ហោះ​នូវ​ប៉េងប៉ោង​ជាច្រើន ដែល​ផ្ទុក​ទៅដោយ​USB​និង ​ខិតប័ណ្ណ​ជាច្រើន​សរុប​ប្រមាណ​ជា​​៥​សែន បង្ហោះ​ចូលទៅ​ក្នុង​ប្រទេស​កូរ៉េខាងជើង​។ ក្រៅពីនេះ​ក្នុង​ប៉េងប៉ោង​ក៏​បាន​ផ្ទុក​កាសែត​វីដេអូ DVD និង​ក្រដាសប្រាក់​តំលៃ​១​ដុល្លារ​ជា​ច្រើន​សន្លឹក​ផងដែរ​។​

​នៅក្នុង​USB​​និង​ខិតប័ណ្ណ​ព្រមទាំង​កាសែតវីដេអូ DVD ទាំងអស់​ដែល​កូរ៉េខាងត្បូង​បាន​បង្ហោះ​តាម​ប៉េងប៉ោង​ចូលទៅ​ក្នុង​ប្រទេស​កូរ៉េខាងជើង​នេះ គឺ​សុទ្ធតែ​ព័ត៌មាន​ដែល​បង្ហាញ​ពី​សកម្មភាព​ស្តីពី​ការរំលោភបំពាន​សិទ្ធិមនុស្ស​នៅ​កូរ៉េខាងជើង និង​សកម្មភាព​ព្រៃផ្សៃ​របស់​មេ​ដឹកនាំ​គឹម​ជុង​អ៊ុន​។

ប្រតិបត្តិការ​បង្ហោះ​ប៉េងប៉ោង​នេះ ដឹកនាំ​ធ្វើ​ដោយ​ជនភៀសខ្លួន​កូរ៉េខាងជើង ព្រោះ​ពួក​គេ​ចង់អោយ​ប្រជាជន​កូរ៉េ​ខាងជើង​ទាំងអស់​បាន​ទទួល​ព័ត៌មាន​ទាក់ទង​នឹង​សកម្មភាព​របស់​មេដឹកនាំ​គឹម​ជុង​អ៊ុន​។ ប៉ុន្ដែ​ទោះជា​យ៉ាងណាក៏ដោយ នៅ​មិនទាន់​មាន​ការឆ្លើយតប​ពី​កូរ៉េខាងជើង​ទាក់​ទង​​នឹង​បញ្ហា​នេះ​នៅឡើយ ទេ​។​

​សូមបញ្ជាក់​ថា បងប្អូន​ភ្លោះ​កូរ៉េ​ទាំង​ពីរ​មាន​បញ្ហា​ល្អក់កករ​ជាមួយ​គ្នា​​ជា​ច្រើន​ចាប់តាំង​ពី​ប្រទេស​​ទាំង​ពីរ​​បាន​​បែក​ចែក​​ទឹកដី​​ចាប់​តាំង​ពី​​ឆ្នាំ​​១៩​៥៣​។ ថ្មីៗ​នេះ​ប្រធានាធិបតី​កូរ៉េខាងត្បូង​បាន​ដាក់សំណើ​មួយ​ ដើម្បី​សុំ​ឱ្យ​ប្រជាជន​ដែល​បែកបាក់​គ្រួសារ​ក្រោយ​សង្គ្រាម​បែក​ចែក​ទឹក​ដី​បាន​​ជួ​ម​ជុំ​គ្នា​វិញ​។ ​ប៉ុន្ដែ​សំណើ​នេះ​ត្រូវបាន​ទីក្រុង​ព្យុងយ៉ាង​បដិសេធ​និង​មិន​អនុញ្ញាត​ឱ្យ​មាន​ព្រឹត្ដិការណ៍​នេះ​ជាដាច់ខាត៕​(ដោយៈ​ពេញ ផេង​)​

លោក​អូ​បា​​ម៉ា​​ជំរុញ​ឱ្យ​​សភា​ផ្ដល់​ឱកាស​​ផ្នែក​ការ​ទូត​ដល់​​អ៊ីរ៉ង់​លើ​​បញ្ហា​​នុយក្លេអ៊ែ​រ​

ប្រធានាធិបតី​របស់​អា​មេរិក​លោក​បា​រ៉ាក់​អូបា​ម៉ា បាន​ថ្លែង​ប្រាប់​ទៅ​សភា​របស់​លោក​កាលពី​ថ្ងៃ​ទី​១៣​ ខែ​មករា​ថា ត្រូវតែ​មាន​ការផ្ដល់​ឱកាស​ដល់​​ប្រទេស​​អ៊ីរ៉ង់​ទាក់​ទង​​នឹង​បញ្ហា​​នុយក្លេអ៊ែ​រ​។ ការ​ថ្លែង​​របស់​លោក​​អូ​បា​ម៉ា ​​ដូច្នេះ​បាន​ធ្វើឡើង​ស្របពេល​ដែល​​សមា​ជិក​​សភា​​ដាក់​ទណ្ឌ​កម្ម​​ជាថ្មី​​ដល់​​អី​រ៉ង់​​ជុំវិញ​​បញ្ហា​​នុយក្លេអ៊ែរ​ដ៏​ចម្រូង​ចម្រាស​បន្ទាប់ពី​​បាន​ព្រ​មាន​​ដល់​​ប្រទេស​​មួយ​​នេះ កាលពី​​ពេល​​​កន្លង​​ទៅ​។

​លោក​អូ​បា​ម៉ា​បាន​បន្ដថា កិច្ចព្រមព្រៀង​ប្រាំមួយ​ខែ​អាច​នឹង​ចូល​ជា​ធរមាន​នៅ​ថ្ងៃ​ទី​២០​ខែ​មករា ក្រោយពេល​បើ​កិច្ចពិភាក្សា​លើ​ខ្លឹមសារ​នៅ​ចុង​សប្តាហ៍​នេះ ដើម្បី​បើកទ្វារ​ផ្ដល់ឱកាស​ឱ្យ​អ៊ីរ៉ង់​មាន​ទំនាក់ទំនង​ល្អ​ជាមួយ​ប្រទេស​ដទៃ​ទៀត​ក្នុង​ពិភពលោក​។ ប៉ុន្ដែ​លោក​អូ​បា​ម៉ា​បាន​បញ្ជាក់​ដែរ​ថា ប្រសិនបើ​អ៊ីរ៉ង់​បរាជ័យ​ក្នុង​ធ្វើ​ទៅ​តាម​លក្ខខណ្ឌ​នៃ​កិច្ចព្រមព្រៀង​នុយក្លេអ៊ែរ​នេះ នោះ​អា​លោក​អូ​បា​ម៉ា​នឹង​គាំទ្រ​ឱ្យមាន​ការដាក់ទោស​ជាថ្មី ដើម្បី​បញ្ឈប់​បញ្ហា​នុយក្លេអ៊ែរ​នៅក្នុង​ទីក្រុងTehran។​

​លោក​អូ​បា​ម៉ា​បាន​សង្កត់ធ្ងន់ថា លោក​ផ្ញើ​សារ​ទៅ​សភា​នេះ​មិនមែន​ចង់ឱ្យ​មាន​ការដាក់​សម្ពាធ​បន្ថែម​លើ​លើ​អ៊ីរ៉ង់​ទេ គឺ​ចង់ឱ្យ​មាន​ការផ្តល់​ឱកាស​​ក្នុង​កិច្ចការ​ការទូត និង​ផ្តល់​ឱកាស​ឱ្យ​អ៊ីរ៉ង់​ចូលរួម​ចរចា​រក​ដំណោះស្រាយ​នៅ​លើ​តុមូល​ដោយ​សន្តិវិធី​ឆ្ពោះទៅ​រក​សន្តិភាព​វិញ​។​

​សូមបញ្ជាក​ថា កាលពីមុន​សេត​វិមាន​អាមេរិក​ក៏​បាន​ប្រកាស​ដែរ​ថា លោក​អូ​បា​ម៉ា​នឹង​បដិសេធ​ការដាក់ទោស​ណាមួយ​ដល់​ប្រទេស់​អ៊ីរ៉ង់ ពាក់​ពន្ធ័​នឹង​បញ្ហា​នុយក្លេអ៊ែរ​។ ការធ្វើ​បែបនេះ​ដោយសារតែ​លោក​អូ​បា​ម៉ា​ព្រួយបារម្ភ​ថា អាច​បង្ក​ជា​ភាព​អកុសល​ណាមួយ​ដែល​ធ្វើឱ្យ​រដ្ឋាភិបាល​ទីក្រុង Tehran ដើ​ចេញពី​តុ​ចរចារ និង​ធ្វើឱ្យ​មាន​ផល​លំបាក​ដល់​អ្នក​ដឹកនាំ​ការចរចារ​របស់​អ៊ីរ៉ង់ ហើយ​ពួកគេ​នឹង​ត្រឡប់​ទៅ​វិញ​ដោយ​គ្មាន​លទ្ធ​ផល​​អ្វី​ទាំងអស់​៕(ដោយៈ​ពេញ ផេង)​

លោក​ថាក់ ស៊ីន​ជំរុញ​ឱ្យ​​លោកស្រី​​យី​ង​ឡា​ក់​នៅ​បន្ដ​ដំណែង​

​ដោយសារតែ​ការទាមទារ​របស់​ក្រុមបាតុករ​មាន​សភាព​ខ្លាំង​ឡើងៗ និង​មាន​ទ្រង់ទ្រាយ​កាន់តែ​ធំ​ជាង​មុន​នោះ​ធ្វើ​ឱ្យ​នាយក​រដ្ឋមន្ដ្រី​ចាំ​ផ្ទះ​របស់​ថៃ​លោកស្រី​យី​ង​ឡាក់​​ ស៊ីណាវ៉ាត្រា ស្ទើតែ​បោះបង់ចោល​ដំណែងរ​បស់ខ្លួន​ទៅហើយ​។

ក្រោយមក​លោក​ស្រី​បាន​ផ្លាស់ប្ដូរ​ចិត្ដភ្លាមៗ បន្ទាប់​ពី​លោក​ស្រី​​បាន​​សន្ទនា​ជាមួយ​បងប្រុស​លោកស្រី គឺ​លោក​ថាក់ស៊ីន​ស៊ីណាវ៉ាត្រា តាម​ប្រពន្ធ័​ទំនាក់ទំនង Skype ដោយ​លោក​ថាក់ស៊ីន​បាន​ស្នើ​ឱ្យ​លោកស្រី​នៅ​បន្ដ​ដំណែង​របស់ខ្លួន និង​នៅ​តែ​ជំរុញ​ឱ្យមាន​ការបោះឆ្នោត​នៅ​ថ្ងៃទី​០២​ខែ​កុម្ភៈ​ដដែល​។

​ដំបូង​ឡើយ គឺ​នៅ​មុនពេល​ក្រុមបាតុករ​បិទ​ទីក្រុង​បាងកក​មួយថ្ងៃ លោកស្រី​យី​ង​ឡា​ក់បាន​ពិភាក្សា​ជាមួយ​មេបញ្ជាការ​កង​ទព័​ថៃ​លោកប្រា​យុទ្ធ​ចាន់​អ៊ូចា ទាក់ទង​នឹង​បញ្ហា​នេះ​ដែរ​។ ​លោកស្រី​បាន​លើកឡើង​ថា លោកស្រី​មាន​ការនឿយហត់​ខ្លាំងណាស់ ចំពោះ​ស្ថានភាព​នយោបាយ​ដ៏​ចម្រូងចម្រាស់​ក្នុង​ប្រទេស​ថៃ​បច្ចុប្បន្ន ហើយ​លោក​ស្រី​បាន​សុំ​ឱ្យ​លោក​មេបញ្ជាការ​ជួយផ្ដល់​ជា​យោបល់​ដល់​លោកស្រី​។

​ប៉ុន្ដែ​លោក​ប្រា​យុទ្ធ​ចាន់​អ៊ូ​ចា​បាន​បដិសេធ​មិន​ផ្ដល់​នូវ​យោបល់ ឬ​ទស្សនៈ​ណាមួយ តាម​ការ​សំណូមពរ​របស់​ស្រី​យី​ង​ឡាក់​ឡើយ​។ លោក​ប្រា​យុទ្ធ​បាន​លើកឡើង​ថា នៅពេល​នេះ​រាល់​ការសម្រេចចិត្ដ​គឺ​ត្រូវ​ធ្វើឡើង​ដោយ​នាយករដ្ឋមន្ដ្រី​ផ្ទាល់ ហើយ​ប្រសិនបើ​មាន​អ្វី​កើតឡើង នោះ​ក៏​ជា​ការទទួលខុសត្រូវរ​បស់​នាយករដ្ឋមន្ដ្រី​ដែរ​។​

​ក្រោយមក​ទៀត​លោកស្រី​យី​ង​ឡាក់​បាន​ជួបប្រជុំ​ជាមួយ​ថ្នាក់ដឹកនាំ​របស់​គណបក្ស​ភឿ​ថៃ និង​បាន​ពិភាក្សា​ជាមួយ​បងប្រុស​លោកស្រី លោក​ថាក់ស៊ីន​ស៊ីណាវ៉ាត្រា តាមរយៈ​ប្រពន្ធ័​ទំនាក់ទនង​Skype ដោយ​លោក​ថាក់ស៊ីន​បាន​ស្នើ​ឱ្យ​លោកស្រី​នៅ​បន្ដ​ដំណែង​របស់​ខ្លួន​តទៅ​ទៀត មិន​ត្រូវ​ប្រកាស​ចុះចេញ​ទេ​។

លោក​ថាក់ស៊ីន​បាន​បន្ដថា ប្រសិន​បើ​លោក​ស្រី​ប្រកាស​ចុះចេញ នោះ​ក្រុមបាតុករ​នឹង​សួរ​ទៅ​តុលាការ​ទាក់ទង​នឹង​ការ​ចុះចេញ​ពី​ដំណែង​របស់​លោកស្រី​ដោយ​លើកឡើង​ថា លោកស្រី​បាន​រំលោភ​លើ​ក្រម​ព្រហ្មទណ្ឌ​មាត្រា​១៥៧​ពាក់​ពន្ធ័​នឹង​ការបោះបង់​កាតព្វកិច្ច​របស់ខ្លួន​។ លើស​ពី​នេះ​ទៅ​ទៀត​​លោក​ស្រី​អាច​នឹង​មាន​ទោស​ជាប់ពន្ធនាគារ​មួយ​រយៈពេល​ផងដែរ​។​

