អន្តរជាតិផ្សេងៗ
លោកស្រី ហ្គោល ដាម៊ែរ ជានាយករដ្ឋមន្ត្រីទី៤ របស់ប្រទេសអ៊ីស្រាអ៊ែលនឹងជាមេដឹកនាំស្រីទី៣ នៅលើពិភពលោក។
លោកស្រីចំណាយពេលវេលាសឹងពេញមួយជីវិតរបស់ខ្លួន ដើម្បីចូលរូមក្នុងចលនាបង្កើតរដ្ឋអ៊ីស្រាអ៊ែល។
តាមរយៈការដឹកនាំ និងទឹកចិត្តដ៏មុះមុតស្នេហាជាតិលោកស្រីត្រូវបានគេហៅថា ជាស្ត្រីចិត្តដែក។
ដើម្បីដឹងឲ្យកាន់តែច្បាស់អំពីប្រវត្តិ និងបុគ្គលិកលក្ខណៈជាមេដឹកនាំរបស់លោកស្រី ហ្គោល ដាម៊ែរ សូមស្តាប់អ៊ុន រស្មី។
សំលេងៈ
ម៉ៅ សេទុង គឺជាមនុស្សដ៏មានឥទ្ធិពលបំផុតក្នុងប្រទេសចិន ជាពិសេសគឺការដឹកនាំបក្សកុំម្មុយនីស្តឆ្ពោះទៅរកភាពជោគជ័យយ៉ាងធំធេងក្នុងប្រវត្តិសាស្ត្ររហូតមកទល់នឹងពេលបច្ចុប្បន្ននេះ។
ទ្រឹស្តីម៉ៅនិយមរបស់លោកក៍មានឥទ្ធិពលយ៉ាងខ្លាំងមកលើបណ្តាប្រទេសមូយចំនួននៅក្នុងតំបន់អាស៊ី។ លោក គឺជាអ្នកដែលបង្រួបបង្រួមប្រទេសចិនឲ្យឈរលើគោលការណ៏តែមួយ។
តើម៉ៅសេទុងជាមនុស្សយ៉ាងណានោះសូមស្តាប់ អ៊ុន រស្មី៖
សំលេងៈ
នៅក្នុងនាទីបុគ្គលិកលក្ខណៈមេដឹកនាំពិភពលោកក្នុងសប្តាហ៍នេះ អ៊ុន រស្មី នឹងលើកយកបុគ្គលលោកបារ៉ាក់ អូបាម៉ា។ លោកបារ៉ាក់ អូបាម៉ា គឺជាប្រធានាធិបតីស្បែកខ្មៅដំបូងគេបំផុតរបស់សហរដ្ឋអាមេរិក។
ក្នុងតំណែងជាប្រធានាធិតីអាមេរិកនេះ លោកបានស្តានូវសេដ្ឋកិច្ចរបស់អាមេរិកដែលបានធ្លាក់ចូលក្នុងវិបត្តិយ៉ាងធ្ងន់ធ្ងរនៅក្នុងអាណត្តិទី១របស់។
លោកក៏ ត្រូវបានប្រជាពលរដ្ឋអាមេរិកបោះឆ្នោតជាប្រធានាធិបតីអាណត្តិទី២បន្តទៀតកាលពីពេលថ្មីៗនេះ។
តើលោកបារ៉ាក់ អូបាម៉ា ជាមនុស្សដូចម្តេច? ជាបន្តសូមស្តាប់ អ៊ុន រស្មីៈ
សំលេងៈ
ចំនួនអ្នកគ្មានការងារធ្វើនៅក្នុងតំបន់ចាយប្រាក់អ៊ឺរ៉ូរបស់អ៊ឺរ៉ុបនៅតែកើនឡើងខ្ពស់ជាងមុនដដែល បើទោះបីជាអតិផរណាមានការធ្លាក់ចុះក៏ដោយ។
បើតាមរបាយការណ៏របស់សហភាពអ៊ឺរ៉ុបបានបញ្ជាក់ថា ចំនួនអ្នកគ្មានការងារធ្វើនៅទូទាំង១៧ប្រទេសនៅតំបន់ចាយប្រាក់អ៊ឺរ៉ូមានចំនួន១២.១ភាគរយ នៅខែមីនា ដែលកាលពីរខែកុម្ភៈមានចំនួន១២ភាគយ។
សូមបញ្ជាក់ថា ក្នុងតំបន់ចាយប្រាក់អ៊ឺរ៉ូទាំងមូល មានប្រជាជនប្រមាណ១៩.២ លាននាក់គ្មានការងារធ្វើហើយក្នុងនោះ អ្នកក្រោមអាយុ២៥ឆ្នាំដែលអត់ការងារធ្វើមានចំនួន ៣.៦ លាននាក់។
ចំពោះប្រទេសក្នុងតំបន់អ៊ឺរ៉ុបដែលមានអត្រាអ្នកគ្មានការងារធ្វើច្រើនជាងគេនោះ គឺមានប្រទេសអេស្បាញដែលមានចំនួន២៧.២ភាគរយ និងប្រទេសក្រិកមានចំនួន២៦.៧ ភាគរយ។
ស្របពេលជាមួយគ្នានេះដែរ នាពេលថ្មីៗនេះអតិផរណាក៏មានការធ្លាក់ចុះមកវិញ ពោលគឺពី១.៧ភាគរយ នៅខែមីនាមកត្រឹមតែ១.២ភាគរយនៅខែមេសា។
ទាក់ទងនឹងបញ្ហាទាំងអស់នេះត្រូវបានក្រុមអ្នកវិភាគសេដ្ឋកិច្ចមួយចំនួនសន្និដ្ឋានថា ធនាគាកណ្តាលរបស់សហភាពអ៊ឺរ៉ុបអាចនឹងធ្វើការសម្រេចកាត់បន្ថយអត្រាការប្រាក់របស់ខ្លួនផងដែរ ដើម្បីទប់ទល់ជាមួយនឹងចំនួនអ្នកគ្មានការងារធ្វើយ៉ាងច្រើនបែបនេះ។
គួរបញ្ជាក់ថា ការកើនឡើងនូវចំនួនអ្នកគ្មានការងារធ្វើដ៏ច្រើនបែបនេះ គឺដោយសារតែវិបត្តិសេដ្ឋកិច្ចដ៏ធ្ងន់ធ្ងរបានញាំញីនៅតំបន់អ៊ឺរ៉ុបនៅរយៈពេលប៉ុន្មានឆ្នាំចុងក្រោយនេះ៕
សមយុទ្ធជើងទឹកជើងគោក និង ជើងអាកាសឈ្មោះថា "ឥន្ទ្រីសម្រាលកូន" រយៈពេលពីរខែ ដែលរៀបចំឡើងរួមគ្នារវាងសហរដ្ឋអាមេរិក និងកូរ៉េខាងត្បូងនឹងត្រូវបញ្ចប់ជាស្ថាពរនៅថ្ងៃអង្គារនេះ។
លំហាត់សមយុទ្ធនោះមានការចូលរួមពីទាហានអាមេរិកច្រើនជាង ១០.០០០នាក់ រួមជាមួយទាហានកូរ៉េខាងត្បូងជាច្រើននាក់ទៀត។
គួរកត់សំគាល់ថា នាពេលកន្លងមករដ្ឋាភិបាលក្រុងព្យុងយ៉ាងតែងចាត់ទុកថាសមយុទ្ធរួមគ្នានេះថាជាការហាត់សមសម្រាប់ការឈ្លានពានប៉ុន្តែសម្រាប់ រដ្ឋាភិបាលក្រុងសេអ៊ូល និង វ៉ាស៊ីនតោនិញបានបញ្ជាក់អះអាងថា សមយុទ្ធនេះធ្វើឡើងគ្រាន់តែជាការពង្រឹងសមត្ថភាពយោធានិងការការពារប្រទេសតែប៉ុណ្ណោះ។
បើតាមអះអាងពីអ្នកជំនាញរបស់ខាងកូរ៉េខាងជើង បាននិយាយថាប្រសិនបើសមយុទ្ធយោធារវាងប្រទេសទាំងនោះបានបញ្ចប់ យ៉ាងហោចណាស់នឹងមិនមានការបារម្ភអំពីការប៉ះទង្គិចណាមួយដែលនាំទៅរកសង្គ្រាមទ្រង់ទ្រាយធំឡើយ។
