ព័ត៌មានជាតិ

​ក្លឹប​អ្នក​កាសែត​​កម្ពុជា​​ចាត់ទុក​ការ​វាយដំ​និង​​ចាប់ខ្លួន​អ្នក​ការ​សែត​​ជា​ការ​គំរាមកំហែង​

  • PDF

​សេចក្តីថ្លែងការណ៍​របស់​ក្លឹប​អ្នកកាសែត​កម្ពុជា​ចុះ​ផ្សាយ​កាលពី​ថ្ងៃ​ទី​១៨ ​ខែ​មេសា​​បានឲ្យដឹងថា ក្លឹប​អ្នកការ​សែត​មាន​ការព្រួយបារម្ភ​យ៉ាងខ្លាំង ចំពោះ​​សិទ្ធ​សេរីភាព​បញ្ចេញមតិ​និង​សុ​វត្តិភាព​របស់​អ្នកការ​សែត បន្ទាប់​ពី​ក្លឹប​អ្នកការ​សែត​កម្ពុជា​(​ក​.​អ​.​ក​)​​បានកត់សម្គាល់​ឃើញ​ថា មួយ​រយៈ​ពេល​​​ចុងក្រោយ​អ្នកសារព័ត៌មាន​បាន​ប្រឈមមុខ​ជាមួយ​សមត្ថកិច្ច ខណៈ​ដែល​ចុះ​បំពេញ​បេសកម្ម​ការងារ​។

​ការ​ព្រួយ​បា​ររ​ម្ភ​របស់​ក្លឹប​អ្នកការ​សែត​នៅពេលនេះ ដោយសារ​តែ​អ្នកយកព័ត៌មាន​ចំនួន​បី​នាក់​ត្រូវបាន​សមត្ថកិច្ច និង​ឈ្មួញ​បាន​ព្រួត​គ្នា​វាយដំ​ហើយ​​ចាប់ខ្លួន​នៅ​ខេត្ត​ចំនួន​បី​គឺ​ខេត្ត​កំ​ពោធិ៍សាត់ ខេត្ត​ព្រះវិហារ​និង​ខេត្ត​កំពង់ចាម​។​

​សេចក្តីថ្លែងការណ៍​ដដែល​ក៍​បាន​បញ្ជាក់​ដែរ​ថា លោកសន មង្គល ជា​អ្នកយក​ព័ត៌មាន​ឲ្យ​កាសែត​កម្ពុជា​ថ្មី​បាន​រងគ្រោះ​យ៉ាង​ដំណំ​ដោយសារ​ត្រូវ​បាន​លោក​ឡាយ សុភាព​​ មេបញ្ជាការរង​កងរាជអាវុធហត្ថ​និង​លោក​គង់ ធារិ​ទ្ធ​ ហៅ​ឆ្លាម ជា​ជំនួយការ​កងរាជអាវុធហត្ថ​ក្រុង​ព្រះវិហារ ខេត្ត​ព្រះវិហារ​បាន​ព្រួត​គ្នា​វាយ​លើ​រូប​លោក​សន មង្គល ខណៈ​រូបលោក​បាន​ថត​រថយន្ត​ម​យ​យ​គ្រឿង ដែល​សង្ស័យ​ថា​មាន​ដឹកឈើ​ក្រញូង​ខុស​ច្បាប់​។​

​ចំណែក​អ្នកសារព័ត៌មាន​របស់​ស្ថានីយ៍​ទូរទស្សន៍ប៉ុស្តិ៍​លេខ​៩​ប្រចាំ​ខេត្ត​ពោធិ៍សាត់ គឺ​លោក ហ៊ិ​ន សាម៉ុន​ត្រូវបាន​សមត្ថកិច្ច​កងរាជអាវុធហត្ថ​ខេត្ត​ពោធិ៍សាត់​បាន​ចាប់ខ្លួន ខណៈ​ដែល​លោក​ហ៊ិ​ន សាម៉ុន​ថត​យក​រូបភាព​នៃ​សកម្មភាព​ឈ្មួញ​ដឹក​ឈើ​ខុសច្បាប់​នៅតាម​ផ្លូវ​។​ ដោ​ឡែក​លោក​សែម បូ​ណា​​អ្នកយក​ព័ត៌មាន​ឲ្យ​កាសែតឆ​ន្ទៈ​ខ្មែរ​ប្រចាំការ​នៅ​ខេត្ត​កំពង់ចាម ក៍​ត្រូវ​ឈ្មួញ​រកស៊ី​ឈើ​ខុសច្បាប់​ព្រួយ​គ្នា​វាយដំ​យ៉ាងដំណំ​ផងដែរ​។​