​សូមបញ្ជាក់​ថា ដើម្បី​ទប់ស្កាត់​អំពើហិង្សា​ក្នុង​អំឡុងពេល​មាន​បាតុកម្ម​ប្រឆាំង​នឹង​រដ្ឋាភិបាល​លោក​ប្រា​យុទ្ធ​បាន​បញ្ជា​ឱ្យ​ក្រុម​កងទ័ព​ត្រូវ​ពង្រឹង​ការ​ការ​ពារ​​ ដើម្បី​ចៀស​ការប៉ះទង្គិច​គ្នា​ដោយ​ហិង្សា​។ ក្រៅពីនោះ​ក៏​មាន​ការ​ដាក់​ពង្រាយ​ក​ង​ទ័ព​នៅ​តាម​កន្លែង​សំខាន់ៗ​មួយចំនួន​ដូច​ជា​ការរិ​យា​ល័យ​​របស់​​លោកស្រី​​យីង​ឡាក់ ​និង​អាគារ​រដ្ឋាភិបាល​​ជាដើម​៕​(ដោយៈ​ពេញ ផេង)​

នាវា​ចិន​​បើក​ចូល​​តំបន់​​ជម្លោះ​​ដែន​កោះ​​ធ្វើឱ្យ​ជប៉ុន​​ឡើង​​កម្ដៅ​ជាថ្មី​

វា​គឺ ជា​រឿង​ក្ដៅគគុក​មួយ រវាង​ជប៉ុន​និង​ចិន​ពាក់​ពន្ធ័​នឹង​តំបន់​ដែនកោះ​ក្នុង​សមុទ្រចិន​ខាងកើ​ត​។ ទោះ​ជា​មិន​ទាន់​មាន​ដំណោះស្រាយ​សម​ស្រប​​នៅឡើយ​ភាពស្ងប់ស្ងាត់​បាន​កើត​ឡើង​មួយរយៈ​។ ​ប៉ុន្តែ​ថ្មីៗ​នេះ​កម្ដៅ​រវាង​ប្រទេស​ទាំង​ពីរ​បានចាប់ផ្ដើម​ជា​ថ្មី​ទៀត​ហើយ ដោយសារ​តែ​នា​វា​​ឆ្មាំ​សមុទ្រ​របស់​ចិន​បាន​ចូល​ទៅក្នុង​តំបន់​ជម្លោះ​នោះ​។

ជប៉ុន​មិន​បណ្ដោយ​ឱ្យ​ចិន​ធ្វើ​អ្វី​តាម​ចិត្ដ​នោះ​ទេ ភ្លាមៗ​ជប៉ុន​ក៏​បាន​បញ្ចេញ​ប្រតិកម្ម​របស់​ខ្លួន គឺ​រដ្ឋមន្ដ្រី​ក្រសួង​ការពារជាតិ​ជប៉ុន​បាន​ប្រកាសថា ជប៉ុន​នឹង​មាន​វិធានការ​ការពារ​តំបន់​ដែន​កោះ​ជាថ្មី មិន​បណ្ដោយ​ឱ្យ​ចិន​បំពាន​ម្ដង​ហើយ​ម្ដងទៀត​ឡើយ ព្រោះ​តំបន់​ដែន​កោះ​នោះ​ជា​អធិប​តេយ្យ​ភាព​ដែនដី​របស់​ខ្លួន​។​

​រដ្ឋមន្ដ្រី​ក្រសួង​ការពារជាតិ​រូបនេះ​បាន​បន្ដទៀតថា ជប៉ុន​មិន​អាច​មើលរំលង​ការ​លុកលុយ​របស់​ចិន​ម្ដង​ហើយ​ម្ដង​ទៀត​មក​ទៅលើ​តំបន់​ដែន​កោះ​​​នោះ​​ទេ​។ ដូច្នេះ​ជប៉ុន​ត្រូវតែ​ពង្រឹង​កិច្ចខិតខំ​ប្រឹងប្រែង​ផ្នែក​ការទូត​នៅ​ក្នុង​ដៃ នឹង​សហការ​ឱ្យបាន​ជិតស្និទ្ធិ​ជាមួ​យកង​ឆ្មាំសមុទ្រ​ក្នុង​ការ​ការ​ពារ​​អធិបតេយ្យភាព​ដែនដី​តំបន់​កោះ មិនឱ្យ​មាន​ការឈ្លានពាន​ពី​ប្រទេសជិតខាង ជាពិសេស​គឺ​ចិន​តែម្ដង​។​

​ដោយឡែក​កង​ឆ្មាំ​សមុទ្រ​បាន​ឱ្យដឹង​ដែរ​ថា វា​ជា​លើកដំបូង​ហើយ​ដែល​នាវា​ចិន​ត្រូវ​បាន​គេ​ប្រទះឃើញ​នៅក្នុង​តំបន់​ដែន​កោះ ចាប់តាំងពី​ថ្ងៃ​ទី​២៩ ​ខែ​ធ្នូ នៅពេល​ដែល​នាវា​ឆ្មាំ​សមុទ្រ​ចិន​ចំនួន​បី​ចូលក្នុង​តំបន់​ដែន​កោះ​ជម្លោះ​អស់​រយៈពេល​៣​បី​ម៉ោង​។ ក្រោយមក​ទូក​ល្បាត​ឆ្មាំ​សមុទ្រ​ជប៉ុន​បាន​ព្យាយាម​ធ្វើយ៉ាងណា​ឱ្យ​នាវា​របស់​ចិន​ចាក​ចេញពី​តំបន់​ដែល​មាន​ភាព​តានតឹង​នោះ ដើម្បី​ការពារ​ការប៉ះទង្គិច​ដោ​យ​ប្រើ​អាវុធ។​

​សូមបញ្ជាក់​ថា ពាក់​ពន្ធ័​នឹង​ជម្លោះ​ដែនកោះ​ដ៏​រាំរ៉ៃ​នេះ​នាយករដ្ឋមន្ត្រី​ជប៉ុន​​លោក​ស៊ីន​ហ្សូ អាបេ​ បាន​សន្យាថា គ្មាន​ការសម្របសម្រួល​ទៅលើ​អធិប​តេយ្យភាព​នៃ​តំបន់​ដែន​កោះ​នោះ​ទៀត​ទេ​។ ​កាលពី​ពេល​ថ្មីៗ​នេះ លោក​អាបេ បានប្រកាស​ដែរ​ថា នឹង​ពង្រឹង​ផ្នែក​យោធា​ម​ន្ថែ​មទៀត ដើម្បី​​ការពា​រ​ប្រទេស​ជាតិ​៕(ដោយៈ​ពេញ ផេង)​

ក្រុមបាតុករ​​ថៃ​ប្រកាស​​បិទ​ទីក្រុង​​បាងកក​

ដូចជា​ការគ្រោងទុករ​បស់​មេដឹកនាំ​ក្រុមបាតុករ​ប្រឆាំង​រដ្ឋាភិបាល​ថៃ លោក​ស៊ូ​ថេប​ ​ថង​ស៊ូ​​ បាន​ប្រកាស​កាល​រួចមកហើយ​ថា នៅ​ថ្ងៃ​ទី​១៣​ ខែ​មករា​នេះ នឹង​មាន​ការប្រមូលផ្ដុំ​គ្នា​ជា​ទ្រង់ទ្រាយ​ធំ ដើម្បី​បិទ​ទីក្រុង​បាងកក​ទាំងមូល​។

ជាក់ស្ដែង​ចលនា​ប្រមូលផ្ដុំ​របស់​ក្រុមបាតុករ​បាន​កើត​ឡើង​មុន​ការរំពឹង​ទុក​ទៅទៀត គឺ​ចាប់តាំងពី​ថ្ងៃ​ទី​១២​ខែ​មករា​ម្ល៉េះ​ដោយ​ពួកគេ​បាន​ជួប​ជុំ​គ្នា​​នៅ​តាម​តំបន់​សំខាន់ៗ​មួយចំនួន​ក្នុង​ទីក្រុង​បាងកក​។

ក្រុមបាតុករ​បាន​ឱ្យដឹង​ថា​ពួកគេ​នឹង​ធ្វើ​ការរារាំង​មន្ដ្រីរាជការ​មិន​ឱ្យ​ទៅ​បំពេញការងារ​បាន​ឡើយ​។ នេះ​គឺជា​ក្ដី​ព្រួយបារម្ភ​មួយ​សម្រាប់​រដ្ឋាភិបាល​ទីក្រុង​បាងកក ដោយ​មន្ដ្រី​អាជ្ញាធរ​បាន​ប្រកាសថា ចលនា​នេះ​អាច​នឹង​ឈាន​ដល់​ការ​បង្ហូរឈាម​គ្នា​ផងដែរ​។​

​ពាក់​ពន្ធ័​នឹង​ការប្រមូលផ្ដុំ​គ្នា​តវ៉ាដ៏​ចម្រូងចម្រាស​ខាងលើ​អតីត​អ្នកការទូត​របស់​ថៃ​ម្នាក់​បាន​ឱ្យដឹងថា អ្វី​ដែល​ប្រទេស​ថៃ​កំពុង​ជួបប្រទះ គឺ​មិន​មែន​​ជា​រឿង​ល្អ​ឡើយ ព្រោះ​មាន​ហានិភ័យ​នយោបាយ​បាន​កើតឡើង​រួច​ទៅ​ហើយ​រវាង​ក្រុមបាតុករ នឹង​រដ្ឋាភិបាល​របស់​លោកស្រី​យី​ង​ឡាក់​។​

ក្រុមបាតុករ​បាន​ធ្វើ​អ្វីៗ​គ្រប់បែប​យ៉ាង​ដើម្បី​ចង់​សម្រេច​គោលបំណង​របស់​ពួកគេ ក្នុង​ការផ្លាស់ប្ដូរ​រដ្ឋាភិបាល​នៅ​មុន​ថ្ងៃ​បោះឆ្នោត​។​ នេះ​ស​បញ្ជាក់​​ឱ្យឃើញថា លោកស្រី​យី​ង​ឡាក់​ស៊ីណាវ៉ាត្រា ដែល​ជា​នាយករដ្ឋមន្ដ្រី​ចាំ​ផ្ទះ​របស់​ថៃ​នាពេល​បច្ចុប្បន្ន ទំនងជា​មិន​អាច​ឱ្យ​វិល​មក​ឈរ​ឈ្មោះ​ជា​អ្នកតំណាងរាស្ដ្រ​សារជាថ្មី​នៅក្នុង​ប្រទេស​ថៃ​បានឡើយ​។

​សូមបញ្ជាក់​ថា ដោយសារ​តែ​បញ្ហា​នយោបាយ​ដ៏​ចម្រូងចម្រាស​ក្នុង​ប្រទេស​ថៃ បាន​ធ្វើឱ្យ​មាន​ការប៉ះទង្គិច​គ្នា​រហូតដល់​មាន​អ្នកស្លាប់​ដល់​ទៅ​៨​នាក់ និង​ជា​ច្រើន​នាក់​ផ្សេង​ទៀត​រងរបួស​។

ចំណែក​មួល​ហេតុ​ដែល​ធ្វើឱ្យ​ក្រុម​បាតុករ ប្រឆាំង​យ៉ាង​ដាច់ខាត​ទៅ​នឹង​រដ្ឋាភិបាល​លោកស្រី​យី​ង​ឡាក់​ស៊ីណាវ៉ាត្រា និង​ចង់​ឱ្យ​លោកស្រី​ចាក​ចេញ​​ពី​តំណែង​ជា​នាយករដ្ឋមន្ដ្រី​នោះ ដោយសារ​តែ​ស្រី​បាន​បង្កើត​នូវ​សេចក្ដីព្រាងច្បាប់​លើកលែងទោស​អ្នកនយោបាយ​ថៃ​។

ច្បាប់​នេះ​ទំនងជា​អាច​ឱ្យ​បងប្រុស​បង្កើត​របស់​លោក​ស្រី គឺ​លោក​ថាក់ស៊ីន​ស៊ីណាវ៉ាត្រា​អាច​វិលត្រឡប់​ចូល​ស្រុក​វិញ​បាន បន្ទាប់ពី​លោក​ត្រូវ​បាន​និរទេស​កាលពី​ឆ្នាំ​២០០៦​។ ​ដូច្នេះហើយ​ក្រុម​ប្រឆាំង​មិន​ចង់​ឱ្យ​លោកស្រី បន្ដ​តួនាទី​ជា​នាយករដ្ឋមន្ដ្រី​ក្នុង​ប្រទេស​ថៃ​ទៀតឡើយ​៕​(ដោយៈ​ពេញ ផេង)​

អតីត​​មេដឹកនាំ​អ៊ី​ស្រាអែល​​បាន​ទទួល​​មរណៈ​​ហើយ​

​ក្រោយ​ពី​សម្រាក​ព្យាបាល​ជម្ងឺ​មួយ​រយៈពេល​ធំ​រួចមក​លោក​Ariel Sharon អតីត​នាយ​រដ្ឋមន្ត្រី​នៃ​ប្រទេស​អ៊ីស្រាអែល​បាន​ទទួល​មរណៈភាព​ហើយ​​​កាលពី​ថ្ងៃ​សៅរ៍​​កន្លង​ទៅ​នេះ​។​

ការទទួល​មរណៈភាព​នេះ គឺ​ដោយសារតែ​លោក​កើត​ជម្ងឺ​ភ្លឹក​ដែល​បាន​សម្រាក​នៅលើ​គ្រែ​អស់​រយៈ​ពេល​ប្រមា​ណា​ជាង​៨​ឆ្នាំ​មកនេះ​នៅ​មន្ទីរ​ពេទ្យ​មួយ​នៅ​ជាយក្រុង​Tel Aviv។​ នេះ​បើ​យោង​តាម​ការចុះ ផ្សាយ​របស់​ការ​សែ​តប​រទស​មួយ ដែល​បាន​ចេញផ្សាយ​កាលពី​ថ្ងៃ​ទី​១១​ខែ​មករា​។​

