នយោបាយ

កូរ៉េខាងជើង​​ព្រមាន​អាមេរិក​​ជុំវិញ​បញ្ហា​ដែលថា​កូរ៉េខាងជើង​​បង្ក​ចលាចល​

កូរ៉េ​ខាងជើង​បាន​ព្រមាន​យ៉ាង​ចាស់ដៃ​ទៅលើ​អាមេរិក​កាលពី​ថ្ងៃ​ទី​២៤​ខែ​មីនា​។ ជា​ការព្រមាន​ដែល​នឹង​អាច​​ឈាន​ដល់​​ការ​ប្រើប្រាស់​​វិធានការ​ក្កៅ​នោះ​គឺ​នុយក្លេអ៊ែរ​ផងដែរ ប្រសិនបើ​​អាមេរិក​​មិន​ព្រម​​បញ្ឈប់​ចោទ​ប្រកាន់​​កូរ៉េខាងជើង​ថា​ជា​អ្នក​បង្កហេតុ​។​ជា​អ្នក​បង្កហេតុដែល​អាមេរិក​​ចោទ​កូរ៉េខាងជើង​ថា​ចង់​បង្ក​ចលនា​ច​ល​ដោយសារ​តែ​ប្រទេស​មួយ​នេះ​បាន​បាញ់​​សាកល្បង​​គ្រាប់​មី​ស៊ី​ល​​រយៈ​ចម្ងាយ​ខ្លី​​របស់​ខ្លួន​ជា​ច្រើន​គ្រាប់​​ក្នុង​អំឡុងពេល​ខែ​មីនា​នេះ​។

អ្នកការទូត​របស់​កូរ៉េខាងជើង​ប្រចាំ​នៅ​អង្គការសហប្រជាជាតិ​​លោក​រី តុង​លី​បាន​និយាយថា​កូរ៉េខាងជើង​ត្រៀមខ្លួន​​រួចរាល់​ហើយ សម្រាប់​ការ​​ផ្អាក​​សកម្មភាព​​នុយក្លេអ៊ែរ​របស់ខ្លួន ប៉ុន្ដែ​​ប្រសិនបើ​​អាមេរិក​​មិន​ព្រម​បញ្ឈប់​​ការចោទ​ប្រកាន់​ទេ​នោះ ខ្លួន​នឹង​​ចាត់​វិធានការ​​ថ្មី ហើយ​វិធានការ​​ថ្មី​នេះ​ទៀតសោត​អាស្រ័យទៅលើ​ឥរិយាបទ​​របស់​អាមេរិក​​ផ្ទាល់​តែម្ដង​។​ លោក រី​បាន​បញ្ជាក់បន្ថែម​ថា វិធានការ​ថ្មី​​ជា​អ្វី​នោះ​​លោក​មិន​ទាន់​ច្បាស់​ទេ ប៉ុន្ដែ​វា​នឹង​អាច​​ចេញ​រូបរាង​​នៅពេល​ក្រោយ​។

​សូមបញ្ជាក់​ថា ជានិច្ច​ជា​កាល​ប្រទេស​ទាំង​ពីរ​គឺ​អាមេរិក​និង​កូរ៉េខាងជើង​​តែងតែ​​ព្រមាន​គ្នា​​ទៅវិញទៅមក​។ អាមេរិក​​ព្រមាន​​កូរ៉េខាងជើង​ថា ចង់​បង្ក​ចលនា​​អសន្ដិសុខ​​ដោយ​ការ​បាញ់​គ្រាប់​​មី​ស៊ី​ល​​របស់គេ​ព្រោះថា​គ្រាប់​មី​ស៊ី​ល​​គ្រប់​ប្រភេទ​​របស់​កូរ៉េ​​ខាងជើង​​ត្រូវ​បាន​​ហាមឃាត់​។​

ប៉ុន្ដែ​កូរ៉េខាងជើង​នៅតែ​បន្ដ​សកម្មភាព​របស់​ខ្លួន​ដដែល​ដូច្នេះ​ទង្វើ​នេះ​អាមេរិក​​ចោទថា​កូរ៉េ​ខាង​ជើង​ថា​ល្មើស​​នឹង​​ការ​ហាមឃាត់​​របស់​​អង្គការ​សហប្រជាជាតិ​។ ដោយឡែក​កូរ៉េ​ខាងជើង​វិញបាន​ចោទ​​អាមេរិក​ថា ចូល​​ដៃ​​ជាមួយ​កូរ៉េ​ខាងត្បូង​​ក្នុង​​សកម្មភាព​​សមយុទ្ធ​​ក្នុងន័យ​​រៀបចំ​​វិធានការ​​ដើម្បី​​ឈ្លានពាន​​ទឹកដី​​របស់គេ​។ ​នៅក្នុង​សកម្មភាព​​សមយុទ្ធ​​នេះដែរ កូរ៉េ​ខាងជើង​​បាន​ស្នើសុំ​​ម្ដង​​ហើយ​​ម្ដងទៀត​​ឱ្យ​បញ្ឈប់ ប៉ុន្ដែ​កូរ៉េខាងត្បូង​​និង​អាមេរិក​​មិន​បញ្ឈប់​ឡើយ និង​បាន​អះអាង​ថា​​វា​ជា​សកម្មភាព​​សមយុទ្ធ​ធម្មតា​។

​ក្រោយមក​កម្ដៅ​រវាង​ប្រទេស​ទាំង​ពីរ បាន​ឆាបឆេះ​កាន់តែ​ខ្លាំង​ឡើងៗ​រហូត​ដល់​​កូរ៉េខាងជើង​​ព្រមាន​អាមេរិក​​ជា​ថ្មី​នៅ​លើក​នេះ​។​ ដូច្នេះ តើ​ប្រទេស​ទាំង​ពីរ​​នឹង​ប្រឈមមុខ​​ដាក់​គ្នា​​ដល់​ពេល​ណា​?​ប្រសិនបើ​​បញ្ហា​កាន់​តែ​ធ្ងន់ធ្ងរ​​ជាង​នេះ តើ​ប្រទេស​ទាំង​ពីរ​​អាច​មាន​វិធានការ​អី្វ​​ដើម្បី​ដោះស្រាយ​?(ដោយ៖ពេញ ផេង)





ក្រុមបាតុករ​ថៃ ​ដើរ​ហែ​ក្បួន​ សុំ​ឱ្យ​ប្រជាជន​ចូលរួម​សកម្មភាព​ ប្រមូលផ្ដុំ​ជាថ្មី​ នៅ​ថ្ងៃ​ទី​២៩​មីនា​

​ជាថ្មី​ម្ដងទៀត​ក្រុមបាតុករ​ប្រឆាំង​រដ្ឋាភិបាល​លោកស្រី​យី​ង​ឡាក់​ស៊ីណាវ៉ាត្រា ដែល​គេ​ស្គាល់​ថា​ជា​ក្រុមបាតុករ​កំណែទម្រង់​បែប​ប្រជាធិបតេយ្យ​ប្រជាជន បានចាប់ផ្ដើម​សកម្មភាព​របស់​ខ្លួន​ជាថ្មី​ម្ដងទៀត​ហើយ​។​ការ​បញ្ចាក់​បែបនេះ បាន​ធ្វើឡើង បន្ទាប់ពី​បាន​ផ្អាក​សកម្មភាព​របស់​ខ្លួន​មួយ​រយៈពេល​ចុងក្រោយ​នេះ​។ ការដើរ​ដង្ហែ​ក្បួន​ជា​ថ្មី​នេះ ធ្វើ​ង​ដោយ​មាន​ការចូលរួម​ពី​អ្នកគាំទ្រ​ជា​ច្រើន​នាក់ ហើយ​អ្នក​ដែល​ដឹកនាំ​ចលនា គឺ​លោក ស៊ូ​ថេប ថង​ស៊ូ​បាន ដដែល​។ ពេលវេលា​នៃ​ការដើ​ដង្ហែ​ក្បូន បាន​ចាប់ផ្ដើម​កាលពី​ព្រឹក​ថ្ងៃទី​២៤​ខែ​មីនា​នេះ ដោយ​បាន​ចេញ ដំណើរ​ពី​សួនច្បារ លុម​ភី​នី បន្ទាប់​មក​ដង្ហែ​គ្នា​ដើរ​ឆ្លងកាត់​មហាវិថី​មួយចំនួន ដែល​មាន​ចម្ងាយ​សរុប​ជិត​៦​គីឡូម៉ែត្រ​។

​គោលបំណង​នៃ​ការជួបជុំ​គ្នា​ដើរ​ដង្ហែ​ក្បួន​លើក​នេះ គឺ​ដើម្បី​សុំ​ការគាំទ្រ​ពី​ប្រជាជន​ដែល​រស់នៅ​ក្នុង​ទីក្រុង​បាងកក ចូលរួម​ឱ្យបាន​ច្រើន​កុះករ​ក្នុង​ចលនា​ប្រមូលផ្ដុំ​ទ្រង់ទ្រាយ​ធំ​មួយ នៅ​ថ្ងៃ​ទី​២៩​ខែ​មីនា​ខាងមុខ​។ សូម​បញ្ជាក់​ផង​ដែរ​ថា នៅក្នុង​ការដើរ​ដង្ហែ​ក្បួន​កាលពី​ព្រឹក​ថ្ងៃទី​២៤​មីនា​នេះ មាន​ក្រុម​ការពារ​សន្ដិសុខ​របស់​ក្រុមប្រឆាំង ប្រមាណ​២​ពាន់​នាក់​ត្រូវបាន​ដាក់    ពង្រាយ​។ បន្ថែម​លើ​នោះ ក៏​មាន​ការស្នើសុំ​ឱ្យ​មន្ដ្រី​ប៉ូលីស ជួយ​សម្រួល​នូវ​ចរាចរណ៍​ផងដែរ​។ ទោះជា​យ៉ាងណា​ក៏ដោយ ទាក់ទិន​នឹង​មូលហេតុ​ពិតប្រាកដ មេដឹកនាំ​ក្រុមបាតុករ​ប្រឆាំង​មិន​បាន​បញ្ជាក់​ឱ្យបាន​ច្បាស់​នោះទេ​។​

​គួរ​រម្លឹក​ឡើងវិញ​ថា ស្ថានភាព​នយោបាយ​នៅក្នុង​ប្រទេស​ថៃ មិនទាន់​បាន​ល្អ​ប្រសើ​នៅ​ឡើយ​ទេ​។ មិនទាន់​ល្អប្រសើរ​គឺថា ថៃ​នៅ​មិនទាន់​អាច​ជ្រើសរើស​ថ្នាក់ដឹកនាំ​ថ្មី សម្រាប់​គ្រប់ គ្រង​ ប្រទេស​បាន​នៅឡើយ​ទេ​។ ដើម្បី​ដោះស្រាយ​បញ្ហា​ដែល​ជាប់គាំង កាលពី​ថ្ងៃ​ទី​០២​ខែ​កុម្ភៈ រដ្ឋាភិបាល​ថៃ​បាន​រៀបចំ​ការបោះឆ្នោត​មុន​អាណត្ដិ​មួយ ដើម្បី​កំណត់​សមាសភាព​នាយករដ្ឋមន្ដ្រី​ថ្មី​។ ប៉ុន្ដែ​លទ្ធផល​បោះឆ្នោត​ត្រូវបាន​ទុកជាមោឃៈ ដោយសារ​តែ​ការបោះឆ្នោត​មិន​អាច​ប្រព្រឹត្ដទៅបាន​ដោយ​រលូន​នៅ​ទូទាំង​ប្រទេស​។

រឿង​ដែល​គួរឱ្យកត់សម្គាល់ មណ្ឌល​បោះឆ្នោត​ចំនួន​២៨​មិន​មាន​អ្នក​ទៅ​ឈរ​ឈ្មោះ ហើយ​ក៏​គ្មាន អ្នក​ទៅ​បោះឆ្នោត​ដែរ ព្រោះតែ​ការរារាំង​ពី​ក្រុម​បាតុករ​ប្រឆាំង​។​ដូច្នេះ គេ​នៅ​មិនទាន់​ដឹង​ទេ​ថា បញ្ហា​នឹង​អាច​បញ្ចប់​នៅ​ពេល​ណា​ឡើយ ព្រោះ​ពេល​នេះ​ក្រុម​មន្ដ្រី​ក្នុង​ជួរ​រដ្ឋាភិបាល​ថៃ ក៏ដូចជា​ស្ថាប័ន ដែល​ពាក់ព័ន្ធ កំពុង​ចូលរួម​យ៉ាង​ពេញដៃពេញជើង​ដើម្បី​ស្រាយចំណង​នយោបាយ​ស៊ី​រូង​ផ្ទៃ​ក្នុង​នេះ​៕(ដោយៈពេញ ផេង)

ក្រុម​បាតុករ​​ជា​ច្រើន​នាក់​​ត្រូវ​​ឃុំខ្លួន​​បន្ទាប់​ពី​​ប៉ះទង្គិច​​ជាមួយ​​ប៉ូលីស​​នៅ​​ក្រុង​តៃប៉ិ​​

