ភាពតានតឹងក្នុងឧបទ្វិបកូរ៉េបានផ្ទុះឡើងសារជាថ្មីម្តងទៀតហើយ បន្ទាប់ពីរប្រទេសកូរ៉េខាងជើងបានប្រកាសថា ខ្លួននឹងបាញ់សាកល្បងគ្រាប់រ៉ុកហ្គែតរយៈចម្ងាយឆ្ងាយនៅចន្លោះថ្ងៃទី១០ និង ថ្ងៃទី២២ ខែធ្នូរនេះ។
ដើម្បីការពារសន្តិសុខនៅក្នុងប្រទេសរបស់ខ្លួន ប្រទេសជប៉ុនបានសម្រេចដាក់ពង្រាយគ្រាប់ម៉ីស៊ីលក៏ដូចជាកងកម្លាំងជាច្រើននៅតាមព្រំដែនជាប់កូរ៉េខាងជើងសម្រាប់ទប់ទល់ជាមួយ នឹង គ្រាប់រ៉ុក្តែត ក្នុងករណីចាំបាញ់មានន័យថាប្រសិន បើគ្រាប់រ៉ុក្តែតរបស់កូរ៉េខាងជើងបំពានចូលក្នុងដែនដីត្រង់ចំណុចណាមួយនោះ ប្រទេសជប៉ុននឹងធ្វើការបាញ់ទំលាក់គ្រាប់រ៉ុក្តែតនោះជាមិនខាន។
លើសពីនោះទៅទៀត ប្រទេសជប៉ុនគ្រោងនឹង ដាក់ពង្រាយនាវា ចម្បាំងនៅព្រំដែនទឹករបស់ខ្លួនផងដែរ។ ការដាក់ពង្រាយនេះ គឺជាពិសេសធ្វើឡើងនៅ លើកោះ Okinawa តែម្តង ព្រោះថាកោះនេះទំនងជាប្រឈមខ្លាំងជាមួយនឹងគ្រាប់រ៉ុក្តែតរបស់កូរ៉េខាងជើង។
ជំនួបជាន់ខ្ពស់រវាងប្រទេស ជប៉ុន និង កូរ៉េខាងជើងដែលគ្រោងនឹងធ្វើឡើងដោយកំរនៅថ្ងៃទី៥ និង៦ ធ្នូរខាងមុខ ត្រូវបានប្រទេសជប៉ុនសម្រេចពន្យាពេល ដោយសារតែគម្រោងបាញ់សាកល្បងគ្រាប់រ៉ុក្កែតរបស់កូរ៉េខាងជើង។
សូមបញ្ជាក់ថា កាលពីថ្ងៃអាទិត្យកូរ៉េខាងជើង ក៏បានប្រាប់ដល់បណ្តាប្រទេសជិតខាង ក្នុងនោះក៏មានប្រទេសជប៉ុន អំពីរយៈចម្ងាយនៃកាំជ្រួចរ៉ុកែ្កតដែលខ្លួនគ្រោងនឹងបាញ់នោះ។
លោក Yoshihiko Noda នាយករដ្ឋមន្ត្រីរបស់ជប៉ុន នៅថ្ងៃចន្ទនេះ បានអំពាវនាវឲ្យបណ្តាប្រទេសផ្សេងៗដូចជា ប្រទេសអាមេរិក ប្រទេសចិន ប្រទេសកូរ៉េខាងត្បូង និង ប្រទេសរុស្ស៊ី ធ្វើការត្រៀមខ្លួនចាត់វិធានការណ៏ផ្សេងៗ ដើម្បីឆ្លើយតបទៅនឹងគម្រោងបាញ់គ្រាប់រ៉ុកហ្គែតរបស់កូរ៉េខាងជើង នាពេលខាងមុខនេះ។
ចំណែកឯប្រទេសចិន ដែលជាប្រទេសមួយ គេស្គាល់យ៉ាងច្បាស់ថា ជាមិត្តដ៏ជិតស្និតជាមួយនឹងកូរ៉េខាងជើងក៏សម្តែងនូវការព្រួយបារម្ភ ចំពោះបញ្ហានេះ ប៉ុន្តែចិនមិនបានបញ្ចេញប្រត្តិកម្មខ្លាំងលើប្រទេសជាមិត្តរបស់ខ្លួនឡើយ តែផ្ទុយទៅវិញប្រទេសមហាអំណាចអាស៊ីមួយនេះ បានជំរុញឲ្យបណ្តាប្រទេសផ្សេងៗធ្វើ ឆ្លើយតបទៅនឹងឥរិយាបទរបស់កូរ៉េខាងជើង ដោយវិធីដែលអាចនាំទៅរកសុខសន្តិភាពនៅក្នុងឧបទ្វិបកូរ៉េវិញ។
គួរបញ្ជាក់ថា ប្រទេសកូរ៉េខាងជើងតែងតែបញ្ជាក់ថា ការបាញ់សាកល្បងគ្រាប់រ៉ុក្តែតនោះ គឺធ្វើឡើងក្នុងន័យសន្តិភាពប៉ុណ្ណោះ ពោល គឺមិនធ្វើឡើងដើម្បីគំរាមដល់សន្តិសុខពិភពលោកនោះឡើយ។ តែយ៉ាងណាក៏ដោយ សហគមន៏អន្តរជាតិមិនអាចជឿលើការអះអាង របស់កូរ៉េខាងជើងទេ។
កាលពីថ្ងៃព្រហស្បត៏កន្លងទៅ ក្រុមព្រឹក្សាសន្តិសុខរបស់អង្គការសហប្រជាតិ បានព្រមានខ្លាំងៗចំពោះប្រទេសកូរ៉េខាងជើងថា មិនឲ្យបាញ់សាកល្បង គ្រាប់រ៉ុក្តែតនោះឡើយ ព្រោះថា នេះគឺជាការរំលោភលើសេចក្តីសម្រេចរបស់ក្រុមព្រឹក្សា សន្តិសុខរបស់អង្គការសហប្រជាជាតិ។
ប្រទេសកូរ៉េខាងជើងក៍ធ្លាប់បាញ់គ្រាប់រ៉ុក្តែតរបស់ខ្លួនផងដែរកាលពីរខែមេសា បើទោះ បីជាមានការ ប្រឆាំងក៍ដោយ តែការបាញ់នៅពេលនោះគឺបរាជ័យ ដោយសារថា គ្រាប់រ៉ុកហ្គែតនោះបានធ្លាក់ចូលទៅក្នុងសមុទ្របន្ទាប់ពីបាញ់បានតែរយៈពេលខ្លី៕ (ដោយ អ៊ុន រស្មី)