​សារព័ត៌មាន​ដដែល​នេះ​បន្ត​ថា អតីត​នាយករដ្ឋមន្ត្រី អ៊ីស្រាអែល​រួប​នេះ បាន​ចំណាយពេល ជាង​ពាក់កណ្តាល​សតវត្សរ៍ នៃ​ជីវិត​របស់​គាត់ ដើម្បី​ធ្វើ​ជា​មេដឹកនាំ​របស់​ប្រទេស​អ៊ីស្រាអែល​។ ​មិនតែប៉ុណ្ណោះ​លោក Sharon ត្រូវបាន​គេ​ចាត់ទុកថា ជា​មេដឹកនាំ​នយោបាយ​មួយ​រូប​ដ៏​ល្បី​ល្បាញ​ក្នុង​ការតស៊ូ​មតិ​នានា ដើម្បី​រក​ភាពរុងរឿង​និង​សន្តិភាព​ជូន​ប្រជាពលរដ្ឋ​និង​ប្រទេស​អ៊ីស្រាអែល ។​

​គួរ​បញ្ជក់​ផង​ដែរ​ថា មុនពេល​ក្លាយជា​នាយក​រដ្ឋមន្ត្រី លោក Sharon ក៏​ធ្លាប់​ជា​រដ្ឋមន្ត្រី​ការពារជាតិ របស់​អ៊ីស្រាអែល​មួយរូបដែល​បាន​ធ្វើ​ការ​ប្រយុទ្ធ​​យ៉ាង​​ខ្លាំង​ក្លា ដើម្បី​ទប់ទល់​ការវាយលុក​លុយ​របស់​របស់​ប្រទេស​លី​បង់​មកលើ​អ៊ីស្រាអែល​នៅ​អំឡុង​ឆ្នាំ​១៩៨២​ផងដែរ​។

​លោក Ariel Sharon បាន​ក្លាយជា​នាយក​រដ្ឋមន្ត្រី​នៃ​ប្រទេស​អ៊ីស្រាអែល ចាប់ពី​ថ្ងៃ​ទី​៧ ខែ​មីនា ឆ្នាំ​២០០១ ហើយ​បាន​ចុះចេញ​ពី​តំណែង​វិញ​នៅ​ឆ្នាំ​២០០៦ ដោយសារតែ​លោក​មាន​ជំងឺ​ប្រចាំកាយ​៕(ដោយៈ​ហេង សំណាង)​

ក្រុម​អាវ​​ក្រហម​​ប្រកាស​តប​ត​ការកាន់​កាប់​ទីក្រុង​​បាងកក​​របស់​​ក្រុមបាតុករ​

បន្ទាប់ពី​ក្រុម​បាតុករ​ប្រឆាំង​រដ្ឋាភិបាល​បាន​ប្រកាស​ឱ្យដឹងថា នឹង​ធ្វើ​ការប្រមូលផ្ដុំ​គ្នា​ជា​ថ្មី​នៅ​ថ្ងៃ​ចន្ទ​ស​ប្ដា​ហ៍​ក្រោយនេះ ក្រុម​អាវ​ក្រហម​ដែល​ជា​ក្រុម​គាំទ្រ​ខាង​គណបក្ស​ភឿ​ថៃ​របស់​លោកស្រី​យី​ឡាក់​ស៊ី ណា​វ៉ា​ត្រា បានប្រកា​ស​ក្ដែងៗ​ថា ពួកគេ​នឹង​ធ្វើការ​ជួបជុំគ្នា​នៅ​ចុង​សប្ដាហ៍​នេះ​។

ការជួបជុំ​គ្នា​របស់​ក្រុម​អាវ​ក្រហម​នៅពេលនេះ គឺ​ដើម្បី​ថ្លែង​សន្ទរកថា ប្រកាស​ដល់​ក្រុមប្រឆាំង​រដ្ឋាភិបាល​ថា​ពួកគេ​នឹងមាន​វិធានការ​ទប់ស្កាត់​ចំពោះ​ទង្វើ​របស់​ក្រុម​បាតុករ​។​

​លោ​ស្រី​​Thida Thavornseth ដែល​​ជា​​មេ​ដឹក​នាំ​​របស់​​ក្រុម​​អាវ​ក្រហម​បាន​​រិះគន់​​ចំពោះ​​លោក​​ស៊ូ​ថេប ​ដោយ​​លោក​​ស៊ូ​ថេប ​បាន​ចោទប្រកាន់​ក្រុម​លោកស្រី​ថា នឹង​ជួល​មនុស្ស​ម្នាក់​ក្នុងតម្លៃ​៣​ពាន់​បាត ដើម្បី​ប្រឆាំង​នឹង​ចលនា​ប្រមូលផ្ដុំ​កាន់កាប់​ទីក្រុង​បាងកក​។

លោកស្រី Thida Thavornseth បាន​បន្ដថា លោក​ស៊ូ​ថេប ក៏​បាន​និយាយ​រិះគន់​ក្រុម​លោកស្រី​ម្ដង​ហើយ​ម្ដងទៀត ពាក់​ពន្ធ័​នឹង​ហិង្សា​ដែល​បាន​កើតឡើង​ក្នុង​ចលនា​កុប្បកម្ម​ក្នុង​ប្រទេស​កន្លងមក​ផងដែរ​។​

​ក្រៅពី​នេះ​លោកស្រី​Thida Thavornseth នៅ​មាន​មេដឹកនាំ​ក្រុម​អាវ​ក្រហម​ជាច្រើ​នាក់​ផ្សេង​ទៀត នឹង​ធ្វើ​ការដឹកនាំ​សមាជិក​របស់​ខ្លួន ទៅ​ជួបជុំ​គ្នា​​នៅ​ន្លែ​ង​ផ្សេងៗ​គ្នា​ទាំង​ខាងក្នុង​នឹង​ខាងក្រៅ​ទីក្រុង​បាងកក​។ អ្នកខ្លះ​នឹង​ជួបជុំគ្នា​នៅ​ថ្ងៃទី​១១ និង​អ្នកខ្លះ​​ទៀត​​នឹង​ជួបជុំគ្នា​នៅ​ថ្ងៃ​ទី​១២ ដើម្បី​បង្ហាញ​ពី​ការឆ្លើយតប​ទៅ​នឹង​ការ​ប្រមូលផ្ដុំ​របស់​ក្រុម​ប្រឆាំង​។

បន្ថែម​លើ​នេះ​ក្រុម​អាវ​ក្រហម​នឹង​អំពាវនាវ​ឱ្យ​ប្រជាជន​ដែល ប្រឆាំង​ក្រុមបាតុករ​កំណ​ទម្រង់​ជាតិ​ទាំងអស់ ចូលរួម​ជាមួយ​ពួកគេ​ផងដែរ ព្រោះ​ពួកគេ​យល់ឃើញ​ថា​សកម្មភាពរ​បស់​ក្រុមប្រឆាំង​រដ្ឋាភិបាល ដែល​មាន​បំណង​កាន់កាប់​ទីក្រុង​បាងកក​នៅ​ថ្ងៃ​ទី​១៣​​ខាងមុខនេះ ប្រាកដ​ជា​ប៉ះ​ពាល់​​ដល់​ជីវភាព​រស់នៅ​របស់​ប្រជាពលរដ្ឋ​។

​សូមបញ្ជាក់​ថា ប្រតិកម្ម​របស់​ក្រុម​អាវ​ក្រហម​ប្រឆាំង​នឹង​ក្រុមបាតុករ​ប្រឆាំង​រដ្ឋាភិបាល បាន​កើតឡើង​បន្ទាប់ពី​មាន​ការប្រកាស​របស់​លោក​ស៊ូ​ថេប​ដែល​ជា​មេដឹកនាំ​ក្រុមប្រឆាំង​ថា​នឹង​ជួបជុំគ្នា​ជា​ទ្រង់ទ្រាយ​ធំ​ម្ដងទៀត​នៅ​ថ្ងៃ​ទី​១៣​ខែ​មករា​នេះ​។

ម្យ៉ាងវិញទៀត​ក្រុម​អាវ​ក្រហម​ខឹង​នឹង​ការចោទប្រកាន់​របស់​លោក​ស៊ូ​ថេប ដែល​បាន​និយាយថា ពួកគេ​បាន​ជួល​មនុស្ស​ត្រៀម​ទប់ទល់​ចលនា​បាតុកម្ម​របស់​លោក ក៏​ដូច​ជា​ការចោទប្រកាន់​ពាក់​ពន្ធ័​នឹង​អំពើ​ហិង្សា​នៅ​ក្នុង​ប្រទេស​ថៃ​កន្លងមក​៕(ដោយៈ​ឡេង ដេត)​

កូរ៉េ​ខាងជើង​​បដិសេធ​​​សំណើ​សុំ​ជួប​ជុំ​គ្រួសារ​​របស់​កូរ៉េ​ខាងត្បូង​

​បន្ទាប់​ពី​ប្រធានាធិបតី​កូរ៉េខាងត្បូង​លោកស្រី ប៉ាក់ គុណ​ហឹ​ បាន​ដាក់​សំណើ​ទៅ​កូរ៉េខាងជើង ស្នើសុំ​ឱ្យ​មាន​ព្រឹត្ដិការណ៍​ជួបជុំ​ក្រុមគ្រួសារ​ដែល​បែកបាក់​គ្នា​ដោយសារ​សង្គ្រាម​បែក​ចែក​ទឹក​ដី​កាលពី​ថ្ងៃ​ទី​០៦​ខែ​មករា​។ ​ជា​​ការ​ឆ្លើយ​តប​​ត្រឹម​​តែ​​រយៈ​ពេល​​៣​ថ្ងៃ​​ប៉ុណ្ណោះ ​កូរ៉េ​ខាង​ជើង​​បាន​ដិ​សេធ​​​​ចោល​​ចំពោះសំណើ​​​មួយ​​​នេះ​។

អង្គការ​កំពូល​មួយ​របស់​កូរ៉េខាងជើង​សម្រាប់​កិច្ចការ​អន្ដរ​កូរ៉េ​បាន​និយាយថា សំណើ​មួយ​នេះ គឺ​ចង់ឱ្យ​មាន​ការជួបជុំ​គ្នា​ជាថ្មី​ម្ដងទៀត រវាង​គ្រួ​សារ​​ដែល​បែកបាក់​ដោយសារ​សង្គ្រាម ប៉ុន្ដែ​អង្គការ​នេះ បាន​ចោទសួរ​ពី​ភក្ដីភាព​របស់​កូរ៉េខាងត្បូង​ក្នុង​ការរៀបចំ​ព្រឹត្ដិការណ៍​ជួបជុំ​សាច់​ញាតិ​នេះ​។ ​កូរ៉េខាងជើង​មិនបាន​ឆ្លើយតប​ឱ្យបាន​លំអិត​ទាក់ទង​នឹង​បញ្ហា​នេះ​ទេ គ្រាន់តែ​ប្រកាស​បដិសេធ​តែប៉ុណ្ណោះ​។​

សកម្មភាព​ខាងលើ​បានធ្វើឱ្យ គណៈ​កម្មាធិការ​សម្រាប់​ការបង្រួបបង្រួម​ដោយ​សន្តិភាព​របស់​ប្រទេស​កូរ៉េ ដកស្រង់​សម្ដី របស់​ទីភ្នាក់ងារ​ព័ត៌មាន​កូរ៉េខាងជើង​ដោយ​លើកឡើង​ថា​តើ​គ្រួសារ​ទាំងអស់​ដែល​ព្រាត់ ប្រាស​សាច់ញាតិ អាច​ជួបជុំគ្នា​បាន​ដោយ​របៀប​ណា​?

ការដកស្រង់​បែបនេះ​ដោយសារ​តែ​ភាគី​ទាំងពីរ ហាក់​មាន​ភាព​មិន​ចុះសម្រុង​គ្នា​ក្នុង​ការដោះស្រាយ​បញ្ហា និង​ហាក់​ដូចជា ប្រកាន់​ត្រូវតែ​រៀង​ខ្លួន​។​ ​សូមបញ្ជាក់​ថា ក្នុងការ​ធ្វើ​សន្និសីទ​ការ​សែត​កាលពីពេល​កន្លង​ទៅ​លោកស្រី​ប៉ាក់ គុណ​ហឺ​បាន​និយាយថា កម្មវិធី​ជួបជុំ​គ្រួសារ​អាច​ជា​សន្ទុះ​ថ្មី​នៅក្នុង​កំណែ​លម្អ​ភាព​តានតឹង​រវាង​ប្រទេស​ទាំង​ពីរ​ឱ្យមាន​កំរិត​ខ្ពស់​។

ប៉ុន្ដែ​ជា​ការ​ខកចិត្ដ​ចំពោះ​កិច្ចខិតខំ​ប្រឹងប្រែង ដោយ​ជប៉ុន​បាន​បដិសេធ​ចំពោះ​សំណើរ​នេះ ហើយ​សូម្បី​តែ​អ្នកជំនួញ​មួយចំនួន​ក្នុង​ជួរ​រដ្ឋាភិបាល​កូរ៉េខាងត្បូង ក៏​បាន​សម្ដែង​នូវ​អាកប្បកិរិយា​មិន​ពេញចិត្ដ និង​បាន​បោះ​ពាក្យសំដី​មិន​សមរម្យ​មួយចំនួន​ផង​ដែរ ចំពោះ​ការបដិសេធ​របស់​កូរ៉េ​ខាង​ជើង​។ ​រឿង​មួយ​ទៀត​ដែល​ទីក្រុង​សេ​អ៊ូ​ល​សោកស្ដាយ ចំពោះ​​ទីក្រុង​ព្យុង​យ៉ាង គឺ​រដ្ឋាភិបាល​ទីក្រុង​ព្យុង​យ៉ាង​បាន​ផ្សារភ្ជាប់​បញ្ហា​ជំនួយ​មនុស្សធម៌​ទៅ​នឹង​ការ​អនុ​ត្ដន៍​ក្បូន​យោធា​រួម​គ្នា​រវាង​កូរ៉េ​ខាង​ត្បូង​​ជាមួយ​នឹង​អាមេរិក​ទៅវិញ​៕​(ដោយៈ​ពេញ ផេង)​

UN៖​បញ្ហា​​អាវុធ​គីមី​​របស់​ស៊ី​រី​​ត្រូវ​ពន្យា​​ពេល​ដល់​​ខែមិថុនា

បញ្ហា​អាវុធ​គីមី​របស់​ប្រទេស​ស៊ី​រី ដែល​គេ​ទទួល​ស្គាល់​ថា ​ជា​បញ្ហា​មួយ​ដែល​មាន​ការ​ស្មុគ​ស្មាញ​​ពិបាក​​ដោះ​ស្រាយ​​នោះ​នឹង​ត្រូវ​លើក​ពេល​ទៅ​ធ្វើ​នៅ​ខែ​មិថុនា​វិញ​។ នេះ​បើ​តាម​ការបញ្ជាក់​របស់​​អង្គការ​ហាមឃាត់​អាវុធ​គីមី​នៃ​អង្គការសហប្រជាជាតិ​។ ប៉ុន្ដែ​បើ​ទោះ​បី​ជា​បញ្ហា​នេះ គឺជា​បញ្ហា​ដែល​​​ពិបាក​​ដោះ​ស្រាយ​​ក៏ដោយ​ក៏​គេ​រពឹង​ថា​នឹង​អាច​ប្រព្រឹត្ដ​ទៅ​នៅ​ក្នុង​ខែ​មិថុនា​បាន​។​

​ទាក់ទង​នឹង​បញ្ហា​អាវុធ​គីមី​ស៊ី​រី​នេះដែរ បន្ទាប់​ពី​លោកស្រី Sigrid Kaag ប្រធាន​អង្គការ​ហាមឃាត់​អាវុធ​គីមី​នៃ​អង្គការ​សហប្រជាជាតិ​បាន​សង្ខេប​​ពី​​សមាសភាព​នៃ​សមាជិក​ក្រុមប្រឹក្សាសន្ដិសុខ អង្គការសហប្រជាជាតិ ដែល​ត្រូវ​ចូលរួម​ក្នុង​ការដោះស្រាយ​បញ្ហា​អាវុធ​គីមី ដល់​ភ្នាក់ងារ​ផ្សព្វ​ផ្សាយ​​ព័ត៌មាន​រួចមក លោកស្រី​ត្រូវបាន​គេ​ចោទសួរ​ថា តើ​វេលា​នៃ​ការធ្វើ​បេសកកម្ម​នេះ អាច​ប្រព្រឹត្ដទៅ​តាម​កាលបរិ​ច្ឆេ​ទ​ដែរឬ​យ៉ាងណា​?