អ្វីដែលគួរឲ្យចាប់អារម្មណ៏នោះគឺថា នៅថ្ងៃទី ៧ ឧសភា ខាងមុខរវាងប្រធានាធិបតីអាមេរិក លោកបារ៉ាក់ អូបាម៉ា និង មេដឹកនាំកូរ៉េខាងត្បូង លោកស្រីផាក ហ្គឹនហេ ដែលចូលកាន់តំណែងក្នុងខែកុម្ភៈនោះ នឹងចូលរួមនៅក្នុង កិច្ចប្រជុំកំពូលដែលរឿបចំធ្វើនៅក្នុងក្រុងវ៉ាស៊ីនតោន។
វត្តមានរបស់ប្រមុខដឹកនាំទាំងពីរនាក់នៅក្នុងកិច្ចប្រជុំនេះ អាចនឹងលើកយកការពិភាក្សាពីទំនាក់ទំនងអន្តរកូរ៉េ។ ប៉ុន្តែបើកូរ៉េខាងជើងមិនអាទទួលយកលទ្ធផលនៃកិច្ចប្រជុំនោះបានទេមានន័យថា ពិភពលោកនឹងនៅតែមានការព្រួយបារម្ភពីការកើតមានសង្គ្រាមដដែល៕
បើយោងតាមក្រសួងសុខាភិបាលកោះតៃវ៉ាន់បានឲ្យដឹងថា វាជាករណីដំបូងហើយដែលមានមនុស្សឆ្លងជម្ងឺផ្តាសាយបក្សីប្រភេទថ្មី H7N9នេះ។
បុរសជនជាតិតៃវ៉ាន់ម្នាក់ ត្រូវបានគេរកឃើញថា មានផ្ទុករោគសញ្ញានៃជម្ងឺផ្តាសាយបក្សប្រភេទH7N9 បន្ទាប់ពីគាត់ទើបតែត្រឡប់ពីប្រទេសចិនវិញបានរយៈពេលបីថ្ងៃប៉ុណ្ណោះ ហើយក៏មានអាការៈគួរឲ្យសង្ស័យតែម្តង។
បុរសនេះកំពុងតែស្ថិតក្នុងស្ថានភាពធ្ងន់ធ្ងរ ហើយក្រុមគ្រូពេទ្យក៏បានដាក់អ្នកជម្ងឺអោយស្ថិតនៅបន្ទប់ឆ្ងាយដាច់ដោយឡែកពីគេ ដើម្បីជៀសវាងការឆ្លងរាលដាលដល់អ្នកដទៃ។
សូមបញ្ជាក់ថា ជម្ងឺនេះដំបូងឡើយបានផ្ទុះឡើងនៅក្នុងប្រទេសចិនដែលនាពេលថ្មីៗនេះ មានជម្ងឺផ្តាសាយបក្សីប្រភេទនេះបានកើតឡើងរហូតដល់ ១០៨ករណី ហើយក្នុងនោះបានបណ្តាលឲ្យមនុស្សស្លាប់ចំនួន ២២នាក់។
ទាក់ទងនិងការប្រយុទ្ធប្រឆាំងជាបន្ទាន់ទៅនឹងជម្ងឺដ៏គួរឲ្យខ្លាចដែលកោះតៃវ៉ាន់ទើបតែមានករណីឆ្លងដំបូងបែបនេះអាជ្ញាធរបានចាត់វិធានការជាបន្ទាន់ផងដែរ។
ជាពិសេសនោះក្រុមអ្នកជំនាញកំពុងត្រួតពិនិត្យនឹងតាមដានមនុស្សចំនួន១៣៩យ៉ាងដិតដល់ជាទីបំផុតដោយសារពួកគេធ្លាប់មានទំនាក់ទំនងផ្សេងៗជាមួយនឹងអ្នកជម្ងឺ។
ហើយក្នុងចំណោមមនុស្សទាំង១៣៩នាក់ នោះក៏រាប់បញ្ចូលទាំងបុគ្គលិកចំនួន១១០នាក់ដែលធ្វើការនៅក្នុងមន្ទីពេទ្យចំនួន៣ផងដែរ។ អាជ្ញាធរកោះតៃវ៉ាន់ក៏បានសម្លាប់មាន់ជាច្រើនក្បាល់ដែលបាននាំចូលមកពីប្រទេសចិនផងដែរ៕(ដោយៈអ៊ុន រស្មី)
សមាជិកសភាជប៉ុនមួយក្រុមដែលមានចំនួន ១៦៨នាក់ នៅថ្ងៃអង្គារនេះបានធ្វើទស្សនកិច្ចនៅតំបន់វិវាទនៃស្តូបចេតិយសម័យសង្គ្រាម យ៉ាស៊ូគូនី ក្នុងទីក្រុងតូក្យូ បើទោះបីជាមានការប្រឆាំងយ៉ាងដាច់ខាតជារឿយៗ ទាមទារឲ្យមេដឹកនាំជប៉ុនបញ្ឈប់ដំណើរទស្សនកិច្ចនេះ ពីសំណាក់ប្រទេសចិន និងកូរ៉េខាងត្បូង យ៉ាងណាក៏ដោយ។
ទស្សនកិច្ចដដែលៗ របស់ជប៉ុនដែលត្រូវបាន ចិននិងកូរ៉េខាងត្បូងចាត់ទុកថាជា ឧក្រិដ្ឋជនសម័យសង្គ្រាម លោកលើកទីពីរត្រូវបានក្រុមអ្នកវិភាគមើលឃើញថា វាបានធ្វើឲ្យចំណងមិត្តភាព រវាងជប៉ុន និងប្រទេសជិតខាង ពោលគឺចិន និងកូរ៉េខាងត្បូងក្លាយទៅជាឧបសគ្គដ៏ធំមួយ និងកាន់តែអាក្រក់ដោយសារតែចិន និងកូរ៉េខាងត្បូង បានទទួលរងនូវការឈឺចាប់យ៉ាងខ្លាំងពីការឈ្លានពានរបស់ជប៉ុននៅអំឡុងសម័យសង្គ្រាមលោកលើកទីពីរ។
ក្នុងអំឡុងពេលែ២៤ម៉ោងប៉ុណ្ណោះ ជំងឺផ្តាសាយបក្សីប្រភេទថ្មី N7H9 បានឆ្លងមកមនុស្សចំនួន០៥ករណី នៅទីក្រុងស៊ីជៀង និងមួយករណីនៅទីក្រុងជៀងស៊ូ។ នេះបើយោងតាមគណៈកម្មាធិការផែនការណ៍គ្រួសារ និងសុខភាពជាតិរបស់ចិន។
យោងតាមរបាយការណ៏ដដែលបានបង្ហាញឲ្យដឹងថា ការវិវត្តន៍ប្រចាំថ្ងៃនៃករណីរបស់ជម្ងឺគ្រុនផ្តាសាយប្រភេទថ្មី N7H9 រហូតមកដល់ពេលនេះមានសរុបចំនួន ១០២ករណី កើតមានក្នុងប្រទេសចិន ហើយក្នុងនោះមានអ្នកជម្ងឺចំនួន ២០នាក់ បានស្លាប់បាត់បង់ជីវិត។
មន្ត្រីចិនបានសំដែងការព្រួយបារម្ភថា ករណីជម្ងឺឆ្លងប្រភេទថ្មី N7H9 នេះ គឺបានប៉ះពាល់ដល់អាយុជីវិតរបស់មនុស្ស ហើយករណីជម្ងឺ N7H9 មិនមានសញ្ញាណាមួយណាដែលបញ្ជាក់ថា ជម្ងឺនេះឆ្លងពីមនុស្សម្នាក់ទៅមនុស្សម្នាក់ទៀតនោះទេ។