ប្រធានាធិបតី​​តៃវ៉ាន់​លោក​​ ម៉ា​យី​ង​​ជៀវ​ បាន​​ប្រកាស​​ឱ្យ​ដឹងថា​ លោក​​នឹង​​មិន​​បោះបង់​​ជាដាច់ខាត ​​ទៅលើ​​កិច្ចព្រមព្រៀង​​ពាណិជ្ជកម្ម​​ជាមួយ​​ប្រទេស​ចិន​។​ ការ​​​ប្រកាស​​​បែប​នេះ​​ត្រូវបាន​​លោក​បញ្ជាក់​​បន្ថែមថា​ ប្រសិន​បើ​​តៃវ៉ាន់​ចុះ​កិច្ច​ព្រមព្រៀង​​​ពាណិជ្ជកម្ម​និង​​ផ្ដល់​នូវ​​សច្ចាប័ន​​លើ​​កិច្ចព្រមព្រៀង​​ដោះដូរ​​ពាណិជ្ជកម្មសេរី​​ជាមួយ​​ចិន​ វា​​អាច​នឹង​​ធ្វើឱ្យ​​តៃវ៉ាន់​​ពង្រីក​​នូវ​​វិស័យ​​ពាណិជ្ជកម្ម​​របស់​ខ្លួន​​កាន់តែ​​ខ្លាំងក្លា​​ជាង​មុន​។​ មិន​តែប៉ុណ្ណោះ​ វា​ក៏​អាច​​ធ្វើឱ្យ​​វិស័យ​សេដ្ឋកិច្ច​របស់​​តៃវ៉ាន់​លូតលាស់​​​ខ្លាំង​​ផងដែរ​។​​

ដោយ​សារតែការ​ប្រកាស​បែបនេះ​ ក្រុម​បាតុករ​ដែល​​មិន​​ពេញចិត្ដ​នឹង​​ការ​សម្រេច​ចិត្ដ របស់​​លោក​​ប្រធានាធិបតី​​តៃវ៉ាន់ បាន​​ប្រមូល​ផ្ដុំ​គ្នា​យ៉ាង​ច្រើន​​កុះករ​​នៅ​មុខ​សភា​​តៃវ៉ាន់​ ដែល​​ជា​កន្លែង​​ត្រួតពិនិត្យ​​សច្ចាប័ន​​ពាណិជ្ជកម្ម​​សេរី​​ជាមួយ​ចិន​។​​ មូលហេតុ​​ គឺ​ដើម្បី​​រារាំង​​មិនឱ្យ​​មាន​​ការចុះហត្ថលេខា​​និង​​ការប្រគល់​​សច្ចាប័ន​​ទៅឱ្យ​ចិន​។ ​ពាក់​ព័ន្ធនឹង​​បញ្ហា​នេះ​ លោក​​ម៉ា​យី​ង​ជៀវ​ កាល​ពី​ថ្ងៃ​ទី​២៣​​ខែ​មីនា​ បាន​​ប្រកាស​​ជា​ថ្មី​​ទៅលើ​​កា​រប្រមូល​ផ្ដុំ​គ្នា​​របស់​ក្រុម​​បាតុករ​​នៅ​​មុខ​អគារ​​រដ្ឋាភិបាល​ថា​ ជា​ទង្វើ​​មួយ​​ដែល​​មិន​ស្រប​​ច្បាប់​ឡើយ​។​​

ដោយឡែក​ ​បើ​តាម​​ព័ត៌មាន​​ដែល​ចុះ​​ផ្សាយ​​តាម​ទូរទស្សន៍​​ក្នុងស្រុក​​បាន​ឱ្យ​ដឹង​​ដែរ​ថា ​​ក្រុមបាតុករ​​បាន​ទាញ​យក​រ​បាំង​លួស​​ ដែល​ដាក់​​រាំង​នៅ​ជុំវិញ​​វិមាន​​រដ្ឋាភិបាល​​ហើយ​​អ្នកខ្លះ​ទៀត​ ​ដាក់​​ជណ្ដើរ​​ឡើង​ទៅ​​ជាន់​ទី​ពីរ​​នៃ​អគារ​ផងដែរ​។​ ដោយសារ​​តែ​​សកម្មភាព​​ធ្ងន់ធ្ងរ​ពេក​​ ក្រុម​សមត្ថកិច្ច​​បាន​​ប្រើប្រាស់​​ខែល​​ដើម្បី​​រារាំង​​ក្រុមបាតុករ​​មិនឱ្យ​​ទំ​ម្លុះ​​ចូល​ក្នុង​វិមាន​​រដ្ឋាភិបាល​។ ​ប្រភ​​ព៏ត៌មាន​​តាម​ទូរទស្សន៍​ដ​ដែល​​បានឱ្យដឹង​​ទៀត​ថា​ នៅក្នុង​​ការប៉ះទង្គិច​​គ្នា​​មាន​មនុស្ស​​ប្រមាណ​​១៧​នាក់​​រងរបួស​ និង​ជាង​​៥០​នាក់​​ទៀត​​ត្រូវបាន​​ឃុំខ្លួន​​ដើម្បី​​សាកសួរ​។​

​សូម​បញ្ជាក់​ថា​ ចលនា​​ប្រឆាំង​​ខាងលើ​​បាន​ចាប់ផ្ដើម​​ឡើង​​តាំងពី​ថ្ងៃ​ទី​១៨​​ខែ​មីនា​​មក​ម្លេះ​។​ ក្រុម​​តវ៉ា​​ទាំងអស់​​ខាងលើ​​ភាគ​ច្រើន​​​គឺ​ជា​សិស្ស​​និស្សិត​ ដោយ​មាន​​គ្នា​​ប្រមាណ​ជា​​២០០​នាក់​ បាន​នាំគ្នា​​មក​​ប្រមូលផ្ដុំ​​នៅ​កន្លែង​​ត្រួតពិនិត្យ​​សច្ចាប័ន​។​ គោល​បំណង​​នៃ​ការប្រឆាំង​​របស់​ពួកគេ​​ ដោយសារតែ​​ពួកគេ​​យល់ឃើញ​ថា​​ការចុះ​​កិច្ចព្រមព្រៀង​​នេះ​ ​អាច​ធើ្វឱ្យ​ប៉ះពាល់​​ដល់​សេដ្ឋកិច្ច​​តៃវ៉ា​ ហើយ​ក៏​អាច​​ធ្វើឱ្យ​​ក្រុមហ៊ុន​​តៃវ៉ាន់​​ទទួល​​គំនាប​​នយោបាយ​​ខ្លាំង​​ពី​​រដ្ឋាភិបាល​ចិន​​ផង​ដែរ​៕​(ដោយ៖ពេញផេង)

សមាជិក​សភា​កម្ពុជា​ពី​ររូប​ជាប់ឆ្នោត​ជា​គណៈកម្មាធិការ​សហភាព​អន្តរ​សភា​IPU

​សមាជិសភា​កម្ពុជា ពីរ​រូប ត្រូវបាន សហភាព​អន្តរ​សភា​IPU បោះឆ្នោត​ឲ្យចូល​ជា​សមាជិក​ថ្មី នៃ​សមាជិក​គណៈកម្មាធិការ​អចិន្ត្រៃយ៏ សម្រាប់ សហភាព​អន្តរ​សភា​ទី​៣ ។​សមាជិសភា​ទាំង​ពីរ​រូប​ទីមួយ គឺ លោក សួស យ៉ារ៉ា ជាប់ឆ្នោត​ចូល​ជា គណៈកម្មាធិការ​ធ្វើ​សេចក្តីសម្រេច ចិត្ត​របៀបវារៈ​បន្ទាន់ និង​សមាជិក​សភា​មួយ​រូប​ទៀត គឺ​អ្នកស្រី ឡោក ខេង ជាប់ឆ្នោត​ជា​សមាជិក​ពេញ​សិទ្ធិ​ក្នុង​គណៈកម្មាធិការ​អចិន្ត្រយ៏​ទី​បី​ដែល​ទទួលបន្ទុក​សលទ្ធិ​ប្រជាធិបេតយ្យ​។​

​គួរបញ្ជាក់​ថា កាលពី​ថ្ងៃ​ទី​១៥​មីនា កន្លងទៅនេះ សភា​កម្ពុជា មាន​ព្រឹទ្ធសភា និង​រដ្ឋសភាបាន​ធ្វើដំណើរ​ទៅ​ចូលរួម​មហាសន្និបាត​លើក​ទី​៣១ អបអរសាទរ​ខួប​លើក​ទី​១២៥ នៃ​ការបង្កើ​ត​​សហភាព​អន្តរ​សភា ក្នុង​កម្ពុជា ក៏​ជា​សមាជិក​ផងដែរ​។ កម្មវិធី​នេះ មាន សហភាព​អន្តរ​សភា​ចូលរួម មាន​ប្រទេស​១៤១​ចូលរួម ដែល​មាន​សមាជិក ​១៤៥០ ក្នុងនោះ មាន​សា​ជិកជាង​៧០០ ស្ត្រី​២៦៦ នាក់​៕(ដោយ ឆេង សូរិយា)

កូរ៉េខាង​ជើង​​បាញ់​​គ្រាប់​មី​ស៊ី​ល​​៣០​គ្រាប់​​ទៀត​​ហើយ​

​កា​ផ្គើន​ម្តង​ហើយ​ម្តងទៀត​ពី​ប្រទេស​កូរ៉េខាងជើង បើទោះបីជា​មាន​ការព្រមាន​ជា​ច្រើន​លើ​ច្រើនសារ​ពី​សហរដ្ឋអាមេរិក​ក៏​ដូចជា​កូរ៉េ​ខាងត្បូង ទាក់​ទង​​និង​​ការបាញ់​​បង្ហោះ​មី​ស៊ី​ល ដែល​ជា​ការហាមឃាត់​ជា​ដាច់ខាត​ក៏​ដោយ ក៏​កូរ៉េខាងជើង​មិន​ស្ដាប់​ឡើយ​។

អ្វី​ដែល​គួរឲ្យ​កត់សម្គាល់​នោះ​នៅ​ថ្ងៃ​ទី​២២​ ខែ​មីនា​កូរ៉េ​ខាងជើង​បាន​​បាញ់​បង្ហោះ​មី​ស៊ី​ល​​ធន​ខ្លី​ដល់​​ទៅ​៣០​គ្រាប់​​បន្ថែម ដែល​ការបាញ់​មី​ស៊ី​ល​នេះ​គឺ​កូរ៉េខាងជើង​បាញ់​ពី​សមុទ្រ​ភាគ​ខាងកើត​របស់ខ្លួន​ឆ្ពោះទៅ​កាន់​សមុទ្រ​ជប៉ុន​។​

​ពាក់ព័ន្ធ​និង​បញ្ហា​នេះ​ប្រទេស​កូរ៉េខាងត្បូង និង​សហរដ្ឋអាមេរិក បានត្រឹមតែ​ធ្វើ​ការព្រមាន​តែ​ប៉ុនណ្ណោះ​។ យ៉ាងណាមិញ ការបាញ់​មី​ស៊ី​ល​របស់​​ប្រទេស​កូរ៉េខាងជើង​កូរ៉េខាងត្បូង​គិតថា ជាក់ស្តែង​ណាស់​ដែល​កូរ៉េខាងជើង​ចង់​បង្ហាញ​ពី​កំហឹង​អ្វីមួយ​ដែល​វា​អាច​ទាក់ទង​ជាមួយ​ការ​ធ្វើ​សម​យុទ្ធ​​យោធារ រវាង​សហរដ្ឋអាមេរិក និង​ប្រទេស​កូរ៉េខាងត្បូង​។​

​សូមបញ្ជាក់​ថា ចាប់តាំងពី​សហរដ្ឋអាមេរិក និង​កូរ៉េខាងត្បូង ធ្វើ​សមយុទ្ធ​យោធា​តាំងពី​ចុងខែ​កុម្ភៈ មក​ប្រទេស​កូរ៉េខាងជើង តែងតែ​រំខាន​ដោយ​បាន​បាញ់​បង្ហោះ​មី​ស៊ី​ល ចំនួន​៥​ដង​មក​ហើយ​។ ទាក់ទិន​នឹង​សកម្មភាព​នេះ​កូរ៉េខាងជើង​បែ​ជា​ឆ្លើយ​ថា វា​គ្រាន់តែ​ជា​ការ​ធ្វើ​តេស្ត​ធម្មតា​ប៉ុន​ណ្ណោះ​។

​ដោយឡែក ការបាញ់​គ្រាប់​រ៉ុក្កែត​កាល​ពី​សប្តាហ៏​មុន​បាន​ធ្វើឲ្យ​ទីក្រុង​បេកាំ​ង​មានការ​ព្រួយ​បារ​ម្មណ៍​ផងដែរ ព្រួយ​បារ​ម្មណ៍​ដោយសារ​តែ​កំ​ម្លាំង​នៃ​​ការបាញ់​វា​ឈាន​ចូល​ទៅក្នុង​ផ្លូវ​ហោះហើរ​យន្តហោះ​របស់​ប្រទេស​ចិន​៕(ដោយ៖​ពេញ ផេង)​

ប្រជាជន​រាប់​ពាន់​នាក់ អបអរ​សារ​ទ​ពេល​Crimea​ក្លាយ​ជា​ផ្នែក​មួយ​របស់​រុស្ស៊ី​ជា​ផ្លូវការ​

សំលេងៈ

Audio clip: Adobe Flash Player (version 9 or above) is required to play this audio clip. Download the latest version here. You also need to have JavaScript enabled in your browser.