​លោកស្រី Sigrid Kaag បាន​ឆ្លើយតប​ថា លោ​ស្រី​មិន​អាច​និយាយ​បាន​ទេ​ថា​បេសកកម្ម​ទាក់ទង​នឹង​ការបំផ្លាញ​អាវុធ​គីមី​ស៊ី​រី អាច​ប្រព្រឹត្ដទៅ​តាម​ការគ្រោង​ទុក​ឬ​យ៉ាងណា​នោះ​ទេ ប៉ុន្ដែ​លោកស្រី​គិត​ថា​ក្រុមប្រឹក្សា​សន្ដិសុខ​បាន​ពិភាក្សា​ពី​បញ្ហា​នេះហើយ ហើយ​ក៏​កំពុងតែ​រងចាំ​កាលបរិច្ឆេទ​នៅ​ខែ​មិថុនា​ដែរ​។ ដូច្នេះ​គ្មាន​មូលហេតុ​អ្វី​ដែល​ត្រូវ​ពន្យា​ពេល​នោះ​ទេ ព្រោះ​អ្វីៗ​ទាំងអស់​គឺ​មាន​សភាព​ល្អប្រសើ​ហើយ​។

លោកស្រី​បាន​បន្ដថា ប្រទេស​ស៊ី​រី​គឺជា​ប្រទេស​ដែល​មាន​សង្គ្រាម ស្ថានភាព​សន្ដិសុខ​អាច​ផ្លាស់​ប្ដូរ​ពី​មួយថ្ងៃ​ទៅមួយថ្ងៃ ប៉ុន្ដែ​ទាក់ទង​នឹង​បញ្ហា​នេះ​គឺ​មាន​ការរៀបចំ​រួចរាល់​ហើយ ចំណែក​ឯ​ការទំនាក់ទំនង​គ្នា​ក៏​បាន​ធ្វើ​ហើយ​ដែរ ដូច្នេះ​បេសកកម្ម​នេះ​ពិតជា​អាច​ប្រព្រឹត្ដទៅបាន​។​

​សូមបញ្ជាក់​ថា បើ​តាម​ការប្រកាស​កាល​ពី​ថ្ងៃ​ទី​០៧​ខែ​មករា​បាន​ឱ្យដឹងថា ការបញ្ជូន​សារធាតុ​គីមី​ទាំងអស់​ដែល​ត្រូវ​បំផ្លាញ​ចោល​បាន​ផ្ទុក​នៅ​លើ​​នាវា​ដា​ណឺម៉ា​ក​មួយ​នៅក្នុង​កំពង់​ផែ​នៃ​ប្រទេស​ស៊ី​រី​។ ក្រោយមក​សារធាតុ​ទាំងអស់នោះ​ត្រូវបាន​នាំយកទៅ​កំពង់ផែ​មួយ​ផ្សេងទៀត ដើម្បី​បញ្ជូន​ទៅ​ផ្ទុក​ក្នុង​នាវា​ជើង​ទឹក​របស់​សហរដ្ឋអាមេរិក​សម្រាប់​ការ​បំផ្លាញចោល​៕(ដោយៈ​ពេញ ផេង)​

ចិន​ព្រ​មាន​​ជា​ថ្មី​​ចំពោះ​​វត្ដ​មាន​​នាយក​រដ្ឋ​មន្ដ្រី​​ជប៉ុន​​នៅ​វិហារ​​យ៉ា​ស៊ូ​គូ​នី​

​ដោយសារ​តែ​ភ្លើងកំហឹង​មិនទាន់រ​សាយ​ពី​ក្នុង​ចិត្ដ ពាក់​ពន្ធ័​នឹង​វត្ដមា​ននាយករដ្ឋមន្ដ្រី​ជប៉ុន​លោក​ស៊ីន​ហ្ស៊ូ​អាបេ នៅ​ព្រះវិហា​រយ៉ា​ស៊ូ​គូ​នី ដែល​ជា​កន្លែង​គោរពបូជា​ដ៏​ចម្រូងចម្រាស់​បន្ទាប់ពី​បញ្ចប់សង្គ្រាម​រួចមក ឯកអគ្គរាជទូត​ចិន ប្រចាំ​នៅ​អង្គការសហប្រជាជាតិ​លោក Liu Jieyi បាន​សើរើ​រឿង​​រាវ​​នេះ​​ដាក់​​ទៅ​អង្គការ​សហប្រជាជាតិ ដើម្បី​ស្វែងរក​អន្ដរាគមន៍​។

ក្រៅពី​នោះ​លោក Liu Jieyi  បាន​លើកយក​បញ្ហា​នេះ​មក​បង្ហាញ​ដល់​ប្រទេស​នៅ​ទូទាំង​សាកលលោក​ទាំងអស់ ក្នុងន័យ​ព្រមាន​ជា​សាកល​ដល់​ប្រទេស​ជប៉ុន​ចំពោះ​ទង្វើ​នេះ​។ ​មន្ដ្រីការទូត​រូបនេះ​បាន​បន្ដថា ដំណើរ​ទស្សនៈកិច្ច​រប​ស់លោក​ស៊ីន​ហ្ស៊ូ​អាបេ​ទៅ​ព្រះវិហារ​យ៉ា​ស៊ូ​គូ​នី កាលពី​ពេល​​​កន្លង​​​ទៅ គឺជា​ភាព​ប្រថុយប្រថាន​មួយ​ដែល​អាច​នាំ​ប្រទេស​ជប៉ុន​ធ្លាក់​ទៅក្នុង​ផ្លូវ​គ្រោះ​ថា្នក់​។

លើសពីនេះទៅទៀត​លោក Liu បាន​ប្រាប់​អ្នកសារព័ត៌មាន​នៅ​ទីស្នាក់ការ​អង្គការសហប្រជាជាតិ​ថា សហគមន៍​អន្ដរជាតិ​ត្រូវតែ​ធ្វើការ​ព្រមាន​ដល់​លោក​អាបេ ឱ្យ​កែប្រែ​នូវ​ទស្សនវិស័យ​របស់​ខ្លួន​ចំពោះ​រឿង​ប្រវត្ដិសាស្ដ្រ​មួយ​នេះ​។ លោក​បាន​សង្កត់ធ្ងន់ថា លោក​អាបេ​ត្រូវ​តែកែតម្រូវ​កំហុស​មិនគួរ​ជ្រុលខ្លួន​ដើរ​លើ​ផ្លូវ​ខុស​យ៉ាង​ដូច្នេះ​ទេ​។​

​ជា​ការឆ្លើយតប​ជប៉ុន​បាន​បដិសេធ​ទាំងស្រុង ចំពោះ​ការចោទប្រកាន់​របស់​ចិន ដោយ​ជប៉ុន​បាន​លើកឡើង​ថា គោលបំណង​របស់​លោក​អាបេ​ចំពោះ​ដំណើរ​ទស្សនកិច្ច ទៅកាន់​ព្រះវិហា​រយ៉ា​ស៊ូ​គូ​នី គឺ​គ្រាន់តែ​ជា​ការប្ដេជ្ញាចិត្ដ និង​សន្យា​មិនឱ្យ​មាន​ប្រជាជន​រងគ្រោះ​ដោយសារ​សង្គ្រាម​ជា​ថ្មី​តែប៉ុណ្ណោះ​។

ចំណែកឯ​មន្ដ្រី​ការទូត​របស់​ជប៉ុន​ប្រចាំ​នៅ​អង្គការ​សហប្រជាជាតិ​បាន​ឆ្លើយតប​នឹង​លោក Liu ថា មិនមែន​ដូច​ការចោទប្រកាន់​របស់​ចិន​នោះ​ទេ ហើយ​លោក​អាបេក៏​គ្មាន​បំណង​ទៅ​គោរព ឬក៏​កោតសរសើរ​ដល់​ឧក្រិដ្ឋជន​សង្គ្រាម​ទាំងអស់​នោះ​ដែរ​។

​គួររម្លឹកថា ដោយសារ​តែ​វត្ដ​មាន​របស់​លោក​អាបេ​ទៅកាន់​វិហារ​យ៉ា​ស៊ូ​គូ​នី កាលពី​ថ្ងៃ​ទី​២៦ ខែ​ធ្នូ ​ឆ្នាំ​២០១៣​​​កន្លង​ទៅ​​បាន​ធ្វើឱ្យ​កំ​ម្ដៅ​រវាង​ប្រទេស​​​ទាំង​ពីរ​​កើនឡើង​សារជាថ្មី បន្ទាប់ពី​មាន​ការ​ស្ងប់ស្ងាត់​មួយរយៈ ហើយ​លោក​អា​បេក៏​បានសុំ​ជួប​ចរចារ​ជាមួយ​ចិន ដើម្បី​ពន្យល់​ពី​បញ្ហា​នេះ​ដែរ ប៉ុន្ដែ​ចិន​មិន​ព្រម​ទទួល​ការ​ណាត់ជួប​ឡើយ​។

ក្រៅពី​ជម្លោះ​ខាងលើ នៅ​មាន​ជម្លោះ​ដែន​កោះ​ដ៏​រាំ​រ៉ៃ​មួយទៀត ដែល​ប្រទេស​ទាំង​ពីរ​មិនទាន់​អាច​ដោះស្រាយបាន បើទោះបីជា​មាន​ការចូល​រួម​ពី​សហគមន៍​អន្ដរជាតិ​ក៏​ដោយ​៕​(ដោយៈពេញ ផេង)​

អាមេរិក​​បញ្ជូន​កងទ័ព​​បន្ថែម​ទៅ​​កូរ៉េខាងត្បូង​​ទប់ទល់​​ការ​គំរាម​​របស់​កូរ៉េ​ខាងជើង​

​អាមេរិក​បាន​បង្ហាញ​នូវ​ការគាំទ្រ​ដល់​កូរ៉េខាងត្បូង​សារជាថ្មី​ម្ដងទៀត​ហើយ បន្ទាប់​ពី​ប្រទេស​មួយ​នេះ​បាន​បញ្ជូន​កងទ័ព​ជាច្រើន​នាក់​ទៅ​ប្រទេស​កូរ៉េខាងត្បូង​។ ជាក់ស្ដែង​កាលពី​ថ្ងៃ​ទី​០៧​ ខែ​មករា​នេះ អាមេរិក​បាន​បង្ហាញ​ឱ្យដឹងថា ខ្លួន​នឹង​បញ្ជូន​កងទ័ព​​៨០០​នាក់​ បន្ថែម​ទៀត​ទៅ​កូរ៉េ​ខាង​ត្បូង ដើម្បី​ធ្វើ​ការការពារ​ពី​កូរ៉េខាងជើង​ដែល​ព្រមាន​ដល់​កូរ៉េខាងត្បូង ក្នុងការ​បង្ក​នូវ​ភាពអសន្ដិសុខ​ណាមួយ​។​

​ជាមួយគ្នា​នឹង​ក្ដីបារម្ភ បន្ទាប់​ពី​មេដឹកនាំ​ដ៏​ក្មេងខ្ចី​របស់​កូរ៉េខាងជើ់ង​លោក​គីម ជុង​អ៊ុន បាន​កាត់ទោស​ប្រហារជីវិត​ឪពុកមា​របស់​ខ្លួន លោក​ចាង​សុង​ថេក រួចមក​រដ្ឋ​មន្ដ្រី​ជាន់ខ្ពស់​អាមេរិក​លោក​ច​ន​ឃើ​រី ក៏​បាន​ជួប​ជាមួយ​រដ្ឋមន្ដ្រី​ការបរទេស​កូរ៉េខាងត្បូង​នៅក្នុង​ទីក្រុង​វ៉ាស៊ីនតោន​។ នៅ​ក្នុង​កិច្ច​​ជំនួប​នោះ ភាគី​ទាំងពីរ​បាន​លើ់កឡើង​ថា ភាព​ត្រូវ​រូ​វ​គ្នា​រវាង​បងប្អូន​បង្កើត​កូរ៉េ​ទាំង​ពីរ ពិតជា​មិន​ងាយ​នឹង​កើតឡើង​បាន​ទេ​សូម្បី​តែ​ជំ​ហ៊ាន​តូច​មួយ​។