យ៉ាងណាក៏ដោយ រហូតមកដល់ពេលនេះ អ្នកជម្ងឺគ្រុនផ្តាសាយ N7H9 ចំនួន ១២នាក់ មានសភាពធូរស្រាល ហើយបានចាកចេញ ពីមន្ទីរពេទ្យ បន្ទាប់ពីទទួលការព្យាបាល ហើយអ្នកជម្ងឺចំនួន ៧០នាក់ផ្សេងទៀត កំពុងទទួលការព្យាបាលនៅមន្ទីរពេទ្យ។
គួរបញ្ជាក់ថា បើយោងតាមយោងតាមគណៈកម្មាធិការផែនការណ៍គ្រួសារ និងសុខភាពជាតិរបស់ចិនបានបង្ហាញថានៅទីក្រុង សៀងហៃ មានអ្នកជំងឺចំនួន ១១នាក់ បានស្លាប់បាត់បង់ជីចិត ក្នុងចំនោម៣៣ករណី ហើយ ២៤ករណីទៀត ក្នុងនោះស្លាប់បីនាក់ នៅខេត្តជៀងស៊ូ ៣៨ករណី។
ក្នុងនោះស្លាប់០៥នាក់ នៅខេត្តស៊ីជៀង ហើយបីករណីក្នុងនោះស្លាប់ម្នាក់ នៅខេត្តអាន់ហ៊ូ ចំណែកទីក្រុងប៉េកាំង មានមួយករណី និងនៅខេត្តហៃណាន់មានបីករណី។ ការវិវត្តន៏យ៉ាងឆាប់រហ័សនៃជំងឺផ្តាសាយបក្សីថ្មីនេះបានកំពុងតែក្លាយជាក្តីព្រួយបារម្ភយ៉ាងខ្លាំងសម្រាប់រដ្ឋាភិបាលចិន៕
លោកស្រី Margaret Thatcher គឺជាអតីតនាយករដ្ឋមន្ត្រីស្ត្រីទីមួយរបស់ប្រទេសអង់គ្លេស ហើយក៏ជាមេដឹកនាំដែលមានឈ្មោះល្បីល្បាញមួយរួមនៅលើពិភពលោកផងដែរ។
លោកស្រីត្រូវបានហៅថា ជាស្ត្រីចិត្តដែក។ លោកស្រី Margaret Thatcher កើតនៅថ្ងៃទី ១៣ខែតុលាក្នុងឆ្នាំ១៩២៥ ក្នុងទីក្រុងGrantham។ គ្រួសាររបស់លោកស្រី គឺជាអ្នកជំនួញ និង ជាអ្នកសកម្មក្នុងសកម្មភាពនយោបាយ។
Margaret Thatcher បានចូលសិក្សានៅសកលវិទ្យាល័យ Oxford ចក្រភពអង់គ្លេសក្នុងឆ្នាំ១៩៤៣ ដោយរើសយកមុខវិជ្ជាគីមី។ តាមរយៈការសិក្សាតាំងពីរថ្នាក់ទាបមករហូតដល់ថ្នាក់ខ្ពស់គេសង្កេតឃើញថា លោកស្រី Margaret Thatcher ជាសិស្សដែលពូកែ និង ខិតខំខ្លាំងខ្លាជាងគេ។
បន្ទាប់មកពោលគឺនៅក្នុងឆ្នាំ១៩៤៦ លោកស្រីត្រូវបានគេបោះឆ្នោតជ្រើសតាំងជាប្រធានសមាគមន៏អភិរក្សនិយមរបស់សកលវិទ្យាល័យ Oxford របស់អង់គ្លេស។ បន្ទាប់ពីរបញ្ចប់ការសិក្សាថ្នាក់បរិញ្ញាប័ត្រគាត់ក៏បានបន្តការសិក្សាថ្នាក់អនុបណ្ឌិតផ្នែកសិល្បះ ហើយបានបញ្ចប់ការសិក្សានៅឆ្នាំ១៩៥០។
ក្រោយពីរបញ្ចប់ការសិក្សាលោកស្រីបានទៅធ្វើជាអ្នកស្រាវជ្រាវផ្នែកគីមី ហើយនាពេលនោះក៏មានទំនាក់ទំនងជាច្រើនជាមួយសមាគមន៏អភិរក្សនិយមនៅតាមតំបន់ផ្សេងៗផងដែរ។
ក្នុងឆ្នាំ១៩៥១ អតីតនាយករដ្ឋមន្ត្រីស្រីរូបនេះបានរៀបការជាមួយនឹងបុរសជាអ្នកជំនួញឈ្មោះថា Denis Thatcher។ ហើយនៅឆ្នាំ១៩៥៣ លោកស្រីមានកូនភ្លោះចំនួនពីរនាក់ គឺឈ្មោះថា Carol និង Mark។ រហូតដល់ ឆ្នាំ ១៩៥៩ Margaret Thatcher បានជាប់ឆ្នោតជាសមាជិកសភាមកពីរគណបក្សអភិរក្សនិយម។
រហូតដល់ឆ្នាំ ១៩៧០ លោក ស្រីបានក្លាយទៅជារដ្ឋមន្ត្រីក្រសួងអប់រំ។ ក្នុងឆ្នាំ១៩៧៩ ប្រទេសអង់គ្លេសមាននាយករដ្ឋមន្ត្រីជាស្ត្រីដំបូងគេ ដែលមេដឹកនាំរូបនោះគឺជាលោកស្រី Margaret Thatcher នោះឯង។ ក្នុងសម័យដែលទើបតែឡើងកាន់អំណាចនោះប្រទេសអង់គ្លេសកំពុងតែប្រឈមនឹងបញ្ហាជាច្រើនដូចជា បញ្ហានយោបាយ សន្តិសុខ និង បញ្ហាសេដ្ឋកិច្ច។
ប៉ុន្តែយ៉ាងណាក៏ដោយ មេដឹកនាំស្រីដំបូងរូបនោះបាននាំឲ្យប្រទេសអង់គ្លេសគេចផុតពីរបញ្ហាជាច្រើន ហើយប្រជាប្រិយភាពក៏បានកើនឡើងយ៉ាងខ្លាំងផងដែរ។ តាមរយៈប្រជាប្រិយភាពដ៏ខ្លាំងខ្លានេះ Margaret Thatcher បានរក្សាតំណែងជានាយករដ្ឋមន្ត្រីរហូតដល់អាណត្តិទី៣។ ហើយគាត់ក៏បានជាប់ឈ្មោះថា ជាអ្នកដឹកនាំដែលកាន់អំណាចបានយូរជាងគេក្នុងប្រទេសអង់គេ្លសនាសតវត្សទី២០ផងដែរ។
រហូតដល់ឆ្នាំ១៩៩០ មានបញ្ហាជាច្រើនក្នុងប្រទេសអង់គ្លេស ហើយក៏ធ្វើឲ្យប្រជាប្រិយភាពរបស់លោកស្រីក៏ថមថយខ្លាំង ហើយនៅថ្ងៃទី១៣ ខែវិច្ឆិការនៅឆ្នាំដដែល Margaret Thatcher បានលាលែងចេញពីដំណែង។
ក្រោយពីរបានលាលែងចេញពីរតំណែងជានាយករដ្ឋមន្ត្រីនៃប្រទេសអង់គ្លេសរួចមក លោក ស្រី និង ស្វាមី បានទិញផ្ទះមួយកន្លែងក្នុងទីក្រុងឡុងន៏ដើម្បីរស់នៅក្នុងជីវិតឯកជនជាមួយនឹងក្រុមគ្រួសារ។ ចាប់ពីឆ្នាំ១៩៩៣ ដល់ឆ្នាំ២០០៣ លោកស្រីបានក្លាយជាអធិការបតីនៅតាមសកលវិទ្យាល័យជាច្រើនរបស់អង់គ្លេស។