​ទាក់ទង​នឹង​បញ្ហា​ទាំងនេះ​ក្លឹប​អ្នកកាសែត​កម្ពុជា​សូម​ថ្កោលទោស​សមត្ថកិច្ច និង​ឈ្មួញ​រកស៊ី​ឈើ​ដែល​បាន​វាយដំ​ហើយ​ចាប់ខ្លួន​អ្នកសារ​ព័ត៌​មាន​​​នៅ​ខេត្ត​ចំនួន​បី​ខាងលើ​នេះ​ខណៈ​ពួកគេ​ចុះ​ផ្តិត​យក​រូបភាព​របស់​ឈ្មួញ​រកស៊ី​ឈើ​ខុសច្បាប់​នៅក្នុង​ខេត្ត​ទាំង​បី​នោះ​។​

ចំពោះ​ទង្វើ​នេះ​ក្លឹប​អ្នក​កាសែត​កម្ពុជា​ចាត់ទុកថា​ជា​សកម្មភាព​គំរាមកំហែង​យ៉ាងធ្ងន់ធ្ងរ​ដល់​ស្មារតី និង​​សុ​វត្ថិភាព​​អ្នក​សារ​ព័ត៌មាន​​នៅ​​ពេល​​ដែល​​បំពេញ​​បេសកម្ម​​ការងារ​​តាម​​វិជ្ជាជីវៈ ​និង​ជា​​ចេតនា​​មួយ​ក្នុង​​ការរា​រាំង​​ដល់​ការ​អនុវត្ត​​សិទ្ធិ ​សេរីភាព​​នៃ​ការ​បញ្ចេញមតិ ​និង​ជា​​ការ​បង្អាក់​​ដំណើរ​ការ​នៃ​​ការអនុវត្ត​​លទ្ធិ​ប្រជាធិប​តេយ្យ​​នៅ​កម្ពុជា​៕(ដោយ​​​៖រំដួល ចិ​ត្រា)​

សម្តេចហ៊ុនសែននឹង​បំពេញ​ទស្សនកិច្ច​ក្រៅប្រទេសចាប់ពីថ្ងៃស្អែកតទៅ

  • PDF

​សម្តេច​ហ៊ុន សែន​នឹង​បំពេញ​ទស្សនកិច្ច​ជា​ផ្លូវការ​ប្រទេស​ចំនួន​២ គឺ ប្រទេស​បេឡា​រូ​ស និង ប្រទេស​អា​សែ​បៃ​ហ្ស​ង់ ចាប់ពី​ថ្ងៃ​ទី​២០ ដល់​ថ្ងៃ​ទី​២៦ ខែ​មេសា​។​គួរកត់សំគាល់​ថា ប្រទេស​បេឡា​រូ​ស និង ប្រទេស អា​សែ​បៃ​ហ្ស​ង់ ដែល​ជា​ប្រទេស ២ ស្ថិតនៅ​តំបន់​អឺរ៉ុប និង​ជា​ប្រទេស​ដែល​បាន​បំបែក​ខ្លួន​ចេញពី អតីត​សហភាពសូវៀត​។ ​យោងតាម​សេចក្តីប្រកាស​ព័ត៌មាន របស់​ក្រសួងការបរទេស និង សហប្រតិបត្តិការ​អន្តរជាតិ  ចុះ​ថ្ងៃ​ទី​១១ ខែ​មេសា​បាន​បញ្ជាក់​ឲ្យដឹងថា សម្តេច ហ៊ុន សែន នឹង​អញ្ជើញ​ចាកចេញ​ពី​មាតុភូមិ ទៅកាន់​ប្រទេស​ បេឡា​រូស នៅ​វេលា​ម៉ោង៨ ព្រឹក ថ្ងៃទី​២០  ដល់​ថ្ងៃ​ទី ២២ ខែ​មេសា ចំនែកឯដំណើរ​ទស្សនកិច្ច​ប្រទេស​ទី​ពីរ គឺ​សម្តេច ហ៊ុន សែន និង​គណប្រតិភូ នឹង​អញ្ចើញ​បំពេញ​ទស្សនកិច្ច​ផ្លូវការនៅ​ប្រទេ ស​អា​សែ​បៃ​ហ្ស​ង់ នៅ ទី​២៣ ដល់​ថ្ងៃ​ទី ២៦ ខែ​មេសា ។