​លោក​ឃើ​រី​បាន​បន្ដថា លោក​នឹង​មិន​អាច​ទទួល​បាន​ទេ​ចំពោះ​កូរ៉េខាងជើង​ដែល​ជា​រដ្ឋ​មួយ​នៃ​ប្រភព​នុយក្លេអ៊ែ​នោះ​។ ក្រៅពី​នោះ​អាមេរិក​នៅ​តែ​បន្ដថា ខ្លួន​នៅតែ​មាន​ឆន្ទៈ​ក្នុង​ការការពារ​សាធារណៈរដ្ឋ​កូរ៉េ​ខាងត្បូង​តាមរយៈ​ការទប់ស្កាត់ និង​ការពង្រីក​ជួរ​កងទ័ព​អាមេរិក​នៅ​តាម​តំបន់​សំ​ខាន់ៗ​ក្នុង​ប្រទេស​កូរ៉េខាងត្បូង​។ អាមេរិក​នឹង​បន្ដ​ធ្វើ​ទំនើបកម្ម​ផ្នែក​កងទ័ព​បន្ថែមទៀត ដើម្បី​ទប់ទល់​នឹង​ការគំរាមកំហែង​ពី​កូរ៉េខាងជើង​។

​សូមបញ្ជាក់​ថា នៅ​ខែ​ក្រោយ​អាមេរិក​នឹង​បញ្ជូន​កងទ័ព​៨០០​រយ​នាក់ និង​សម្ភារៈ​ធ្វើសឹក​មួយចំនួន​ទៀត​ដូចជា រថក្រោះ​និង​អាវុធ​ផ្សេងៗ​ជាដើម ទៅ​ជំរុំ​ទ័ព​តាម​តំបន់​ព្រំដែន​រវាង​កូរ៉េ​ខា​ជើង​និង​ខាងត្បូង​។ នេះ​បើ​តាម​ការបញ្ជាក់​របស់​អ្នកនាំពាក្យ​ក្រសួងការពារជាតិ​របស់​អាមេរិក​។

អ្នកនាំ​ពាក្យ​​រូប​​នេះ​បាន​បង្ហាញ​ទៀត​ថា មាន​វត្ដ​មាននៃ​កងទ័ព​អាមេរិក​មាន​ប្រមាណ​ជា​២៨៥០០​នាក់​ហើយ​ក្នុង​ប្រទេស​កូរ៉េខាងត្បូង ហើយ​អាមេរិក​នឹង​បន្ដ​វត្ដ​មាន​កងទ័ព​ទាំងនេះ​យូរ​ទៅទៀត​នៅ​ក្នុង​ពេល​អនាគត​៕(ដោយៈ​ពេញ ផេង)​

មេបញ្ជាការ​​ថៃ​អះអាង​ថា​គ្មាន​​ផែនការ​​ធ្វើ​រដ្ឋប្រហារ​ទេ​

បន្ទាប់​ពី​ការប្រកាស​របស់​ក្រុមបាតុករ​ប្រឆាំង​រដ្ឋាភិបាល​ថា នឹង​ប្រមូលផ្ដុំ​គ្នា​ជា​ថ្មី​ដើម្បី​ដាក់​គំនាប​លើ​ទីក្រុង​បាងកក​ទាំងមូល​មិន​បាន​ប៉ុន្មាន​ថ្ងៃ​ផង មាន​រថក្រោះ​យោធា និង​រថពាស​ដែក​​ដង្ហែ​​នៅ​តាម​​ផ្លូវ​នៅ​ក្នុង​​ទីក្រុង​​បាង​កក​ជា​ច្រើន​​គ្រឿង​។

ប៉ុន្ដែ​វត្ដ​មាននៃ​រថក្រោះ​និង​រថពាសដែក​ក្នុង​ទីក្រុង​បាង​កក​​នៅ​ពេល​នេះ គឺ​មិន​មែន​​ជា​​ការ​រៀបចំ​​ធ្វើ​​រដ្ឋ​ប្រហារ ​ឬក៏​ការ​ការពារ​​ក្រុម​បាតុករ​​នោះ​​ទេ គ្រាន់តែ​ជា​ចលនា​មួយ​ក្នុងការ​ដង្ហែ​ក្បូន​យោធា​សម្រាប់​ទិវា​កុមារ​ជាតិ​នៅ​ថ្ងៃទី​១១ និង​ការ​ប្រារព្ធ​ទិវា​កងទ័ព​ថៃ​នៅ​ថ្ងៃទី​១៨​ខែ​មករា​តែ​ប៉ុណ្ណោះ​។​

​ពាក់​ពន្ធ័​នឹង​បញ្ហា​ខាងលើ​នេះ លោក Wara Boonyasit មេបញ្ជាការ​នៃ​កងពល​ទី​១​របស់​ព្រះមហាក្សត្រ​ថៃ បាន​និយាយ កាលពី​ថ្ងៃ​ទី​០៦​ខែ​មករា​ថា ការ​ដង្ហែ​ក្បូន​យោធា​ដែល​មាន​រថក្រោះ និង​រថពាសដែក​នៅតាម​ដងផ្លូវ​ក្នុង​ទី​ក្រុង​បាងកក​នេះ គឺ​មិនមែន​ជា​ការ​ចល័ត​កង​ទព័ និង​គ្រឿង​​ព្វា​វុ​ធ​សង្គ្រាម​សម្រាប់​ធ្វើ​រដ្ឋប្រហារ​នោះទេ​។ ការ​បញ្ជាក់​បែប​នេះ គឺ​ដើម្បី​ឆ្លើយតប​ទៅនឹង​ពាក្យ​ច​ចាម​អារាម​មួយចំនួន​ដែល​បាន​ចោទ​ប្រកាន់​​សកម្មភាព​ខាងលើ​ថា​ជា​ទង្វើ​នៃ​ការធ្វើ​រដ្ឋប្រហារ​។

​មេបញ្ជាការ​នៃ​កងពល​ទី​១​របស់​ព្រះមហាក្សត្រ​ថៃ​រូបនេះ​បាន​សង្កត់ធ្ងន់ថា ដោយសារតែ​ស្ថានភាព​នៅ​ក្នុង​ប្រទេស​ថៃ​មិនទាន់​មាន​សភាព​ធូរស្រាល​ឡើងវិញ ពី​សំណាក់​ការតវ៉ា​របស់​ក្រុមបាតុករ ហេតុដូច្នេះ​ហើយ​បានជា​មាន​ការយល់ច្រឡំ​។ ប៉ុន្ដែ​ទោះជា​យ៉ាងណាក៏ដោយ ពាក្យ​ច​ចាម​អារាម​ទាំងនេះ​មិន​ពិតប្រាកដ​ឡើយ​។

ក្រៅពី​នោះ​លោក​បាន​បង្ហាញ​ឱ្យដឹងថា ការ​ដង្ហែ​ក្បូន​យោធា​នេះ​គឺជា​ការឆ្លើយតប​ទៅនឹង​មេបញ្ជាការ​កង​ទព័​ជាន់ខ្ពស់​ថៃ​លោក ប្រា​យុ​ត​ចាន់​អ៊ូ​ចា ដែល​លោក​ស្នើ​ឱ្យ​មាន​ការបង្ហាញ​ពី​សព្វាវុធ​ទំនើបៗ​របស់ខ្លួន ទៅ​ដល់​ប្រទេស​ដទៃ​ទៀត​ដែល​មាន​បំណង​ចង់​វាយប្រហារ​មកលើ​ប្រ​ទេស​​ថៃ​តែប៉ុណ្ណោះ​។​

​ដោយឡែក​អនុប្រធាន​អ្នកនាំពាក្យ​កងទ័ព​ភូមិន្ទ​ថៃ​បាន​ឱ្យដឹងថា នៅ​ថ្ងៃ​ទី​០៩ ​ខែ​មករា​សម្ភារៈ​យោធា​ទាំងអស់នេះ​នឹង​ត្រូវបាន​ផ្លាស់ប្តូរ​ពី​ខេត្ដ​​រ៉ាត់​ចា​បូរី ខេត្ដ​ប្រា​ជិន​ប៊ូ​រិ និង​ខេត្ដ​ឡូ​ភូរិ ចូលទៅ​ក្នុង​ទីក្រុង​បាងកក​​ ដើម្បី​ជា​ផ្នែក​មួយ​នៃ​ព្រឹត្ដិការណ៍​ទិវា​កុមារ​ជាតិ​ថៃ​នៅ​ថ្ងៃ​ទី​១១​មករា​។​

​សូមបញ្ជាក់​ថា ការ​ដង្ហែ​ក្បូន​យោធា​ខាងលើ​ធ្វើ​ឡើង​ក៏​ដើម្បី​ជា​ការគោរព​ដល់​មេបញ្ជាការ​កំពូល​លោក Prayuth និង​លោក Thanasak Patima​prakorn ដែល​នឹង​ចូល​និវត្តន៍​នៅ​ចុង​​ខែ​កញ្ញា​​ ឆ្នាំ​២០១៤​នេះ​​ផង​​ដែរ​៕(ដោយៈពេញ ផេង)​

កិច្ច​ពិភាក្សា​​នៅ​ស៊ូដង់​​ខាងត្បូង​​នឹង​ពាំនាំ​​ក្ដីសង្ឃឹម​​ក្នុង​ការ​បញ្ឈប់​​អំពើហឹង្សា​

ដោយសារតែ​សង្គ្រាម​ស៊ីវិល​ដណ្ដើម​កាន់​កាប់​អំណាច​ក៏ដូចជា​កាន់កាប់​នូវ​តំបន់​មួយចំនួន​នៅក្នុង​ប្រទេស​ស៊ូដង់​ខាងត្បូង កាលពី​ថ្ងៃ​ទី​០៦ ​ខែ​មករា​នេះ ប្រធានាធិបតី​របស់​ប្រទេស​ស៊ូដង់​លោក​ Omar al-Bashir បាន​ធ្វើដំណើរ​ទៅដល់​ប្រទេស​មួយ​នេះ​ហើយ​។

ការធ្វើដំណើរ​ទៅ​កាន់​ប្រទេស​ស៊ូដង់​ខាងត្បូង​របស់​ប្រធានាធិបតី​រូប​នេះ​គឺ​ដើម្បី​បើក​កិច្ច​ពិភាក្សា​គ្នា​ដោះស្រាយ​បញ្ហា​ដែល​បាន​កើតឡើង​ពាក់​​ពន្ធ័​​ នឹង​ការប្រយុទ្ធ​គ្នា​យ៉ាង​​សាហាវ​ឃោ​ឃៅ​។​ លោក​Omar al-Bashir​បាន​ធ្វើដំណើរ​តាម​ជើង​យន្ដហោះ​នៅ​ក្នុង​ទីក្រុង​ជូ​បាន​មុន​ពេល​លោក​​ទៅ​ជួប​នឹង​ប្រធានាធិបតី​ស៊ូដង់​ខាងត្បូង​លោក​SalvaKiir។​

​បន្ទាប់​មក​សន្និសីទ​ការ​សែត​ចំនួន​ពីរ​ក៏​បាន​ប្រារព្ធ​ឡើ​។​នៅក្នុង​ការធ្វើ​សន្និសីទ​នេះ​លោក​ al-Bashir បាន​សង្កត់ធ្ងន់ថា លោក​បាន​ត្រៀម​ខ្លួន​រួចរាល់​ហើយ​នៅក្នុង​ជួប​ពិភាក្សា​គ្នា​ដើម្បី​ដោះស្រាយ​បញ្ហា ដោយ​លោក​បាន​គាំទ្រ​ចំពោះ​ស៊ូដង់​ខាងត្បូង​ក្នុង​ការរៀបចំ​ការបើក​កិច្ចពិភាក្សា​។

នេះ​បើ​តាម​ការបញ្ជាក់​របស់​ភ្នាក់ងារ​ព័ត៌មាន​ស៊ូដង់​ខាងត្បូង​។​ដំណើរ​ទស្សនៈកិច្ច​របស់​ប្រធានាធិបតីស៊ូដ​ង់ ទៅកាន់​ប្រទេស​ស៊ូដង់​ខាងត្បូង​រូបនេះ គឺ​ស្របពេល​ដែល​បក្សប្រឆាំនៅ​ស៊ូដង់​ខាងត្បូង​បាន​ព្យាយាម​ដោះស្រាយ​បញ្ហា​ហិង្សា​ដោយ​ប្រើ​អាវុធ​ដាក់គ្នា​នេះ​ដែរ​ប៉ុន្ដែ​មិនទាន់​ទទួល​បាន​ប្រសិទ្ធភាព​។

​សូមបញ្ជាក់​ថា​ការពិភាក្សា​គ្នា​រវាង​លោក​Omar al-Bashir​និង​លោក​SalvaKiir​នឹង​ប្រព្រឹត្ដទៅ​នៅ​ថ្ងៃ​ទី​០៧​ខែ​មករា​នេះ​។​ដែល​មិន​ត្រឹមតែ​ជា​ការពិភាក្សាគ្នា​ចាំបាច់​ខាង​ផ្នែក​មនុស្សធម៌​ប៉ុណ្ណោះ​ទេ ហើយ​វា​ក៏​ជា​ការពិភាក្សា​មួយ​ដើម្បី​ស្វែងរក​ដំណោះស្រាយ​បញ្ឈប់​ឈុត​ឆាកប្រយុទ្ធ​គ្នា​យ៉ាង​សាហាវឃោឃៅ​នៅក្នុង​ប្រទេស​ក្មេងខ្ចី​មួយ​នេះ​ដែរ​។​    ​

​គួររម្លឹកថា​អំពើហិង្សា​ក្នុង​ប្រទេស​ស៊ូដង់​ខាងត្បូង​បាន​ផ្ទុះឡើង​កាលពី​ថ្ងៃ​ទី​១៥​ខែ​ធ្នូ​កន្លង​ទៅ នៅពេល​ដែល​ពួក​ឧទ្ទាម​ស្មោះស្ម័គ្រ​នឹង​អនុ​ប្រធានាធិបតី​ត្រូវ​បាន​បណ្តេញចេញ​RiekMachar​បាន​ព្យាយាម​រៀបចំ​ធ្វើ​រដ្ឋប្រហារ​មួយ​។ ​ចាប់តាំងពី​ពេលនោះ​មក​សមាជិក​កងជីវពល​ស្មោះត្រង់​នឹង​មេដឹកនាំ​បណ្តេញចេញ​រូបនេះ បាន​វាយ​ប្រយុទ្ធ​យ៉ាង​ខ្លាំងក្លា​ជាមួយ​កងកម្លាំង​រដ្ឋាភិបាល​។​