រហូតដល់ឆ្នាំ២០០៣ ប្តីរបស់លោកស្រីដែលមានឈ្មោះថា Denis Thatcher បានស្លាប់បាត់បង់ជីវិតដោយសារជម្ងឺមហារីក។ រយៈពេលជាច្រើនឆ្នាំ ចុងក្រោយនេះ Margaret Thatcher បានប្រឈមនឹងបញ្ហាបាត់បង់ការចង់ចាំ និង បញ្ហាសុខភាពផ្សេងៗទៀត ដោយសារតែវ័យជរា។
នៅថ្ងៃទី០៨ ខែមេសា ឆ្នាំ២០១៣ ពោលគឺកាលពីយប់ថ្ងៃច័ន្ទម្សិលម៉ិញ លោកស្រី Margaret Thatcher បានទទួលមរណៈភាពដោយសារជម្ងឺដាច់សរសៃឈាមក្នុងខួរក្បាលក្នុងវ័យ៨៧ឆ្នាំ។ មរណភាពរបស់លោកស្រី Margaret Thatcher បាននាំអោយពិភពលោកមានការសោកស្តាយយ៉ាងខ្លាំង៕(ដោយៈអ៊ុន រស្មី)
អតីតនាយករដ្ឋមន្ត្រីស្ត្រីលើកទី១របស់អង់គ្លេស លោកស្រី ម៉ាហ្គារេត ឌែតឆ័រ បានទទួលមរណភាពហើយ កាលពីល្ងាចថ្ងៃច័ន្ទទី០៨ ខែមេសានេះ ក្នុងវ័យ៨៧ឆ្នាំ ដោយសារជម្ងឺដាច់សរសៃឈាមក្នុងខួរក្បាល រឺជំងឺស្ត្រូក Stroke។
ការបាត់បងវិរនារីចិត្តដែក គឺជារឿងគួរអោយសោកស្តាយបំផុតសម្រាប់ប្រទេសអង់គ្លេស និងពិភពលោកទាំងមូល។
លោកស្រី ម៉ាហ្គារ៉េត ឌែតឆ័រ ជាស្រីទី១ដែលបានក្លាយជានាយករដ្ឋមន្ត្រីអង់គ្លេស ដោយលោកស្រីបានដឹកនាំគណបក្សអភិរក្សនិយម អោយឡើងកាន់អំណាចនៅឆ្នាំ១៩៧០ រហូតដល់ឆ្នាំ១៩៩០។
ប៉ុន្តែក្នុងរយៈពេលប៉ុន្មានឆ្នាំចុងក្រោយនេះ លោកស្រី ម៉ាហ្គារ៉េត ថាច់ឆ័រ កាន់តែមានសុខភាពទន់ខ្សោយដោយសារវ័យចាស់ជរានិងញាំញីដោយជម្ងឺ Stoke ដែលជាប្រភេទជម្ងឺផ្តាច់សរសៃរឈាមក្នុងខួរក្បាល់។
ហើយលោកស្រីបានចូលសម្រាកនៅមន្ទីរពេទ្យអស់រយៈពេលជាច្រើនលើកច្រើនសារដើម្បីព្យាបាលប្រឆាំងនឹងជម្ងឺនេះ។ ប៉ុន្តែយ៉ាងណាក្តីស្ត្រីបេះដូងដែកម្នាក់នេះនៅតែពុំអាចរំដោះជីវិតចេញពីជម្ងឺ Stroke នេះបានឡើយដោយលោកស្រីបានទទួលមរណៈកាលពីល្ងាចថ្ងៃច័ន្ទក្នុងវ័យ៨៧ឆ្នាំ ដោយសារតែដាច់សរសៃ ឈាមក្នុងខួក្បាលដែលហៅជាភាសាអង់គ្លេសថា ជម្ងឺStoke។
លោកស្រីបានទទួលមរណភាពនៅក្នុងសណ្ឌាគារRitz ចំកណ្តាលទីក្រុងLondonនៃចក្រភពអង់គ្លេសដោយបានបន្សល់ទុកនូវការសោកស្តាយយ៉ាងខ្លាំងសម្រាប់ប្រជាជនអង់គ្លេស និងនៅលើពិភពលោកផងដែរ។
ពិធីបុណ្យសពរបស់អតីតនាយករដ្ឋមន្ត្រីអង់គ្លេសរូបនេះ ត្រូវបានគេរំពឹងថា នឹងបន្តរហូតដល់សប្តាហ៍ក្រោយដោយមានយោធាចូលរួមជាកិត្តិយសយ៉ាងច្រើនកុះករនៅក្នុងទីក្រុង London។
គួរបញ្ជាក់ដែរថា ក្រោយពីការស្លាប់របស់លោកស្រី Margaret Thatcher ភ្លាមមេដឹកនាំទូទាំងពិភពលោកបានផ្ងើសារចូលរួមរំលែកទុក្ខនិងបានបញ្ចេញទស្សនៈផ្សេងៗគ្នាដោយលើកតម្កើង និងកោតសរសើរយ៉ាងខ្លាំងចំពោះជីវិតនយោបាយដ៏បិនប្រសព្វរបស់លោកស្រី។
ក្នុងនោះប្រធានាធិបតីអាមេរិកបាលោករ៉ាក់ អូបាម៉ាបានចាត់ទុកលោកស្រី Margaret Thatcher ជាជើងឯកនៃសេរីភាពនិងឯករាជ្យភាព៕(ដោយៈថា ថៃ)
អតីតនាយករដ្ឋមន្ត្រីអង់គ្លេស ម៉ាហ្ការេត ថាច់ឆឺ បានស្លាប់ដោយសារជម្ងឺ ដាច់សរសៃឈាមក្នុងខួរក្បាល កាលពីថ្ងៃចន្ទ ក្នុងវ័យ៨៧ឆ្នាំ។ នេះបើតាមការប្រកាសរបស់អ្នកនាំពាក្យរបស់លោកស្រីកាលពីថ្ងៃចន្ទ។
លោកស្រី ថាច់ឆឺ នាយករដ្ឋមន្ត្រីស្រី្តលើកដំបូងនិងតែមួយរបស់អង់គ្លេសដែលបានផ្លាស់ប្តូរជីវិតរបស់ប្រជាជន និងជាកំពូលនាយករដ្ឋមន្ត្រី ម្នាក់នៅគ្រប់សម័យកាលទាំងអស់។
លោកស្រីបានបូជាខ្លួនដើម្បីធ្វើឲ្យជីវភាពប្រជាជនបានប្រសើរឡើង"។ គួរបញ្ជាក់ថា ម៉ាហ្ការេត ថាច់ ឆឺ ចូលបានកាន់តំណែងនៅអំឡុងឆ្នាំ១៩៧៩ដល់ ១៩៩០។
បើតាមមន្ត្រីរបស់កូរ៉េខាងត្បូងស្ថានភាពនៅតំបន់សេដ្ឋកិច្ចរួម Kaesong មានភាពមិនប្រក្រតីឡើយនៅថ្ងៃពុធនេះដោយសារតែខាងភាគីកូរ៉េខាងជើងមិនអនុញ្ញាតឲ្យកម្មករកូរ៉េខាងត្បូងជាច្រើនរយនាក់ចូលធ្វើការដូចថ្ងៃធម្មតានោះទេ ពោលគឺកម្មករកូរ៉េខាងត្បូងអាចចេញពីរតំបន់នោះបានតែចូលមិនបានឡើយ។
តំបន់សេដ្ឋកិច្ច Kaesongនេះគឺជាតំបន់ដែលបានបង្កើតឡើងកាលពីឆ្នាំ២០០៤ស្ថិតក្នុងទឹកដីរបស់កូរ៉េខាងជើងដែលគេសម្គាល់ថាជានិមិត្ត រូបបង្ហាញពីកិច្ចសហប្រត្តិបត្តិការនៅតាមព្រំដែនរវាងប្រទេសទាំងពីរ។
តំបន់សេដ្ឋកិច្ចនេះ មានរោចក្ររបស់កូរ៉េខាងត្បូងជាង ១០០ ហើយ មានកម្មករដែលជាជនជាតិកូរ៉េខាងជើងជាង ៥ពាន់នាក់ធ្វើការនៅទីនោះ។