​សំឡេង​កាំជ្រួច បាន​ផ្ទុះឡើង នៅលើ​អាកាស យ៉ាង​កងរំពង នៅ​ព្រឹក​ថ្ងៃ​សៅរ៍​នេះ អម​ជាមួយ នូវ​សំរែក​អបអរ​សារ​ទ​
​ពី​សំណាក់ ក្រុម​មនុស្ស​ជាច្រើន​ពាន់​នាក់ ដែល​ជា​ប្រជាជន​Crimea​។

​ប្រជាជន​Crimea បាន​នាំ​គ្នា​ប្រារព្ធ​ពិធី អបអរសាទរ នៅ​រដ្ឋធានី​Crimean ក្នុង​តំបន់​Simferopol បន្ទាប់​ពី​Crimea  បាន​ផ្ដាច់ខ្លួន​ចេញពី អ៊ុយ​ក្រែនជា​ផ្លូវការ ដើម្បី​ភ្ជាប់​ខ្លួន​ជាមួយ សហព័ន្ធរុស្ស៊ី​។

​ការ​ប្រារព្ធ​ពិធី​អបអរ​សារ​ទ​នេះ គឺ​បន្ទាប់ពី លោក​ប្រធានាធិបតី​រុស្ស៊ី វ្ល៉ា​ឌី​មៀរ ពូ​ទីន កាលពី​ថ្ងៃ​អង្គារ បាន​ចុះហត្ថលេខា​លើ សន្ធិសញ្ញា ដើម្បី​ធ្វើឲ្យ​Crimea ក្លាយ​ជា​ផ្នែក​មួយ​របស់​រុស្ស៊ី​។

​ស្ថិត​ក្នុង​ហ្វូងមនុស្ស ពេល​ប្រារព្ធ​ពិធី​នោះ ក៏​មាន​វត្ដ​មាន​ដែរ ពី​សំណាក់​លោក Sergei Aksenov ដែល​ជា​មេដឹកនាំ នៃ​រដ្ឋធានី​Crimea​។ បើ​តាម​សារព័ត៌មាន​អារ៉ាប់ Al Jazeera បានឲ្យដឹង ថា ហ្វូងមនុស្ស ក៏​បាន​ប្រារព្ធ​ពិធី អបអរ​សារ​ទ​នេះ ក្នុង​ទីក្រុង​ម៉ូស្គូ ប្រទេស​រុស្ស៊ី​ផងដែរ​។​

​លោក Sergei Aksenov មេដឹកនាំ នៃ​រដ្ឋធានី​Crimea បាន​និយាយ ថា “​ខ្ញុំ ជឿជាក់ថា យើងទាំងអស់គ្នា រួមគ្នា នឹង រស់នៅ​ក្នុង​នៅ Crimea ថ្មី យ៉ាង​សប្បាយ​រីករាយ យើង​នឹង​រស់នៅ​ជា វិធី​ដែល ឪពុក​និង ជីតា របស់​យើង ចង់ឲ្យ យើង រស់នៅ ដូច​ជា​យើង សុបិន​នេះ​។ នេះ​គឺជា យុត្តិធម៌ ហើយ​យើង សមតែ​បានទទួល វា​។ រីករាយ ថ្ងៃ​ឈប់សម្រាក មិត្តភក្តិ ជា​ទីស្រឡាញ់​”​។

​គួរ​រលឹក ថា សមាជិក​សភា​ជាន់​ទាប​រុស្ស៊ី​១៥៥​រូប កាលពី​ថ្ងៃ​សុក្រ បាន​បោះឆ្នោត ដើម្បី​ផ្ដល់​សច្ចាប័ន លើ​សន្ធិសញ្ញា ឲ្យ​Crimea ក្លាយ​ជា​ផ្នែក​មួយ នៃ​សហព័ន្ធរុស្ស៊ី បន្ទាប់ពី​លោក​ពូ​ទីន កាលពី​ថ្ងៃ​អង្គារ បាន​ចុះហត្ថលេខា​លើ​សន្ធិសញ្ញា​នេះ​។

​ទន្ទឹម​នឹង ការ​ប្រារព្ធ​ពិធី​អបអរ​សារ​ទ​នេះ នាយករដ្ឋមន្ត្រី​ស្តីទី នៃ​ប្រទេស​អ៊ុយ​ក្រែនលោក Arseniy Yatsenyuk បាន​ចុះហត្ថលេខា​លើ កិច្ចព្រមព្រៀង មួយ​ជាមួយ​សហភាព​អឺរ៉ុប ដែលថា ទង្វើ​របស់​រុស្ស៊ី គឺជា​ការ​បំបែក សម្ព័ន្ធមិត្ត កាន់តែ​ខ្លាំង​រវាង​អ៊ុ​យក្រែន និង​រស្ស៊ី​។

​ទង្វើ​របស់​រស្ស៊ី​នេះ ក៏​រង​ការ​ដាក់​ទណ្ឌកម្ម​ផ្នែក​សេដ្ឋកិច្ច និង​ការទំនាក់ទំនង​ចំនួន​ដែរ ពី​សំណាក់​សហភាព​អឺរ៉ុប និង​សហរដ្ឋអាមេរិក​៕(ដោយៈឃួន សុភ័ក្រ)


តុលា​ការ​ធម្មនុញ្ញ​ថៃ​លុប​ចោល​លទ្ធផល​​បោះឆ្នោត​​ពី​ថ្ងៃ​ទី​២​កុម្ភៈ​

​តុលា​ការ​​ធម្មនុញ្ញ​ថៃ នៅ​ថ្ងៃទី​២១ ខែ​មីនា បាន​ច្រានចោលនូវ​លទ្ធផលការបោះឆ្នោត​ថៃ កាលពី​ថ្ងៃ​ទី​២ ដើមខែ​កុម្ភៈ​កន្លងទៅ​។ ការ​ច្រាល​ចោលលទ្ធផល​បោះឆ្នោត​នេះ​បាន​ធ្វើឡើង​ក្រោយ​ពេល​ដែល វិបត្តិ​​នយោបាយ​នៅថៃ​មិនទាន់​បាន​បញ្ចប់​ពោល​គឺ​​ នៅតែមាន​ការ​​មិន​យល់​ស្រប​ និង​រារាំង​​ពី​ក្រុម​បាតុករ​ជាច្រើនលើក​ច្រើន​សារ​។​ នេះ​បើ​តាម​ការបញ្ជាក់​​ឲ្យដឹង​ពី​អ្នកនាំពាក្យ​​របស់​តុលាកា​រ​​ធម្មនុញ្ញ​​ថៃ​។​

​អ្នកនាំពាក្យ​​ដដែល​បានបន្តថា ក្រុមប្រឹក្សា​ចៅក្រម​នៃ​តុលាការ​ធម្មនុញ្ញ​ ៩រូប បាន​វិនិច្ឆ័យ​ ​ដោយសម្លេង ៦​ទល់នឹង​​ ៣សម្លេង ដោយ ចាត់​ទុក​ថា លទ្ធផល​​បោះឆ្នោត​ជាសកល​​នៅ​ថ្ងៃទី​២ ដើមខែ​កុម្ភៈ​កន្លងទៅនេះជា​មោឃៈ​។ ចៅក្រម​ដែល​បាន​វិនិ​វិនិច្ឆ័យ​បាន​បញ្ជាក់​ឲ្យដឹងថា គណៈ​កម្មា​ធិការ​ជាតិ​​រៀបចំ​ការបោះឆ្នោត​មិន​បាន​រៀបចំ​ការបោះ​ឆ្នោត​សកល​បញ្ចប់​​ដោយ​​រលូន​ពោល​គឺ ​មិន​រួចរាល់​ក្នុង​ថ្ងៃ​តែ​មួយ​។​

​បើតាម​តុ​លាករ​​ធម្មនុញ្ញ​បានឲ្យដឹងថា ការបោះឆ្នោត​ជា​សកល កាលពីដើម​​ខែ​កុម្ភៈ​នោះ គឺ​ធ្វើឡើង​ដោយអធម្មនុញ្ញភាព​ពី​ព្រោះ​ការ​បោះ​ឆ្នោត​​​នេះ មិនបាន​ធ្វើ​ឡើង​តែ​មួយ​ថ្ងៃ​នោះ​ទេ​នៅ​ទូទាំង​ប្រទេស​។​ ក្រៅពីនោះ​តុលាការ​ធម្មនុញ្ញ​ថៃ​បាន ប្រកាសឲ្យ​គណៈកម្មាធិការ​ជាតិ​រៀប​ចំ​​ការ​បោះ​ឆ្នោត​ពិភាក្សា​​ជាមួយ​​រដ្ឋាភិបាល ​ដើម្បី​ឲ្យមាន​​ការបោះឆ្នោត​​ជា​ថ្មី​​ឡើង​វិញ​។​

​សូមបញ្ជាក់​ថា ក្រោយ​អំឡុង​ការបោះឆ្នោត​សកលនៅ​ថៃ​កាលពី​ថ្ងៃ​ទី​២ ខែ​កុម្ភៈ​ក​នុ្លង​ទៅ មាន​មនុស្ស​២៣​នាក់ ត្រូវបាន​សម្លាប់​ដោយ​កាំភ្លើង សុទ្ធតែជា​ក្រុមអ្នកតវ៉ា​​ប្រឆាំង​​រដ្ឋាភិបាល​៕​(ដោយៈ​​ឡេង ដេត)

នាយក​រដ្ឋ​មន្ត្រី​​ទួកគី​​ ប្រកាស​លុប​ចោល​​បណ្តាញ​​Twitter ​​ចេញ​​ពី​​ប្រទេស​​

នាយក​រដ្ឋមន្ត្រី​ទួកគី​លោក Recep​ Tayyip Erdogan ​កាលពី​ថ្ងៃ​ព្រហស្បត្តិ៍ ​បាន​​ប្រកាស​ឲ្យ​​លុប​ចោល​នូវ​បណ្តាញ​ទំនាក់​ទំនង​សង្គម​ ដែល​កំពុង​មាន​ការ​ពេញ​និយម​​យ៉ាង​ខ្លាំង​​នៅក្នុង​​តំបន់​អឺរ៉ុប ​គឺTwitter​។ ការ​ប្រកាស​បិទ​ចោល​នូវ​បណ្តាញ​សង្គម​Twitter​ ពី​ប្រទេស​​ទួក​គីនេះ​ គឺធ្វើ​​ឡើង១​ម៉ោង ​បន្ទាប់ពីមាន​ការលេចធ្លាយ​​នូវរឿង​សំងាត់​​ជាច្រើន ​ដែលអាច​ទាក់​ទង​​ទៅ​នឹង​ ការស៊ើប​អង្កេត​ អំពើ​ពុករលួយ ​ដែល​ជាប់​ពាក់​ព័ន្ធ​ នឹង​អតីត​រដ្ឋមន្រ្តី​ នៃ​រដ្ឋាភិបាល​​ទួកគី​​ចំនួន​​៤រូប​។

ជាង​នេះ​ទៅ​ទៀត​នោះ ​ខ្សែ​អាត់​សម្លេង​សន្ទនា​ តាម​ទូរស័ព្ទ រវាងលោក ​Erdogan ​ជាមួយ​​សមា​ជិក​ ក្រុមគ្រួសារ និង​សមាជិក​មន្ត្រី​ជាន់ខ្ពស់​របស់លោក​ ក៏ត្រូវ​លេច​ធ្លាយ ​នៅលើ​ទំព័រTwitter​ ដ៏​ពេញ​និយម​​​មួយ​​នេះ​​ផង​​​ដែរ​។​

ការបង្ហាញ​នូវភាព​មិនប្រក្រតី​ ជាច្រើននៅលើTwitterនេះ​ ត្រូវបានលោកនាយក​រដ្ឋ​មន្ត្រី​នៃ​ប្រទេស​ទួកគី​រូបនេះ​ បាន​អះអាង​ថា ​អាច​ផែន​ការនៃ​ការធ្វើ​រដ្ឋ​ប្រហារ​។