អំពើហិង្សា​ក៏បាន​រីក​រាលដាល​យ៉ាង​ឆាប់រហ័ស​ជាមួយនឹង​របាយការណ៍​នៃ​ការសម្លាប់​រង្គាល​ដែល​កំពុង​កើនឡើង​នៅ​ទូទាំង​ប្រទេស​ស៊ូដង់​ទាំង​មូល​ដោយ​មាន​មនុស្ស​ស្លាប់​ជាង​១​ពាន់​នាក់ និង​ប្រជាជន​ចាកចេញ​ពី​លំនៅស្ថាន​របស់​ខ្លួន​ប្រមាណ​ជា​២​សែន​នាក់​ផងដែរ​៕(ដោយៈ​ពេញ​ ផេង)​

ប្រធានាធិបតី​​កូរ៉េខាងត្បូង​​ស្នើ​ឱ្យមាន​​ការជួប​ជុំ​គ្រួសារ​​ដែល​បែក​បាក់​​ជាមួយ​​កូរ៉េ​ខាងជើង​

​បន្ទាប់​ពី​​មាន​​ការ​ប៉ះ​ទង្គិច​​គ្នា​​ដោយ​​ការ​បោះ​​ពាក្យ​សំដី​​ឌឺដង​​ទៅ​វិញ​​ទៅ​មក​​រវាង​បងប្អូន​បង្កើត​កូរ៉េខាងត្បូង និង​កូរ៉េ​ខាងជើង​ ​កាលពី​​ចុងឆ្នាំ​២០១៣​​​កន្លង​​ទៅ​ នៅក្នុង​សន្និសីទ​សារព័ត៌មាន​កាល​ពី​ព្រឹក​ថ្ងៃទី​០៦​ ​ខែ​មករា​នេះ ប្រធានាធិបតី​កូរ៉េខាងត្បូង​លោកស្រី​ប៉ាក់ គុន​ហេ បាន​ដាក់​សំណើរ​ជា​ថ្មី​ម្ដងទៀត​សុំ​ឱ្យមាន​ការជួបជុំ​គ្នា​ឡើងវិញ​រវាង​ប្រជាជន​កូរ៉េខាងត្បូង និង​កូរ៉េខាងជើង​។

ការស្នើសុំ​ឱ្យ​មាន​ការជួប​ជុំ​សាច់ញាតិ​ឡើងវិញ​នេះ ដោយសារតែ​ពួកគេ​បាន​បែក​ពី​គ្រួសារ​សាច់ញាតិ​របស់​ខ្លួន​ក្នុង​សម័យ​សង្គ្រាម​បែក​ចែក​ទឹក​ដី​នៃ​ប្រទេស​កូរ៉េ​។ ​លោកស្រី​ប៉ាក់ ​គុន​ហេ បាន​បន្ដថា​ការជួបជុំ​គ្នា​គួរតែ​បាន​ចាប់ផ្ដើម​ឡើង​តាំង​ពី​ការប្រជុំ​ធំ​បី​ឆ្នាំមុន​ម្លេះ ប៉ុន្ដែ​គ្រាន់តែ​ជា​ថ្ងៃ​ចាប់​ផ្ដើម​​ដំបូង​នៃ​ព្រឹត្តិការណ៍​នេះ ទីក្រុង​ព្យុងយ៉ាង​បាន​បង្អាក់​សកម្មភាព​ដែល​បណ្ដាល​ឱ្យ​មាន​ការ​ស្ដីបន្ទោស ក៏ដូចជា​ការប្រទូសរ៉ាយ​យ៉ាងខ្លាំង​ពី​សំ​ណាក់​​កូរ៉េខាងត្បូង​។

លោកស្រី​​ក៏​សង្ឃឹម​ដែរ​ថា ការជួបជុំ​គ្នា​រវាង​គ្រួសារ​ដែល​បាន​បែកបាក់ នឹង​អាច​ធ្វើទៅបាន​ក្នុង​ពិធី​បុណ្យចូលឆ្នាំថ្មី​ខាងមុខ ដែល​នឹង​ប្រព្រឹត្ដ​ទៅ​​នៅ​ថ្ងៃ​ទី​៣១ ​ខែ​មករា ដើម្បី​ដោះស្រាយ​វិបត្ដិ​ផ្លូវចិ​ត្ដ​ជនជាតិ​កូរ៉េ​ឱ្យបាន​ជា​សះស្បើយ​ឡើងវិញ​។​

ស្របពេល​ជាមួយគ្នានេះ ប្រធានាធិបតី​កូរ៉េ​ខាង​ត្បូង​​លោកស្រី​ប៉ាក់​ គុន​ហេ បាន​បញ្ជាក់​ដែរ​ថា នឹង​បង្កើន​ការ​ឧបត្ថម្ភ​​ជំនួយ​​មនុស្ស​ធម៌​​បន្ថែម​ទៀត​​ដល់​​កូរ៉េ​ខាងជើង​​ដោយ​​កាលពី​​ឆ្នាំមុន​​ទីក្រុង​​សេ​អ៊ូ​ល ​បាន​ផ្ដល់​ជំនួយ​ប្រមាណ​១២​លាន​៧​សែន​ដុល្លារ​អាមេរិក សម្រាប់​ប្រតិ​បត្ដិការអ​ង្គ​ការ​អន្តរជាតិ ក្នុង​ប្រទេស​កូរ៉េខាងជើង​រួចមកហើយ។

ប៉ុន្ដែ​ពេល​បច្ចុប្បន្ន​នេះ កូរ៉េខាងត្បូង​មិនទាន់​បាន​ផ្ដល់​នូវ​ជំនួយ​ដោយ​ផ្ទាល់​ទៅ​កូរ៉េខាងជើង​នៅ​ឡើយ​ទេ​។ លោកស្រី​បាន​សង្កត់ធ្ងន់ថា ស្ថាន​ភាព​​សន្តិសុខ​នៅ​លើ​ឧបទ្វីប​កូរ៉េ គឺ​ពិតជា​ធ្ងន់ធ្ងរ​មិន​ធ្លាប់​មាន​ទេ ហើយ​លោក​ស្រី​បាន​អំពាវនាវ​ឱ្យ​បញ្ចប់​ការ​ការគំរាមកំហែង​គ្នា​ទៅវិញទៅមក និង​បើក​សម័យកាល​នៃ​ការបង្រួបបង្រួម​គ្នា​ជា​ធ្លុង​មួយ​វិញ​។​

​សូមបញ្ជាក់​ថា ការស្នើសុំ​ឱ្យ​មាន​ការជួប​ជុំ​គ្រួសារ អ្នក​ដែល​បាន​បែកបាក់​គ្នា​កាលពី​សម័យ​សង្គ្រាម ត្រូវបាន​កូរ៉េខាងជើង​លុបចោល​ម្ដង​រួច​មក​ហើយ​កាលពី​ខែ​កញ្ញា​ឆ្នាំ​២០១៣​។ ដូច្នេះ​កាលពី​ព្រឹក​ថ្ងៃ​ទី​០៦​ខែ​មករា​នេះ ប្រធានាធិបតី​កូរ៉េខាងត្បូង បាន​ស្នើ​ទៅ​កូរ៉េខាងជើង​ជាថ្មី​ម្ដងទៀត ដើម្បី​អនុញ្ញាត​ឱ្យ​មាន​ព្រឹត្ដិការណ៍​នេះ​ឡើង​វិញ​។​

​គួររម្លឹកថា ព្រឹត្ដិការណ៍​ជួបជុំ​គ្រួសារ​ដែល​បែកបាក់​គ្នា​ក្នុង​សម័យ​សង្គ្រាម បាន​ចាប់ផ្តើម​ឡើង​ម្ដង​រួចមក​ហើយ​បន្ទាប់​ពី​កិច្ចប្រជុំ​កំពូល​អន្តរ​កូរ៉េ​ជា​ប្រវត្តិសាស្ត្រ​នៅ​ឆ្នាំ​២០០០ ហើយ​កាលណោះ​មាន​ប្រជាជន​ប្រមាណ​ជា ១៧០០០​នាក់​ បាន​ជួបជុំគ្នា​ចាប់តាំងពី​ពេលនោះ​មក​។ ប៉ុន្តែ​ការ​ជួប​ជុំ​​នេះ​ត្រូវបាន​ផ្អាក​ជា​ថ្មី​ម្តងទៀត​នៅក្នុង​ឆ្នាំ​២០១០ បន្ទាប់ពី​មាន​បញ្ហា​នៅ​តំបន់​ព្រំដែន​កោះ​កូរ៉េខាងត្បូង​។

​នៅ​ឆ្នាំ​ចុងក្រោយ​នេះ​កូរ៉េ​ខាងជើង​បាន​សំដែង​សកម្មភាព​បង្កហេតុ​មួយចំនួន​រួម​មាន​ការ​ធ្វើ​តេស្ត​អាវុធ​នុយក្លេអ៊ែរ​លើក​ទី​បី​ការគំរាមកំហែង​នៃ​ការវាយប្រហារ​យោធា និង​បិទ​ឯកតោភាគី​នៃ​តំបន់ឧស្សាហកម្ម​អន្តរ​កូរ៉េ​ជាដើម​៕(ដោយៈ​ពេញ ផេង)​

លោកស្រី​យី​ង​ឡាក់​៖​បោះឆ្នោត​​ប្រឆាំង​​នឹង​ខ្ញុំ​​បើ​ចង់ឱ្យ​​ខ្ញុំ​ចាក​ចេញ​

​នាយករដ្ឋមន្ដ្រី​ចាំផ្ទះ​ថៃ លោកស្រី​យី​ង​ឡាក់​ស៊ីណាវ៉ាត្រា បាន​​បញ្ជាក់​​ប្រាប់​​ទៅ​​គណបក្ស​នយោបាយ​​ដែល​​ជា​​គូរ​​ប្រជែង​​ជាមួយ​​លោក​ស្រី​​កាល​​ពី​ថ្ងៃ​​ទី​០៥​​ ខែ​មករា​​ថា ប្រសិន​បើ​ចង់ឱ្យ​លោកស្រី​ចាកចេញ​ពី​ការិយាល័យ ពួកគេ​ត្រូវតែ​ចូលរួម​ប្រកួតប្រជែង​នៅក្នុង​ការបោះឆ្នោត​។​

ជា​ការបោះឆ្នោត​ជ្រើសរើស​នាយករដ្ឋមន្ដ្រី​ថ្មី ដើម្បី​គ្រប់គ្រង​ប្រទេស ហើយ​នឹង​ប្រព្រឹត្ដទៅ​នៅ​ថ្ងៃ​ទី​០២​ខែ​កុម្ភៈ​ខាង​មុខ​។ លោកស្រី​បាន​បញ្ជាក់​បន្ថែម​​ថា លោកស្រី​ចង់​ស្នើសុំ​ឱ្យ​គ្រប់​ភាគី​ទាំងអស់​ត្រូវ​ធ្វើ​អ្វី​ប្រកប​ដោយ​ភាព​អត់ឱន និង​អធ្យាស្រ័យ​គ្នា​ទៅវិញទៅមក ហើយ​ទុកឱ្យ​ពេលវេលា​ជា​អ្នក​ដោះស្រាយ​បញ្ហា​វិញ​។

រាល់​បញ្ហា​ដែល​ប្រឈម​បច្ចុប្បន្ននេះ គឺ​វា​កាន់តែ​ស្មុគស្មាញ​ខ្លាំង​ឡើងៗ ហើយ​បញ្ហា​ទាំងអស់​នេះ​មិន​អាច​ដោះស្រាយ​តែ​មួយ​ថ្ងៃ​បានទេ​។​ ដូច្នេះ​ប្រសិនបើ​អ្នក​គ្រប់គ្នា​មិន​ចង់ឱ្យ​រដ្ឋាភិបាល​វិល​មក​កាន់​អំណាច​វិញ​ទេ អ្នក​ទាំងអស់​គ្នា​ត្រូវតែ​ចូលរួម​ប្រកួតប្រជែង​នៅក្នុង​ការបោះឆ្នោត និង​​ប្រែ​កា្លយ​​ការ​ប្រមូល​ផ្ដុំ​របស់ខ្លូ​ន​ទៅ​ជា​ការត្រួតពិនិត្យ​លើ​ការបោះឆ្នោត​វិញ​។​

​នៅលើ​ទំព័រ Facebook របស់​លោកស្រី លោកស្រី​យី​ង​ឡាក់​បាន​បញ្ជាក់បន្ថែម​ថា ការបោះឆ្នោត​គី​ជា​ឱសថ​មួយ​សម្រាប់​ព្យាបាល​ជម្លោះ​នយោ​បាយ​នៅក្នុង​ប្រទេស​ថៃ ហើយ​វា​ក៏​ជា​យន្ដការ​ក្នុង​ការដោះស្រាយ​បញ្ហា​តាម​បែប​ប្រពន្ធ័​ប្រជាធិបតេយ្យ​ដែរ​។​

ក្រៅពី​នេះ​លោកស្រី​បាន​លើក​ឡើង​​ថា ​បន្ទាប់ពី​រដ្ឋសភា​ត្រូវបាន​រំលាយ​រដ្ឋាភិបាល​នៅ​មិនទាន់​អាច​ដោះស្រាយ​បញ្ហា​សេដ្ឋកិច្ច​បាន​នៅ​ឡើយ​​ទេ ដូច​ជា​ការបង្កើន​ផលិតផល​ក្នុងស្រុក​សរុប​តាមរយៈ​ការចំណាយ​របស់​រដ្ឋាភិបាល​ជាដើម​។

ដូច្នេះ​បញ្ហា​នេះ បានធ្វើឱ្យ​ការវិនិយោគ​ឯកជន​ហាក់​មាន​ការព្រងើយកន្តើយ​។ ចំណែកឯ​អ្នកទេសចរ​បរទេស ជាច្រើ​នាក់​បាន​លុបចោល​ការដើរ​កម្រា​ន្ដ​របស់​ខ្លួនៅ​ក្នុង​ប្រទេស​ថៃ ហើយក៏​មាន​ប្រទេស​មួយចំនួន​ទៀត​នៅក្នុង​ពិភពលោក បាន​ហាមប្រាម​ប្រជាជន​របស់​គេ មិន​ឱ្យ​មក​ទស្សនា​នៅក្នុង​ប្រទេស​ថៃ​ផង​ដែរ​។