ដូច្នេះការមិនឲ្យតំបន់សេដ្ឋកិច្ចនេះអាចបន្តដំណើរការតាមធម្មតាយ៉ាងដូច្នេះ វានឹងប៉ះពាល់ដល់កូរ៉េទាំងពីរពោលគឺ រោងចក្ររបស់កូរ៉េខាងត្បូងនឹងទទួលការខាតបង់ដោយសារមិនអាចបន្តដំណើរការផលិតទំនិញបាន។
ចំណែកកម្មករ ប្រទេសកូរ៉េខាងជើងវិញក៏រងផលប៉ះពាល់យ៉ាងខ្លាំងផងដែរ ព្រោះមានកម្មករជាច្រើនរបស់កូរ៉េខាងជើងនឹងប្រឈមការបាត់បង់ការងារធ្វើ។
កាលពីរថ្ងៃអង្គារ កូរ៉េខាងជើងបានប្រកាសថាខ្លួននឹងចាប់ផ្តើមដំណើរការម៉ាស៊ីនរ៉េអាក់ទ័រនុយក្លេអ៊ែរឡើងវិញ បន្ទាប់ពីការបិទមិនដំណើរការរយៈពេល៥ឆ្នាំ។
លោក John Kerry រដ្ឋមន្ត្រីការបរទេសរបស់អាមេរិកបានចេញមុខប្រកាសភា្លមៗ ដោយបញ្ជាក់ថាអ្វីដែលលោកគីមជុងអ៊ុនកំពុងធ្វើនោះគឺជារឿងដែលមិនអាចទទួលយកបានឡើយព្រោះវាគឺជាការបង្ករឿងនិងជាការបំពានយ៉ាងខ្លាំង ដូច្នេះសហរដ្ឋអាមេរិកចាំបាច់ត្រូវធ្វើអ្វីៗគ្រប់បែបយ៉ាងដើម្បីការពារខ្លួនក៏ដូចជាការពារប្រទេសកូរ៉េខាងត្បូងនិងប្រទេសជប៉ុន ដែលជាសម្ព័នមិត្តរបស់ខ្លួន។
ទាក់ទងនឹងការប្រកាសបន្តដំណើរការម៉ាស៊ីនរ៉េអាក់ទ័រនុយក្លេអ៊ែររបស់កូរ៉េខាងជើងនោះ លោកបាន គីមូនអគ្គលេខាធិការអង្គការសហប្រជាជាតិក៏បានប្រកាសភា្លមៗ ដើម្បីឲ្យមានការបើកកិច្ចចរចារដោយផ្ទាល់ជាមួយនឹងកូរ៉េខាងជើងជុំវិញបញ្ហាទាំងអស់នោះ ហើយថា អាវុធនុយក្លេអ៊ែរគឺមិនមែនជាហ្គេមធម្មតានោះទេ។
ស្របពេលដែលភាពតានតឹងកំពុងតែកើនឡើងខ្លាំងក្នុងឧបទ្វិបកូរ៉េ ប្រទេសចិនក៏កំពុងតែពង្រាយកងទ័ពរបស់ខ្លួនយ៉ាងច្រើននៅតាមតំបន់ជាប់ព្រំដែនកូរ៉េខាងជើងដោយមានទាំងកងរថក្រោះ និង យន្តហោះចម្បាំងផងដែរ។ ចិនអះអាងថា ការធ្វើបែបនេះ គឺដើម្បីត្រៀមការពារខ្លួនក្រែងមានបញ្ហាណាមួយកើតឡើង៕(ដោយៈអ៊ុន រស្មី)
ក្រុមមន្ត្រីបាននិយាយ អាមេរិកបានដាក់ពង្រាយរ៉ាដាដ៏ទំនើប និងបានបញ្ជូននាវាពិឃាតទីពីរ មកកាន់តំបន់ឆ្នេររបស់ជប៉ុន កាលពីថ្ងៃអង្គារទី ២ មេសា ដែលវាមានសមត្ថភាពតាមដានមីស៊ីលកូរ៉េខាងជើង។ នេះបើយោងតាមការឲ្យដឹងពីក្រុមមន្ត្រីអាមេរិក។
រ៉ាដា ដែលមានឈ្មោះថា Sea-Based X-Band Radar (SBX) មានបាឡុងដ៏ធំមួយ បំពាក់នៅលើសំណង់អណ្តូងប្រេងកាតរចនាឡើង ដើម្បីតាមដានមីស៊ីលឆ្លងទ្វីប និងផ្តល់នូវទិន្នន័យទៅកាន់បញ្ជាការដាច់ដោយ ឡែកមួយដែលអាចបាញ់គ្រាប់ស្កាត់។
អ្នកនាំពាក្យមន្ទីរបញ្ចកោណ លោកចច លីតថល បានបញ្ជាក់ថា ការដាក់ពង្រាយប្រព័ន្ធ រ៉ាដា SBX ត្រូវបានកំណត់កាលបរិច្ឆេទរួចហើយ និងមិនពាក់ព័ន្ធជាមួយ ភាពតានតឹងនៅឧបទ្វីបកូរ៉េនោះទេ។
បណ្តាញសារព័ត៌មានឯកជនត្រូវបានបោះពុម្ពផ្សាយជាលើកទីមួយនៅថ្ងៃចន្ទនេះក្នុងប្រទេសមីយ៉ាន់ម៉ាក្នុងរយៈពេលជិត៥០ចុងក្រោយនេះ។ វាគឺជាលទ្ធផលនៃកំណែរទំរង់ដ៏គួរឲ្យកត់សម្គាល់មួយក្នុងការចាក់ចេញពីរបបផ្តាច់ការ។
គួរបញ្ជាក់ថា នាពេលកន្លងមកបណ្តាញសារព័ត៌មានក្នុងប្រទេសមីយ៉ាន់ម៉ាមិនត្រូវបានគេបើកទួលាយនោះទេ ជាពិសេសនោះគឺសារព័ត៌មានឯកជនតែម្តង។
ប្រទេសមីយ៉ាន់ម៉ាដែលគេធ្លាប់ស្គាល់ថា ជាប្រទេសតឹងតែងបំផុតក្នុងវិស័យសារព័ត៌មាននោះបានផ្លាស់ប្តូររបត់ថ្មីតាមរយៈការបើកទូលាយចំពោះវិស័យនេះឡើងវិញ។
ចាប់តាំងពីរដ្ឋាភិបាលមីយ៉ាន់ម៉ា បានប្រកាសធ្វើកំណែរទំរង់ និង បើកសិទ្ធឲ្យសារព័ត៌មានអាចដំណើរការមករហូតមកទល់នឹងពេលនេះ មានបណ្តាញសារព័ត៌មានឯកជនចំនួន១៧ ហើយបានទទួលបានសិទ្ធពីររដ្ឋាភិបាលក្នុងការបោះពុម្ពផ្សាយអត្ថបទរបស់ខ្លួន។
ប៉ុន្តែមានចំនួនតែ៤ស្ថាប័នប៉ុណ្ណោះ ដែលបានត្រៀមខ្លួនរួចរាល់ និង បានចេញផ្សាយជាលើកដំបូងនៅថ្ងៃចន្ទនេះ។ កាលពីមុនរាល់អត្ថបទទាំងអស់ត្រូវបានឆ្លង់កាត់ការត្រូតពិនិត្យពីសំណាក់រដ្ឋាភិបាលមីយ៉ាន់ម៉ាយ៉ាងតឹងតែងបំផុត មុននឹងអាចចេញផ្សាយបាន។
សូមរម្លឹកឡើងវិញថា បណ្តាញសារព័ត៌មានឯកជនក្នុងប្រទេសមីយ៉ាន់ម៉ាទាំងអស់ត្រូវបានរដ្ឋាភិបាលយោធានៃប្រទេសនេះបានបង្ខំឲ្យបិទក្នុងឆ្នាំ១៩៦៤។ ចាប់តាំងពីពេលនោះមកពោល គឺមានរយៈពេលជិត៥០ឆ្នាំមកហើយ ដែលប្រជាជនមិនបានប្រើប្រាស់សារព័ត៌មានសម្រាប់ទទួលបានដំណឹង ឬហេតុផ្សេងៗទាំងក្នុងប្រទេសនិងក្រៅប្រទេស។