​តាម​ការគ្រោងទុក ដំណើរ​ទស្សនកិច្ច នៅ​សាធារណរដ្ឋ​បេឡា​រុស សម្តេច ហ៊ុន សែន នឹង​ជួប​សំដែង​ការគួរសម​ជាមួយ លោក​អា​ឡិច​សាន់​ដឺ​រ ឡូ​កា​សី​ន​កូ ប្រធានាធិបតី នៃ​សាធារ ណរដ្ឋបេឡា​រុស​, លោក អាន់​ណា​តូ​លី រូប៊ី​ន​នូវ៍ ប្រធាន​ក្រុមប្រឹក្សា​រដ្ឋ​សភា និង​ជួបពិភាក្សា​ទ្វេភាគី ជាមួយ​លោក មី​ខាយ មី​យ៉ាស​នី​កូ​វិច នាយករដ្ឋមន្ត្រី​បេឡា​រូ​ស ក្នុងនោះ ប្រទេស​ទាំង​ពីរកម្ពុជា និង​បេឡា​រុស នឹង​ចុះហត្ថលេខា​លើ​ឯកសារ​ចំនួន​៩​។​

​រីឯ ដំណើរ​ទស្សនកិច្ច នៅ​សាធារណរដ្ឋ​អា​ស៊ែ​បៃ​ហ្ស​ង់ សម្តេច ហ៊ុន សែន នឹង​ជួប​សំដែង​ការគួរសម ជាមួយ​លោក អ៊ី​ល​ហាម អា​លី​យេ​វ ប្រធានាធិបតី នៃ​សាធារណរដ្ឋ អា​ស៊ែ​បៃ​ហ្ស​ង់​,លោក អុក​តៃ អា​សាដូវ ប្រធានរដ្ឋសភា និង​ជួបពិភាក្សា ទ្វេភាគី​ជាមួយ លោក អា​ធឺ រ៉ាស៊ី​-​ហ្សា​ដ នាយករដ្ឋមន្ត្រី នៃ​សាធារណរដ្ឋ​អា​ស៊ែ​បៃ​ហ្ស​ង់​។ ក្នុងអំឡុងពេល​ទស្សន​កិច្ចនៅ​សា​ធារ​ណរដ្ឋ​អា​ស៊ែ​បៃ​ហ្ស​ង់ នឹង​មាន​ការចុះហត្ថលេខា​លើ​អនុស្សរណៈ នៃ​ការយោគយល់​គ្នា ស្តីពី​ការ បង្កើត​កិច្ច​ពិគ្រោះ​យោបល់​ទ្វេភាគី​។​

​គួរបញ្ជាក់​ថា ប្រតិភូ​អមដំណើរ​សម្តេច ហ៊ុន សែន រួមមាន លោក​ឧបនាយករដ្ឋមន្ត្រី ហោ ណាំ ហុង រដ្ឋមន្ត្រី​ក្រសួង​ការបរទេស និង​សហប្រតិបត្តិការ​អន្តរជាតិ និង​លោក​ទេសរដ្ឋមន្ត្រី ស៊ុន ចាន់ថុល រដ្ឋមន្ត្រី​ក្រសួង​ពាណិជ្ជកម្ម​កម្ពុជា​និង​គណៈប្រតិភូ​មួយចំនួនទៀត​៕(ដោយៈ ឆេង សូរិយា)


បក្សប្រឆាំង​​ស្នើរ​ទីលាន​​ប្រជាធិបតេយ្យ​​ឬ​សួន​កា​រូ​ឡា​​ដើម្បី​ជួបជុំ​អ្នក​គាំទ្រ​ឃោសនា​​រក​សម្លេង​ឆ្នោត​

  • PDF

ដើម្បី​ជួបជុំ​ជាមួយ​តំណាងរាស្ត្រ​របស់​ខ្លួន​ព្រមទាំង​ប្រជាពលរដ្ឋ​ដែល​គាំទ្រ ក្នុង​ការឃោសនា​រក​សម្លេងឆ្នោត​សម្រាប់ការ​បោះឆ្នោត​ជ្រើសរើស​ក្រុមប្រឹក្សា​រាជធានី​ខេត្ត​ក្រុង​ស្រុក​ខណ្ឌ​អាណត្តិ​ទី​២ ដែល​នឹង​ប្រព្រឹត្តិ​ទៅ​នៅ​ថ្ងៃ​ទី​១៨​ ​ខែ​ឧសភា​ខាងមុខ​នេះ.