គួរ​​បញ្ជាក់ថា ​​គេហ​ទំព័រ​ Twitter​ គឺ​ជា ​សេវា​កម្ម​បណ្តាញ​សង្គម ​ដែល​អាច​ឱ្យ ​អ្នកប្រើ​​ផ្ញើរសារ ​និង​បង្ហោះ​នូវ​រូបភាព ​និង​វីដេ​អូ​​​​ផ្សេងៗ​បាន​។ twitter ​ត្រូវបាន​បង្កើតឡើង​ នៅខែមីនា​ ឆ្នាំ 2006 ​ដោយ ​លោក Jack Dorsey , ​Evans Williams​ , Biz Stone។​ ដោយឡែក​ គេហទំព័រនេះ ​មានប្រជា​ប្រិយភាព ​ទូទាំងពិភពលោក​ ដោយមាន​មនុស្ស​ចំនួន​ 500 លាន​នាក់ បាន​ចុះ​​ឈ្មោះ​ប្រើប្រាស់ក្នុង​ឆ្នាំ២០១២​៕(ដោយៈសៅ វិសាល)​​

លោក​អូ​បា​ម៉ា ប្រកាស​ដាក់​ទណ្ឌកម្ម បន្ថែម​ទៀត​ទៅ​លើ​រុស្ស៊ី ចំពោះ​វិបត្ដិ​នៅ​Crimea

លោក​ប្រធានាធិបតី​អាមេរិក​បា​រ៉ាក់​អូបា​ម៉ា បាន​​ប្រកាស​នៅ​ថ្ងៃនេះ​ពី​ការដាក់ទណ្ឌកម្ម​បន្ថែមទៀត​ទៅលើមន្ត្រី និង​ធនាគារ​រុស្ស៊ី ដើម្បី​ប្រឆាំង​ចំពោះ​​រុស្ស៊ី​ដែល​បាន​ចុះហត្ថលេខា​លើ​សន្ធិសញ្ញា​ភ្ជាប់​Crimea នឹង​រុស្ស៊ី​។ នេះ​បើ​យោងតាម​សារព័ត៌មាន​BBC​។

​លោក​អូ​បា​ម៉ា​បាន​មានប្រសាសន៍​ថា សហរដ្ឋអាមេរិក​មាន​ការព្រួយបារម្ភ​ជា​ខ្លាំង​ចំពោះ​ស្ថានភាព​នៅក្នុង​ភាគខាងត្បូង និង​ភាគ​ខាងកើត​អ៊ុ​យ​ក្រែន​។ លោក​និយាយ​ថា លោកបាន​ចុះហត្ថលេខា ដើម្បី​ប្រតិបត្តិ​មួយ​ដែល​អនុញ្ញាត​ឲ្យ​សហរដ្ឋអាមេរិក ដើម្បី​ដាក់​ទណ្ឌកម្ម​សេដ្ឋកិច្ច​លើ​ប្រទេស​រុស្ស៊ី​។​

​ទន្ទឹមនឹងនេះ​ដែរ​មេដឹកនាំ​សហភាព អឺរ៉ុប​បាន​មកដល់​នៅក្នុង​ទីក្រុង​ព្រុច​សែ​ល​បែ​ល​ហ្សិក ដើម្បី​ពិភាក្សា​ពី​វិបត្តិ​នៅ​​Crimea នៅ​ប្រទេស​អ៊ុ​យ​ក្រែន​។ ​ចំណែក​មេដឹកនាំ​អាល្លឺម៉ង់ លោកស្រី Angela Merkel បាន​ថ្លែងថា សហភាព​អឺរ៉ុប​ត្រៀម​ខ្លួន​ជា​ស្រេច​ក្នុង​ការដាក់​ទណ្ឌកម្ម​សេដ្ឋកិច្ច​​ប្រសិន បើ​មាន​ការកើនឡើង​ណាមួយ​។

​នៅ​ថ្ងៃនេះ​ដែរ សភា​ថ្នាក់ក្រោម​រុស្ស៊ី​បាន​សម្រេច​ផ្ដល់​សច្ចា​នុម័ត​លើ​សន្ធិសញ្ញា ដើម្បី​ឲ្យ​តំបន់ស្វយ័ត​Crimea​ក្លាយ​ជា​សហព័ន្ធ​រុស្ស៊ី​៕​(​ដោយៈ​ឃួន សុភ័​ក្រ​)

សភា​ថ្នាក់ក្រោម​រុស្ស៊ី ផ្ដល់​សច្ចា​នុម័ត ភ្ជាប់​Crimea​ជា​ផ្នែក​មួយ​របស់​រស្ស៊ី​

នៅ​ថ្ងៃ​ព្រហស្បត្ដិ៍​នេះ សភា​ថ្នាក់ក្រោម​រុស្ស៊ី បាន​សម្រេច​ផ្ដល់​សច្ចា​នុម័ត លើ​សន្ធិសញ្ញា ដើម្បី​ឲ្យ​តំបន់ស្វយ័ត​Crimea ក្លាយ​ជា​សហព័ន្ធ រស្ស៊ី​។ នេះ​បើ​តាម សារព័ត៌មាន​អន្ដរជាតិ CNN​។

​ការសម្រេច​នេះ​គឺ​ធ្វើឡើង បន្ទាប់​ពី មាន​ការបោះឆ្នោត​ប្រជាមតិ នៅ​តំបន់​Crimea ក្នុង​ប្រទេស​អ៊ុ​យក្រែន កាលពី​ថ្ងៃ​ទី​១៦ ខែ​មីនា ហើយ​ប្រជាជន​នៅ​Crimea ជាង​៩០​ភាគរយ បាន​បោះឆ្នោត​ផ្ដាច់ខ្លួន ពី​អ៊ុ​យក្រែន ទៅ​ភ្ជាប់​ខ្លួន​ជាមួយ​រុស្ស៊ី​។​

​លោកពូ​ទីន បាន​និយាយ ថា ការបោះឆ្នោត​ប្រជាមតិ នៅ​ប្រទេស​អ៊ុយ​ក្រែន​កាលពី​ថ្ងៃ​ទី​១៦ ខែ​មីនា ជាការ​ស្របច្បាប់​ត្រឹម ត្រូវ និង​យុត្តិធម៌​ពីព្រោះ ប្រជាជន​អ៊ុយ​ក្រែន​ភាគច្រើន​គាំទ្រ​ប្រទេស​រុស្ស៊ី ដើម្បី​ឲ្យ​ប្រធានាធិបតី​រុស្ស៊ី​ក្តោប​ក្ដាប់​តំបន់Crimeaនេះ​មក​វិញ​។​

​កាលពី​ថ្ងៃ ទី​១៨ ខែ​មីនា លោក​ប្រធាន​ធិបតី​រុស្ស៊ី ពូ​ទីន បាន​ចុះហត្ថលេខា លើ​សន្ធិសញ្ញា ភ្ជាប់​Crimea នឹង​រុស្ស៊ី​។

​យ៉ាងណាក៏ដោយ ប្រតិកម្ម​ជា​ច្រើន បាន​ធ្លាក់​មក​ជា​បន្ដបន្ទាប់ ពី​ប្រទេស​លោកខាងលិច ចំពោះ​ទង្វើ​របស់​រុស្ស៊ី ហើយ​បណ្ដា​ប្រទេស​ធំៗ​ជាច្រើន ក៏​គ្រោង​នឹង​ដាក់​ទណ្ឌកម្ម ដល់​ប្រទេស​រុស្ស៊ី​ផងដែរ​៕(​ដោយៈ​ឃួន សុភ័​ក្រ​)

អាមេរិក​​និង​​កូរ៉េខាងត្បូង​​នឹង​បន្ដ​សម​យុទ្ធ​ទ្រង់​ទ្រាយ​​ធំ​មួយ​​ផ្សេងទៀត​​នៅ​សប្ដាហ៍​​ក្រោយ​

នៅ​សប្ដាហ៍​ក្រោយនេះ​កងទ័ព​របស់​អាមេរិក​ប្រមាណ​ជាង​១​ម៉ឺន​នាក់ នឹង​ចូលរួម​ជាមួយ​ក​ង​ទ័ព​កូរ៉េខាងត្បូង​ក្នុងការ​ធ្វើ​សមយុទ្ធ​ទ្រង់ទ្រាយ​ធំ​មួយ​​ផ្សេង​ទៀត នៅ​ឆ្នេរសមុទ្រ​ភាគ​អាគ្នេយ៍​របស់​កូរ៉េខាងត្បូង​។

នៅក្នុង​ការធ្វើ​សមយុទ្ធ​រួម​គ្នា​ជា​លើក​ទី​ពីរ​នេះ គឺ​បែងចែក​ចេញ​ជា​ពីរ​ក្រុម​ហើយ​សកម្មភាព​នេះ​នឹង​ចាប់ផ្ដើម​ឡើង​ពី​ថ្ងៃ​ទី​២៧​ ខែ​មីនា រហូត​ដល់​ថ្ងៃ​ទី​៧​​ ខែ​មេសា​។ អ្វី​ដែល​គួរឱ្យ​កត់សម្គាល់​នោះ​គឺ គ្រាប់​ម៉ី​ស៊ី​ល​ចំនួន​​២៥​គ្រាប់​​ក៏​​នឹង​បាញ់​​សាកល្បង​ពេលធ្វើ​លំ​ហាត់​សមយុទ្ធ​នេះ​ផងដែរ​។​

​បើ​តាម​អ្នកនាំពាក្យ​ទីបញ្ជាការដ្ឋាន​កងទ័ព​របស់​អាមេរិក​បាន​ឱ្យ​ដឹងថា សមយុទ្ធ​ខាងលើ​នឹងមាន​ទាហាន​ម៉ា​រី​ន​របស់​អាមេរិក​ប្រមាណ​៧៥០០​នាក់ និង​ទាហានជើងទឹក​២០០០​នាក់​។ ដោយឡែក​បើ​តាម​ការបញ្ជាក់​ពី​សារព័ត៌មាន Yonhap ​របស់​កូរ៉េ​ខាងត្បូង​បានបញ្ជាក់​ថា នឹង​មាន​កង​ទ័ព​​ម៉ា​រី​ន​​កូរ៉េខាងត្បូង​៣៥០០ និង​ទាហានជើងទឹក​១០០០​នាក់​​បន្ថែម​ពីលើ​កងទ័ព​អាមេរិក​។​

​សូមបញ្ជាក់​ថា ការធ្វើ​សមយុទ្ធ​កាលពី​លើក​មុន​មាន​កងទ័ព​អាមេរិក​ប្រមាណ​២៨៥០០​នាក់​ហើយ​បាន​ចូលរួម​ជាមួយ​កូរ៉េខាងត្បូង​។ ការធ្វើ​សម​យុទ្ធ​វគ្គ​ទី​មួយ​នេះ​ដែរ​បាន​ចាប់ផ្ដើម​កាល​ពី​ថ្ងៃ​ទី​២៤​ខែ​កុម្ភៈ នឹង​បន្ដ​រហូតដល់​ពាក់កណ្ដាល​ខែ​មេសា​ខាង​មុខ​។​

​គួ​រម្លឹកថា ពាក់ព័ន្ធ​នឹង​សមយុទ្ធ​ប្រចាំឆ្នាំ​របស់​កូរ៉េ​ខាងត្បូង​និង​អាមេរិក​ត្រូវបាន​កូរ៉េខាងជើង​ថ្កោលទោស​យ៉ាងខ្លាំង​។ ថ្កោលទោស​គឺថា​កូរ៉េ​ខាង​ជើង​​បាន​​ចោទ​កូរ៉េ​ខាងត្បូង​និង​អាមេរិក​ថា បាន​រៀបចំ​យុទ្ធសាស្ដ្រ​ដើម្បី​វាយឆ្មក់​លើ​ទឹកដី​របស់​ខ្លួន​។

ជាមួយគ្នានេះដែរ​ កូរ៉េខាងជើង​ក៏​បាន​ស្នើសុំ​ឱ្យ​បញ្ឈប់​សកម្មភាព​សមយុទ្ធ​ភ្លាមៗ ប៉ុន្ដែ​កូរ៉េខាងត្បូង​មិនបាន​ធ្វើ​តាម​សំណូមពរ​របស់​កូរ៉េ​ខាង​ជើង​​ឡើយ​ដោយ​កូរ៉េ​ខាងត្បូង​អះអាងថា វា​គ្រាន់តែ​ជា​ការ​ធ្វើ​សមយុទ្ធ​ធម្មតា​ប៉ុណ្ណោះ​។ ដូច្នេះ​តើ​ការបញ្ជូន​កងទ័ព​បន្ថែម​ទៅ​ទឹកដី​កូរ៉េខាងត្បូង​របស់​អាមេរិក​អាចធ្វើឱ្យ​កូរ៉េ​ខាងជើង​មាន​ប្រតិកម្ម​យ៉ាងណា​ទៀត​?​(ដោយ៖​ពេញ ផេង)​

ចៅហ្វាយក្រុង​​តូ​ក្យូ​ថ្មី​​ប្តេជ្ញា​​នឹង​ជួយ​​ដោះស្រាយ​​បញ្ហា​​ប្រឈម​​ក្នុង​ទីក្រុង​​ប៉េកាំង​​តាម​ផ្នែក​​ការទូត