ជារឿយរាល់អ្នកសារព័ត៌មានជាច្រើនតែងតែទទួលនូវទោស ក្នុងករណីដែលហានបំពានទៅនឹងច្បាប់របស់រដ្ឋាភិបាលយោធា។ តែប្រទេសមីយ៉ាន់ម៉ា បានកែប្រែមុខមាត់របស់ខ្លួនជាថ្មី ក្រោយកំណែរទំរង់របស់លោក ថេន សេន ប្រធានាធិបតីនៃប្រទេសមីយ៉ាន់ម៉ាដែលឡើងកាន់តំណែងកាលពីឆ្នាំ ២០១១មក។
គួរបញ្ជាក់ថា ក្រោយពេលដែលប្រទេសមីយ៉ាន់ម៉ា បានធ្វើកំណែរទំរងជាច្រើនរួចមកសហគមន៏អន្តរជាតិបានបង្ហាញ់ពីការចាប់អារម្មយ៉ាងខ្លាំងមកលើប្រទេសមួយនេះ។ មិនត្រឹមតែប៉ុណ្ណោះទណ្ឌកម្មសេដ្ឋកិច្ចជាច្រើនត្រូវបានប្រទេសមហាអំណាចបានលុបចោលជាបន្តបន្ទាប់ផងដែរ៕(ដោយៈអ៊ុន រស្មី)
មានវ័យ ៩៤ឆ្នាំ អតីតជាប្រធានាធិបតីនៃប្រទេសអាហ្វ្រិកខាងត្បូង លោក Nelson Mandela បានយល់ព្រមទទូលការព្យាបាលជាថ្មីទៀត ក្រោយពីស្ថានភាពជម្ងឺសួតរបស់លោកមានអការៈធ្ងន់ធ្ងរឡើងវិញ។
វិរៈបុរសប្រឆាំងការប្រកាន់ពណ៌សម្បុរ ពូជសាសន៏ និងជាប្រធានាធិបតីស្បែកខ្មៅដំបូងគេនៅក្នុងប្រទេសប្រទេសអាហ្វ្រិកខាងត្បូងត្រូវបានគេបញ្ជួនទៅសង្គ្រោះនៅមន្ទីពេទ្យចាប់តាំងពីពាក់កណ្តាលយប់ថ្ងៃពុធមកម្លេះ ខណៈដែលលោកត្រូវបានសន្លប់បាត់បង់ស្មារតី។ នេះបើតាមអោយដឹងពីខុទ្ទការល័យរបស់ប្រធានាធបតីអាហ្វ្រិកខាងត្បូងលោក Jacob Zuma។
រហូតមកដល់ពេលនេះ លោក Nelson Mandela កំពុងសម្រាក់ព្យា បាល និងកំពុងតាមដាន់ពីស្ថានភាពជម្ងឺសួតរបស់លោកដោយវេជ្ជបណ្ឌិតជាច្រើន នៅក្នុងមន្ទីពេទ្យ។ គួរកត់សម្គាល់ថា នេះគឺជាលើកទី២ហើយ នូវក្នុងខែនេះដែលលោក Nelson Mandela ត្រូវបានទៅសម្រាក់ព្យាបាល ដើម្បីប្រឆាំងនឹងជម្ងឺសួតរបស់លោក ។
វេជ្ជបណ្ឌិតជាច្រើនកំពុងតែយកចិត្តទុកយ៉ាងខ្លាំងចំពោះសុខភាពរបស់លោក Nelson Mandela ហើយពួកគេ ក៏បានធានាថា មានឱសថដ៏ពិសេសៗបំផុត ដើម្បីព្យាបាល និងធ្វើឲ្យធូស្រាលពីជម្ងឺនោះបាន។ គួរបញ្ជាក់ថា ក្រៅពីបញ្ហាសួតលោក Nelson ក៏មានបញ្ហាគ្រួសក្នុងប្រមាត់ផងដែរ ។
ហើយ កាលពីខែធ្នូរ ឆ្នាំ២០១២ កន្លងទៅលោក Nelson Mandela ក៏បានចូលមន្ទីពេទ្យ ដើម្បីវះកាត់គ្រាប់គ្រួសក្នុងប្រមាត់នោះដែរ។ មានអាយុ ៩២ឆ្នាំ លោកម៉ង់ ដេឡា បាន ទ្រុឌទ្រោម ដោយវ័យចំណាស់របស់លោក និងដោយសារតែលោកបានជាប់ពន្ធនាគាររយៈ ពេល ២៧ឆ្នាំ ។ ក្រោយមកលោក ក៏មិនសូវចេញមុខជាសាធារណៈទៀតដែរ ដោយមានបញ្ហាសួតរាំរ៉ៃនេះឯង ។
គួររំលឹកថា លោក Nelson គឺជាមេដឹកនាំដ៏អស្ចារ្យម្នាក់ ដែលបានចំណាយកម្លាំងកាយចិត្តទាមទារឲ្យមានភាពស្មើគ្នា អំឡុងពេលរដ្ឋាភិបាលស្បែកស គ្រប់គ្រងអាហ្វ្រិកខាងត្បូង។ នៅពេលនោះលោកត្រូវបានរដ្ឋាភិបាលដែលកាន់កាប់ដោយពួកស្បែកសចាប់ដាក់គុក អស់រយៈពេល ២៧ឆ្នាំតែម្តង។
ប្រជាជនអាហ្វ្រិកខាងត្បូងបានចាត់ទុករូបលោកបិតាស្ថាបនិកប្រជាធិបតេយ្យដោយសារតែលោកបានជំរុញចិត្តឲ្យពួកគេងើបឈរតតាំង ដើម្បីលទ្ធិប្រជាធិបតេយ្យ ៕
លោក Jay Carney អ្នកនាំពាក្យរបស់សេតវិមានអាមេរិកបានបញ្ជាក់ថា តាមរយៈការគំរាមទាំងនេះ កូរ៉េខាងជើងនឹងមិនអាចសម្រេចតាមបំណងនោះឡើយតែផ្ទុយទៅវិញប្រទេសនេះ គឺរឹតតែធ្វើឲ្យខ្លួនឯងកាន់តែដាច់ឆ្ងាយពីសហគមន៏អន្តរជាតិ និងកាន់តែបង្កឲ្យមានភាពស្មុគស្មាញខ្លាំងថែមទៀតប៉ុណ្ណោះ។
រីឯអ្នកនាំពាក្យក្រសួងការបរទេសអាមេរិកវិញ គឺលោក Patrick Ventrell បាននិយាយថា បើទោះបីជាកូរ៉េខាងជើងមានសមត្ថភាពដូចការអះអាងរបស់ខ្លួនយ៉ាងណាក៏ដោយ ប៉ុន្តែសហរដ្ឋអាមេរិកមានសមត្ថភាពពេញលេញក្នុងការការពារខ្លួនឯង និងសម្ព័នមិត្តផ្សេងៗទៀតពីការវាយប្រហាររបស់រដ្ឋាភិបាលទីក្រុងព្យុងយ៉ាង។
បើទោះបីជាអាមេរិកបានបង្ហាញប្រាប់ថា ខ្លួនមានសមត្ថភាពគ្រប់គ្រាន់ក្នុងការការពារខ្លួនក៏ដោយតែមិនមែនមានន័យថា អាមេរិកមិនមានការបារម្ភនោះដែរ ព្រោះថាកូរ៉េខាងជើងមិនមែនមានត្រឹមតែកាំភ្លើងធំធម្មតាទេ ពោល គឺកូរ៉េខាងជើងមានទាំងអាវុធនុយក្លេអ៊ែរផងដែរ។