គណបក្ស​សង្គ្រោះ​ជាតិ​ដែល​ជា​បក្ស​​ប្រឆាំង​ដ៏​​ធំ​បំផុត​នៅក្នុង​ប្រទេស​កម្ពុជា នៅ​ថ្ងៃ​ទី​១៨​ ខែ​មេសា​​បាន​ចេញ​​នូវ​លិខិត​មួយ​​ច្បាប់​​ផ្ញើ​ជូន​កាន់​អភិ​បាល​រាជធានី​ភ្នំពេញ​លោក​ប៉ា សុជាតិ​​វង្ស ដើម្បី​សុំ​ទីលាន​ប្រជាធិបតេយ្យ​ឬ​ ​សួន​កា​រូ​ឡា​ខាងកើត​ចំហៀង​​ខាងត្បូង​​វត្តបុ​ទុម​វត្តី​​ ដើម្បី​ជួបជុំគ្នា។

នៅក្នុង​លិខិត​ដដែល​នោះ​បក្សប្រឆាំង​បាន​បញ្ជាក់ថា ខ្លួន​នឹង​ហែរ​ក្បូន​យុទ្ឋនាការ​ឃោសនាបោះឆ្នោ​ត​ជ្រើសរើស​ក្រុមប្រឹក្សា​រាជធានី​ខេត្ត​ក្រុង​ស្រុក​​ខណ្ឌ​តាម​ផ្លូវ​នានា​នៅ​ទូរ​ទាំង​រាជធានី​ភ្នំពេញ​ចាប់ពី​ថ្ងៃ​ទី​២ ​ខែ​ឧសភា រហូត​ដល់​ថ្ងៃ​ទី​១៨ ​ខែ​ឧសភា​។​

​យ៉ាងណា​ក៏​ដោយ​សម្រាប់​ការស្នើរ​សុំ​នេះ​សម្រាប់​លោក​ឡុង ឌី​ម៉ង អ្នកនាំពាក្យ​សាលា​រាជធានី​ភ្នំពេញ​បាន​លើកឡើង​ថា សាលា​រាជ​នី​ភ្នំពេញ មិនទាន់​សម្រេច​យ៉ាងណា​នោះទេ ព្រោះ​ថា​សាលាក្រុង​ទើបតែ​បាន​ទទួល​លិខិត ហើយ​លិខិត​នោះ​កំពុងតែ​រៀបចំ​ដាក់​ជួន​អភិបាល​រាជធានី​ភ្នំពេញ​​សម្រេច​។​

លោក​ឡុង ​ឌី​ម៉ង់​៖

Audio clip: Adobe Flash Player (version 9 or above) is required to play this audio clip. Download the latest version here. You also need to have JavaScript enabled in your browser.

​គួរបញ្ជាក់​ថា ការបោះឆ្នោត​ក្រុមប្រឹក្សា​រាជធានី ខេត្ត ក្រុង ស្រុក ខណ្ឌ អណ្ណត្តិ​ទី​២​ឆ្នាំ​២០១៤​ ​នឹង​ត្រូវ​​ប្រព្រឹត្តិ​​ទៅ​នៅ​​ថ្ងៃ​ទី​១៨​​ ឧសភា ឆ្នាំ​២០១៤​។ ចំណែក​យុទ្ធនាការ​ឃោសនា​រក​សម្លេងឆ្នោត​នឹង​ត្រូវចា​ប់​ផ្តើម​នៅ​ថ្ងៃ ទី​២​ឧសភា រហូត​ដល់​ថ្ងៃ​ទី​១៦​​ឧសភា​។

ការបោះឆ្នោត​ក្រុមប្រឹក្សា​រាជធានី ខេត្ត ក្រុង ស្រុក ខណ្ឌ​នេះ​នឹង​ត្រូវ​ធ្វើឡើង​ជា​អសកល ហើយ​មាន​តែ​សមាជិក​ក្រុមប្រឹក្សា​ឃុំ​សង្កាត់​តែ​ប៉ុណ្ណោះ​​ដែល​មាន​​សិទ្ឋិ​​បោះឆ្នោត​​នេះ​៕(ដោយ៖​ឆេង សូរិយា​)​

រាជធានី​ភ្នំពេញ​​ប្រែ​ពី​ស​ភាពស្ងប់ស្ងាត់​មក​អ៊ូអរ​ធម្មតា​វិញ​នៅ​ថ្ងៃ​ទី​១៨​មេសា​