លោកស្រី​យី​ង​ឡាក់​ស៊ីណាវ៉ាត្រា​បាន​សង្កត់ធ្ងន់ថា ត្រូវតែ​មាន​ការពិភាក្សា​គ្នា​បើទោះបីជា​មាន​ទស្សនៈ​មិន​ដូចគ្នា​ទាំងអស់​ក៏​ដោយ មិនត្រូវ​មាន​ការ​បែក​ចែក​យ៉ាង​ដាច់ស្រឡះ​ដូច្នេះ​ទេ​។​ សូម​កុំ​បន្សល់​ទុក​ជម្លោះ​នេះ ឱ្យ​កូនចៅ​ជំនាន់​ក្រោយ​អី​។ ត្រូវ​ប្រែកា្លយ​ភាព​ខុសប្លែក​គ្នា​នេះ​ឱ្យទៅ​ជា​កម្លាំងចលករ​មួយ ដើម្បី​ងាក​មក​រក​ការដោះស្រាយ​បញ្ហា​ដើម្បី​ប្រទេសជាតិ​ទាំងមូល​។​

​សូមបញ្ជាក់​ថា ការប្រកាស​របស់​លោក​ស្រី​យី​ង​ឡាក់​ខាងលើនេះ បាន​ធ្វើឡើង​បន្ទាប់​ពី​ក្រុមបាតុករ​ប្រឆាំង​រដ្ឋាភិបាល ប្រកាស​ថា​នឹង​ប្រូល​ផ្ដុំគ្នា​ជាថ្មី​ម្ដងទៀត​នៅ​ថ្ងៃទី​១៣​​ខាងមុខ ដោយ​ការ​ជួ​ម​ជុំ​គ្នា​នេះ គឺ​ពួក​គេ​ចង់​ដាក់​គំនាប​ទៅលើ​ទីក្រុង​បាងកក​ទាំងមូល​តែ​ម្ដង​។

ក្រៅពីនេះ​ពួកគេ​បាន​គម្រាម​ផ្ដាច់​ទឹក និង​ចរន្ដ​អគ្កិសនី​នៅ​គេហដ្ឋាន​របស់​លោកស្រី​យី​ង​ឡាក់ ក៏ដូចជា​វិមាន​រដ្ឋាភិបាល​ដទៃទៀត​ដែរ​។​ ការ​ធ្វើ​​បែប​​នេះ​​ដោយសារ​តែ​ពួក​គេ​ចង់​ទម្លាក់​លោកស្រី​យី​ង​ឡាក់​ពី​ដំណែង​ជា​នាយក​មន្ដ្រី​ចាំផ្ទះ និង​ចង់​ធ្វើកំណែទម្រង់​ជាតិ​នៅ​មុន​ថ្ងៃ​បោះ​ឆ្នោត​៕(ដោយៈ​ពេញ ផេង)​

មេដឹកនាំ​​បក្សប្រឆាំង​​ភូមា ​អំពាវនាវ​​ឲ្យ​យោធា​​ចូលរួម​​ធ្វើ​វិសោធន​កម្ម​រដ្ឋ​ធម្មនុញ្ញ​​ចាស់​គំរិល​

​មេដឹកនាំ​បក្សប្រឆាំង​នៅ​ភូមា​លោកស្រី​អ៊ុង​ សាន​ស៊ូ​ជី​បាន​មានប្រសាសន៍​អំពាវនាវ​ដល់​កងកម្លាំង​យោធា​ឲ្យចូល​រួម​ធ្វើ​វិសោធនកម្ម​រដ្ឋ​ធ​ម្មនុ​ញ្ញា​ដ៏​ចាស់គំរិល​របស់​ភូមា​។ ​ការធ្វើ​វិសោធនកម្ម​រដ្ឋ​ធ​ម្មនុ​ញ្ញា​ដ៏​ចាស់គំរិល​នេះ​គឺ​ដោយសារ​តែ​រដ្ឋ​ធ​ម្មនុ​ញ្ញា​ដែល​នៅ​ជា​ធរមាន​នា​ពេល​សព្វថ្ងៃ​នេះ​ត្រូវ​​បាន​​​បង្កើតឡើង​ដោយ​ពួកយោធា​ ខណៈ​ពេល​​ដែល​យោធា​​កាន់​កាប់​អំនាច​។

​មិនតែប៉ុណ្ណោះ​ការធ្វើ​វិសោធនកម្ម​រដ្ឋ​ធ​ម្មនុ​ញ្ញា​នេះ​ក៏​ក្នុង​គោលបំណង​ដើម្បីឲ្យ​ការដឹកនាំ​ប្រទេស​សព្វថ្ងៃ​ស្របតាម​គោល​ការណ៏​លទ្ឋិប្រជាធិប​តេយ្យ​ផងដែរ​។​ លោកស្រី​អ៊ុង​សាន​ស៊ូ​ជី​មានប្រសាសន៍​បែបនេះ​កាលពី​ថ្ងៃ​ទី​៤​ខែ​មករា​កន្លងទៅ​នេះ​ហើយ​វា​ក៏​ជា​ថ្ងៃ​ដែល​ភូមា​ប្រារព្ឋ​ពិធីបុណ្យ​ឯករាជ​ជាតិ​លើក​ទី​៦៦​​ផងដែរ​។​

​លោកស្រី​អ៊ុង​សាន​ស៊ូ​ជី​មានប្រសាសន៍​បន្ត​ថា ប្រសិនបើ​ក​គ្មាន​វត្ត​មាន​ចូលរួម​ពី​សំណាក់​យោធា​នោះទេ នោះ​ការ​ធ្វើ​វិសោធនកម្ម​រដ្ឋ​ធនុ​ញ្ញា​របស់​​​ភូមា​គឺ​​មិន​​អាច​​ធ្វើ​ទៅ​​បាន​​ឡើយ​។ ​មិន​អាច​ធ្វើ​វិសោធនកម្ម​រដ្ឋ​ធ​ម្មនុ​ញ្ញា​បានគឺ​ដោយសារតែ​នៅក្នុង​អត្ថប​ទ​រដ្ឋ​ធ​ម្មនុ​ញ្ញាស​ព្វថ្ងៃ​នេះ​បាន​ប្រ​គល់​អំណាច​ដល់​យោធា​ចំនួន​២៥%​​នៃ​អំណាច​រដ្ឋសភា​។ ​ហើយ​ប្រសិនបើ​ចង​ធ្វើ​វិសោធនកម្ម​នោះ​ទាល់តែ​មាន​សម្លេង​គាំទ្ររ​ពី​រដ្ឋសភារ​ហូ​ត់​ដល់​​៧៥% ឯណោះ​។​

​គួរ​បញ្ជាក់​ផង​ដែរ​ថា នា​ពេលកន្លងមក ម​លោកស្រី​អ៊ុង​ ​សាន​​ស៊ូ​ជី បាន​កំណែទម្រង់​រដ្ឋ​ធម្មនុញ្ញ​ជា​អាទិភាព​ក្នុង​ឆាកនយោបាយ​របស់​លោក​ស្រី ព្រោះ​​ច្បាប់​​នេះ​​ត្រូវ​បាន​​តាក់តែង​ឡើង​តាំង​ពី​សម័យ​​ភូមា​ត្រូវ​បាន​​ដឹកនាំ​​ដោយ​ពួក​យោធា​​ដែល​ត្រូវ​​អនុម័ត​​ដោយ​​ប្រជាមតិ​​នៅ​​ឆ្នាំ​២០០៨​។ មិន​តែ​ប៉ុណ្ណោះ​​រដ្ឋធម្មនុញ្ញ​​ចាស់​គំរិល​​នេះ ​បាន​​ហាមឃាត់​​មិន​ឱ្យ​​ជន​ណា​​ដែល​រៀបការ​​ឬ​មាន​កូន​ឬ មាន​សញ្ជាតិ​បរទេស​ឡើង​កាន់​អំណាច​ជា​​ប្រធានា​ធិបតី​​បាន​​នោះ​ឡើយ​៕​​​(ដោយៈ​ឆេង សូរិយា​)​

លោក​ច​ន ​ឃើ​រី​ស្ថិត​​នៅក្នុង​​ប្រទេស​​អ៊ីស្រាអែល​ ​ដើម្បី​ជម្រុញ​​កិច្ច​ចរច​រា​​សន្ដិភាព​​អាស៊ី​បូព៌ា​

​កិច្ចប្រជុំ​ចំនួន​ពីរ​នៅក្នុង​ទីក្រុង Jerusalem ដែល​ត្រូវបាន​គេ​រំពឹងថា នឹង​អាច​ប្រព្រឹត្ដ​ទៅ​រយៈពេល​​៤​ថ្ងៃ​នោះ គឺជា​ជំនួប​ការទូត​រវាង​ប្រមុខ​ដឹកនាំ អ៊ីស្រា​អែល និង​ប៉ាលេ​ស្ទីន​។

កាលពី​ថ្ងៃ​ទី​០២​​កន្លង​ទៅ​​លោក​ច​ន​ឃើ​រី រដ្ឋ​មន្ដ្រី​ជាន់ខ្ពស់​សហ​រដ្ឋ​អាមេរិក បាន​ជួប​ជាមួយ​ថ្នាក់ដឹកនាំ​របស់​អ៊ីស្រា​អែល​​រួច​មក​ហើយ ហើយ​លោក​​ក៏​បាន​ជួប​ជាមួយ រដ្ឋមន្ត្រី​ក្រសួង​ការពារជាតិ និង​រដ្ឋមន្ត្រី​ក្រសួង​យុតិ្ត​ធម៌ ដែល​ជា​ប្រធាន​ដឹកនាំ​ក្នុង​ការចរចារ​ជា​មួយ​​ភាគី​ប៉ាលេ​ស្ទី​ន​ហើយ​​ដែរ ដើម្បី​ពិភាក្សា​ពី​គ្រោងការ​នៃ​ការជួប​ចរចារ​គ្នា​ពី​បញ្ហា​សន្ដិភាព​នៅ​ថ្ងៃ​ខាង​មុខ​។ នេះ​បើ​តាម​ការបញ្ជាក់​របស់​ប្រពន្ធ័​ផ្សព្វផ្សាយ​អ៊ីស្រាអែល​។​

​ក្រៅពី​ថ្នាក់​ដឹកនាំ​ទាំងអស់​ខាងលើ​លោក​ឃើ​រី នឹង​ជួប​ជាមួយ​ភាគី​អ៊ីស្រាអែល​បន្ដ​ទៀត​គឺ លោក​Avigdor Lieberman មុន​ពេល​ធ្វើដំណើរ​ទៅ​ជួបពិភាក្សា​ជាមួយ​ប្រធានាធិបតី​ប៉ាលេ​ស្ទីន លោក Mahmud Abbas។ លោក Kerry បាន​ប្រឈមមុខ​នឹង​ការប្រឆាំង​យ៉ាងខ្លាំង​ពី​ភាគី​ទាំងពីរ ដើម្បី​សម្របសម្រួល​លើ​ការទាមទារ​របស់​ពួកគេ​។ ការ​ដើរតួ​ជា​អ្នកសម្របសម្រួល​របស់​លោក​ឃើ​រី​នេះ ដោ​សារ​តែ​តម្រូវការ​របស់​ភាគី​ទាំងពីរ មាន​ច្រើន​ពេក​មិន​អាច​ផ្សះផ្សា​បាន បន្ទាប់​ពី​ការចរចារ​មាន​ការខ្វះចន្លោះ​បី​ឆ្នាំ​មកហើយ​នោះ​។​

​សូមបញ្ជាក់​ថា ដំណើរ​ទស្សនកិច្ច​ចុងក្រោយ​បំផុត​របស់​លោក ច​ន​ឃើ​រី លើក​ទី​១០​​ គិត​ពី​ខែ​មីនា ដោយ​លោក​បាន​ជួប​ជាមួយ មេដឹកនាំ​ប៉ាឡេ​ស្ទី​ន​និង​អ៊ីស្រាអែល គឺ​មេដឹកនាំ​ទាំងពីរ​បាន​ចោទប្រកាន់​គ្នា​ទៅវិញទៅមក ហើយ​ទង្វើ​នេះ​គឺជា​កាយវិការ​ខ្វះ​ការប្តេជ្ញាចិត្ត​ដ៏​ធ្ងន់ធ្ងរ ដើម្បី​សម្រេច​បាន​នូវ​សន្តិភាព​យូរអង្វែង​៕(ដោយៈ​ពេញ ផេង)​

លោក​ស៊ូ ​ថេប​៖​ថ្ងៃទី​១៣​​មករា​​គឺជា​ថ្ងៃ​ទី​​ក្រឡាប់​ចាក់​ក្នុង​​ទីក្រុង​​បាងកក​

ទីក្រុង​បាងកក​ទាំងមូល​នឹង​ក្លាយទៅជា​ទីក្រុង​ដែល​ពោរពេញ​ទៅ​ដោយ​ក្រុម​បាតុករ​មក​ឡោម​ព័ទ្ធ​នៅ​ថ្ងៃ​ទី​១៣​ ខែ​មករា ដើម្បី​ប្រឆាំង​នឹង​រាជ​រដ្ឋា​ភិ​បាល​។ នេះ​បើ​តាម​ការបញ្ជាក់​របស់​លោក​ស៊ូ​ថេប ​ថង​ស៊ូ​បាន មេដឹកនាំ​ក្រុមបាតុករ កាលពី​យប់​ថ្ងៃ​ទី​០១ ​ខែ​មករា ថ្លែង​ទៅ​កាន់​ក្រុម​អ្នក​តវ៉ា​​នៅ​​​វិ​មាន​​ប្រជាធិតេយ្យ ។

​លោក​ស៊ូ​ ថេប​​បាន​បន្ដថា ការគ្រោង​ជួបគ្នា​នៅ​ថ្ងៃ​ទី​១៣​ខាងមុខនេះ នឹង​ត្រូវ​ប្រកាស​ឱ្យ​ប្រជាពលរដ្ឋ​ទូទាំង​ប្រទេស​ថៃ​បាន​ដឹង​និង​ស្នើ​ឱ្យ​ពួក​គាត់​​​ធ្វើដំណើរ​ពី​តាម​បណ្ដា​ខេត្ដ​នានា​មក​ចូលរួម​ក្នុង​មហា​បាតុកម្ម​លើក​នេះ​។ លោក​បាន​បន្ថែមថា អ្នក​រស់នៅ​តាម​បណ្ដា​ខេត្ដ​មាន​ពេល​ចំនួន​១២​ថ្ងៃ ក្នុង​ការរៀបចំ​សម្ភារៈ​ផ្សេងៗ ធ្វើដំណើរ​មក​កាន់​ទីក្រុង​បាងកក ព្រោះ​មហា​បាតុកម្ម​លើក​នេះ​អាច​មាន​រយៈពេល​យូរ គឺ​ពី​៥​ថ្ងៃ​ដល់​២០​ថ្ងៃ​។