កាលពី​ថ្ងៃ​​ទី​១៩​​ខែ​មីនា​លោក ​​យ៉ូ​អ៊ី​ឈិ​ ម៉ា​ស៊ូ​ហ្សូ​អិ​ ចៅហ្វាយ​​ក្រុង​តូ​ក្យូ​ បាន​​ប្រកាស​ឱ្យ​​ដឹងថា​ ទីក្រុង​ តូ​ក្យូ ​ចង់​​សហការ​​ជាមួយ​​ទីក្រុង​​ប៉េកាំង​ ដើម្បី​​ដោះស្រាយ​​បញ្ហា​​កង្វក់​​បរិយាកាស​ និង​​ការ​បំពុល​បរិយាកាស​ ដែល​បញ្ហា​​បំពុល​​អាច​​ធើ្វឱ្យ​ប៉ះពាល់​​ដល់​​ទីក្រុង​ដទៃ​ទៀត​​ក្នុង​​ប្រទេស​ចិន​ ក្រៅ​ពី​​ទីក្រុង​​ប៉េកាំង​។​ ការចង់​​ដោះ​ស្រាយ​​បញ្ហា​​ខាង​លើ​នេះ​ ត្រូវបាន​​លោក​​ម៉ា​ស៊ូ​ហ្សូ​អិ​ បញ្ជាក់​ថា​​ទីក្រុង​​ប៉េកាំង​ គឺ​ជា​​ទីក្រុង​​មួយ​​ដែល​​មាន​​មនុស្ស​​រស់​នៅ​​ប្រមាណ​​ដល់​ទៅ​​៣០​លាន​​នាក់​ ដូច្នេះ​​បើ​មិន​​ដោះ​ស្រាយ​​បញ្ហា​​កង្វក់​​បរិយាកាស​​ឱ្យ​បាន​​លឿន​​បំផុត​ទេ​ វា​អាច​នឹង​​បង្ក​ជា​​ផល​ប៉ះពាល់​​នៅ​ថ្ងៃ​​ខាង​មុខ​។​

​មិន​​ត្រឹមតែ​​ផ្នែក​​បរិស្ថាន​​ប៉ុណ្ណោះ​ទេ​ ថ្នាក់​ដឹកនាំ​​ថ្មី​មួយ​រូប​នេះ​ ក៏​ចង់​​អភិវឌ្ឍន៍​​លើ​វិស័យ​​សុខុមាលភាព​​ជាមួយ​​ទីក្រុង​​ប៉េកាំ​ង​​ផងដែរ​។​ ចង់​​អភិវឌ្ឍន៍​​វិស័យ​​សុខុមាលភាព​​គឺថា​ ជប៉ុន​​ចង់​​សហការ​​ជាមួយ​ចិន​​ក្នុង​ការ​ដោះស្រាយ​​បញ្ហា​ប្រឈម​ ទៅ​លើ​​គោល​នយោបាយ​​អនុញ្ញាត​ឱ្យ​មាន​​កូន​​តែ​មួយ​​ក្នុង​​មួយ​គ្រួសា​រ​ ដោយសារ​​តែ​​គោល​​នយោបាយ​​នេះ​ មាន​ប្រតិកម្ម​​ប្រឆាំង​​ពី​​ប្រជាពលរដ្ឋ​​មួយចំនួន​ ព្រោះ​​ពួកគេ​​មិន​​ពេញចិត្ដ​នឹង​​គោល​នយោបាយ​​ដែល​​​រដ្ឋាភិបាល​ទីក្រុង​ ប៉េកាំ​ង ​បាន​​អនុម័ត​។​ ដូច្នេះ​ហើយ​ ​ទើប​ជប៉ុន​​ចង់​ចាប់​​ដៃ​ជាមួយ​​ចិន​ ដើម្បី​​ជួយ​​សម្រួល​​បញ្ហា​​ដែល​​កើតឡើង​ និងជួយ​​ជំរុញ​​វិស័យ​​សុខុមាលភាព​​ចិន ឈាន​ទៅ​រក​ភាព​​ល្អប្រសើរ​ ​ជាងនេះ​ទៅ​ទៀត​។​

​ជា​ចុង​ក្រោយ​ ​លោក​យ៉ូ​អ៊ី​ឈិ​ ម៉ា​ស៊ូ​ហ្សូ​អិ ​បាន​​សង្កត់​ធ្ងន់​ថា​ គោលដៅ​​ធំ​បំផុត​របស់​​លោក​ ​ដែល​ចង់​​ដើរ​​ជាមួយ​ចិន​​ក្នុង​ទិស​ដៅ​​អភិវឌ្ឍ​​វិស័យ​​ខាងលើ​ គឺ​ដើម្បី​​បង្កើន​​ទំនាក់​ទំនង​​ល្អ​​នឹង​គ្នា​។​ លោក​​មិនមែន​​ជា​​រដ្ឋមន្ដ្រី​ការបរទេស​ ហើយ​​លោក​​ក៏​​មិនមែន​​ជា​​នាយករដ្ឋមន្ដ្រី​​ដែរ​ តែ​​យ៉ាង​ហោច​ណាស់​​ ក៏​លោក​​មាន​​តួនាទី​​ជា​​ចៅហ្វាយ​ក្រុង​​ម្នាក់​​ដែរ​ ដូច្នេះ​​រូប​លោក​​នឹង​​ព្យាយាម​​ធ្វើ​អ្វី​​តាម​ដែល​​អាច​ធ្វើ​បាន​ ដើម្បី​​ឱ្យ​​ប្រទេស​​ទាំង​ពីរ​ក្លាយទៅជា​​ប្រទេស​​ជិតខាង​​ដ៏​ជិតស្និទ្ធិ​ ព្រោះ​ថា​​កន្លង​មក​​ចិន​និង​ជប៉ុន​​ធ្លាប់​​ថ្នាំងថ្នាក់​​ចិត្ត​​នឹង​គ្នា​ ចាប់តាំង​ពី​ការ​ពង្រីក​​ចក្រពត្តិ​និយម​​របស់​ជប៉ុន​ ​នៅ​ទូទាំង​​តំបន់​​អាស៊ី​​ក្នុង​​ពាក់កណ្តាល​​សតវត្ស​​ទី​២០​មកម្ល៉េះ ។​​

​សូម​​បញ្ជាក់​​ដែលថា​ លោក​​យ៉ូ​អ៊ី​ឈិ​ ម៉ា​ស៊ូ​ហ្សូ​អិ​ គឺជា​​ចៅហ្វាយ​ក្រុង​ តូ​ក្យូ​ ដែល​​ទើបតែ​​បោះឆ្នោត​​ឱ្យ​​ចូល​កាន់​តំណែង​​កាលពី​ខែ​មុន​។​ លោក​​មាន​​អាយុ​​៦៥​ឆ្នាំ​ ហើយ​​ពី​មុន​​លោក​​បម្រើការ​​ជា​មន្ដ្រី​​ជាន់ខ្ពស់​​ផ្នែក​​សុខុមាលភាព​​របស់​ជប៉ុន​៕​(ដោយ៖ពេញផេង)​

ចិន​បញ្ជូន​​នាវា​​៩​គ្រឿង​​បន្ថែម​​ដើម្បី​​ស្វែងរក​​យន្ដហោះ​​ម៉ាឡេស៊ី

បន្ទាប់​ពី​​​​​យន្តហោះ​​ម៉ាឡេស៊ី​ បានបាត់​​អស់​រយៈ​ពេល​​ប្រមាណ​ជា​​១១​ថ្ងៃ​​កន្លងមក​ នៅ​​ថ្ងៃ​ទី​១៩​​ខែ​មីនា​នេះ​ ចិន​​បាន​​បញ្ជូន​​នាវា​​របស់ខ្លួន​​៩​គ្រឿង​​ទៀត​ហើយ​ ក្នុង​ការ​ចុះ​​ប្រតិ​បត្ដ​ការ​​ស្វែងរក​​យន្ដហោះ​​ប៊ូ​អ៊ីង​៧៧៧​។​ ​ការ​បញ្ជូន​​នាវា​​៩​គ្រឿង​​ជា​ថ្មី​​គឺ​ធ្វើ​ដំណើរ​​ទៅ​​ទិស​ដៅ​​ផ្សេង​គ្នា​​ពី​លើក​មុន​​ដោយ​​លើក​នេះ​ ​ឆ្ពោះ​ទៅ​កាន់​​ដែនទឹក​​ភាគ​ខាង​កើត​​នៃ​​ឈូង​សមុទ្រ​ Bengal ​និង​​ភាគ​ខាងលិច​​នៃ​ប្រទេស​​ឥណ្ឌូនេស៊ី​។​ សូម​បញ្ជាក់​ថា​​ ការបញ្ជូន​​នាវា​​ចំនួន​៩​គ្រឿង​​បន្ថែម​​ទៅ​តំបន់​​ខាងលើ​ ធ្វើឡើង​​បន្ទាប់​ពី​​ថៃ​បាន​​ប្រកាស​ថា​​ប្រព័ន្ធ​​រ៉ា​ដា​​របស់​គេ​​ ចាប់បាន​​​ព័ត៌មាន​​របស់​​យន្ដហោះ​​ប៊ូ​អ៊ីង​៧៧៧​ មុន​ពេល​​វា​បាត់​​ពី​ប្រព័ន្ធ​​ទំនាក់ទំនង​។ ​

ជាមួយគ្នា​​នឹង​ការបាត់​​យន្ដហោះ​នេះ​ អាជ្ញាធរ​​ម៉ាឡេស៊ី​ បានឱ្យ​ដឹង​ថា​​យន្ដហោះ​ ដែល​​ចេញ​ដំណើរ​​ពី​ទី​ក្រុង​​កូឡា​ឡាំ​ពួ​​ ឆ្ពោះទៅ​កាន់​​ទីក្រុង​​ប៉េកាំង​ ត្រូវបាន​​គេ​បង្វែរ​​ទិស​​និង​​អាច​ហោះហើរ​​នៅលើ​​ធ្នូ​មួយ​​ស្ថិត​​នៅ​​ភាគ​ខាងជើង​ និង​​ភាគ​ខាងត្បូង​។ ​ចំណែកឯ​​ទីតាំង​​ចុង​ក្រោយ​​ដែល​បាន​​ស្គាល់​ ​គឺ​នៅក្នុង​​ច្រក​​សមុទ្រ​​ ម៉ា​ឡា​កា​។​ ក្រោយ​មក​​អាជ្ញាធរ​​ ក៏​បញ្ជូន​​ក្រុម​​អ្នករុករក​​ចុះ​ទៅ​​ប្រតិ​បត្ដិការ​នៅ​​តំបន់​នោះ​​ដែ​រ​​ ប៉ុន្ដែ​​នៅតែ​​គ្មាន​​ដំណឹង​។​ បច្ចុប្បន្ននេះ​ មាន​​ប្រទេស​​ចំនួន​២៦​​ហើយ​ បាន​​ចូលរួម​​ក្នុង​​យុទ្ធនាការ​​ស្វែងរក​​យន្ដហោះ​​ប៊ូ​អ៊ីង​៧៧៧​​ដែល​បាត់​ខ្លួន​។​​

​គួរ​ម្លឹក​​ឡើងវិញ​ថា​ យន្ដហោះ​​ខាងលើ​​បាន​បាត់​​ពី​ប្រព័ន្ធ​ទំនាក់​ទំនង​​ កាលពី​​ថ្ងៃ​សៅរ៍​​ទី​៨​ខែ​មីនា​។​ នៅ​ក្នុង​​យន្ដហោះ​ មាន​​មនុស្ស​​២៣៩​នាក់​​ហើយ​អ្នកដំណើរ​​ភាគ​ច្រើន​​គឺជា​​ជនជាតិ​ចិន​។​ បច្ចុប្បន្ន​នេះ​​ ក្រុម​អ្នក​​ស៊ើបអង្កេត​​កំពុង​តែ​​តាមដាន​​ ថា​តើ​​ការបាត់​ខ្លួន​​របស់​យន្ដហោះ​​មាន​​ជាប់​​ពាក់ព័ន្ធ​​ជាមួយ​​ក្រុម​​អ្នកបើកបរ​ ​ឬក៏​​មាន​​អ្នកណា​​ផ្សេង​​នៅ​លើ​យន្ដ​ហោះ​ជា​អ្នក​​បង្កហេតុ​៕​(ដោយ៖ពេញ ផេង)​

​ប្រធា​នាធិ​បតីសហរដ្ឋ​អា​មេរិក ​​បង្ខំចិត្ត​​បិទ​ទ្វារស្ថាន​ទូត​ស៊ី​រី​​ ដោយ​សារ​​ការរឹង​​រួស​​របស់​លោក អា​សាដ​