  • PDF

នៅតាម​ចំណតរថយន្ត ស្ទើរ​គ្រប់​ទីកន្លែង នៅក្នុង​រាជធានី​ភ្នំពេញ នា​ព្រឹក​ថ្ងៃទី​១៨​មេសា គឺ​ពោរពេញ​ទៅដោយសំលេង អ៊ូអរ មនុស្ស​កុះករ នៅ​ទីនោះ ពីព្រោះ តែ កន្លែង​នោះ គឺជា ទីតាំងដែល​ប្រជាពលរដ្ឋ កម្មករ កម្មការិនី ធ្វើដំណើរ​មក​ដល់​ទីក្រុង​ភ្នំពេញ​វិញ ក្រោយ​ពី​ពិធី​បុណ្យចូលឆ្នាំ​ខ្មែរ បានបញ្ចប់​។​ ផ្ទុយ​ពី​ស្ថានភាព កាលពី​ប៉ុន្មាន​ថ្ងៃមុន ដែលមើល​ទៅ​រាជ​ធានី​​ភ្នំពេញ ហាក់ដូចជា មាន​មនុស្ស មិន​ប៉ុន្មាន​នាក់ កំពុងស្នាក់នៅ​។​ប៉ុន្តែ ស្ថានភាព​ប្រក្រតី បាន​វិល​ត្រលប់ មក ដូចដើម​វិញ​ហើយ នៅក្នុង​រាជធានី​ភ្នំពេញ​។​

​ត្រលប់​មក​រក​ស្ថានភាព​ធម្មតា​វិញ ដោយសារតែ នៅតាម​ដងផ្លូវ ទីផ្សារ កន្លែង​លក់ដូរ ទំនិញ មួយចំនួន ធំ​ចាប់ផ្តើម​បើក​ដំណើរការ​វិញ ស្របពេល ដែល ប្រជា​ពលរដ្ឋ​ខ្មែរ ជាច្រើន​រយ​នាក់ កំពុងតែ សំរុក​ពី​ស្រុកកំណើត ចូល​ក្នុង​ទីក្រុង​ភ្នំពេញ បំរើ​ការងារ របស់ខ្លួន តាម​ការកំណត់​។​ជា​ការកត់សំគាល់ នៅ​ថ្ងៃ​ទី​១៨​មេសា​នេះ យើង​សង្កេតឃើញថា ក៏​នៅ​មាន​កន្លែង​លក់​ដូរ មួយចំនួន​តូច បន្ត​បិទទ្វារ របស់​ខ្លួន​នៅឡើយ​។

​ស្ថានភាព​បែប​នេះ វា​មិនមែន​ជា​រឿង​ថ្មី​ឡើយ គឺ​ជា​ការកត់សំគាល់ នៅពេលដែល​មាន​ពិធី​បុណ្យទាន​ធំៗ តួយ៉ាង ដូចជា បុណ្យចូលឆ្នាំ​ខ្មែរ បុណ្យ​ភ្ជុំបិណ្ឌ ជាដើម រាជធានី​ភ្នំពេញ គឺ​បាន​ប្រែ​ក្លាយ​ទៅជា ទីក្រុង​មួយ ដែល​ស្ងប់ស្ងាត់​។​តែ​យ៉ាងណាក៏ដោយ ភាពស្ងប់ស្ងាត់​នេះ មិន​បាន​ស្ថិតនៅ​យូរអង្វែង​ឡើយ តែ​ប៉ុន្មនា​ថ្ងៃ​ក្រោយមក រាជធានី​ភ្នំពេញ ក៏​ក្លាយជា ទីក្រុង អ៊ូអរ​វិញ​៕(ដោយៈ ឆេង សូរិយា) 

កិច្ចប្រជុំពេញ​អង្គ​លើកយក​​របៀបវារៈ​​៤​មក​​ពិភាក្សា​

  • PDF

គណៈរដ្ឋមន្ត្រី​កម្ពុជា​នៅ​ថ្ងៃ​ទី​១៨ ខែ​មេសា​នេះ បាន​បើក​សម័យប្រជុំ​ប្រចាំ​សប្តាហ៍​របស់​ខ្លួន​ក្រោម​វត្តមាន​សម្តេច​ហ៊ុន សែន នាយករដ្ឋមន្ត្រី​កម្ពុជា ដើម្បី​ពិភាក្សា​លើ​របៀបវារៈ​ចំនួន​៤​។