ដូច្នេះហើយទីតាំងមួយចំនួនដែលកូរ៉េខាងជើងធ្លាប់បានគំរាមវាយប្រហារនោះដូចជា រដ្ឋAlaska និងរដ្ឋ California ជាដើម ត្រូវបានអាមេរិកសម្រេចបន្ថែមប្រព័ន្ធការពារគ្រាប់ម៉ីស៊ីលជាច្រើននៅក្នុងខែមិនានេះ។
គួរបញ្ជាក់ថា ស្របពេលភាពតានតឹងក្នុងឧបទ្វិបកូរ៉េហាក់កាន់តែកើនឡើងកំដៅខ្លាំងតាមរយៈការគំរាមរបស់រដ្ឋាភិបាលទីក្រុងព្យុងយ៉ាងនេះ ភ្នាក់ងាររបស់អង្គការសហប្រជាជាតិនាពេលថ្មីៗនេះ បានបញ្ជាក់ថា ប្រជាជន២ភាគ៣ របស់កូរ៉េខាងជើងកំពុងត្រូវការជំនួយស្បៀងអាហារជាចាំបាច់ ព្រោះពួកគេកំពុងតែប្រឈមនឹងការកង្វះអាហារបរិភោគដោយសារតែរដ្ឋាភិបាលប្រទេសនេះមិនសូវយកចិត្តទុកដាក់លើការអភិវឌ្ឍន៏សេដ្ឋកិច្ចប៉ុន្មានទេ។
ពោល គឺផ្តល់អថិភាពទៅលើគ្រឿងសព្វាវុធច្រើនជាង។ ជាការកត់សំគាល់ជារៀងរាល់ឆ្នាំ មានប្រជាជនកូរ៉េខាងជើងជាច្រើនបានស្លាប់ដោយសារតែមិនមានអាហារបរិភោគគ្រប់គ្រាន់៕ អ៊ុន រស្មី
រឿងហេតុដែលវៀតណាមបានចោទប្រកាន់ថានាវារបស់ចិនបានបាញ់ទៅលើទូកនេសាទរបស់ខ្លួននោះ គឺបានកើតឡើងកាលពី២០ខែមិនាមកម្លេះ។ បញ្ហានេះ ក៏បានធ្វើឲ្យមានការតវ៉ាយ៉ាងខ្លាំងពីរដ្ឋាភិបាលក្រុងហាណូយនិងពីសំណាក់ប្រជាជនវៀតណាមទៅលើរដ្ឋាភិបាលចិន ដើម្បីឲ្យបើកការស៊ើបអង្កេតលើករណីនោះ។
រដ្ឋាភិបាលវៀតណាម បានចាត់ទុកសកម្មភាពនោះថា ជាអំពើរដ៏ខុសឆ្គង និង អមនុស្សធម៌ផងដែរ។ រដ្ឋាភិបាលវៀតណាមក៍បានបញ្ជូនកំណត់ទូត ផ្លូវការមួយទៅកាន់ស្ថានទូតរបស់ចិនប្រចាំទីក្រុងហាណូយផងដែរ។ តែយ៉ាងណាដ៏ដោយរហូតមកទល់នឹងពេលនេះមិនទាន់មានការបកស្រាយណាមួយពីរសំណាក់រដ្ឋាភិបាលរបស់ទីក្រុងប៉េកាំងនោះទេ។
គួរបញ្ជាក់ថា ទាំងប្រទេសវៀតណាមនិងប្រទេសចិនបានអះអាងថា កោះParacelដែលស្ថិតនៅសមុទ្រចិនខាងត្បូង គឺជាកម្មសិទ្ធិរបស់គេរៀងៗខ្លួន។ហើយប្រការនេះក៏បានធ្វើឲ្យភាគីទាំងពីរមានភាពតានតឹងជាមួយគ្នាជាញឹកញាប់ផងដែរ។
បញ្ហាជម្លោះដែនកោះនៅសមុទ្រចិនខាងត្បូ មិនមែនមានត្រឹមតែប្រទេសវៀតណាមទេដែលមានភាពតានតឹងជាមួយនឹងប្រទេសចិន ពោលគឺមានប្រទេសជាច្រើនទៀតដូចជា ប្រទេសហ្វីលីពីន ប្រទេសព្រុយណេ ប្រទេសម៉ាឡេស៊ី និងកោះតៃវ៉ាន់ផងដែរ។
ប្រទេសវៀតណាម ហ្វីលីពីន ប្រទេសព្រុយណេ ប្រទេសម៉ាឡេស៊ី និងកោះតៃវ៉ាន់ ដែលមានអាមេរិកនៅពីក្រោយនោះមិនបានបង្ហាញការខ្លបខ្លាចអំណាចរបស់ចិននៅក្នុងដែនជំលោះនេះទេ៕(ដោយៈអ៊ុន រស្មី)
និយតករនៃទូរគមនាគមន៍កូរ៉េខាងត្បូងបាននិយាយថា ពូកអ្នកព័ត៌មានវិទ្យា Hackers បានប្រើប្រាស់អាស័យដ្ឋានជាជនជាតិចិន ដើម្បីបញ្ជូលលេខកូដដែលប្រើប្រាស់វីរូសវាយប្រហារតាមប្រព័ន្ធអ៊ីនធឺណេតទៅលើស្ថាប័នចំនួនប្រាំមួយនៅកូរ៉េខាងត្បូងនោះ រួមជាមួយនឹងបណ្តាញទូរទស្សន៍ និងធនាគាធំៗរបស់កូរ៉េខាងត្បូងផងដែរកាលពីថ្ងៃពុធម្សិលមិញនេះ។
ប៉ុន្តែយ៉ាងណាក្តី ចម្លើយទាំងនេះនៅតែមានស្រពិចស្រពិលនៅឡើយ។ ជាមួយគ្នានេះ មន្ត្រីជាន់ខ្ពស់កូរ៉េខាងត្បូងបាននិយាយថា ករណីនេះពួកគេកំពុងតែបន្តស៊ើបអង្គេតបន្ថែមទៀត ដើម្បីអោយដឹងអំពីប្រភពនៃការវាយប្រហារនេះកាន់តែបានច្បាស់។ ទន្ទឹមគ្នានេះ និយតករទូរគមនាគមន៍ ក៏បាននិយាយទៀតថា ការវាយប្រហារតាមបណ្តាញអ៊ិនធឺណេត ក៏មានការជាប់ពាក់ព័ន្ធជាមួយនឹងប្រទេសកូរ៉េខាងជើងដែរ។
គួរគត់សម្គាល់ថាកាលពីឆ្នាំ២០០៩និង២០១១កូរ៉េខាងត្បូងក៏ធ្លាប់ទទូលរងការវាយប្រហារផ្សេងៗតាមបណ្តាញអ៊ីនធឺណេតនេះដែរ។ អ្នកវិភាគពីសន្តិសុខអ៊ីនធឺណេតនៅក្នុងប្រទេសកូរ៉េខាងត្បូងជឿជាក់ថាពួកមន្ត្រីព័ត៌មានវិទ្យា Hackers នៅកូរ៉េខាងជើងបានរៀនសូត្រយ៉ាងច្រើននូវជំនាញបច្ចេកវិទ្យាកុំព្យួទ័រក្នុងប្រទេសចិន ហើយពួកគេបានបើកប្រតិបត្តិការវាយប្រហារនេះនៅទីនោះតែម្តង។
គួរបញ្ជាក់ថា កាលពីថ្ងៃពុធបណ្តាញទូរទស្សន៍ធំៗជាច្រើនរបស់កូរ៉េខាងត្បូងមានដូចជា ទូរទស្សន៍ KBS MBC និង YTN ព្រមទាំងធនាគារ Shinhan និងធនាគារកសិកម្ម Nonghyu នៅកូរ៉េខាងត្បូងបានទទូលរងការវាយប្រហារតាមប្រព័ន្ធព័ត៌មានវិទ្យា ដោយបណ្តាលអោយដំណើរការក្នុងស្ថាប័នទាំងនោះជួបប្រទះនឹងភាពរអាក់រអួលយ៉ាងខ្លាំង៕(ដោយៈថា ថៃ)