ប្រធានា​ធិបតី​​អាមេរិក លោក​បា​​រ៉ាក់ អូ​បា​ម៉ា នៅ​ថ្ងៃ​ទី​១៨ ខែ​មីនា បាន​សម្រេច​បិទទ្វារ ស្ថាន​ទូត ប្រចាំការ​​ នៅ​វ៉ាស៊ីន​តោន រដ្ឋ​ឌី​ស៊ី និង​​ស្ថាន​​កុងស៊ុល​​ មាន​ដូច​ជា​រដ្ឋ Michigan ហ៊ូស្តុន និង​រដ្ឋ​តិច​សាស់​​ និង​ស្ថាន​កុងស៊ុល​​ របស់​ស៊ី​រី​​ មិនឲ្យ​ដំណើរ​ការ ​ការងារ ទាំង​បង្ខំចិត្ត។​​ មិន​តែ​ប៉ុនណ្ណោះ អាមេរិក​​បាន​​បញ្ជា​ ឲ្យ​​បុគ្គល​​ជា​ជន​ជាតិ​ស៊ី​រី និង​អ្នក​​ដែល​មាន​​តួនាទី​នៅក្នុង​​ស្ថានទូត​ស៊ី​រី ចាកចេញ​​ពី​ សហរដ្ឋអា​មេរិក ជាបន្ទាន់​។​

​ពាក់ព័ន្ធ​​ទៅ​និង​ការ​ផ្អាក​​សកម្មភាព​ស្ថាន​ទូត​ស៊ី​រី បាន​ធ្វើឡើង​​បន្ទាប់​ពី សហរដ្ឋ​អាមេរិក ទ្រាំ​មិន​​បាន​នូវ​​ទង្វើរ​យង់ឃ្នង របស់​ប្រធានាធិបតី​ ​ប្រទេស​ស៊ី​រី ដែល​ដឹកនាំ​ដោយ លោក​បា​សា អាល​អាសាដ​( Bashar Al-Assad) ។​ទង្វើរ​ជាច្រើន ដែល​លោក​បា​សា​អាល អា​សាដ នៅតែ​រឹង​រួស​ ​ប្រព្រឹត្ត​នោះ អា​មរិ​ក​ បាន​​លើក​ជា​​បញ្ហា​​ច​ម្ប​ង គឺ​លោក​ ​បា​សា អាល​អាសាដ នៅ​តែ​ប្រកាន់​ជំហ​ដឹកនាំ​សង្គ្រាម​ប្រឆាំង ប្រជារាស្ត្រ​ខ្លួនឯង ដើម្បី​ប្រកាន់​ខ្ជាប់​នូវ​​អំណាច និង​ការការពា​​ផលប្រយោជន៍​ផ្ទាល់ខ្លួន​។​

​មកដល់​​ត្រង់​​ចំណុច​នេះ សូម​បញ្ជាក់​​ឡើងវិញ​បន្តិច​​ដែរ​ថា ការប្រឆាំង​របស់លោក អាល អា​សាដ ទៅ​និង​ប្រជាពលរដ្ឋ​ស៊ី​រី ខ្លូន​ឯង ដោយសារ​​តែ​ប្រជាជន​​ស៊ី​រី ភាគច្រើន មិន​ពេញចិត្ត​​របប ​ដែល​ដឹកនាំ​ដោយ​​លោក​អាល អា​សាដ​។​មិន​ពេញចិត្ត​ក៏​ព្រោះតែ លោក​បា​សា អាល អា​សាដ មិន​យកចិត្តទុកដាក់ សុខ​ទុក​ប្រជាជន មិន​អាច​ស្វែង​រក​អ្វី​ដែល​ហៅថា សន្តិភាព​ពេញ​លេញ​ដល់​ពលរដ្ឋ​ស៊ី​រី​។

ទោះបីជា​អា​មេរិក ​​សម្រេច​បែប​នេះ​ក្តី អាមេរិក​នៅ​តែ​រក្សា ​ទំនាក់ទំនង​​ការទូត​របស់​ខ្លូន ជាមួយ​ស៊ី​រី ដដែល  ដើម្បី​ជួយ​ដល់​ពលរដ្ឋ​ស៊ី​រី  ស្វែងរក​ការផ្លាស់ប្តូរ នៅក្នុង​​ប្រទេស​មួយ​នេះ តាមរយៈ​ការចរ​ចា​ ដោយ​​សន្តិវិធី​ជាមួយ លោក​បា​សា​អាល​អាសាដ​ប្រធានា​ធីបតី​ស៊ីរី​។​ជាមួយគ្នា​នោះ​ដែរ រដ្ឋលេខាធិការ​ជាន់ខ្ពស់​ សហរដ្ឋអាមេរិក លោក​ច​ន ឃែ​រី (John Kerry) នឹង​រៀប​ចំ​ឲ្យ​មន្ត្រី​ជាន់ខ្ពស់ ដែល​ជា​បេស​កជន ​ពិសេស​​របស់​អាមេរិក លោក Daniel Rubinstein ធ្វើដំណើរ​ទៅ ប្រទេស​​នៅ​ប៉ែក​មជ្ឈឹម​បូព៌ា​មួយនេះ នៅ​ចុង​ខែ​មីនា ដើម្បី​ចាប់​ផ្តើម​ ការ​ពិគ្រោះ​យោបល់ ជាមួយនឹង​ស៊ី​រី និង​អ្នក​ដទៃ​ទៀត​ដែល​ពាក់ព័ន្ធ ដើម្បី​ស្វែងរក​ការបញ្ចប់​វិបត្តិ នៅ​ប្រទេស​ស៊ី​រី​៕
(ដោយៈ ​អ៊ុន សុខ​ឡា)


លោក​ពូ​ទីន​​ប្រកាស​​បដិសេធ​​ពាក្យ​ថា​​រុស្ស៊ី​​រំលោភ​យក​​ទឹកដី​​អ៊ុ​យក្រែន

ប្រតិកម្ម​​ពី​បណ្ដា​​ប្រទេស​​ដែល​​គាំទ្រ​​អ៊ុយ​ក្រែន​​បាន​​កើតឡើង​​ជា​បន្ដ​បន្ទាប់​ ក្រោយ​​ពេល​​លោក​​វ្លា​ឌឺ​មៀ​ពូ​ទីន​ បាន​ចុះ​ហត្ថលេខា​​លើ​​សន្ធិសញ្ញា​​បញ្ចូល​​តំបន់​​គ្រីមៀ​​ជា​​អធិបតេ​យ្យ​ភាព​​ដែនដី​​របស់​រុស្ស៊ី​។​ ក្នុង​ចំណោម​​ប្រទេស​​ដែល​​គាំទ្រ​​អ៊ុយ​ក្រែន​គេ​​សង្កេត​ឃើញថា​ ​អាមេរិក​​លេចមុ​ខ​ខ្លាំង​ជាងគេ​ ចំពោះ​​ការ​​ជ្រោមជ្រែង​​រដ្ឋាភិបាល​​អ៊ុយក្រែន​។​ អាមេរិក​​បាន​​ចោទប្រកាន់​​រុស្ស៊ី​ថា​ បាន​​រំលោភ​​បំពាន​​លើ​​អធិបតេយ្យភាព​ដែនដី​​របស់​​អ៊ុ​យក្រែន​ និង​បាន​​ចាត់ទុក​​កាបោះឆ្នោត​​ប្រជាមតិ​​កាលពី​​ថ្ងៃ​ទី​១៦​​ខែ​មីនា​​ជា​ការ​បោះឆ្នោត​​មិន​​ស្របច្បាប់​។​​ ជាមួយ​គ្នានេះ​​ដែរ​​អាមេរិក​​ ក៏ដូចជា​​ប្រទេស​ក្នុង​សហគមន៍​​អ៊ឺរ៉ុប​​មួយចំនួន​ទៀត​​កំពុងតែ​​ពិភាក្សា​គ្នា​​រកវិធីសាស្ដ្រ​​ដោះស្រាយ​ និង​​កំពុងតែ​​ធ្វើឱ្យ​​រុស្ស៊ី​​កាន់តែ​​ឯក​កា​​លើឆាក​​អន្ដរជាតិ​។​

​ក្រៅ​ពី​ប្រទេស​​ដែល​​គាំទ្រ​​ហើយ ​​អ៊ុយ​ក្រែន​​ផ្ទាល់​ក៏​បាន​​ប្រឆាំង​​យ៉ាង​​ដាច់អហង្កា​​ដែរ​​ ពាក់ព័ន្ធ​នឹង​​ការប្រកាស​​ដាក់​​តំបន់​​ស្វ័យយ័ត​​គ្រីមៀ​​ជា​ផ្នែក​​មួយ​​របស់​រុស្ស៊ី​។ ​អ៊ុយ​ក្រែន​​​លើក​ឡើង​​ថា​​​ការ​​ប្រ​ព្រឹ​ត្ដ​​របស់​រុស្ស៊ី​​​ដូច្នេះ​​ ជា​ទង្វើ​មួយ​​ដែល​​រំលោភ​​បំពាន​​លើ​​អធិបតេយ្យភាព​​ដែនដី​​ប្រទេស​​ដទៃ​។​ ម្យ៉ាង​វិញ​ទៀត ​​អ៊ុ​ក្រែន​ក៏​សោក​ស្ដាយ​យ៉ាង​ខ្លាំ​ង​​ដែរ ជុំវិញ​​ការ​ស្លាប់របស់​​ទាហាន​​អ៊ុយ​ក្រែន​​ក្នុង​​តំបន់​​គ្រីមៀ​​កាល​ពី​ថ្ងៃ​ទី​១៨​​មីនា ដោយ​​អ៊ុ​យក្រែន​អះអាង​ថា​​ទាហាន​​រុស្ស៊ី​​ជា​អ្នក​​សម្លាប់​​ទាហាន​​របស់ខ្លួន​។​

​ប៉ុន្ដែ​ទោះ​ជា​យ៉ាងនេះ​ក្ដី​ ​ប្រមុខ​​ដឹកនាំ​​របស់​រុស្ស៊ី​​លោក​​វ្លា​ឌឺ​មៀ​ពូ​ទីន ​មិន​យក​ចិត្ដទុក​ដាក់​​នឹង​​ពាក្យសម្ដី​​ទាំងនោះ​ឡើយ​ ហើយ​​លោក​​បាន​​ប្រកាស​​ដាច់ខាត​​ចំពោះ​​ពាក្យ​​ដែល​ថា​ ​រុស្ស៊ី​​បំពាន​​យក​​ទឹកដី​​របស់​​អ៊ុ​យក្រែន​។​ ការអះអាង​​បែប​នេះ​​ត្រូវបាន​​លោក​​ពូ​ទីន​​បញ្ជាក់​បន្ថែម​ថា​ វា​សម​​ស្រប​​ណាស់​​ដែល​លោក​​សម្រេចចិត្ដ​​ដាក់​​តំបន់​​គ្រីមៀ​ ជា​រដ្ឋ​​មួយ​ចំណុះ​​រុស្ស៊ី​​ព្រោះ​​លទ្ធផល​​បោះឆ្នោត​​ប្រជាមតិ​​កាលពី​ថ្ងៃ​ទី​១៦​ ជា​​សក្ខីភាព​​ជាក់ស្ដែង​​បង្ហាញ​ពី​​ភាព​ស្របច្បាប់​ ដោយ​​មាន​​សំឡេង​​ដល់​ទៅ​​៩៧% ​ឱ្យ​តំបន់​​គ្រីមៀ​​ស្ថិតក្រោ​ម​​កាគ្រប់គ្រង​​របស់​រុស្ស៊ី​។​ មិនតែប៉ុណ្ណោះ​ ​នាយករដ្ឋមន្ដ្រី​ក្នុង​ទីក្រុង​​គ្រីមៀ​​ ក៏​បាន​​យល់​ព្រម​​លើប​ញ្ហ​នេះដែរ​។​ ដូច្នេះ​​ការបញ្ចូល​​តំបន់​​គ្រីមៀ​​ជារ​ដ្ឋ​​ចំណុះ​​​រស្ស៊ី ​​ពិតជា​​ត្រឹមត្រូវ​ មិនមែន​​ជា​ការ​រំលោភ​​បំពាន​​យក​ទឹ​ដី​​ឡើយ​។​​

​​សូមបញ្ជាក់​ថា​​ ពីដំបូង​​ឡើយ ​​តំបន់​​គ្រីមៀ​គឺជា​ទឹកដី​​របស់​រុស្ស៊ី​ ប៉ុន្ដែ​​​មេដឹក​នាំ​សូ​វៀតជា​ជនជាតិ​អ៊ុ​យក្រែន​ កាល​ពី​​៦០​ឆ្នាំមុន​ បាន​ដក​​ទឹកដីនេះ​​ចេញ​​ពី​​ក្រោម​​អធិបតេយ្យ​ភាព​រុស្ស៊ី ​​ទៅ​​នៅ​​ក្រោម​​អធិបតេយ្យភាព​​អ៊ុ​យក្រែន​។​ ហេតុដូច្នេះ​ហើយ​ ទើប​​លោក​​ពូ​ទីន ​​រៀបចំ​​ការបោះឆ្នោត​​ប្រជាមតិ​​ដើម្បី​​ទាមទារ​​តំបន់​គ្រីមៀ​ម​ក​ជា​​អធិបតេ​យ្យ​ភាព​​របស់​ខ្លួន​ ក្នុងន័យ​​កែប្រែ​​កំហុស​​ប្រវត្ដិសាស្ដ្រ​​របស់​​ថ្នាក់​​ដឹកនាំ​​រុស្ស៊ី​​កាល​ពីមុន​៕​​(ដោយ៖ពេញ ផេង)​