កិច្ចប្រជុំពេញអង្គ​ដែល​មាន​របៀបវារៈ​ចំនួន​៤​នោះ​រួមមាន ទី​១-​សេចក្តីព្រាងច្បាប់ ស្តីពី​ការរៀបចំ​អង្គ​តុលា ការ​ទី​២-​សេចក្តីព្រាងច្បាប់ ស្តីពី​ការរៀបចំ និង​ការប្រព្រឹត្តទៅ​នៃ​ឧត្តម​ក្រុមប្រឹក្សា​នៃ​អង្គចៅក្រម​។​

ទី​៣-​សេចក្តីព្រាងច្បាប់​ស្តីពី​លក្ខន្តិកៈ​នៃ​ចៅក្រម និង​ព្រះរាជអាជ្ញា​និង​ ទី​៤-​បញ្ហា​ផ្សេងៗ​៖​​សំណើ​សុំ​ការយល់ព្រម​ពី​គណៈរដ្ឋមន្ត្រី ដើម្បី​សុំ​សច្ចាប័ន​ពី​ស្ថាប័ន​នីតិប្បញ្ញត្តិ លើ​ពិធីសារ​នៃ​វិសោធនកម្ម​លើ​អនុសញ្ញា​អន្តរជាតិ​ស្តីពី​សាមញ្ញក​ម្ម​និង​ការធ្វើ​ឲ្យ​ស៊ីសង្វាក់​នៃ​នីតិវិធី​គយ​៕​(ដោយ៖លាង ធីតា)​

៤៨​​នាក់​​ស្លាប់ ៣០៦​​នាក់​​របួស​​ដោយ​​គ្រោះ​ថ្នាក់​ចរាច​រណ៍​គិត​ពី​ថ្ងៃ​ទី​១៣​​ដល់​១៧​​មេសា

  • PDF

នៅ​ក្នុង​​រយៈពេល ៥ ថ្ងៃ នៃ​ពិធី​បុណ្យចូលឆ្នាំ​ខ្មែរ ចាប់ពី​ថ្ងៃ​ទី​១៣ ដល់​១៧ មេសា​នេះ មាន​គ្រោះថ្នាក់​ចរាចរណ៍​កើតឡើង​១៨៥ លើក​នៅ​ទូទាំង​ប្រទេស កើនឡើង​៣៧ លើក បើ​ប្រៀបធៀប នឹង​រយៈពេល​ដូចគ្នា​ក្នុង​ឆ្នាំ​២០១៣ ដែល មាន ចំនួន ១៤៨​លើក ស្មើនឹង ២៥​ភាគរយ​។​​នេះ​បើ​យោងតាម​របាយការណ៍ របស់​អគ្គស្នងកា​រន​គរ​បាល​ជាតិ​។

​របាយការណ៍ ដដែល​បាន​បង្ហាញថា គ្រោះថ្នាក់​ចរាចរណ៍​នេះ បាន​បណ្តាល​ឲ្យ មនុស្ស​ចំនួន ៤៨ នាក់​បាន​ស្លាប់​បាត់បង់​ជីវិត បើ​ធៀ​នឹង​រយៈពេល​ដូចគ្នា មាន​ការធ្លាក់ចុះ​១៨ នាក់ ស្មើនឹង​២៧​ភាគរយ និង​៤០៦​នាក់​ផ្សេង​ទៀត​រងរបួស​កើនឡើង ចំនួន ១០១​នាក់ ស្មើនឹង ៣៣​ភាគរយ ក្នុងនោះ​របួសធ្ងន់​មាន​ចំនួន ២៥០​នាក់ កើនឡើង ៦៧​នាក់ និង​របួសស្រាល មាន​ចំនួន​១៥៦​នាក់ កើនឡើង​ចំនួន ៣៤​នាក់​។​

​​​​ប្រភព​ដដែល​បាន​បន្តថា មូលហេតុ​ដែល​បង្កឲ្យមាន​គ្រោះ​ថ្នាក់​គឺ ដោយសារ បើក​ល្មើស​ល្បឿន បើកបរ​ក្នុងស្ថានភាព​ស្រវឹង ការបើក​ជែង​គ្នា មិន​គោរព​សិទ្ធ​អទិភាព មិន​ប្រកាន់​ស្តាំ បត់​ឆ្វេង​-​ស្តាំ​មិន​ប្រុងប្រយ័ត្ន កត្តា​យានយន្ត ផ្លូវ និង​ក្តា​ផ្សេងៗ​ជាដើម​។​