ខ្សែវិដេអូនៃការស្រមើស្រមៃនៃការវាយប្រហារទីក្រុងវ៉ាស៊ីនតោនរបស់អាមេរិកនេះ មានរយៈពេលត្រឹម៤នាទីប៉ុណ្ណោះ ហើយវាត្រូវបានបង្ហោះផ្សព្វផ្សាយតាមប្រព័ន្ធ YouTube នៃវិបសាយរបស់រដ្ឋាភិបាលកូរ៉េខាងជើងដែលហៅថា Uriminzokkiri កាលពីថ្ងៃច័ន្ទម្សិលមិញនេះ។
រូបភាពនៃវីដេអូនោះ បានបង្ហាញពីក្តីសុបិនមួយដោយគ្រាប់មីស៊ីលកូរ៉េខាងជើង ដែលហោះទៅទំលាក់លើអាគាររដ្ឋាភិបាលទីក្រុងវ៉ាស៊ីនតោន សេតវិមាន និងវិមានរដ្ឋសភារបស់អាមេរិក។
ក្នុងរូបភាពវិដេអូក្លីបនោះមានសព្វាវុធជាច្រើនប្រភេទ រូមមានអាវុធបាញ់ប្រហារដោយគ្រាប់កាំភ្លើងធំ និងមីស៊ីលដ៏មានឥទ្ធិពលជាច្រើនបានដាក់បង្ហាញនៅបន្ទាយទាហ៊ានជើងគោក។
ជាការគត់សម្គាល់ក្នុងរយៈ៣នាទីដំបូងរូបភាពវិដេអូនោះបានបង្ហាញពីការកំណត់ប្រវែង ហើយបន្ទាប់មកតម្រង់បាញ់យ៉ាងលឿនស្លុងទៅលើសេតវិមាននិងជាបន្តទៀតបានបាញ់កម្ទេចវិមានរដ្ឋសភា។
ការបញ្ចេញខ្សែរវិដេអូនេះ បានផុសឡើងខណៈដែលស្ថានភាពតានតឹងកំពុងពុះកញ្ជ្រោលយ៉ាងខ្លាំងរវាងទីក្រុងព្យុងយ៉ាង និងទីក្រុងវ៉ាស៊ីនតោន បន្ទាប់ពីក្រុមប្រឹក្សាសន្តិសុខអង្គការសហប្រជាជាតិបានបោះឆ្នោតដាក់ទណ្ឌកម្មទៅលើកូរ៉េខាងជើងតាមរយៈការបាញ់សាកល្បងនុយក្លែអ៊ែជាលើកចុងក្រោយ កាលពីខែមុនកន្លងមក។
បើទោះបីជាយ៉ាងនេះក្តី អ្នកវិភាគ និង មន្ត្រីសហរដ្ឋអាមេរិកបាននិយាយថា ពួកគេពិតជាមិនជឿងនោះឡើយថាកូរ៉េខាងជើង នឹងបាញ់ប្រហារមកលើសហរដ្ឋអាមេរិក។
ប៉ុន្តែចំពោះរដ្ឋមន្ត្រីការពាជាតិអាមេរិកលោក Chuck Hagel បានប្រកាសកាលពីសប្តាហ៍មុនថា ខ្លួនមានផែនការបញ្ជួនសព្វាវុធប្រឆាំងមីស៊ីលទៅកាន់ ឆ្នេរសមុទ្រភាគខាងលិច ដើម្បីការពារទប់ទល់ពីការវាយប្រហាររបស់ប្រទេសកូរ៉េខាងជើង។
គួរបញ្ជាក់ថា នេះមិនមែនជាលើកទីមួយនោះទេ ដែលកូរ៉េខាងជើងបង្ហាញពីខ្សែរវីដេអូនៃការវាយប្រហារទៅលើសហរដ្ឋអាមេរិក។ កាលពីខែមុន វិដេអូមួយក៏ត្រូវបានកូរ៉េខាងជើងបង្ហោះផ្សព្វផ្សាយតាមបណ្តាញ You Tube ផងដែរ។
វិដេអូនោះបានបង្ហាញរូបភាពពីទីក្រុង New York ដែលមានអាគារខ្ពស់ៗ ហើយត្រូវបានកូរ៉េខាងជើងបាញ់អោយឆាប់ឆេះយ៉ាងសន្ធោសន្ធៅ៕(ដោយៈថា ថៃ)
ក្រោយពីការឡើងកាន់ដំណែងជាផ្លូវការជាសម្តេចសង្ឃប៉ាប់នៅទូទាំងពិភពលោកកាលពីថ្ងៃទី១៤ ខែមិនា កន្លងទៅថ្មីៗ នេះគឺជាលើកដំបូងហើយដែលសម្តេចសង្ឃប៉ាប់ថ្មីអង្គនេះឡើងថ្លែងសុន្ទរកថា។
ការលើកថ្លែងសន្ទរកថាដ៏មានអត្ថន័យនោះ មានអ្នកកាន់សាសនាកាតូលិករាប់ពាន់រាប់ម៉ឺននាក់នៅទូទាំងពិភពចូលរួមស្តាប់។ ប្រមុខដឹកនាំថ្មីនៃព្រះវិហារសាសនាកាតូលិក មានឈ្មោះថា FRANCOIS អាយុ៧៦ឆ្នាំ បានថ្លែងនៅចំពោះមុខគ្រឹស្ទបរិស័ទរាប់ម៉ឺននាក់ជាលើកដំបូងថាព្រះអង្គពិតមានហឬទ័យរីករាយយ៉ាងខ្លាំងដែលបានទទូលដំណែងនេះ។
ជាមួយគ្នានោះព្រះអង្គក៏បានយាងចេញមកក្រៅដើម្បីប្រទានពរដល់គ្រឹស្ទបរិស័ទរបស់ទ្រង់ និងដើម្បីចូលរួមអបអរសាទរក្នុងការទទូលបាននៅតំណែងជាសម្តេចសង្ឈប៉ាប់នេះដែរ។
យ៉ាងណាក្តី ពិធីអបអរដ៏ធំបំផុតនឹងត្រូវប្រារព្ធធ្វើឡើងនៅថ្ងៃអង្គារក្នុងទីក្រងរ៉ូម ប្រទេសអ៊ីតាលីដោយមានគ្រឹះបរិស័ទចូលរួមរាប់ម៉ឺននាក់មកពីទូទាំងពិភពលោក។
គួររម្លឹងថា កាលពីពុធទី១៤ ខែមិនាកន្លងទៅសង្ឃប៉ាបមកពីប្រទេសអាហ្សង់ទីនបានក្លាយជាសម្តេចប៉ាបថ្មី ក្រោយការបោះឆ្នោតជ្រើសរើសដោយគណៈមន្ត្រីសង្ឃប៉ាបជាន់ខ្ពស់ចំនួន១១៥អង្គមកពីទូទាំងពិភពលោក។
នេះជាលើកមួយហើយដែលសង្ឃប៉ាបមកពីអាមេរិកឡាទីនក្លាយជាសម្តេចប៉ាបក្នុងរយៈពេល១,២០០ឆ្នាំកន្លងទៅនេះ។ សម្តេចប៉ាបថ្មីនេះ គឺជាជនជាតិអាហ្សង់ទីនមានឈ្មោះដើមថា Jorge Mario Bergoglio មានវ័យ៧៦ឆ្នាំ ដើម្បីធ្វើការបន្តស្នងតំណែងពីសម្តេចសង្ឃ Benôit ទី16 ដែលបានលាលែងចេញពីមុខតំណែងជាប្រវត្តិសាស្ត្រនិងគួរអោយភ្ញាក់ផ្អើលកាលពីថ្ងៃ២៨កុម្ភៈកន្លងទៅ៕(ដោយៈថា ថៃ)