ប្រធាន​​គ្រប់​គ្រង​​យន្តហោះ​​ម៉ាឡេស៊ី​ ​រង​ការរិះគន់​ពី​​បក្សប្រឆាំង​ ​និង​ប្រជាពលរដ្ឋ​​

​ក្រោយ​​​ពី​ប្រទេស​​២៥​ បាន​​ចូល​រួម​ក្នុង​​ការស្វែង​រក​យន្តហោះ​​ប៊ូ​អ៊ីង​៧៧៧ ​ដែល​បាន​បាត់​អស់​រយៈ​ ពេល​ជាង​មួយ​សប្ដាហ៍​មក ​ក្រុម​អ្នកស្រាវជ្រាវ​ ​នៅតែ​មិន​ទាន់​រក​ឃើញ​យន្តហោះ​ដ​ដែល​។​ ​ទន្ទឹម​គ្នា​នេះ​​សហរដ្ឋអាមេរិក​ ក៏​បាន​ដក​នាវា​ជើង​ទឹក​ដែល​ស្វែង​រក​យន្ត​ហោះ​​ ​ចេញពី​សមុទ្រ​ឥណ្ឌា​វិញ​ហើយ​ដែរ​។​ មូលហេតុ ​ដែល​សហរដ្ឋអាមេរិក​ ដក​នាវា​ជើង​ទឹក នោះ​នៅ​មិនទាន់​ដឹង​អំពី​មូលហេតុ​ឱ្យបាន​ច្បាស់​នៅឡើយ​។​

​ស្របពេល​​ដែល​យន្តហោះ​ប៊ូ​អ៊ីង ​នៅ​មិន​ទាន់​​រកឃើញ​​ និង​មាន​ភាពចម្រូងចម្រាស​​​បាន​កើតឡើង​ផង​នោះ​ បក្ស​ប្រឆាំង​ក្នុង​ប្រទេស​ម៉ាឡេស៊ី​ ​ក៏ដូចជា​ប្រជាពលរដ្ឋ ​បាន​រិះគន់​អ្នកគ្រប់គ្រង​​​យន្តហោះ​ម៉ាឡេស៊ីថា​  អសមត្ថភាព​​ក្នុង​ការ​សែ្វង​រក​។ ម្យ៉ាង​​​​​វិញ​​ទៀត​ មេដឹកនាំ​បក្សប្រឆាំង ​ក៏​នឹង​ថ្កោលទោស​ ប្រធាន​ក្រុមហ៊ុន​អាកាសចរណ៍​នោះ​ផងដែរ ​​​ដោយសារតែ​មិន​ទទួល​ខុស​ត្រូវ​ចំពោះ​​​យន្តហោះ​របស់ខ្លួន​។​​

​ដោយ​ឡែក​​ប្រទេស​​ចិន​​បាន​បញ្ជាក់ថា ​ការបាត់​​យន្តហោះ​ប៊ូ​អ៊ីង​​៧៧៧ ​មិន​មាន​ភស្តុតាង​​​ ណា​បញ្ជាក់​ថា​ជាប់​ពាក់ព័ន្ធ​នឹង​ភេ​វរ​កម្ម​នោះទេ ពីព្រោះ​គេ​បាន​សង្កេត​ឃើញ​យន្តហោះ​ខាងលើ​បាន​ចេញដំណើរ​ពី​ទីក្រុង​គូ​ឡា​ឡាំ​ពួរ ឆ្ពោះទៅ​កាន់​ក្រុង​ប៉េកាំង ។​កាលពី​ពេល​ថ្មី​នេះ ប្រព័ន្ធ​ផ្សព្វផ្សាយ​ចិន​បាន​បញ្ជាក់បន្ថែម​ថា អ្នកដំណើរ​ជនជាតិ​ចិន ដែល​នៅ​លើ​យន្ដហោះ មិន​​​ជាប់​ពាក់ព័ន្ធ​នឹង​អំពើ​ភេរវកម្ម ឬក៏​ការ​ប្លន់​យន្ដហោះ​ឡើយ​។​​

​គួររម្លឹកថា ​យន្ដហោះ​ដឹក​អ្នកដំណើរ​ប៊ូ​អ៊ីង​៧៧៧ ​របស់​ម៉ាឡេស៊ី​ផ្ទុក​មនុស្ស​សរុប​២៣៩​នាក់​​ និង​បាន​​បាត់​កាលពី​ថ្ងៃ​សៅរ៍​សប្ដាហ៍​មុន​។ ​​ទាក់ទង​នឹង​មូលហេតុ​នៃ​កា​បាត់​​​យន្ដហោះ​ខាងលើ ​​គេ​នៅ​មិនទាន់​ដឹង​ច្បាស់លាស់​ថា​មកពី​អ្វី​នោះ​ទេ បាន​ត្រឹម​តែ​សន្និដ្ឋានថា​ អាច​ជា​អំពើ​ភេរវកម្ម​ ប្លន់​ជំរិត ​ហើយ​ខ្លះ​យល់​ថា​យន្ដហោះ​បាន​ធ្លាក់​ទៅហើយ​៕​(ដោយៈលាង ធីតា)

ក្រុង​បាង​កក​ បញ្ចប់​​ភាព​​ប្រកាស​អាសន្ន​​ ប៉ុន្ដែ​​ជំនួស​​ដោយ​​ច្បាប់​​ថ្មី​​

ដោយ​សារ​​តែ​​ស្ថាន​ភាព​ធ្ងន់ធ្ងរ​ ពេក​​ក្នុង​អំឡុង​​ពេល​តវ៉ា​របស់​​ក្រុម​បាតុករ ​កាលពី​ចុងឆ្នាំ​២០១៣​​ និង​ដើមឆ្នាំ ២០១៤​នេះ រដ្ឋាភិបាល​​ទីក្រុង​បាងកក ​បាន​សម្រេច​​ដាក់​​ទីក្រុង​បាងកក ​និង​តំបន់​​ដែល​​នៅ​ជុំវិញ​​ទីក្រុង​ស្ថិតក្នុង​ភាព​ប្រកាសអាសន្ន រយៈ​ពេល​៦០​ថ្ងៃ​។ ​ក្នុង​ចន្លោះ​ពេល​​នៃ​​​ការប្រកាស​ដាក់​ទីក្រុង​បាងកក ស្ថិតក្នុង​ភាព​ប្រកាសអាសន្ន ប្រជាពលរដ្ឋ​ទាំងអស់ ត្រូវ​បាន​ហាម​មិនឱ្យ​ធ្វើ​ដំណើរ​ពេលយប់​ផ្ដេសផ្ដាស​ឡើយ​។​​

ប្រសិនបើ​មិន​​គោរព​តាម​បទបញ្ជា​ដែល​បានកំណត់​ អាជ្ញាធរ​មាន​សិទ្ធិ ក្នុងការ​ចាប់​ជន​ដែល​សង្ស័យ​មក​សាកសួរ និង​អាច​ឈាន​ដល់​ការដាក់ទោស​ថែមទៀត​ផង​។​ម្យ៉ាងវិញទៀត  អាជ្ញាធរ​ក៏​បាន​ហាម​មិនឱ្យ​មាន​ការប្រមូលផ្ដុំ​គ្នា​ជា​ក្រុម​ផងដែរ​។​

​នៅ​ថ្ងៃ​ទី​១៨​ខែ​មីនា​នេះ ​រដ្ឋាភិបាល​ថៃ​បានឱ្យដឹងថា ​ទីក្រុង​បាងកក​នឹង​ត្រូវ​បិទ​បញ្ជប់​ការប្រកាស​ដាក់​ទីក្រុង​បាងកក​ជា​ទីក្រុង​​ប្រកាសអាសន្ន​ចាប់ពី​ពេល​ថ្ងៃ​ទី​១៨​ខែ​មីនា​តទៅ​។ ការប្រកាស​បញ្ជប់​ការដាក់​ទីក្រុង​បាងកក​ជា​ទីក្រុង​ប្រកាស​អាសន្ន​​​​ធ្វើឡើង​ បន្ទាប់​ពី​ស្ថានភាព​តវ៉ា ​​ក៏ដូចជា​ស្ថានភាព​ប្រមូលផ្ដុំ​ក្នុង​ប្រទេស​ថៃ​បាន​ល្អប្រសើរ​ជាង​មុន​មួយកម្រិត​។ នេះ​បើ​​តាម​​​​​ការបញ្ជាក់​ពី​មន្ដ្រីជាន់ខ្ពស់​ថៃ ​ប្រាប់​ដល់​ភ្នាក់ងារ​សារព័ត៌មាន​បរទេស AFP ។ ​

​ដោយឡែក​​ បើ​តាម​ការបញ្ជាក់​ពី​អគ្គលេខាធិការ​របស់​ នា​យក​រដ្ឋមន្ដ្រី​បានឱ្យដឹងថា បន្ទាប់​ពី​ប្រកាស​បិទ​​ ការដាក់​ទីក្រុង​បាងកក​ជា​ទីក្រុង​ប្រកាសអាសន្ន​ហើយ និង​មាន​ច្បាប់​ថ្មី​មក​ជំនួស​វិញ ​ គឺ​ច្បាប់​សន្តិសុខ​ផ្ទៃក្នុង ដែល​ច្បាប់​នេះ​នឹង​ចាប់​អនុវត្ដ​ន៍​ពី​ថ្ងៃ​ទី​១៩​ខែ​មីនា​រហូត​ដល់​ថ្ងៃ​ទី​៣០​ខែ​មេសា​។​

​សូម​បញ្ជាក់​ឡើងវិញ​ថា​ រដ្ឋាភិបាល​ថៃ​បាន​ប្រកាស​ដាក់​ទីក្រុង​បាងកក ​និង​បណ្ដា​ខេត្ដ​មួយ​ចំនូ​ន​ទៀត​ជាប់​ទីក្រុង​ត្រូវ​ស្ថិតនៅ​ក្នុង​ការប្រកាសអាសន្ន​រយៈពេល​៦០​​ ចាប់តាំងពី​ថ្ងៃ​២២​ខែ​មករា​មក​។​ ការដាក់​ទីក្រុង​បាងកក​ក្នុង​ភាព​ប្រកាស​អាសន្ន​​នេះដែរ ​ត្រូវ​បាន​រដ្ឋាភិបាល​ថៃ បញ្ជាក់​ប្រាប់​ថា​ ដើម្បី​ទប់ទល់​នឹង​ក្រុមបាតុករ​ប្រឆាំង​រដ្ឋាភិបាល​៕(ដោយៈពេញ ផេង)


ក្រុម​នាវិក​ប្រទេស​ចិន​ ចំនួន​៩​នាក់​ បាន​បាត់​ខ្លួន​នៅក្នុង​សមុទ្រ​ជប៉ុន​

សមាជិក​នាវិក ចំនួន​៩​នាក់​បាន​បាត់​ខ្លួន​និង ក្រុម​នាវិក​១១​នាក់​ផ្សេង​ទៀត ត្រូ​បាន​គេ​ជួយ​សង្គ្រោះ​ទាន់ពេលវេលា នៅក្នុង ឧបទ្ទវហេតុ​មួយ នាវា ដឹកទំនិញ របស់​ប្រទេស​ចិន បុក និង​នាវា​ដឹក ទំនិញ​របស់​ក្រុមហ៊ុន   Pegasus ដែលជា​ក្រុមហ៊ុន​មួយ ត្រូវបាន​នាយករដ្ឋមន្ត្រី ប្រទេស​កូរ៉េខាងត្បូង ចុះបញ្ជី អោយមាន​ការធ្វើ​ដំណើរ​តាមផ្លូវ​ទឹក​មួយ​ឆ្លងកាត់​ប្រទេស​ជប៉ុន​។​

ឧ​ប​ទ្ទវ​ហេតុនេះ បាន​កើតឡើង​នៅ​សមុទ្រ​នៃ​ទីក្រុង តូ​ក្យូប្រទេស​ជប៉ុន​កាលពី​ដើម​ថ្ងៃទី​១៨​ខែ​មីនា​។ ​នេះ​បើ​តាម​ការបញ្ជាក់​ឲ្យដឹងពី មន្ត្រី​ឆ្មាំ​សមុទ្រ​របស់​ប្រទេស​ជប៉ុន​។ ម​ន្ត្រី​ឆ្មាំ​សមុទ្រ​​របស់​​ប្រទេស​ជប៉ុន​ដដែល​បាន​ប្រាប់ឲ្យដឹង​ថា​នាវា​របស់​ប្រទេស​ចិន បាន​ផ្ទុកទំនិញ​សុទ្ធតែ​ជា​គ្រឿង​ដែក និង​មាន​ទំងន់​១២,៦៣០​តោន​។​ ចំណែក​នាវា​របស់​ក្រុមហ៊ុន​Pegasus​វិញ​ បាន​ផ្ទុក​ទំនិញ​មាន​ទំងន់ ៧ ,៤០៦ តោន​។​យោងតាម​ប្រភព​ដែល​ឃើញ​ហេតុការណ៍​នោះ បាន​ប្រាប់​ឲ្យដឹង​ដែរថា វា​ដូចជា​មិន​ទំនង​សោះ ដែល​នាវា​ទាំងពីរ​អាច​បុក​គ្នា​បាន នេះ​បើ​តាម​សម្តី​មន្ត្រី​ឆ្មាំ​សមុទ្រ​ជប៉ុន​បាន​អះអាង​។​គួរកត់សំគាល់​ថា ចំនួន​សមាជិក នាវិក​ទាំងអស់នោះ គឺ​មាន​ចំនួន​២០​នាក់​។​