ប៉ុន្ដែ​ប្រសិនបើ​ប្រជាជន​ទាំងអស់ មាន​ការលំបាក​ក្នុងការ​ធ្វើ​ដំណើរ​មក​ទីក្រុង​បាងកក ពួកគេ​អាច​ធ្វើ​ការជួបជុំ​គ្នា​នៅក្នុង​ខេត្ដ​របស់ខ្លួន​បាន​។ ​មេដឹកនាំ​ក្រុមបាតុករ​ប្រឆាំង​រដ្ឋាភិបាល​រូបនេះ បានឱ្យដឹង​ទៀត​ថា កន្លែង​ជួបជុំ​ដ៏​ធំ​បំផុត​នៅក្នុង​ទីក្រុង​បាងកក គឺ​នៅ​វិមាន​ប្រជាធិបតយ្យ ដោយ​មាន​វេទិការ​ចំនួន​២០​នៅ​ទីនោះ​។

បន្ទាប់​មក​ក្រុមបាតុករ​​នឹង​​ធ្វើ​ការ​ឡោម​ព័ទ្ធ​ក្នុង​ទីក្រុង​បាងកក និង​ដង្ហែ​គ្នា​ឆ្លងកាត់​ទីក្រុង​បាងកក​ផងដែរ​។ ចំណែកឯ​គោលដៅ​សំខាន់​ក្រៅពី​ការឡោមព័ទ្ធ និង​ការដើរ​ដង្ហែ​គ្នា​នៅក្នុង​ទីក្រុង​បាងកក​នោះ​លោក​ស៊ូ​ថេប​បាន​គម្រាម​ថា នឹង​ផ្ដាច់​ចរន្ដ​អគ្គីសនី និង​ប្រព័ន្ធ​ទឹក​នៅតាម​ផ្ទះ​មន្ដ្រី​រដ្ឋាភិបាល និង​នៅតាម​អាគារ​រដ្ឋាភិបាល​ទាំងអស់ ហើយ​ពួកគេ​បាន​ប្ដេជ្ញា​ថា នឹង​យក​ឈ្នះ​លើ​រដ្ឋាភិបាល​ឱ្យ​បាន​នៅក្នុង​ខែ​នេះ​។​

​សូមបញ្ជាក់​ថា ការប្រកាស​ប្រមូលផ្ដុំ​គ្នា​ឡោមព័ទ្ធ​ទី​ក្រុង​បាងកក​ជាថ្មី​នេះ គឺ​ដើម្បី​ទាមទារ​ឱ្យ​លោកស្រី​យី​ង​ឡាក់ ​ស៊ីណាវ៉ាត្រា លា​លែង​​ពី​​ដំ​ណែង​​​ជា​នាយករដ្ឋមន្ដ្រី​ចាំផ្ទះ និង​ដើម្បី​សម្រេច​ឱ្យបាន​នូវ​គោលបំណង​របស់​ពួកគេ ក្នុងការ​ធ្វើ​កំណែទម្រង់​ជាតិ​មុន​ពេល​ធ្វើ​ការបោះឆ្នោត​។​(ដោយៈ​ពេញ ផេង)​

ប្រធានាធិបតី​​មី​យ៉ាន់​ម៉ា​​គាំទ្រ​ឱ្យ​មាន​ការ​ធ្វើ​វិសោធនកម្ម​​រដ្ឋធម្មនុញ្ញ​

​លោក​ថេន​ សេន ដែល​បាន​ជាប់​ជា​នាយករដ្ឋមន្ដ្រី​កាលពី​ឆ្នាំ​២០១១ និង​បាន​ទទួល​​ការ​កោត​សរសើរ​​ជា​​អន្ដរជាតិ​​នៅក្នុង​ការធ្វើ​កំណែទម្រង់​នោះ​​បាន​គាំទ្រ​យ៉ាង​ពេញទំហឹង​នៅក្នុង​ការធ្វើ​កំណែទម្រង់​រដ្ឋធម្មនុញ្ញ​។ កា​ធ្វើ​វិសោធនកម្ម​រដ្ឋធម្មនុញ្ញ​នេះ ជា​ការបង្ហាញ និង​គាំទ្រ​ឱ្យមាន​ការ​ផ្លាស់ប្ដូរ​មេដឹកនាំ​បក្សប្រឆាំង ដើម្បី​អនុញ្ញាត​ឱ្យ​លោកស្រី អ៊ុង សាន​ស៊ូ​ជី អាច​ក្លាយជា​ប្រធានាធិបតី​វិញ​ម្ដង​។

​លោក​បាន​បន្ដថា គុណភាព​នៃ​រដ្ឋធម្មនុញ្ញ​គឺ​ត្រូវតែ​មាន​ការផ្លាស់ប្ដូរ ដើម្បី​ឱ្យមាន​ប្រសិទ្ធភាព​ក្នុង​ការដោះស្រាយ​បញ្ហា​ដែល​បាន​កើតឡើង​នៅ​ក្នុង​​ប្រទេស​មាន​ដូចជា​បញ្ហា សេដ្ឋកិច្ច បញ្ហា​សង្គម និង​បញ្ហា​តំរូវការ​សង្គម​ជាដើម​។

ក្រៅពី​នោះ​លោក​បាន​បន្ថែម លោក​គាំទ្រ​ចំពោះ​ការធ្វើ​កំណែ​ទម្រង់​​កាលពី​​ពេល​មុន​ដែល​អាច​អនុញ្ញាត​ឱ្យ​អ្នកនយោបាយ​គ្រប់​រូប មិន​ថា​ពួកគេ​មាន​ស្វាមី​មាន​ភរិយា ឬក៏​មាន​កូន​ជា​ជនជាតិ​បរទេស​ក៏ដោយ ក៏​អាច​មាន​សិទ្ធិ​ឈរឈ្មោះ​ជា​ប្រធានាធិបតី​ដែរ ជាក់ស្ដែង​ដូចជា​លោកស្រី​អ៊ុង​សាន​ស៊ូ​ជី​ជាដើម​។ លោក​បាន​សង្កត់ធ្ងន់ថា លោក​មិន​ដាក់​កំណត់ ឬ​ក៏​ដាក់​គំណាប​ទៅលើ​នរណាម្នាក់ ដែល​មាន​បំណង​ចង់​ក្លាយ​ជា​ប្រធា​នាធិបតី​នោះទេ​។​

​សូមបញ្ជាក់​ថា នៅក្នុង​សុន្ទរកថា​របស់​លោក​មេដឹកនាំ​មី​យ៉ាន់​ម៉ា​រូបនេះ​បាន​និយាយថា លោក​ព្យាយាមលើកកម្ពស់​ភាព​សុខដុម ខណៈ​ពេល​ដែល​​លោក​នៅ​មាន​អំណាច​តែ​ប៉ុណ្ណោះ ប៉ុន្តែ​លោក​បាន​ព្រមាន ប្រទេស​មួយ​នេះ​នឹង​អាច​មាន​ហានិភ័យ​ជាប់គាំង​នយោបាយ បើសិន​ជា​ការ​ទាមទារ​របស់​ប្រជាជន​មាន​ទំហំ​ធំ​ជាង​អ្វី​ដែល​ប្រព័ន្ធ​នយោបាយ​បច្ចុប្បន្ន​អាច​ផ្ទុក​។​ ប្រសិន​បើ​រឿង​នេះ​កើតឡើង​មែន​នោះ​សេរីភាព​នយោបាយ​ដែល​​ខំ​​ស្វែង​រក ជា​យូរណាស់​មកហើយ​នោះ​ក៏​នឹង​អាច​បាត់បង់​ទាំង​ស្រុង​ដែរ​។​

​ឥឡូវនេះ​គណៈកម្មាធិការ​សភា​កំពុង​ធ្វើ​ការត្រួតពិនិត្យ​ឡើងវិញ​នូវ​រដ្ឋធម្មនុញ្ញ ហើយ​រំពឹងថា​នឹង​មាន​ការរាយការណ៍​ពី​ការផ្តល់​អនុសាសន៍​របស់​ពួកគេ​នៅ​ចុង​ខែ​មករា​នេះ​៕(ដោយៈ​ពេញ ផេង)​​

កិច្ចព្រមព្រៀង​​នុយក្លែអ៊ែរ​​អ៊ីរ៉ង់​​ចាប់ផ្ដើម​​ជា​ថ្មី​នៅ​​ថ្ងៃទី​២០ ​ខែ​មករា​

​ថ្ងៃទី​២០​ ខែ​មករា​ ឆ្នាំ​២០១៤​ខាងមុខនេះ គឺជា​ថ្ងៃ​ចាប់ផ្ដើម​នៃ​ការ​អនុវត្ដ​ន៍​កិច្ចពិភាក្សា ដើម្បី​ដោះស្រាយ​បញ្ហា​កម្មវិធី​នុយក្លេអ៊ែរ​អ៊ីរ៉ង់​ដែល​នឹង​ប្រព្រឹត្ដ​ទៅ​នៅក្នុង​ទីក្រុង​ជី​នីវ៉ា ប្រទេស​ស្វីស បន្ទាប់​ពី​កិច្ចពិភាក្សា​នេះ​បាន​ពន្យា​ពេល​អស់​រយៈពេល​ជា​យូរ​មក​។

ការចាប់ផ្ដើម​កិច្ចពិភាក្សា​នេះ មាន​ការចូលរួម​ពី​អ្នកឯកទេស​មកពី​ប្រទេស​អ៊ីរ៉ាក់ ក៏ដូចជា​អ្នកឯកទេស​មកពី​ប្រទេស​មហាអំណាច​៥+១​នៅក្នុង​ពិភពលោក​ផងដែរ​។​ នេះ​បើ​តាម​ការបញ្ជាក់​របស់​ភ្នាក់ងារ​ព័ត៌មាន​មួយ​ឈ្មោះ​IRNA កាលពី​ថ្ងៃ​ទី​០១​ខែ​មករា​។​

​ភ្នាក់ងារ​សារព័ត៌មាន​ខាង​លើ​បាន​បញ្ជាក់បន្ថែម​ថា ផែនការ​មួយ​នៅក្នុង​ផែនការ​ធំៗ ដែល​ត្រូវ​អនុវត្ដ​គឺ  ការចាប់ផ្ដើម​អនុវត្ដ​ន៍ កិច្ចព្រមព្រៀង ដែល​នឹង​ចាប់ផ្ដើម​ឡើង​ពី​ថ្ងៃ​ទី​២០​ខែ​មករា​នេះ​តទៅ​។ ការជួប​គ្នា​នៅ​ថ្ងៃទី​២០​ខាងមុខ​នេះ​ដែរ ក៏​មាន​កិច្ចព្រមព្រៀង​លើ​គោលការណ៍​សំខាន់ៗ ដែល​បញ្ហា​នេះ​នឹង​ត្រូវ​លើក​បង្ហាញ​ដោយ​អ្នកនយោបាយ​ដែល​ចូលរួម​។

​ទាក់ទង​នឹង​បញ្ហា​នុយក្លេអ៊ែរ​នេះ  លោក Baeedinejad ដែល​ជា​អ្នកជំនាញ​ដឹកនាំ​គណៈប្រតិភូ​អ៊ីរ៉ង់​បានធ្វើ​សេចក្ដីរាយការណ៍​កាលពី​ថ្ងៃទី​៣១​ខែ​ធ្នូ​ឆ្នាំ​២០១៣ ដល់​ទីភ្នាក់ងារ​ព័ត៌មាន ISNA​ថា​កិច្ចព្រមព្រៀង​នេះ​គួរតែ​បាន​អនុវត្តន៍​នៅ​ចុង​ខែ​មករា​។​

​សូមបញ្ជាក់​ថា ប្រទេស​លោក​ខាងលិច​និង​ប្រទេស​អ៊ីស្រាអែល​បាន​សង្ស័យ​ជា​យូរ​មក​ហើយ​ទៅ​លើ​ប្រទេស​អ៊ីរ៉ង់ ដោយ​ពួកគេ​បាន​ចោទ​ប្រកាន់​ថា​អ៊ីរ៉ង់​បាន​លួចលាក់​បន្ត​សមត្ថភាព​អាវុធ​នុយក្លេអ៊ែរ​របស់​ខ្លួន ជាមួយ​កម្មវិធី​ស៊ីវិល​។ ប៉ុន្ដែ​ការចោទប្រកាន់​នេះ ត្រូវ​បាន​រដ្ឋាភិបាល​ទី​ក្រុងតេអេ​រ៉ង់​បដិសេធចោល និង​បាន​បញ្ជាក់បន្ថែម​ថា ការទទូច​ចំរាញ់​អ៊ុយ​រ៉ា​ញ៉ូម​របស់ខ្លួន គឺ​សម្រាប់​គោលបំណង​បម្រើ​ដោយ​សន្តិភាព​តែប៉ុណ្ណោះ​។​

​គួររម្លឹកថា ក្រុម​អ្នកជំនាញ​មកពី​ប្រទេស​អ៊ីរ៉ង់ និង​ប្រទេស​មហាអំណាច​៥+១​មាន​សហរដ្ឋអាមេរិក អង់គ្លេស បារាំង រុស្ស៊ី ចិន​បូក​នឹង​ប្រទេស​អាល្លឺ​ម៉ង់​ផង​នោះ បាន​ធ្វើ​ការពិភាក្សា​គ្នា​លើ​បច្ចេកទេស​ការអនុវត្ត​កិច្ចព្រមព្រៀង​មួយ ទាក់ទង​នឹង​បញ្ហា​នុយក្លេអ៊ែរ​ដ៏​ចម្រូងចម្រាស​របស់​អ៊ីរ៉ង់​ចាប់តាំងពី​ថ្ងៃ​ទី​២៤ ខែវិច្ឆិកា​ឆ្នាំ​២០១៣​មកម្ល៉េះ​។ ប៉ុន្ដែ​ការ​អនុវត្ដ​កិច្ចព្រមព្រៀង​នេះ មិនទាន់​ឈានដល់​ចំណុច​តាម​ការចង់បាន​នៅឡើយ​ទេ​។​(ដោយៈ​ពេញ ផេង)​

Vayo FM Song Request