​គួរកត់សម្គាល់​ថា ខេត្ត ដែលមាន​គ្រោះថ្នាក់​ចរាចរណ៍​ច្រើនជាងគេ មាន​ចំនួន ៦​ខេត្ត មាន​ខេត្ត​តាកែវ ២១​លើក ស្លាប់ ១​នាក់ របួសធ្ងន់ ស្រាល ៥៨​នាក់​, ខេត្ត​បន្ទាយមានជ័យ ១៩​លើក ស្លាប់ ៤​នាក់ របួស ៤៥​នាក់​, ខេត្ត​បាត់ដំបង ១៤​លើក ស្លាប់ ៤​នាក់ របួស ៣៤​នាក់​, ខេត្ត​កំពង់ចាម ១៤​លើក ស្លាប់ ២​នាក់ របួស ៣៤ នាក់​, ខេត្ត​កំពត ១៣​លើក ស្លាប់ ៣​នាក់ របួស ២៦​នាក់ និង​ខេត្ត​កំពង់ឆ្នាំង ១២​លើក ស្លាប់ ៣​នាក់ របួស​ធ្ងន់​ស្រាល ៣០​នាក់​៕(ដោយៈ​ ឡេង ដេត)

​អ្នកកាសែត​​អាជីព​ជន​ជាតិខ្មែរ​១០​នាក់​​​បើក​​វគ្គ​បណ្តុះ​បណ្តាល​​ជំនាញ​​សារព័ត៌មាន​

  • PDF

​អ្នកកាសែត​អាជីព​ជនជាតិខ្មែរ​ចំនួន​ ១០​នាក់ មក​ពី​ស្ថាប័ន​ចំនួន​១០​​នៅក្នុង​ប្រទេស​កម្ពុជា​នឹងចូលរួម​វគ្គ​បណ្តុះបណ្តាល​ជំនាញ​សារព័ត៌មាន​ស៊ីជម្រៅ​ចំនួន​​១០​ថ្ងៃ នៅក្នុង​ការិយាល័យ​ក្លឹប​អ្នកកាសែត​កម្ពុជា​នៅ​ទីក្រុង​ភ្នំពេញ នា​ព្រឹក​ថ្ងៃទី​១៨​​​មេសា​នេះ។

វគ្គ​បណ្តុះបណ្តាល​នេះ នឹង​អនុញ្ញាត​អោយ​អ្នកកាសែត​ខ្មែរ​អាច​ចែករំលែក​បទពិសោធន៍​របស់ខ្លួន ជាមួយ​អ្នកកាសែត​បរទេស​និង​អនុញ្ញាត​អោយ​​​ពួក​គេ​អាច​ទទួលបាន​បទពិសោធន៍​ថ្មីៗ​​ពី​សាស្ត្រាចារ្យ​សារព័ត៌មាន​ខ្មែរ បារាំង និង​ជនជាតិ​ស្វីស​​ដែល​មាន​​បទ​ពិសោធន៍​​ខ្ពស់​។​

នៅ​ក្នុង​វគ្គ​បណ្តុះបណ្តាល​នោះ មាន​វត្តមាន លោក​ជា ច័ន្ទ​បរិបូរណ៍ រដ្ឋលេខាធិការ នៃ​ក្រសួង​ព័ត៌មាន លោក ប៉ែន សមិទ្ធិ​ប្រធាន​ក្លឹប​អ្នក​កា​សែត​​​កម្ពុជា លោកស្រី​ការ៉ូ​ល វ៉ាន់​​ នាយក​ទីភ្នាក់ងារ​ព័ត៌មាន InfoSud​ ជនជាតិ​ស្វីស លោកប៊ិន សុជាតិ​ តំណាង​អង្គការ​​ស៊ុយអែត​ForumSyd​ជន​ជាតិខ្មែរ លោកស្រី​ហ្វុង​តែ​ន សង់​ដ្រា​ សាស្ត្រាចារ្យ​​សារព័ត៌មាន​​ជនជាតិ​បារាំង លោកស្រី​អាន​ឡ ប៉​រ៉េ​ សាស្ត្រាចារ្យ​សារព័ត៌មាន​​ជនជាតិ​បារាំង និង​លោក​គី សុខ​លីម​ សាស្ត្រាចារ្យ​​សារព័ត៌មាន​​ជនជាតិ​ខ្មែរ​ជា​ដើម​។