​សូមបញ្ជាក់​ថា ក្រុម​នាវា​ល្បាត និង​ឧទ្ធម្ភាគចក្រ បាន​កំពុង​បន្ត​ស្វែងរក​ក្រុម​នាវិក​ដែល​បាន​បាត់​ខ្លួន​នៅឡើយ ក្រោយពី​ពួកគេ​បាន​ស្វែងរក អស់​រយៈពេល​ប្រាំ​ម៉ោង បន្ទាប់ពី​ ហេតុ​ការ​ណ៍​ នាវា​ទាំងពីរ​បាន​បុក​គ្នា​។​ទោះជា​យ៉ាងណា មិនទាន់​មាន​ប្រភព​ពី​នាវា​ទាំងពីរ បញ្ជាក់​ឲ្យបាន​ច្បាស់​ថា មាន​មូលហេតុ​អ្វី ឲ្យ​ពិតប្រាកដ​នៅឡើយ​ទេ ទាក់ទង​និង​ឧបទ្ទវហេតុ​នាវា​បុក​​គ្នា​នេះ​៕(អ៊ុន សុខឡា)


លោកពូ​ទីន​​សម្រេច​​ចុះហត្ថលេខា​​ទទួល​ស្គាល់​​តំបន់​​គ្រីមៀ​​ស្របពេល​​ដែល​​ប្រទេស​​លោក​ខាងលិច​​នៅតែ​​បដិសេធ​​

ទោះបីជា​​ប្រទេស​​លោក​ខាងលិច​​រួម​ទាំង​​សហរដ្ឋអាមេរិក​ បាន​​ប្រកាស​​មិន​​ទទួស្គាល់​​លទ្ធផល​​នៃ​ការ​​បោះឆ្នោត​​​កាលពី​​ថ្ងៃ​ទី​១៦​​ខែ​មីនាក្នុង​​តំបន់​គ្រីមៀ​ក៏​ដោយ​ ប៉ុន្តែ​លោក​ពូ​ទីន​​នៅតែ​​មិន​ខ្វល់​​នឹង​​មតិ​ប្រឆាំង​​របស់​​ពួកគេ​ ហើយ​​ថែមទាំង​​បាន​ចុះ​ហត្ថលេខា​​លើ​អនុក្រឹត្យ​​ទទួលស្គាល់​​តំបន់​​គ្រីមៀ​​ជា​​សាធារណ​រដ្ឋ​​មួយ​​របស់​​រុស្ស៊ី​​ថែម​ទៀត​ផង​។​

ការ​ចុះ​ហត្ថលេខា​ទទួល​ស្គាល់​​តំបន់​​ស្វយ័ត​​គ្រីមៀ ​ត្រូវបាន​​លោក​​ពូ​ទីន​​បញ្ជាក់​​ឱ្យដឹង​ថា​ ការ​បោះឆ្នោត​​កាល​ពី​​ថ្ងៃ​ទី​១៦​​ខែ​មីនា​ ជា​ការ​បោះឆ្នោត​​មួយ​​ដែ​ល​​ស្រប​​ទៅ​តាម​​បទដ្ឋាន​​នៃ​ច្បាប់​​អន្ដរជាតិ​និង​​ស្រប​តាម​ច្បាប់​​រដ្ឋធម្មនុញ្ញ​​អង្គការ​សហប្រជាជាតិ​​ផងដែរ​។​

ម្យ៉ាង​វិញ​ទៀត​ លទ្ធផល​​នៃ​​ការបោះ​ឆ្នោត​​គឺ​មាន​​មតិ​​យ៉ាងច្រើន​​លើស​លប់​​ប្រមាណ​​ជាង​៩៦%​ គាំទ្រ​​ឱ្យ​​តំបន់​​​គ្រីមៀ​​​ស្ថិតនៅ​​ក្រោម​​​ការ​​គ្រប់គ្រង​​​របស់​​រុស្ស៊ី​។​​ ដូច្នេះ​​​វា​សាក​​សម​​​ណាស់​​ដែល​​លោក​​សម្រេចចិត្ដ​​ចុះ​ហត្ថលេខា​​ទទួល​ស្គាល់​តំប​ន់​មួយ​នេះ​។​​

ប៉ុន្ដែ​​ទោះ​ជា​​យ៉ាងណាក្ដី​ អាមេរិក​​និង​​ប្រទេស​​លោក​ខាងលិច​​នៅតែ​​មិន​គាំទ្រ​ និង​​ប្រកាស​​ប្រឆាំង​​ដាច់ខាត​​លើ​ការ​ចុះហត្ថលេខា​​ទទួល​ស្គាល់​​តំបន់​​គ្រីមៀ​​ជា​សាធារណ​រដ្ឋ​មួយ​​របស់​​រុស្ស៊ី​។ ​អាមេរិក​​ដែល​​មាន​​លោក​​បា​រ៉ាក់​អូ​បា​ម៉ា​ជា​ប្រធានាធិបតី​ ​បាន​​ប្រឆាំង​​តាំង​ពី​ដើមទី​​ម្លេះ​​ចំពោះ​​លទ្ធផល​​បោះឆ្នោត​ និង​ការ​រៀបចំ​​ការ​បោះឆ្នោត​។​

មិន​តែ​ប៉ុណ្ណោះ​​មុន​​រៀបចំ​​ការបោះឆ្នោត​ អា​មរិ​ក​​និង​រុស្ស៊ី​​បាន​ជួប​​ពិភាក្សា​គ្នា​​ជា​ច្រើន​លើក​​ច្រើនសារ​​មក​​ហើយ​​ដើម្បី​ដោះស្រាយ​​បញ្ហា​​នៅ​តំបន់​​គ្រីមៀ​តែ​មិន​​ទទួល​បាន​​ផ្លែផ្កា​​ឡើយ​។​ ផ្ទុយទៅវិញ​​បែរជា​​ធ្វើឱ្យ​​ប្រទេស​​ទាំង​ពីរ​​មើល​​មុខ​គ្នា​​កាន់តែ​​លែង​ចំ​​ទៅវិញ​។​

សូម​បញ្ជាក់​​ថា​ ដោយ​សារ​​តែ​​បញ្ហា​​នៅ​​តំបន់​​គ្រីមៀ និង​​នៅ​​ទីក្រុង​​គៀវ​​របស់​​អ៊ុ​យក្រែន បាន​​ធ្វើឱ្យ​​ប្រទេស​​មួយ​ចំនួន​​នៅក្នុង​​ពិភពលោក​​មាន​ភាព​ល្អក​កករ​​ជាមួយគ្នា​។​ ជាក់ស្ដែង​​ដូចជា​​អាមេរិក​ និង​​រុស្ស៊ី​​ជាដើម​។ ​ដើម​ឡើយ​​គ្រាន់តែ​​ក្រុម​​ជ្រុលនិយម​​ទាមទារ​​ទម្លាក់​​លោក​​យ៉ានូ​កូវិ​ច​បាន​សម្រេច​ រុស្ស៊ី​​ក៏​ចេញ​មុខ​ភ្លាម​ ដើម្បី​​ការពា​រ​លោក​​យ៉ានូ​កូវិ​ច​​ឱ្យ​នៅ​​រក្សា​​តំណែង​។​

ប៉ុន្ដែ​​ការប៉ុនប៉ង​​របស់​​រុស្ស៊ី​មិន​​ទទួលបាន​​ជោគជ័យ​​ឡើយ​ ព្រោះ​​ក្រុម​​បាតុករ​​ប្រឆាំង​​រដ្ឋាភិបាល​​លោក​​យ៉ានូកូ​វិច ដែល​​គេ​ស្គាល់​ថា​​ជា​​ក្រុម​​ជ្រុលនិយម​​នោះ​ មាន​​ប្រទេស​​លោក​ខាងលិច​​ជា​អ្នកគាំទ្រ។ លើស​ពីនេះទៅទៀត​​ សូម្បីតែ​​ប្រទេស​​មហា​អំណាច​​ក៏​លូក​ដៃ​​ចូល​​ក្នុង​រឿង​​នេះ​ដែរ​។​

បន្ទាប់​ពីនោះ​​មក​ បញ្ហា​​កាន់​តែ​​ចលាចល​រហូតដល់​រុស្ស៊ី​​បញ្ជូន​​កងទ័ព​ជាច្រើន​​នាក់ ចូល​ក្នុ្ងង​​តំបន់​​គ្រី​មៀ​ ដែល​​ជា​​ដែនដី​​ស្វយ័ត​​មួយ​​របស់​​អ៊ុ​យក្រែន​។​ កាលណោះ​​មាន​ប្រតិកម្ម​​យ៉ាងខ្លាំង​​ពី​អាមេរិក​​ផង​ដែរ​ រហូត​​ដល់​​អាមេរិក​​ក៏​បាន​​បញ្ជូន​​យន្ដហោះ​​ចម្បាំង​​របស់​ខ្លួន​​ជាច្រើន​​គ្រឿង​ ចូល​ក្នុង​​ប្រទេស​​ដែល​​នៅ​ជិត​​ព្រំដែន​​អ៊ុយ​ក្រែន​​ថែមទៀត​​ផង​។​

ដូច្នេះ​ តើ​ការ​ប្រកាស​​ចុះ​ហត្ថលេខា​​ទទួល​ស្គាល់​​តំបន់​​គ្រីមៀ​​ជា​សាធារណ​រដ្ឋ​​​មួយ​​របស់​រុស្ស៊ី​ អាច​​ធ្វើឱ្យ​​ប្រទេស​​ដែល​​មិន​​ពេញចិត្ត​​មាន​ប្រតិកម្ម​​ដល់​​កម្រិត​ណា​?​ តើ​​ប្រទេស​​ទាំងនោះ​​នឹង​​មាន​​វិធានការ​យ៉ាងណា​​ទៀត​​ចំពោះ​រុស្ស៊ី​? ​(ដោយ៖ពេញ ផេង)​

សភា​Crimea ប្រកាស​ឯករាជ្យ និង​ចូលរួម​ក្លាយ​ជា​ផ្នែក​មួយ នៃ​ប្រទេស​រុស្ស៊ី​

នៅ​ទី​បំផុត​ទៅ រដ្ឋសភា​Crimea បានប្រកាស​ឯករាជ្យ ចេញពី​ប្រទេស​អ៊ុ​យក្រែន ដើម្បី​ក្លាយជា​ផ្នែក​មួយ នៃ​ប្រទេស​រុស្ស៊ី បន្ទាប់​ពី​ប្រជាជន​Crimea បាន​បោះឆ្នោត កាលពី​ថ្ងៃអាទិត្យ​។ ជា​លទ្ធផល ប្រជាជន​Crimea ៧៦.៧៧​ភាគរយ បាន​បោះ ឆ្នោត​ផ្ដាច់ខ្លួន ចេញពី​អ៊ុ​យក្រែន ទៅ​ភ្ជាប់​ខ្លួន ឬ​ស្ថិត​ក្រោម ការគ្រប់គ្រង របស់​រុស្ស៊ី​វិញ​។

​ជាមួយគ្នានេះ រដ្ឋមន្ត្រី ការបរទេស សហភាព អឺរ៉ុប​បាន យល់ព្រម ដាក់​បំរាម ការ ធ្វើដំណើរ និង​បង្កក​ទ្រព្យសម្បត្ដិ ដើម្បី​ប្រឆាំង​នឹង​មនុស្ស​២១​នាក់ ចំពោះ​វិបត្ដិ​នៅ​អ៊ុ​យក្រែន​។

​លទ្ធផល​បោះឆ្នោត​ប្រជាមតិ ដែល​ប្រជាជន​Crimea ភាគច្រើន បោះឆ្នោត​ចង់​ក្លាយ​ជា​ផ្នែក​មួយ នៃ​ប្រទេស​រុស្ស៊ី ធ្វើ​ប្រទេស​លោកខាងលិច មិន​សប្បាយ​ចិត្ត​ជា​ខ្លាំង​។

ប្រធានាធិបតីអាមេរិក បានអនុម័ត ការដាក់ទណ្ឌកម្ម ប្រឆាំង នឹង មន្រ្ដីរុស្ស៊ី និងមនុស្សផ្សេងទៀត ចំពោះ ការទទួល ខុសត្រូវ ទាក់ទង នឹងស្ថានភាពកាន់តែធ្ងន់ធ្ងរ នៅអ៊ុយក្រែន តំបន់Crimea៕

Vayo FM Song Request