ក្រុមអ្នករត់ម៉ូតូឌុប និងរត់ម៉ូតូកង់បីដែលជាសមាគមរួមគ្នាដើម្បីអភិវឌ្ឍន៍កម្ពុជាប្រមាណជាង២០០នាក់ បានដាក់លិខិតជូនលោកអំ សំអាត មន្ត្រីជាន់ខ្ពស់អង្គការលីកាដូនៅព្រឹកថ្ងៃទី១២ ខែកញ្ញានេះ។
ដោយនៅក្នុងខ្លឹមសារនៃលិខិត្តនោះពួកគេបានបដិសេធទៅនឹងការលើឡើងរបស់លោកអំ សំអាតក្នុងពេលដែលបានផ្តល់បទសម្ភាសន៍ដល់វិទ្យុអស៊ីសេរី កាលពីថ្ងៃទី៩ ខែកញ្ញាថា ការចាប់ខ្លួនអ្នកបឹងកក់ និងអ្នកបុរីកីឡានេះ គឺជារូបភាពថ្មីមួយដើម្បីបំបាក់ទឹកចិត្តមោះមុតរបស់អ្នកតវ៉ាក្នុងបំណងបង្ខំពួកគេឲ្យទទួលដំណោះស្រាយមិនសមរម្យដែលពួកគេមិនព្រមទទួលនៅពេលកន្លងមក។
ហើយនៅក្នុងលិខិតដដែលនោះបានបន្ថែមទៀតថា លោកអំ សំអាតកំពុងតែបង្វែររឿងករណីអ្នកស្រីយ៉ោម បុប្ផា និងបក្ខពួកពីបទបង្ករបួសស្នាមដោយចេតនាមានស្ថានទម្ងន់ទោសទៅជាករណីទំនាស់ដីធ្លីជាមួយអាជ្ញា ធរនៅតំបន់បឹងកក់ទៅវិញ។
តែយ៉ាងណាកក៏ដោយជុំវិញការលើកឡើងនៅក្នុងខ្លឹមសារនៃលិខិត្តបនេះមន្ត្រីអង្គការលីកាដូមិនទានមានប្រតិកម្មបែបណានៅឡើយនោះទេ។
គួរបញ្ចាក់ថា ក្រុមអ្នកសមាគមរួមគ្នាដើម្បីអភិវឌ្ឍកម្ពុជាបាននាំគ្នាទាមទារឲ្យតុលាការផ្តន្ទាទោសទៅលើស្ត្រីបឹងកក់ឈ្មោះ យ៉ោម បុប្ផា និងស្ត្រីនៅបូរីកីឡាមា្នក់ទៀត ឈ្មោះទឹម សាក់មុន្នី ដោយសំអាងថា ស្ត្រីទាំងពីរនាក់នោះបានញុះញង់ឲ្យប្រព្រឹត្តបទឧក្រិដ្ឋ និងបានព្រួតគ្នាវាយលើបុរសអ្នករត់ម៉ូតូឌុបពីរនាក់ឲ្យរបួសកាលពីថ្ងៃទី៤ ខែកញ្ញា ឆ្នាំ២០១២។
ដោយឡែកក្រុមស្ត្រីបឹងកក់ និងអង្គការសិទ្ធិមនុស្សមួយចំនួនបានច្រានចោលការចោទប្រកាន់ ហើយថាការចាប់ខ្លួនអ្នកស្រីយ៉ោម បុប្ផាគឺ អាជ្ញាធរប្រើប្រាស់ប្រព័ន្ធតុលាការ ដើម្បីគាបសង្កត់ និងបំបាក់ស្មារតីលើស្ត្រីអ្នកតវ៉ាដីធ្លីនៅតំបន់បឹងកក់៕