​គួរបញ្ជាក់​ថា វគ្គ​បណ្តុះបណ្តាល​នេះ​ធ្វើឡើង​ក្រោម​កិច្ចសហប្រតិបត្តិការ​រវាង​ក្លឹប​អ្នកកាសែត​កម្ពុជា​អង្គការ​ស៊ុយអែត​​ForumSyd​ និង​ទីភ្នាក់​ងារ​សារ​ព័ត៌មាន​ ​InfoSud​ នៃ​ប្រទេស​ស្វីស​៕​(ដោយ៖ឆេង សូរីយា)​


​ក្រសួង​សេដ្ឋកិច្ច ​និង​ហិរញ្ញវត្ថុ​សម្រេច​លុប​ចោល​​កម្រៃ​បែប​​គយ​​លើ​ការនាំ​ចេញ​អង្ករ​​កម្ពុជា​

  • PDF

​យោងតាម​សេចក្តីប្រកាស​ព័ត៌មានរបស់​អគ្គ​នា​យកដ្ឋាន​គយ និង​រដ្ឋាករ​កម្ពុជា​បានឲ្យដឹងថា ក្រសួង​សេដ្ឋកិច្ច និង​ហិរញ្ញវត្ថុ​បានសម្រេច លុប​ចោល​​កម្រៃ​​បែប​គយ​​លើ​ការនាំចេញ​អង្ករ​នៅ​កម្ពុជា ដើម្បី​ជម្រុញ​ប្រសិទ្ធភាព​លើ​កម្ពស់​នៃ​​ការ​នាំ​ចេញ​​អង្ករ​​បន្ថែម​ទៀត ​ស្រប​តាម​​គោល​​នយោ​បាយ​​​​រាជ​រដ្ឋាភិបាល​។​ សេចក្តី​ប្រកាស​​ព័ត៌​មាន​​​ដដែល​​​​បាន​​​បន្ត​ថា ​ការ​សម្រេ​ប​បែប​នេះ​​នឹង​ត្រូវ​​អនុវត្ត​​ចាប់​ពី​ថ្ងៃ​ទី១​ ខែ​ឧសភា​​​ខាងមុខ​​នេះ​​តទៅ​។​

​បើ​តាម​លោក​គឹម សាវុធ ប្រធាន​ក្រុមហ៊ុន​នាំចេញ​អង្ករ​ខ្មែរ​ហ្វូត និង​ជា​ប្រធាន​សម្ព័ន្ធ​អ្នកដឹកនាំ​ចេញ​អង្ករ​កម្ពុជា​បាន​ផ្តល់​បទ​សម្ភាស​ប្រាប់​សា​ព័ត៌​មាន​​ក្នុង​ស្រុក​ថា ការសម្រេចចិត្ត​នេះ គឺធ្វើឡើង​បន្ទាប់​ពី​ការស្នើសុំ​ពី​អ្នក​នាំចេញ​អង្ករ​ជាច្រើន​តាមរយៈ​សម្ព័ន្ធ​អ្នក​នាំ​អង្ករ​ចេញ​កន្លង​មក​​នៅ​​កម្ពុជា ​ដើម្បី​សម្រួល​ដល់​ការនាំចេញ​អង្ករ​កម្ពុជា​។​

​សូមបញ្ជាក់​ថា​នៅក្នុង​រយៈពេល​៣​ខែ​ដើមឆ្នាំ​២០១៤​នេះ​ប្រទេស​កម្ពុជា​បាន​នាំ​អង្គ​ចេញ​ចំនួន​៨៤. ៣៣០​តោន​។ ​ចំនួន​នេះ​បើ​ប្រៀប​បៀ​ប​ទៅ​នឹង​​រយៈពេល​៣​ខែ​​ដើមឆ្នាំ​២០១៣​​គឺ​ មាន​ចំនួន​តិចជាង​។​ ព្រោះថា​នៅ​ក្នុង​រយៈពេល​៣​​ខែ​ដើម ឆ្នាំ​២០១៣​​ កម្ពុជា​បាន​នាំ​អង្គ​ចេញ​​ចំនួន​៩៥.​២២៨​តោន​។​ នេះ​បើ​តាម​របាយការណ៍​របស់​សហព័ន្ធ​អ្នកនាំ​ចេញអង្ករ​កម្ពុ​ជា​៕​(ដោយ៖​​ឡេង ដេត)​

Vayo FM Song Request